Tou Faʼifaʼitakiʼi Te Tagata Faiako Lahi Mokā Tou Fakaʼaogaʼi Te Tohi Te Ako Mai Te Tohi-Tapu
1. Neʼe feafeaʼi te faiako ʼa Sesu?
1 Ko Sesu, te Tagata Faiako Lahi, neʼe faigafua pea mo mahino lelei tuʼumaʼu tana ʼu fai fakamahino. ʼI ʼihi temi, moʼo uga ʼo te nofoʼaki ke natou fakakaukau, neʼe ina ʼuluaki fakalavelave muʼa peʼe koteā tanatou manatu. (Mat. 17:24-27) Neʼe ina fakaʼaogaʼi ia te Folafola ʼa te ʼAtua. (Mat. 26:31; Mko. 7:6) Neʼe tokaga ke mole lahi fau ia te ʼu manatu ʼaē neʼe ina akoʼi age ki tana kau tisipulo, ʼi tana ʼiloʼi ʼaē ʼe hoko atu pē anai tanatou ako. (Soa. 16:12) Neʼe toe fia ʼiloʼi e Sesu peʼe tui pea mo mahino tana kau tisipulo ki te ʼu meʼa ʼaē neʼe ina akoʼi age kiā nātou. (Mat. 13:51) Ko te tohi Te Ako Mai Te Tohi-Tapu neʼe fai moʼo tokoni mai ke tou faʼifaʼitakiʼi tana faiako.
2. ʼE tou lava fakaʼaogaʼi feafeaʼi ia te ʼu fehuʼi ʼaē ʼe tuʼu ʼi te kamata ʼo te ʼu kāpite?
2 Te ʼu Fehuʼi ʼAē ʼe Tuʼu ʼi Te Kamataʼaga: Kā kotou kamata he kāpite, ʼe lelei ke kotou palalau ki te ʼu fehuʼi ʼaē ʼe tuʼu ʼi te kamata, ʼi te lalo kupu tāfito. Kotou lagaʼi mo he tahi ʼu fehuʼi ke feala kiā ia ʼaē ʼe ako ke tupu hana fia mahino. Peʼe feala ke kotou fakalavelave age peʼe koteā tana manatu ʼo ʼuhiga mo te ʼu fehuʼi ʼaia. ʼE mole ʼaoga anai ke kotou palalau fualoa ʼo ʼuhiga mo tana ʼu manatu peʼe fakatonutonuʼi tana ʼu manatu fuli ʼaē ʼe hala. ʼE feala pē ke kotou fakamālo age ki ai, ki tana ʼu manatu pea mo kotou kamata vakaʼi ia te kāpite. Ko tana ʼu manatu ʼo ʼuhiga mo te ʼu fehuʼi ʼaē ʼe tuʼu ʼi te kamata, ʼe tokoni atu anai ke kotou ʼiloʼi ia te ʼu faʼahi ʼo te kāpite ʼaē ʼe tonu ke kotou fuafualoa ai.
3. ʼE feafeaʼi hatatou faka faigafua ia te ako?
3 Te ʼu Vaega Faka Tohi-Tapu: ʼE tonu ke fakatafito te ako ki te Tohi-Tapu. (Hep. 4:12) Kae ʼe mole ʼaoga ke kotou lau ia te ʼu vaega Tohi-Tapu fuli. Kotou faka maʼuhigaʼi te ʼu vaega ʼaē ʼe fakatafito kiai tatatou tui. Ko te ʼu vaega ʼaē ʼe talanoa ki te tahi ʼu manatu ʼe lagi mole ʼaoga anai ke lau. ʼE mole faigataʼa te fakamatala ʼo te moʼoni ʼi te tohi Te Ako Mai Te Tohi-Tapu. Kotou faka faigafua ia te ako. Kotou talanoa tāfito ki te ʼu manatu maʼuhiga, pea ʼaua naʼa lahi fau takotou palalau ki he tahi ʼu kiʼi manatu peʼe ki he tahi atu ʼu manatu ʼe mole tuʼu ʼi te tohi.
4. ʼI te lolotoga ʼo te ako, koteā ʼaē ʼe fakalogo kiai tatatou vakaʼi ia te fakamatala ʼaē ʼe tuʼu ʼi Te Tahi ʼu Fakamahino?
