Tou Fiafia ʼi Te Ako ʼo Te Tohi Koteā ʼAē ʼe Akoʼi Moʼoni Mai ʼi Te Tohi-Tapu?
1 Ko te faʼahi ʼaē neʼe tou fiafia ai ʼi te Fakatahi Faka Tisitilike ʼaē ko tona kupu tāfito “Te Fakalogo Ki Te ʼAtua,” neʼe ko te fakahā ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu? Kua tou vave fakaʼaogaʼi te tohi ʼaia ʼi tatatou minisitelio, tāfito moʼo fai he ʼu ako Tohi-Tapu. Koia ʼe tonu ai ke tou ʼiloʼi lelei te tohi foʼou ʼaia. ʼE feala anai te faʼahi ʼaia heʼe tou ako anai te tohi ʼaia ʼi te Ako Tohi, ʼo kamata ʼi te vāhaʼa ʼo te ʼaho 17 ʼo Sūlio 2006.
2 Ko te taupau ʼo te Ako Tohi ʼe talanoa anai ki te ʼu fehuʼi ʼaē ʼe tuʼu ʼi te kamata ʼo te ʼu kapite. Pea fai anai te ako ʼaki te ʼu fehuʼi ʼaē ʼe tuʼu ʼi te lalo pasina. ʼE lau anai pea mo fai anai te fai palalau ki te ʼu vaega ʼaē ʼe ʼalutahi mo te manatu tāfito, pea ko te fakamatala ʼaē ʼe ʼātakai ʼaē ʼi te fakaʼosi ʼo te ʼu kapite, ko tona kupu tāfito “Te ʼu Meʼa ʼAē ʼe Akoʼi Mai ʼi Te Tohi-Tapu,” ʼe ʼaoga anai moʼo fai he fakamanatu ʼo te kapite, heʼe maʼu ai te tali ʼaki te ʼu vaega Tohi-Tapu ki te ʼu fehuʼi ʼaē ʼe fai ʼi te kamata. ʼE koutou leleiʼia anai te fai ʼo hakotou ʼu tali, heʼe ko te ʼu manatu ʼaē ʼe vakaʼi ʼi te tohi ʼaia ʼe mahino lelei, mo mahino gafua, pea mo kita fia lau.
3 Ko te faʼahi ʼo te tohi ʼaia ʼaē ʼe higoa ko Te Tahi ʼu Fakamahino ʼe maʼu ai te tahi ʼu manatu ʼo ʼuhiga mo he ʼu faʼahi kehekehe. ʼE feala anai hatatou fakaʼaogaʼi te faʼahi ʼaia mokā ʼaoga ke foaki he tahi ʼu fakamahino ki te kau ako Tohi-Tapu ʼo ʼuhiga mo he faʼahi ʼe nātou fia ʼiloʼi. Ko ʼihi koga ʼo Te Tahi ʼu Fakamahino ʼe vakaʼi anai lolotoga te Ako Tohi. Ko te kapite kātoa ʼe lau anai e te tēhina ʼaē ka lautohi ʼi te ako tohi, pea ʼe fakanounou anai te ʼu kapite ʼaē ʼe loaloaga. ʼE mole ʼi ai he ʼu fehuʼi ʼi te ʼu kapite ʼaia. Kae ʼe fai anai e te taupau ʼo te ako tohi he ʼu fehuʼi ki te nofoʼaki ke nātou fai he ʼu tali ʼo ʼuhiga mo te ʼu manatu tāfito.
4 Ko te ako ʼo te tohi Te Ako Mai Te Tohi-Tapu ʼe vave anai tona fai ʼi te Ako Tohi ʼo te kokelekasio. ʼE mole tonu ke tou mulimuli ki te faʼahi ʼaia mokā tou ako te tohi ʼaia mo te hahaʼi, tāfito la mo kapau ʼe nātou ʼiloʼi veliveli pe peʼe mole nātou ʼiloʼi ia te Tohi-Tapu. (Gaue 26:28, 29) ʼI te ʼu ako Tohi-Tapu, ʼe tonu anai ke loloto age tatatou fai palalau ki te ʼu vaega, mo te fakamahino ʼo te ʼu lea fakatātā, pea mo te tahi atu ʼu meʼa. Koia, koutou fakatuʼutuʼu ke koutou kau ʼi te ʼu vāhaʼa fuli ki te ako ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu? pea mo lagolago lelei ʼo fai hakotou ʼu tali.