ʼAtatou Meʼa Gaue Ki Te Faifakamafola
1. He koʼe ʼe fakatatau ia te kau tagata fakamafola evaselio Kilisitiano ki he kau tagata tufuga?
1 Ko he ʼu tagata tufuga ʼe natou fakaʼaogaʼi ia te ʼu faʼahiga meʼa gaue kehekehe. Ko ʼihi meʼa gaue ʼe tahitahiga tanatou fakaʼaogaʼi, kaʼe ʼe natou fakaʼaogaʼi tuʼumaʼu ʼihi meʼa gaue tafitō. ʼE fakaʼaogaʼi tuʼumaʼu e te kau tagata tufuga faiva ia te ʼu meʼa gaue tafitō ʼaia pea ʼe natou fakaʼaogaʼi lelei age ia te ʼu meʼa gaue ʼaia. ʼE fakalotomalohiʼi ʼi te Tohi-Tapu ia te kau Kilisitiano takitokotahi ke natou gaue lelei ʼi te minisitelio pea ke natou hage “ko he tagata . . . ae e mole ufiufi i tana gaue.” (2 Tim. 2:15) Kotea ia te meʼa gaue maʼuhiga ʼae ʼe tou maʼu? ʼE ko te Folafola ʼa te ʼAtua, te meʼa gaue tafitō ʼe tou fakaʼaogaʼi moʼo “fai ni tisipulo.” (Mat. 28:19, 20) Koia, ʼe tonu ke tou faiga ke tou liliu ʼo faiva ʼi te “ave fakahagatotonu te folafola o te mooni.” Kaʼe, ʼe ʼi ai ʼihi meʼa gaue ʼe tou tau fakaʼaogaʼi. Pea ʼe tonu anai ki te kau Kilisitiano fuli ke natou ako ke natou fakaʼaogaʼi lelei.—Taag. 22:29.
2. Kotea ʼatatou meʼa gaue tafitō ki te fai ako?
2 ʼAtatou Meʼa Gaue Tafitō Ki Te Fai Ako: Kotea te tahi ʼu meʼa gaue ʼe tonu ke tou fakaʼaogaʼi? Ko te ʼuluaki meʼa gaue ʼe tou maʼu moʼo akoʼi te ʼu moʼoni Fakatohi-tapu ʼe ko te tohi “Koteā ʼAē ʼe Akoʼi Moʼoni Mai ʼi Te Tohi-Tapu?” Hili tatatou ako katoa ia te tohi ʼaia mo ia ʼae ʼe ako, ʼe tou fakaʼaogaʼi anai te tohi “Kotou Haga Nonofo ʼi Te ʼOfa ʼo Te ʼAtua” moʼo akoʼi kia ia ke ina maʼuliʼi te ʼu pelesepeto Fakatohi-tapu ʼi tona maʼuli ʼae ʼi te ʼaho fuli. Koia, ʼe tonu ke tou faiva ʼi te fakaʼaogaʼi ʼo te ʼu tohi ʼaia ʼe lua. ʼE ʼi ai ʼihi kaupepa ʼe toe kau ki ʼatatou meʼa gaue. Ko te kaupepa Te ʼu Logo Lelei Mai Te ʼAtua ʼe ko he tahi meʼa gaue tafitō ʼaia moʼo kamata he ʼu ako Tohi-Tapu. Kapau ʼe tou maʼu ʼi ʼatatou telituale he ʼu hahaʼi ʼe mole popoto lelei ʼi te lautohi peʼe natou palalau ʼi he lea kua fakaliliu ki ai ʼihi tohi peʼe mole maʼu ʼi tanatou lea, ʼe feala ke tou toe fakaʼaogaʼi ia te kaupepa Tou Fakalogo Ki Te ’Atua Pea Ke Tou Mā’u’uli ’o He’egata. Ko te tahi meʼa gaue tafitō moʼo taki te kau ako ki te kautahi ʼe ko te kaupepa Ko Ai ʼe Ina Fai Te Finegalo ʼo Sehova Iā ʼAho Nei? Ko ʼihi ʼata viteo ʼe feala ke tokoni ki te fai ʼo ni tisipulo, ohage la He Ko ʼe ʼe Lelei Ke Ke Ako Te Tohi-Tapu?, Kotea ʼAe ʼe Fai ʼi Te ʼu Fale Fono? pea ʼE ʼi Ai Koa He Higoa ʼo Te ʼAtua? ʼE tonu ke tou toe ako ke tou fakaʼaogaʼi lelei ia te ʼu meʼa gaue ʼaia.
3. ʼE tokoni feafeaʼi mai anai te ʼu alatike foʼou ʼo Te Minisitelio ʼo Te Puleʼaga?
3 ʼE tokoni mai anai te ʼu alatike foʼou ʼi Te Minisitelio ʼo Te Puleʼaga ke tou faiva ʼi te fakaʼaogaʼi ʼo te ʼu meʼa gaue tafitō ki te fai ako. ʼI tatatou faiga ʼae ke tou fakaʼaogaʼi lelei te ʼu meʼa gaue ʼaia, ʼe tou fakalogo ai anai ki te tokoni ʼaeni neʼe fai e Paulo kia Timoteo: “Ke ke tokaga kia koe totonu, pea mo tau faiakonaki; ke ke kataki fualoa i te u mea aia, koteuhi, i tau fai fena, e ke haofaki ai anai ia koe totonu, pea e ke haofaki ai foki ia natou ae e fakalogo atu kia koe.”—1 Tim. 4:16.