4 Te Tahi ʼu Fakamahino: ʼI te kupu tāfito Te Tahi ʼu Fakamahino, ʼe maʼu ai te ʼu fakamatala e 14 ʼe natou fakakātoa te ʼu kāpite ʼo te tohi. ʼE fakalogo kiā koutou mokā kotou fia vakaʼi ia te ʼu fakamatala ʼaia. ʼO ʼuhiga mo ʼihi kāpite, ʼe lagi feala ke kotou fakaloto mālohiʼi ia ia ʼaē ʼe ako ke ina lau tokotahi ia te ʼu fakamatala ʼaē ʼe natou fakakātoa ia te kāpite ʼaia, tāfito lā mo kapau ʼe mahino pea mo ina tali te ʼu manatu ʼaē ʼe tuʼu ʼi te kāpite. Ohagē lā, kā kotou fai ia te kāpite 4 “Ko Ai Ia Sesu Kilisito?”, kapau kua ina faka tui ʼe ko Sesu ia te Mēsia, pea ʼe lagi mole ʼaoga anai ke vakaʼi ia te fakamatala ʼaē ko tona kupu tāfito “Ko Sesu Kilisito—Te Mesia ʼAē Neʼe Fakapapauʼi Mai.” ʼI ʼihi age kāpite, ʼe lagi lelei ke kotou toʼo he temi ʼi te lolotoga fai ʼo te ako, moʼo vakaʼi te fakamatala ʼaē ʼe tuʼu ʼi Te Tahi ʼu Fakamahino peʼe ko hona koga.
5. Kapau ʼe kotou filifili ke kotou vakaʼi te ʼu manatu ʼi Te Tahi ʼu Fakamahino, ʼe feafeaʼi hakotou fai ia te faʼahi ʼaia?
5 Kapau ʼe kotou filifili ke kotou palalau ki te ʼu manatu ʼaē ʼe tuʼu ʼi Te Tahi ʼu Fakamahino, pea ʼe feala ke kotou teuteuʼi fakatomuʼa te ʼu fehuʼi pea mo vakaʼi mo takotou ako, ia te ʼu palakalafe ohagē pē ko hakotou vakaʼi te kāpite. Peʼe ʼo mulimuli ki te ʼu meʼa ʼaē ʼe ʼaoga ki takotou ako, ʼe feala hakotou fakaʼaogaʼi he ʼu kiʼi minuta ʼi te lolotoga ako moʼo vakaʼi mo ia ia te fakamatala. ʼE feala ai anai ke kotou ʼiloʼi papau peʼe mahino ki te ʼu meʼa ʼaē neʼe ina lau tokotahi.
6. ʼE lava fakaʼaogaʼi feafeaʼi te fakamanatu ʼaē ʼe ʼātakai ʼi te fakaʼosi ʼo te ʼu kāpite?
6 Te Fakamanatu ʼAē ʼe ʼĀtakai: ʼI te fakamatala ʼaē ʼe ʼātakai ʼi te fakaʼosi ʼo te ʼu kāpite, ʼi te agamāhani ʼe maʼu ai te ʼu tali ki te ʼu fehuʼi ʼaē ʼe fai ʼi te kamata ʼo te kāpite. ʼE feala ke kotou fakaʼaogaʼi te ʼu tali ʼaia moʼo fakamanatuʼi ia te ʼu manatu tāfito ʼo te kāpite. Neʼe tokagaʼi e ʼihi kau fai faka mafola te ʼaoga ʼaē ʼo te lau mo ia ʼaē ʼe ako ia te ʼu tali takitokotahi pea lagi mo te ʼu vaega ʼaē ʼe pipiki kiai. Pea ʼe natou kole leva kiā ia ʼaē ʼe ako ke ina fakamahino fakanounou te fakamoʼoni ʼo te tali ʼaki te vaega. ʼE feala ai ki te faiako ke ina ʼiloʼi peʼe kua mahino lelei ia ia ʼaē ʼe ako ki te ʼu manatu tāfito ʼo te kāpite pea mo fakamoʼoni feafeaʼi e te ʼu vaega Tohi-Tapu ia te ʼu manatu ʼaia, pea mo ʼiloʼi peʼe manatu tahi mo te ʼu manatu ʼaia. ʼE toe akoʼi ai kiā ia ʼaē ʼe ako te fakaʼaogaʼi ʼo te Tohi-Tapu moʼo fakamahino te moʼoni ki te hahaʼi.
7. ʼE tou lava fakaʼaogaʼi feafeaʼi te tohi Te Ako Mai Te Tohi-Tapu moʼo fakahoko tatatou gāue?
7 Ko te faʼahiga fai ʼaē ʼe fua lelei moʼo fakahoko tatatou gāue ʼaē ko te akoʼi te hahaʼi pea mo fai ʼo ni ʼu tisipulo, ʼe ko te mulimuli ki te faʼahiga faiako ʼa Sesu. (Mat. 28:19, 20) Ko te tohi Te Ako Mai Te Tohi-Tapu ʼe tokoni mai ke tou fai te faʼahi ʼaia. Kotou fakaʼaogaʼi lelei te tohi ʼaia moʼo akoʼi ki te hahaʼi ia te moʼoni ʼi hona ʼaluʼaga ʼe mahino lelei, mo mahino gafua, pea mo tupu ai te fia ako ʼa te hahaʼi.