ʼE Tonu Ke Tou Teuteu Ke Tou Faiva ʼi Te Fai He Ako

Neʼe tuʼa lua te fai age kia Sesu ia te fehuʼi ʼo ʼuhiga mo te maʼuli heʼe gata. Kaʼe, ʼi te temi fuli pe neʼe tali ʼo mulimuli ki te aluʼaga ʼo ia ʼae neʼe ina fai te fehuʼi. (Luka 10:25-28; 18:18-20) Logo la ʼe tou iloʼi lelei te ʼu faʼahi ʼae ka tou ako anai, kaʼe ʼe tonu ke tou teuteu fakatomuʼa ʼo tou manatuʼi ia ia ʼae ʼe ako. Kotea te ʼu faʼahi ʼe lagi faigataʼa anai tana mahino ki ai? Ko te ʼu vaega Tohi-Tapu fea ʼae ʼe tonu ke tou lau mo ia? Ko te ʼu palakalafe ʼe fia ʼe tonu ke tou fai mo ia? ʼE lagi ʼaoga anai ke tou teuteuʼi he faʼifaʼitaki, mo he fakamahino peʼe ko he ʼu fehuʼi ke tou tokoni kia ia ʼae ʼe ako ke mahino. Pea tahi, ʼe ko Sehova ʼae ʼe ina fakatuputupu te moʼoni ʼi te ʼu loto. Koia, ʼe tonu ai ke tou kole ke tapuakinaʼi e Sehova tatatou teuteuʼi te ako, mo tatatou ako pea mo ʼatatou faiga ʼae ke tuputupu ia ia ʼi te faʼahi fakalaumalie.—1 Ko. 3:6; Sakp. 1:5.