ʼE Feala Ke Kotou Tokoni Ki Tokotou Kiʼi Famili Ke Natou Fiafia

ʼE loto e Sehova ke fiafia te ʼu famili fuli. (Ps 127:3-5; Ekl 9:9; 11:9) Kae ʼe feala pe ke puli totatou fiafia ʼuhi he ʼe tou hoha ʼo ʼuhiga mo te malama ʼaeni, peʼe ko te ʼu lakahala neʼe fai ʼihi ʼi ʼotatou famili. Kotea ʼae ʼe feala ke tou fai takitokotahi ke fiafia ʼotatou kiʼi famili?

ʼE tonu ki te tagata ke ina fakamaʼuhigaʼi tona ʼohoana. (1Pe 3:7) ʼE tonu ke ina fakaʼaogaʼi he temi ke fakatahi mo ia. ʼE mole ina fakamaʼua ki ai he ʼu gaue ʼe mole ina lavaʼi, pea ʼe ina fakamalo age ki ai ki te ʼu gaue lelei ʼe ina fai maʼa ia mo tona kiʼi famili. (Kol 3:15) ʼE ina fakaha tona ʼofa ki ai pea mo vikiʼi ia ia.​—Taa 31:28, 31.

ʼE kumi e te fafine he ʼu puleʼaki ke tokoni ki tona ʼohoana. (Taa 31:12) ʼE fakalogo ki ai pea mo gaue fakatahi mo ia. (Kol 3:18) ʼE agalelei ki ai pea mo vikiʼi ia ia.​—Taa 31:26.

ʼE fakaʼaogaʼi e te ʼu matuʼā he temi ke fakatahi ai mo ʼanatou fanau. (Tet 6:6, 7) ʼE natou fakaha ki ʼanatou fanau, ʼaki ʼanatou palalau, tanatou ʼoʼofa ʼae ia natou. (Mat 3:17) Ka natou akonakiʼi natou ʼe natou fai ʼaki te ʼofa pea mo te fakasiosio poto.​—Efe 6:4.

ʼE fakaʼapaʼapa te ʼu fanau ki ʼanatou matuʼā pea mo fakalogo kia natou. (Taa 23:22) ʼE mole natou fufu ki ʼanatou matuʼā ʼanatou manatu pea mo te ʼu meʼa ʼae ʼe natou logoʼi. ʼE natou tali ke fakatonutonuʼi natou e ʼanatou matuʼā pea mo fakaʼapaʼapa kia natou.​—Taa 19:20.

SIOʼI TE ʼATA KE FIAFIA TOKOTOU KIʼI FAMILI, PEA MO TALI KI TE FEHUʼI ʼAENI:

Kotea ʼae ʼe tonu ke tou fai e tatou takitokotahi ke fiafia ai te kiʼi famili?