TE MAʼULI FAKAKILISITIANO
“Neʼe Fakafetaʼi Ia Paulo Ki Te ʼAtua Pea Neʼe Lotomalohi Ai”
ʼI te logo ʼa te kokelekasio ʼo Loma ʼe haʼu ia Paulo, neʼe faifagona te fale tau tehina ia kilometa ʼe 64 ʼo felaveʼi mo ia. Neʼe malave feafeaʼi kia Paulo tonatou manavaʼofa lahi ʼaia? ʼE ui ia Gaue 28:15: “ ʼI te sio ʼa Paulo kia natou, neʼe fakafetaʼi ki te ʼAtua pea neʼe lotomalohi ai.” Ko Paulo neʼe iloa ʼe ko he tagata neʼe ina fakalotomalohiʼi te ʼu kokelekasio ʼae neʼe ina ʼaʼahi. Kae ʼi te lakaga leva ʼaeni, neʼe ko he tagata pilisoni pea ʼe ko ia ʼae neʼe fakalotomalohiʼi.—2Ko 13:10.
Ia ʼaho nei, ʼe feoloʼaki te kau taupau fakasiliko ʼi te ʼu kokelekasio ʼo fakalotomalohiʼi te ʼu tehina mo tuagaʼane. Ohage pe ko te ʼu kaugana fuli ʼa te ʼAtua, ʼi ʼihi temi ʼe natou gaʼegagaʼe mo tuʼania pea mo lotovaivai. Ka ʼaʼahi anai tau kokelekasio e te taupau fakasiliko mo tona ʼohoana, kotea anai he meʼa ʼe ke fai moʼo fakalotomalohiʼi ʼo naua, ke ‘kotou fefakalotomalohiʼaki’?—Lom 1:11, 12.
Lagolago ki te ʼu vahe gaue. ʼE lotomalohi ia te taupau fakasiliko ʼi te ʼu sakilifisio ʼae ʼe fai e te ʼu tehina mo tuagaʼane ke natou kau tuʼumaʼu ki te ʼu vahe gaue ʼo te vahaʼa makehe. (1Te 1:2, 3; 2:20) Fakasiosio pe ʼe feala ke ke pionie vaeluaʼi temi ʼi te mahina ʼae ʼe ʼaʼahi ai tau kokelekasio. ʼE feala koa ke ke faifakamafola mo te tehina taupau peʼe ko tona ʼohoana, peʼe ke alu mo he tahi ia naua ʼo fai he ako? ʼE nā leleiʼia te faifakamafola mo te ʼu tehina mo tuagaʼane kehekehe, ʼo kau ai mo natou ʼae ʼe kei foʼofoʼou peʼe heʼeki loko faiva ʼi te minisitelio.
Tali kaiga. ʼE feala koa ke ke fakaʼapi peʼe ke ke fakaafe naua ki he kiʼi meʼa kai? ʼE ha ai tou ʼofa moʼoni ki te taupau fakasiliko pea mo tona ʼohoana. ʼE mole nā loto anai ke ke fakakinakina fau.—Luk 10:38-42.
Maʼuliʼi te ʼu tokoni ʼae ʼe ina foaki atu. Ko te taupau fakasiliko ʼe tokoni fakaʼofa mai ki te hikihiki ʼo ʼatatou gaue ke lelei age tatatou tauhi ʼae kia Sehova. ʼI ʼihi temi, ʼe feala pe ke ina fakatonutonuʼi. (1Ko 5:1-5) ʼE fiafia anai moka ʼe tou fakalogo pea mo talagafua.—Hep 13:17.
Fakafetaʼi. Fakamalo ki te taupau fakasiliko pea mo tona ʼohoana ki te ʼu faiga ʼae neʼe nā fai, pea mo ʼona fua kia koe. ʼE feala ke ke fakaha fakahagatonu age peʼe ke ke faitohi peʼe ke fai he kiʼi kate.—Kol 3:15.