Tou Fakatalitali Fakafiafia Ia Natou

Ko ai ʼae ʼe tonu ke tou fakatalitali fakafiafiaʼi? Ko natou fuli ʼae ʼe kau ki ʼatatou fono, ia natou foʼofoʼou pea neʼe kua fualoa tatatou fakakaumeʼa mo natou. (Lom 15:7; Hep 13:⁠2) ʼE lagi ko he tehina peʼe ko he tuagaʼane ʼe haʼu mai he tahi fenua. Peʼe ko he tehina peʼe ko he tuagaʼane kua vaivai ʼi te faʼahi fakalaumalie talu mai fualoa. Kotea la ʼe ke logoʼi moka hoko kia koe he aluʼaga feia? ʼE mole ke lotofakafetaʼi koa la moka fakatalitali fakafiafiaʼi koe? (Mat 7:12) Koia, he koʼe ʼe mole ke alu ʼo tau ʼalofa kia natou fuli ʼae ʼi te Fale Fono ʼi muʼa pea mo te hili ʼo te fono? Ka ke fai feia, ʼe ke fakaha anai te tali kaiga pea mo te ʼofa. Pea ʼe ke fakakololiaʼi ai ia Sehova. (Mat 5:16) ʼE mahino ia, ʼe mole feala anai ke tou faipalalau mo te hahaʼi fuli. Kaʼe kapau ʼe tou fai fuli he ʼu faiga, ʼe logoʼi anai e natou fuli ʼae neʼe ʼomai ʼo fono te fiafia.a

ʼE mole tou fakaha pe ia te tali kaiga ʼi he ʼu aluʼaga makehe ohage la ko te ʼAho Fakamanatu. Kaʼe ʼe tonu ke tou fai ʼi te temi fuli. Ka tokagaʼi pea mo logoʼi e natou ʼae ʼe foʼofoʼou te agaʼofa ʼa te ʼu tehina mo tuagaʼane, ʼe fakalotomalohiʼi ai natou ke natou fakavikiviki ki te ʼAtua. Pea ke natou kau mo tatou ki te tauhi maʼa.​​—Soa 13:⁠35.