ʼE Kotou Kamata Anai Koa He Ako Tohi-Tapu Lolotoga Te Māhina ʼo ʼOketopeli?
1. Koteā te tufa ʼo te māhina ʼo ʼOketopeli?
1 Ko te tufa ʼo te māhina ʼo ʼOketopeli, ʼe ko Te Tule Leʼo pea mo te Réveillez-vous ! Ke feala hatatou taupau ia te fia logo ʼa te hahaʼi, ʼe fakalotomālohiʼi tātou ke tou tufa te kiʼi pepa lotu ʼE Kotou Fia ʼIloʼi Koa Te Moʼoni? pea tou faigaʼi ke tou kamata he ʼu ako Tohi-Tapu. ʼE feafeaʼi hatatou toe liliu ʼo ʼaʼahi te hahaʼi?
2. Ke tou kamata he ako Tohi-Tapu mokā tou toe liliu ʼo ʼaʼahi he tahi neʼe ina tali te ʼu nusipepa, ʼe feafeaʼi lā hatatou fakaʼaogaʼi te kiʼi pepa lotu ʼE Kotou Fia ʼIloʼi Koa Te Moʼoni?
2 Te Fakaʼaogaʼi ʼo Te Kiʼi Pepa Lotu: ʼE lagi feala ke tou ʼui fēnei: “ ʼI te ʼu nusipepa ʼaē neʼe au tuku atu, ʼe fakalotomālohiʼi ai te hahaʼi ʼo te lanu kehekehe pea mo te lotu kehekehe ke natou vakavakaʼi te Tohi-Tapu. [Kotou fakatoʼo age ki ai te kiʼi pepa lotu ʼE Kotou Fia ʼIloʼi Koa Te Moʼoni?, pea kotou fakahā age te ʼu fehuʼi ʼe lagaʼi ʼi te ʼuluaki pāsina.] Koʼenā he ʼu fehuʼi maʼuhiga ʼe maʼu tona ʼu tali lelei ʼi te Tohi-Tapu. Kua ʼi ai lā he fehuʼi ʼi te ʼu fehuʼi ʼaenā kua ke fai e koe totonu?” ʼI te ʼosi tali mai e ia ʼo te loto fale, kotou vakaʼi fakatahi ʼi te kiʼi pepa lotu te tali ki tana fehuʼi, pea mo lau age he vaega Tohi-Tapu ʼe tuʼu ʼi te kiʼi pepa lotu. Pea kotou fakamahino age ʼe ko he kiʼi koga pē ia ʼo te meʼa ʼaē ʼe akoʼi mai ʼi te Tohi-Tapu, pea kotou fakatoʼo age ki ai te tohi Te Ako Mai Te Tohi-Tapu. ʼE hoki feala ai leva ke tou palalau fakatahi ki te ʼu ʼuluaki palakalafe ʼo he kāpite kua ina filifili mai te tānakiʼaga ʼo te ʼu kupu tāfito. Peʼe feala pē ke tou fuli age te pāsina ʼe lahi ai te fakamahino ʼo te puani ʼaē neʼe tou palalau kiai mai te kiʼi pepa lotu. Koʼenī te ʼu pāsina ʼe feala ke tou fakaʼaogaʼi:
● ʼE tokaga moʼoni koa te ʼAtua kiā tātou? (pp. 9-11, pal. 6-10)
● ʼE gata anai koa ʼi he ʼaho ia te tau mo te mamahi? (p. 12, pal. 12-13)
● Koteā ʼaē ʼe hoko kiā tātou mokā tou mamate? (pp. 59-60, pal. 7-8)
● ʼE ʼi ai koa he ʼamanaki ki te kau mate? (p. 71, pal. 13-15)
● ʼE feafeaʼi koa haku faikole pea ʼe logo mai te ʼAtua? (pp. 166-167, pal. 5-8)
● ʼE feafeaʼi koa haku maʼuli fiafia? (p. 9, pal. 4-5)
3. ʼE feafeaʼi lā hatatou fakaʼalutahi tatatou fai palalau mo te hahaʼi ʼo mulimuli ki te ʼu ʼaluʼaga ʼaē ʼe tou felāveʼi mo ia?
3 ʼE mahino ia, kapau ʼe mole fealagia ke tou kamata pea mo fakahā te faʼahiga fai ʼo te ako Tohi-Tapu ʼi te tohi Te Ako Mai Te Tohi-Tapu ʼi te ʼuluaki ʼaʼahi, ʼe feala pē ke tou fai he ʼu fakatuʼutuʼu ke tou toe liliu ʼo fai te ʼaʼahi pea mo hoko atu tatatou fai palalau. Pea ʼo mulimuli pē ki te fia logo ʼa te hahaʼi, ʼe feala ke tou filifili ke tou palalau ki he tahi ʼu fehuʼi ʼi te kiʼi pepa lotu ʼi muʼa ʼo tatatou fai palalau ʼaki te tohi. ʼOfa pē ke tou fakaʼaogaʼi lelei te kiʼi pepa lotu ʼaoga ʼaia lolotoga te māhina ʼo ʼOketopeli, ke tou kamata ai he ako Tohi-Tapu pea mo tokoni ki te hahaʼi fakamālotoloto ke natou “ ʼiloʼi . . . te moʼoni.”—Soane 8:31, 32.