Te Kamata ʼo Te ʼu Ako Tohi-Tapu ʼAki Te Tohi Te Ako Mai Te Tohi-Tapu

Tokolahi iā tatou ʼe tou fiafia anai mo kapau ʼe tou lava kamata he ako Tohi-Tapu. ʼE feala ke tokoni mai te tohi foʼou Koteā ʼAē ʼe Akoʼi Moʼoni Mai ʼi Te Tohi-Tapu? Ko te ʼu ʼuluaki palalau ʼi te pasina 3 ki te 7 neʼe fai moʼo kamata ʼaki he fai palalau faka Tohi-Tapu ʼaki te tohi ʼaia. Māʼiape la mo nātou ʼaē ʼe mole faʼa māhani ʼi ki te minisitelio, ʼe faigafua anai hanatou fakaʼaogaʼi te tohi ʼaia moʼo kamata he ʼu ako Tohi-Tapu.

◼ Koutou ʼahiʼahiʼi te puleʼaki ʼaenī ʼe fakatafito ki te pasina 3:

ʼI takotou ʼosi talanoa ki he logo, peʼe ko he fihifihia ʼe palalau kiai te hahaʼi ʼo totatou telituale, koutou fakahā age te ʼu fehuʼi ʼaē ʼe tohi faka mātolu ʼi te pasina 3, pea koutou fehuʼi age peʼe koteā tana manatu. ʼOsi ʼaia, pea koutou fuli age te pasina 4 pea mo te 5.

◼ Peʼe feala hakotou kamata te fai palalau ʼaki te pasina 4 mo te 5:

ʼE feala ke koutou ʼui fēnei: “ ʼE mole lelei anai koa mo kapau ʼe fetogi te maʼuliʼo totatou temi ʼaki te ʼu fetogi ʼaē ʼe hā ʼi te pāki ʼaenī?” Peʼe feala ke koutou fehuʼi fēnei: “Ko te fakapapau fea ʼi te ʼu fakapapau ʼaenī ʼe ke fakaʼamu ke hoko?” Koutou fakalogo lelei ki tana tali.

Kapau ʼe ʼi ai he vaega ʼe fia mahino tāfito kiai, koutou fakahā age kiā ia te meʼa ʼaē ʼe akoʼi mai ʼi te Tohi-Tapu ʼo ʼuhiga mo te faʼahi ʼaia, ʼo koutou vakaʼi te ʼu palakalafe ʼo te tohi ʼaē ʼe palalau ki te vaega ʼaia. (Vakaʼi te fakamatala ʼaē ʼe ʼātakai ʼi te pepa ʼaē neʼe tufa tahi atu mo Te Minisitelio ʼo Te Puleʼaga.) Koutou vakaʼi te ʼu palakalafe ʼaia ohage pe ko hakotou fai he ako Tohi-Tapu. ʼE feala ke fai te faʼahi ʼaia iā minuta e nima peʼe hogofulu, ʼi te ʼuluaki fai palalau ʼi te muʼa matapā.

◼ Ko te tahi faʼahiga fai ko te uga ke ina fakahā mai tana manatu, ʼo tou fakaʼaogaʼi te ʼu manatu ʼaē ʼe tuʼu ʼi te pasina 6:

Koutou fakahā age te ʼu fehuʼi ʼaē ʼe tuʼu ʼi te lalo pasina, pea mo koutou fehuʼi fēnei age: “Neʼe kua ke fai koa ia te ʼu fehuʼi ʼaia?” Kapau ʼe ʼi ai he fehuʼi ʼe fia mahino kiai, koutou fuli age ʼi te tohi te ʼu palakalafe ʼaē ʼe tali ki te fehuʼi ʼaia. (Vakaʼi te fakamatala ʼaē ʼe ʼātakai ʼi te pasina ʼo te pepa ʼaenī ʼe ʼalutahi mo Te Minisitelio ʼo Te Puleʼaga.) ʼI takotou vakaʼi fakatahi ia te ʼu palakalafe, ʼe koutou lolotoga fai ai te ako Tohi-Tapu.

◼ ʼE feala hakotou fakaʼaogaʼi te pasina 7 moʼo fakahā ia te faʼahiga fai ʼo he ako Tohi-Tapu:

Koutou lau te ʼu ʼuluaki laini e tolu ʼo te palakalafe, pea koutou fuli age te kapite 3, ʼo fakahā peʼe feafeaʼi te fai ʼo te ako Tohi-Tapu ʼaki te palakalafe 1 ki te 3. Koutou fakatuʼutuʼu ke koutou toe liliu mai ʼo fai palalau ki te ʼu tali ʼo te ʼu fehuʼi ʼo te palakalafe 3.

◼ Te teuteuʼi ʼo te ʼaʼahi:

ʼI te ʼosi ʼo takotou ʼuluaki fai palalau, koutou fakatuʼutuʼu ke koutou ʼōmai ʼi he tahi ʼaho ʼo hoko atu te fai palalau. ʼE feala hakotou ʼui fēnei: “Lolotoga he ʼu kiʼi minuta, neʼe tā vakaʼi te meʼa ʼaē ʼe akoʼi mai ʼi te Tohi-Tapu ʼo ʼuhiga mo he manatu maʼuhiga. ʼI taku toe liliu mai, ʼe feala ke tā palalau [koutou lagaʼi te fehuʼi ʼaē ka koutou vakaʼi anai]. ʼE ke lotolelei koa ke au toe haʼu ʼi te vāhaʼa ʼaenī ka haʼu, ʼi te hola pe la ʼaenī?”

ʼI tatatou fakaōvi ki te temi ʼaē kua fakakatofa e Sehova, ʼe ina hoko atu tana foaki mai ia te ʼu meʼa gāue ʼaē ʼe ʼaoga moʼo fai ia te gāue. (Mat. 28:​19, 20; 2 Tim. 3:17) Tou fakaʼaogaʼi lelei te tohi foʼou ʼaia moʼo kamata ʼaki he ʼu ako Tohi-Tapu.

[Talanoa ʼo te pasina 3]

He Fai Palalau Ki Te ʼu Vaega ʼi Te Pasina 4 Mo Te 5

◻ Apokalipesi 21:4 (p. 27 mo te 28, pal. 1 ki te 3)

◻ Isaia 33:24; 35:​5, 6 (p. 36, pal. 22)

◻ Soane 5:​28, 29 (p. 72 mo te 73, pal. 17 ki te 19)

◻ Pesalemo 72:16 (p. 34, pal. 19)

Te ʼu Tali Ki Te ʼu Fehuʼi ʼi Te Pasina 6

◻ He koʼe ʼe tou maʼuli mamahi? (p. 108 mo te 109, pal. 6 ki te 8)

◻ Ko ai totatou holaʼaga ʼi te ʼu faigataʼaʼia ʼo te maʼuli? (p. 184 mo te 185, pal. 1 ki te 3)

◻ Koteā ʼaē ʼe tonu ke tou fai ke maʼuli fiafia age totatou famili? (p. 142 mo te 143, pal. 20)

◻ Koteā ʼaē ʼe hoko kiā tatou mokā tou mamate? (p. 58 mo te 59, pal. 5 mo te 6)

◻ ʼE tou toe sisio anai koa ki te kau mate ʼaē neʼe tou ʼoʼofa ai? (p. 72 mo te 73, pal. 17 ki te 19)

◻ He koʼe ʼe tou tui papau ko te ʼAtua ʼe ina fakahoko anai tana ʼu fakapapau ʼo ʼuhiga mo te ka haʼu? (p. 24 mo te 25, pal. 17)