ʼE TOU LAVA FAKAGATA FEAFEAʼI TE FEHIʼA?

1 | Te Mole Fakapalatahi

Te Ako Mai Te Tohi-Tapu:

“ ʼE mole fakapalatahi te ʼAtua, kae ʼi te ʼu puleʼaga fuli pe, [ko te tagata fuli pe] ʼae ʼe manavasiʼi kia te ia pea mo ina maʼuliʼi te faitotonu, ʼe ina tali leleiʼi ia ia.”—GAUE 10:34, 35.

Ko Tona Fakaʼuhiga:

ʼE mole fakamauʼi tatou e Sehovaa ʼo mulimuli ki totatou haʼuʼaga, ki totatou lanu peʼe ki tatatou agaʼi fenua. ʼE ina tokagaʼi tafito te faʼahi ʼae ʼe maʼuhiga: totatou loto. Koia, “ ʼe sio pe te tagata ki te ʼu meʼa ʼae ʼe ha ki ʼona mata, kae ʼe sio ia Sehova ki te loto.”—1 Samuele 16:7.

Kotea ʼAe ʼe Feala Ke Kotou Fai?

Logo la ʼe mole feala ke tou iloʼi te meʼa ʼi te loto ʼo he tahi, kae ʼe feala ke tou faiga ke tou faʼifaʼitakiʼi te ʼAtua pea ke mole tou fakapalatahi ki ʼihi. Kotou maʼu he faʼahiga sio ʼe lelei ki te hahaʼi kae ke mole kotou fakakehekeheʼi natou. Kapau ʼe kotou logoʼi ʼe kotou maʼu he ʼu manatu ʼe mole lelei ki ʼihi ʼo he tahi lanu peʼe ko he tahi age fenua, kotou kole ki te ʼAtua ke tokoni atu ke kotou liʼaki te ʼu manatu ʼaia. (Pesalemo 139:23, 24) Kapau ʼe kotou kole fakamalotoloto kia Sehova ke ina foaki atu te malohi ke ʼaua naʼa kotou fakapalatahi, ʼe mahino ia ʼe fakalogo anai ki takotou faikole pea mo tokoni atu.—1 Petelo 3:12.

a Ko Sehova ʼe ko te huafa ʼaia ʼo te ʼAtua.—Pesalemo 83:18.

“Neʼe mole feala ʼi muʼa atu ke ma heheka fakatahi mo he papalagi kae mole hoko he kē . . . ʼI te temi nei, kua au kau ki he foʼi famili fakamalamanei moʼoni.”—TITUS

Te Aluʼaga Neʼe Hoko—TITUS

Te Malo ʼi Te Fehiʼa

Neʼe kau ia Titus ki he kiʼi kutuga agamalohi, neʼe kua natou fiu ʼi te ʼu lao ʼo ʼuhiga mo te fakapalatahi. ʼE ina fakamatala fenei: “Neʼe matou olo ki te ʼu faʼahi ʼo te kolo ʼae neʼe mole tali leleiʼi ai te kau uli, ohage ko te ʼu otele mo te ʼu fale kava ʼo fakatupu ai he ʼu fuhu.” ʼE fakamoʼoni e Titus neʼe ina fai te ʼu faʼahi ʼaia ʼuhi ko tona fehiʼa pea ina hoko atu fenei: “Kapau ʼe au kē mo he tahi, tagata peʼe fafine, ko au pe ʼe au ʼuluaki taʼi ia ia ʼaia.”

Neʼe fetogi leva ia Titus ʼi tana kamata ako ia te Tohi-Tapu mo te kau Fakamoʼoni ʼa Sehova. ʼI te temi ʼae ʼe ina lau ai te Tohi-Tapu, ʼe ina fai he toe gaue malohi kia ia. Neʼe malave kia ia te fakapapau ki he malama foʼou “ ʼe mole toe ʼi ai anai te mate, mo te putu, mo te lauga pea mo te mamahi.”—Apokalipesi 21:3, 4.

ʼI te kamata, neʼe faigataʼa kia Titus tana liʼaki ia te fehiʼa ʼi tona loto. Neʼe ina ui fenei: “Neʼe faigataʼa ia te fetogi ʼo taku faʼahiga manatu mo taku aga.” Kae ko te faʼahi ʼae neʼe tokoni ki ai ko tana mahino kia Gaue 10:34, 35, ʼae ʼe ui ai ʼe mole fakapalatahi te ʼAtua.

Kotea leva te ʼu fua lelei? ʼE fakamahino fenei e Titus: “Kua au tui papau ko te kau Fakamoʼoni ʼa Sehova ʼe ko te tauhi moʼoni ʼaia ʼi taku sio ki tanatou fefakahaʼaki te ʼofa logo aipe la ʼe mole natou lanu tahi. ʼI muʼa ʼo taku papitema, neʼe fakaafe au e te tehina papalagi ʼo taku kokelekasio ke ma kakai ʼi tona ʼapi. Neʼe hage pe ko he moemisi. Neʼe mole feala ʼi te ʼu temi ki muʼa atu ke ma heheka fakatahi mo he papalagi kae mole hoko he kē peʼe ma kakai fakatahi ʼi tona ʼapi. ʼI te temi nei, kua au kau ki he foʼi famili fakamalamanei moʼoni.”