Kotou Fakaʼaogaʼi Lelei Te ʼu Puani ʼAoga ʼo Te Tohi Te Ako Mai Te Tohi-Tapu

Ka ako e he tahi te ʼu moʼoni ʼae ʼi te Tohi-Tapu pea mo maʼuliʼi, ʼe tuputupu anai ʼi te faʼahi fakalaumalie. (Pes. 1:1-3) ʼE feala ke tou tokoni ki tatatou ako ʼaki tatatou fakaʼaogaʼi lelei ia te tohi Te Ako Mai Te Tohi-Tapu.

Te ʼu Fehuʼi ʼAe ʼe Tuʼu ʼi Te Kamataʼaga: Ko te ʼu kapite takitahi ʼe kamata ʼaki te ʼu fehuʼi pea ʼe maʼu ʼona tali ʼi te fakamanatu. ʼE feala ke kotou lau te ʼu fehuʼi ʼaia kia ia ʼae ʼe ako ke tupu ai hana fia mahino. Peʼe kotou kole age ki ai ke tali fakanounou atu ki te ʼu fehuʼi takitahi ʼaia. Kapau ʼe hala tana tali, ʼe mole tou foimo fakatonutonuʼi atu aipe ʼi te temi ʼaia. ʼE tokoni atu anai ʼana tali ke kotou iloʼi te ʼu faʼahi ʼae ʼe tonu ke kotou tokakaga ai pea mo fakamaʼuhigaʼi.—Taag. 16:23; 18:13.

Te Tahi ʼu Fakamahino: Kapau ko ia ʼae ʼe ako ʼe mahino pea mo ina tali te ʼu manatu ʼae ʼe tuʼu ʼi te palakalafe, ʼe feala ke kotou fakalotomalohiʼi ia ia ke ina lau tokotahi ia te ʼu fakamahino ʼae ʼe alu tahi mo te kapite. ʼI te ako ʼae ka hoa mai, ʼe feala ke kotou toʼo he kiʼi temi ke kotou vakaʼi pe neʼe mahino lelei ki te ʼu fakamahino ʼaia. Kaʼe, kapau ʼe kotou manatu ʼe ʼaoga kia ia, ʼe lagi lelei ke kotou toʼo he temi ʼi te lolotoga ʼo te fai ʼo te ako ke kotou vakaʼi mo ia te tahi ʼu fakamahino. Peʼe kotou lau he ʼu palakalafe pea mo fai te ʼu fehuʼi ʼae neʼe kotou teuteuʼi fakatomuʼa.

Te Fakamanatu ʼAe ʼe ʼa Takai: ʼI te ʼa takai ʼae ʼi te fakaʼosi ʼo te ʼu kapite, ʼi te agamahani ʼe maʼu ai te ʼu tali ki te ʼu fehuʼi ʼae ʼe fai ʼi te kamata ʼo te kapite. ʼE feala ke kotou fakaʼaogaʼi te ʼa takai ʼaia ke kotou iloʼi ai pe kua mahino lelei takotou ako pea ʼe ina lava fakamahino ia te ʼu puani tafitō. Kotou lau fakatahi mo ia te ʼu tali takitahi pea mo te ʼu vaega Tohi-Tapu. Pea kotou fakaafe takotou ako ke ina fakaʼaogaʼi te ʼu vaega Tohi-Tapu moʼo fakamahino pe koʼe ʼe tui ʼe moʼoni ʼana manatu.—Gaue 17:2, 3.