’E TOU LAVA FAKAGATA FEAFEA’I TE FEHI’A?

3 | Kotou Pulihi Te Fehiʼa ʼI Tokotou ʼAtamai

Te Ako Mai Te Tohi-Tapu:

“Kaʼe ke kotou fetogi tokotou ʼulugaaga ʼo kotou fakafoʼou tokotou ʼatamai, ke feala ai ke kotou vakavakaʼi pea mo iloʼi e koutou totonu ia te finegalo ʼo te ʼAtua, ʼae ʼe lelei, mo haohaoa pea mo ina leleiʼia.”—LOMA 12:2.

Ko Tona Fakaʼuhiga:

ʼE maʼuhiga tatatou faʼahiga manatu ki te ʼAtua. (Selemia 17:10) Kapau ʼe tonu ke tou liʼaki ia te ʼu palalau peʼe ko te fai ʼo he meʼa ʼe ha ai te fehiʼa, ʼe tonu ke tou fai ʼihi atu faʼahi. ʼE kamata ia te fehiʼa ʼi te ʼatamai mo te loto. ʼE tonu ke tou taʼaki ia te ʼu faʼahi fuli ʼe ha ai te fehiʼa ʼi ʼatatou manatu pea mo te ʼu meʼa ʼae ʼe tou logoʼi. Pea hoki feala leva ke hoko he “fetogi” pea mo tou pulihi ai te fehiʼa.

Kotea ʼAe ʼe Feala Ke Kotou Fai?

Kotou vakavakaʼi fakalelei takotou faʼahiga manatu pea mo te ʼu meʼa ʼe logoʼi e ʼihi, tafito ia natou ʼo he tahi lanu peʼe mai he tahi fenua. Kotou fai ia te ʼu fehuʼi ʼaeni: ‘ ʼE feafeaʼi koa taku faʼahiga sio kia natou? ʼE fakatafito koa taku faʼahiga manatu ki te meʼa ʼae ʼe au mahino ki ai peʼe fakatafito ia ki he ʼu manatu hala?ʼ Kotou fakamamaʼo mai te ʼu fakatahiʼaga ʼi te neti, mo te ʼu ʼata viteo pea mo te ʼu fakafiafia ʼe fakamaʼuhigaʼi ai te fehiʼa mo te agamalohi.

ʼE lava tokoni mai te Folafola ʼa te ʼAtua ke tou tauʼi te fehiʼa ʼi totatou loto pea mo totatou ʼatamai

ʼE mole faigafua tuʼumaʼu tatatou fakamauʼi ʼatatou manatu totonu pea mo te ʼu meʼa ʼae ʼe tou logoʼi. Kae ʼe feala ke tokoni mai te Folafola ʼa te ʼAtua he “ ʼe feala ke ina fakaha te ʼu manatu pea mo te ʼu fakatuʼutuʼu ʼo te loto.” (Hepeleo 4:12) Kotou haga vakavakaʼi te Tohi-Tapu. Kotou fakatatau te ʼu akonaki ʼe tuʼu ai mo takotou faʼahiga manatu, pea mo kotou faiga ke alu tahi takotou faʼahiga manatu mo te meʼa ʼe akoʼi mai ʼi te Tohi-Tapu. ʼE feala ke tokoni mai te Folafola ʼa te ʼAtua ke tou tauʼi te fehiʼa ʼae kua ‘tauakaʼ ʼi totatou ʼatamai mo totatou loto.—2 Kolonito 10:4, 5.

Te Aluʼaga Neʼe Hoko—STEPHEN

Neʼe Fetogi Tana Faʼahiga Manatu

Neʼe fehiʼaʼinaʼi ia Stephen mo tona famili e te kau papalagi. ʼUhi ko te faʼahi ʼaia, neʼe hu ʼi te kiʼi kutuga politike ʼe natou tauʼi te ʼu alikisiaʼaga ʼo te tagata. ʼAki te alu ʼo te temi, neʼe kau ki te ʼu fakapo ʼuhi ko te fehiʼa. ʼE fakamatala fenei e Stephen: “Neʼe au sioʼi mo ʼoku kaumeʼa ia te ʼu ʼata viteo neʼe fakaha ai te gaohi koviʼi ʼo te ʼu kaugana Afelika ʼi Amelika. ʼI tamatou iita ki te taʼi heʼe faitotonu ʼaia, neʼe matou gaohi koviʼi ʼihi kau tupulaga papalagi ʼi te senima. Pea matou olo ki te ʼu kolo ʼe nofoʼi e te kau papalagi, ke matou maʼu ni hahaʼi ke lalava.”

Neʼe fetogi ʼosi te faʼahiga manatu ʼa Stephen ʼi tana kamata ako te Tohi-Tapu mo te kau Fakamoʼoni ʼa Sehova. ʼE ina manatuʼi: “Hili taku maʼu he ʼu manatu fakapalatahi, neʼe au punamaʼuli ki te ʼu meʼa neʼe au sio ki ai ʼi te kau Fakamoʼoni. Ohage la, ka folau he Fakamoʼoni papalagi ki he tahi fenua, ʼe ina tuku age tana ʼu fanau ki he kiʼi famili ʼuli. Pea toe fakaʼapi e te kiʼi famili papalagi ia te tupulaga ʼuli neʼe ʼaoga ke ʼi ai hona nofoʼaga.” Neʼe tui papau ai ia Stephen ko te kau Fakamoʼoni ʼa Sehova, ʼe ko te fale tau tehina ʼofaina ʼae neʼe palalau ki ai ia Sesu ʼe tonu ke maʼu ʼi te kau Kilisitiano moʼoni.—Soane 13:35.

Kotea ʼae neʼe tupu ai te liʼaki e Stephen ʼana gaue ʼe ha ai tona fehiʼa? Neʼe tokoni ki ai ia te meʼa ʼae ʼe tohi ia Loma 12:2. ʼE ina ui fenei: “Neʼe au kamata mahino ai ʼe tonu ke fetogi taku faʼahiga manatu. Neʼe tonu ke au agalelei pea mo au mahino ko te faʼahiga maʼuli pe ʼaia ʼe lelei.” Kua taʼu 40 tupu leva ia te kua fimalie ʼo te maʼuli ʼo Stephen he ʼe mole ina maʼu he ʼu manatu ʼe ha ai te fehiʼa.