TE MAʼULI FAKAKILISITIANO
Ko Ai ʼOkotou Kaumeʼa ʼi Te Neti?
Ko he kaumeʼa ʼe ko he tahi ʼe tou feʼofaʼofani. Ohage ko Sonatane mo Tavite neʼe nā kamata kaumeʼa lelei hili pe te matehi e Tavite ia Koliate. (1Sa 18:1) Neʼe nā tahi maʼu ni kalitate ke fakamalohiʼi ai tanā feʼofaʼaki. Koia, ko he ʼu kaumeʼa lelei ʼe tupu ʼuhi ko tanā feiloʼiʼaki lelei. Ke tou iloʼi lelei he tahi, ʼe ʼaoga ki ai he temi mo he ʼu faiga. ʼI te ʼu fakatahiʼaga ʼi te Neti, ʼe faigafua te maʼu e te hahaʼi ʼonatou “kaumeʼa” ʼaki pe tonatou lomiʼi tonatou masini. Koteʼuhi ko natou ʼaia ʼae ʼi te Neti ʼe feala pe ke natou ʼai faʼifaʼitaliha ʼanatou manatu, ke tui ai ia natou ʼae ʼe natou faipalalau ki ai. ʼE faigafua ai kia natou ke natou fufu tonatou ʼuhiga moʼoni. Koia ʼae ʼe tonu ai ke tou fakakaukauʼi lelei pe ʼe ko ai ia natou ʼae ʼe tou filifili ke tou kaumeʼa mo ia. ʼAua naʼa tou tuʼania ki te fakafisi ki he kole kaumeʼa mai ʼa he tahi ʼe mole tou iloʼi lelei, ʼuhi naʼa ita mai kia tatou. ʼUhi ko te ʼu tuʼutamaki ʼae ʼe feala ke hoko ʼi te Neti, ko ʼihi neʼe natou fakafisi ke natou kau ki te ʼu fakatahiʼaga ʼi te Neti. Kae kapau la ʼe kotou fakaʼaogaʼi he fakatahiʼaga ʼi te Neti, kotea ʼae ʼe tonu ke kotou tokakaga ki ai?
SIOʼI TE ʼATA FAKAʼAOGAʼI FAKAPOTOPOTO TE ʼU FAKATAHIʼAGA ʼI TE NETI, PEA MO TALI KI TE ’U FEHU’I:
Kotea ʼae ʼe tonu ke ke tokaga ki ai ʼi muʼa ʼo hau momoli hau tala manatu mo hou pāki?
He koʼe ʼe tonu ke ke filifili lelei tou ʼu kaumeʼa ʼi te Neti?
He koʼe ʼe tonu ke ke fakaʼaogaʼi lelei tou temi moka ke faipalalau ʼi he fakatahiʼaga?—Efe 5:15, 16