TE MAʼULI FAKAKILISITIANO

Fakatuʼutuʼu Foʼou Ki Te Fono ʼo Te Vahaʼa

ʼE kamata atu anai ʼi Sanualio 2018, te fakaʼaogaʼi ʼo te tokoni ki te ako pea mo te ʼu pāki mo ʼata viteo ʼi te ʼu fono ʼo te vahaʼa. ʼE toʼo mai te Tohi-Tapu ki te ako ʼo te Les Saintes Écritures. Traduction du monde nouveau ʼi te Neti (nwtsty), tatau aipe pe ʼe heʼeki maʼu ʼi takotou lea. ʼE mahino ia, ʼe tokoni atu anai ke kotou fakaloloto takotou teuteuʼi te fono. Kae tafito, ʼe kotou fakaovi lahi ai anai ki tatatou Tamai ʼofa ko Sehova.

TOKONI KI TE AKO

ʼE maʼu anai he ʼu fakamahino ʼi te tokoni ki te ako ʼo ʼuhiga mo te agaʼi fenua, te fenua pea mo te lea mo te ʼu kupusiga palalau ʼae ʼi te ʼu vaega Tohi-Tapu.

Mateo 12:20

Te vavae malama: Ko te malama mahani ʼo he ʼapi neʼe ko te kiʼi ipu kele. Pea neʼe fakafonu te malama ʼaki te moʼi lolo oliveto. Neʼe homi e te moʼi vavae te moʼi lolo ʼo feala ai ke uloulo tuʼumaʼu te malama. Ko te kupusiga palalau Fakakeleka ʼae ko te “vavae malama” ʼe lagi fakaʼuhiga ki he vavae ʼe kohu koteʼuhi ʼe kei ʼi ai te kiʼi moʼi kakaha kae kua mate te ulo. Neʼe fakakikite ʼi te lea polofeta ʼo Esaia 42:3 te manavaʼofa ʼo Sesu; ʼae ʼe mole ina matehi anai ʼi he temi te ʼamanaki ʼae ʼe kei maʼuli ʼi te loto ʼo te hahaʼi agavaivai pea mo gaohi koviʼi.

Mateo 26:13

Moʼoni: Mai te Fakakeleka, a·menʹ, ʼae ko te fakaliliu ʼo te Fakahepeleo ʼa·menʹ. Ko tona fakaʼuhiga “ke fai pe ki ai” peʼe “mahino papau.” Neʼe tau fakaʼaogaʼi e Sesu te kupuʼi palalau ʼaia moʼo kamata ʼaki hana palalau, moka ina fai he fakapapau peʼe ko he fakakikite. ʼO ha ʼaki mai ai, ʼe moʼoni papau te ʼu palalau. Ko te fakaʼaogaʼi e Sesu te kupu “moʼoni” peʼe ameni, ʼe maʼu ʼateaina pe ʼi te ʼu tohi taputapu. Pea ʼi te Evaselio ʼo Soane, ʼe puʼaki liuga lua e Sesu te kupu “ameni” ʼo toe ha ai te moʼoni tukupau ʼo ʼana palalau.—Soa 1:51.

PĀKI MO ʼATA VITEO

Ko te ʼu pāki mo te ʼu ʼata viteo ʼe fakaha ai te ʼu aluʼaga kehekehe ʼae ʼe talanoa ki ai te Tohi-Tapu.

Petefase mo te Moʼuga ʼo Oliveto pea mo Selusalemi

ʼE fakaha ʼi te kiʼi ʼata viteo ʼaia, he ʼala ʼe haʼu mai te potu esite ki Selusalemi, mai te kolo ko et-Tour—ʼe lagi ko te Petefase ʼae ʼe tuʼu ʼi te Tohi-Tapu—ki he potu maʼoluga ʼo te Moʼuga ʼo Oliveto. ʼE tuʼu ia Petania ʼi te potu esite ʼo Petefase ʼae ʼi te potu esite ʼo te Moʼuga ʼo Oliveto. ʼI Selusalemi neʼe tau nofo po katoa ai ia Sesu mo ʼana tisipulo ʼi Petania, neʼe natou nonofo ʼi te ʼapi ʼo Maleta, mo Malia pea mo Lasalo. Ia ʼaho nei, ko te kolo ʼaia kua higoaʼi ko el-ʽAzariyé peʼe ko El ʽEïzariya, ko te higoa Alape ko tona fakaʼuhiga “Te Koga Meʼa ʼo Lasalo”. (Mat 21:17; Mko 11:11; Luk 21:37; Soa 11:1) ʼI tanatou faifagona mai ʼonatou ʼapi ki Selusalemi, neʼe lagi natou olo ʼi he ʼala ʼe hage ko te ʼala ʼae ʼe ha ʼi te ʼata viteo. ʼI te ʼaho 9 ʼo Nisani, ʼi te taʼu 33 H.T.S., neʼe faifagona ia Sesu ʼi he asino mai te Moʼuga ʼo Oliveto, lagi mai Petefase ki Selusalemi.

Te ʼala mai Petania ki Petefase
Petefase
Te Moʼuga ʼo Oliveto
Te Liuʼa ʼo Kitelone
Te Moʼuga ʼo Te Fale Lotu

Ko Te Faʼo Neʼe Tutuki ʼi Te Muliʼi Vaʼe

Ko te pāki ʼo te muliʼi vaʼe ʼo he tagata neʼe tutuki ki ai he faʼo ukamea ʼe teitei satimeta 11 tona loa. Neʼe maʼu te hui ʼo te muliʼi vaʼe ʼaia ʼi te taʼu 1968 ʼi te kumiʼaga fakaalekeolosia ʼi te potu noleto ʼo Selusalemi. Pea ʼe talu mai te temi ʼo te kau Loma. ʼE ko he fakamoʼoni ʼaia neʼe fakaʼaogaʼi te ʼu faʼo moʼo tutuki ʼo he tahi ʼi he pou ʼakau. ʼE lagi tatau te faʼo ʼaia mo te ʼu faʼo ʼae neʼe fakaʼaogaʼi e te kau solia Loma moʼo tutuki ʼo Sesu Kilisito ʼi te pou. Neʼe maʼu te hui ʼi he puha maka he neʼe ko he agamahani te ai ʼo te ʼu hui ʼo he tahi kua mate ki loto. ʼO ha mai ai, ko he tahi neʼe tutuki ʼi he pou, neʼe feala pe ke ʼi ai hona tanuʼaga.—Mat 27:35.