Kotou Fai Fakamafola Ki Te “u Tagata Fuli”
1. ʼE tou lava liliu feafeaʼi ko he kau fai fakamafola ʼe faiva ohagē ko he tagata tufuga ʼe gāue lelei?
1 Ko he tagata tufuga ʼe gāue lelei, ʼe lahi te ʼu faʼahiga meʼa gāue ʼe ina maʼu, pea ʼe ina ʼiloʼi ia te temi ʼaē ʼe tonu ke ina fakaʼaogaʼi ai pea mo te faʼahiga fakaʼaogaʼi ʼo tana ʼu meʼa gāue ʼaia. ʼO toe fēia pē mo tātou, ʼe tou maʼu te ʼu faʼahiga meʼa gāue kehekehe moʼo tokoni mai ke tou fakahoko kātoa tatatou gāue fai fakamafola. Ohagē lā, neʼe tā te ʼu kaupepa lalahi ʼaē ʼe tou maʼu ai te ʼu meʼa kehekehe ʼe talanoa kiai moʼo tokoni mai kiā tātou ke tou fai fakamafola ki te “u tagata fuli.” (1 Ko. 9:22) Ko te pepa ʼaē neʼe tufa tahi mo Te Minisitelio ʼo Te Puleʼaga ʼaenī, ʼe ina tuku atu ia te lisi ʼo te ʼu kaupepa fuli lalahi ʼaia, pea mo fakamahino atu peʼe ko ai ʼaē ʼe ʼaoga ki ai, pea mo te faʼahiga tufa ʼo te ʼu kaupepa lalahi.
2. Ko te temi fea ʼaē ʼe feala ke tou fakaʼaogaʼi ai ia te ʼu kaupepa lalahi ʼi te minisitelio?
2 Te Temi ʼAē ʼe Fakaʼaogaʼi Ai Te ʼu Kaupepa Lalahi: Ko he tagata tufuga ʼe ina fakaʼaogaʼi fakalelei ia he meʼa gāue ʼe feala ke fua lelei. ʼO toe fēia aipē, ʼe feala anai ke fua lelei ia te foaki age ki he tahi ia he kaupepa lahi ʼe ʼaoga ki ai, tatau aipē peʼe mole ko te māhina ʼaia ʼaē ʼe tonu ke tufa ai ia te ʼu kaupepa lalahi. Ohagē lā, kapau ko te tufa ʼo te māhina ko te tohi Te Ako Mai Te Tohi-Tapu pea ʼe tou fai fakamafola ʼi he koga meʼa ʼe mole tui ai te hahaʼi ki te ʼAtua pea ʼe mole natou fia ako te Tohi-Tapu, ʼe lelei ke foaki age he kaupepa lahi ʼe natou leleiʼia, pea kapau ʼe tou tokagaʼi kua fia logo, pea ʼe feala leva ke tou fakahā age ia te tohi Te Ako Mai Te Tohi-Tapu.
3. He koʼē ʼe tonu ke tou faigaʼi ke tou popoto lelei ʼi te fakaʼaogaʼi ia tatatou ʼu meʼa gāue ki te minisitelio?
3 ʼI te Tohi-Tapu, ʼe fakavikiviki ia nātou ʼaē ʼe faiva ʼi tanatou gāue. (Taag. 22:29) ʼE mahino papau ia, ʼi te temi nei, ʼe mole ʼi ai he gāue ʼe maʼuhiga age ʼi “te gaue taputapu o te Evaselio.” (Loma 15:16) Ke feala hatatou liliu ko “he tagata . . . e mole ufiufi i tana gaue,” ʼe tou faigaʼi anai ke tou popoto lelei ʼi te fakaʼaogaʼi ia tatatou ʼu meʼa gāue.—2 Tim. 2:15.