Te ʼu Kaupepa Lalahi—Ko Te ʼu Meʼa Gāue Maʼuhiga Ki Te Minisitelio
1 Ko he tagata tufuga ʼe ina ʼave tuʼumaʼu te ʼu tuʼuga meʼa gāue, ʼe feala ke ʼaoga ki te gāue kehekehe. Ia tatou ko te kau fai faka mafola ʼo te Puleʼaga, ʼe tou maʼu te ʼu tuʼuga kaupepa lalahi moʼo tokoni kia tatou ke tou fakafimālieʼi te ʼu meʼa ʼaē ʼe ʼaoga ki te hahaʼi ʼaē ʼe felāveʼi mo tatou ʼi te fai faka mafola. (Taag. 22:29) ʼI he matapā, e lagi ʼe koutou felāveʼi mo he tahi ʼe lotovaivai. Peʼe ko he tahi ʼe holi ki he puleʼaga faitotonu, peʼe ko he tahi ʼe feʼekeʼaki peʼe ʼi ai he ikuʼaga ʼo te maʼuli. E feafeaʼi koa hatatou fakaʼaogaʼi ʼatatou ʼu kaupepa lalahi moʼo tokoni ki te ʼu hahaʼi ʼaia?
2 Mokā ʼe koutou fakahā te kaupepa lahi ʼaenī “ ʼE tokaga moʼoni koa te ʼAtua kia tatou?,” ʼe feala ke koutou ʼui age:
◼ “Ko te hahaʼi ʼe nātou fakatokagaʼi te mamahi pea mo te heʼe faitotonu ʼi te mālama ʼe nātou tautau tukugakoviʼi te ʼAtua. ʼE ʼui maʼa nātou, mai tona ʼaluʼaga ʼaē ko te ʼAtua ʼe māfimāfi neʼe kua feala pe tana fakagata te ʼu mamahi mo ka na pau la ʼe tokaga moʼoni ia kia tatou. Koteā takotou manatu ʼo ʼuhiga mo te faʼahi ʼaia? [Koutou tuku ke fai atu hana tali.] ʼE fakahā mai e te Pesalemo 72:12-14 ko te ʼAtua ʼe tokaga moʼoni kia tatou. Ko te mamahi pea mo te heʼe faitotonu ʼe mole ko ia ia ʼaē ʼe ina fakatupu. Neʼe ina fakapapau kua vave pe tana fakaʼauha te kau agakovi. Ko te kaupepa lahi ʼaenī, ʼE tokaga moʼoni koa te ʼAtua kia tatou?, ʼe ina fakahā mai te meʼa ka ina fai anai pea e feafeaʼi tona fua lelei kia tatou.” E feala ke hoko atu takotou fai palalau ʼo talanoa ki te palakalafe 22 ʼo te pasina 27.
3 Kapau ʼe koutou fakaʼaogaʼi te kaupepa lahi ʼaenī “Te ʼu laumālie ʼo te kau mate,” ʼe feala hakotou ʼui age fēnei:
◼ “Peʼe ʼi te temi nei peʼe ki ʼamuli ʼe feala ke feʼekeʼaki e te hahaʼi fuli ia te mate. ʼE ko he maʼuli pe koa ia, ia taʼu e 70 peʼe 80 pea mate? Peʼe ʼi ai koa he maʼuli ʼi te ʼosi ʼo te mate? Koteā takotou manatu? [Koutou faka fealagia ke fai atu hana tali.] Ia Fakahā 21:3, 4, ʼe tou sio ai ki te ʼamanaki taulekaleka ʼa te ʼAtua ʼo ʼuhiga mo te tagata.” ʼI te ʼosi lau ʼo te vaega faka Tohi-Tapu, koutou fakahā age te paki ʼi te pasina 31, pea koutou fakamahino age ko te maʼuli ʼaē ʼe hā ʼi te paki ʼaia ʼe ko te maʼuli la ʼaia ka tou maʼu anai ʼi te Palatiso.
4 Ko te kaupepa lahi “Kote puleaga” ʼe feala ke koutou fakahā fēnei age:
◼ “Ko te tagata neʼe mamahi ʼaupito lolotoga te hisitolia. ʼI takotou manatu koteā koa la te tupuʼaga ʼo te faʼahi ʼaia? [Koutou faka fealagia ke fai atu hana tali.] ʼE fakamahino mai e te Tohi-Tapu ʼe mole feala te taki fakalelei e te tagata ia ia totonu. [Lau ia Tagata Tānaki 8:9.] ʼE fakahā mai e te vaega ʼaenī ʼe mole feala ke fakatuʼu e te tagata he puleʼaga ʼe ina ʼaumai anai te fiafia heʼegata. ʼE gata pe ki te ʼAtua ʼe feala ke ina fai te faʼahi ʼaia. Koutou fakatokagaʼi te talanoa ʼa te Tohi-Tapu ʼo ʼuhiga mo te meʼa ka fakahoko anai e te Puleʼaga ʼo te ʼAtua.” [Lau ia Mikea 4:3, 4.] Fakaʼosi takotou palalau ʼo koutou ʼui age fēnei: “Moʼo tokoni kia koutou ke koutou mahino peʼe feafeaʼi te fakatuʼu anai e te ʼAtua ia te palatiso, ʼe feala ke koutou maʼu te kaupepa lahi ʼaenī ko tona totogi fakaʼofa ko te falā 50.”
5 ʼE feala ke koutou fakaʼaogaʼi fēnei te kaupepa lahi ʼaenī “Fiafia Kite Mauli Heegata Ite Kele”:
◼ “ ʼI te manatu ʼa te tokolahi ʼe tonu ke nātou hake anai ki selo ʼo maʼuʼuli heʼegata ai, kae koteā koa takotou manatu ki te maʼuli heʼegata ʼaē ʼi te kele? [Koutou faka fealagia ke fai atu hana tali.] ʼE fakamoʼoni mai e te Tohi-Tapu ko te maʼuli heʼegata ʼe feala, pea ʼe ina ʼui mai peʼe feafeaʼi tatatou maʼu te maʼuli ʼaia.” Lau ia Soane 17:3. ʼOsi ʼaia pea koutou fakahā ki ai te paki 49 pea koutou fehuʼi age: “ ʼE koutou fia maʼuli koa ʼi te mālama ʼaenī?” Koutou tuku ki ai te kaupepa, pea koutou fakatuʼutuʼu ke koutou toe liliu ʼo ʼaʼahi ia ia.
6 Ko te ʼu kaupepa lalahi ʼe talanoa ki te ʼu faʼahiga meʼa ʼe hoko ʼi te temi ʼaenī, ʼe nātou tali ki te ʼu fehuʼi ʼa te hahaʼi, pea mo nātou foaki he fakafimālie. Ko te fakaʼaogaʼi fakapotopoto ʼo te ʼu meʼa gāue lelei ʼaia, ʼe feala hatatou tokoni ki te hahaʼi ʼaē ʼe fakamalotoloto ke nātou “maʼu te mālama totonu ʼo te moʼoni.”—1 Tim. 2:4.