Te ʼu Fehuʼi ʼa Te Kau Lautohi
ʼI te po ʼae neʼe fai ai e Sesu ia te Taumafa ʼa Te ʼAliki, neʼe ʼifea te toko 70 tisipulo ʼae neʼe ina fekauʼi ke olo ʼo faifakamafola ʼi muʼa atu? Neʼe natou liʼaki koa ia Sesu?
ʼI tanatou mole kau ki te Taumafa ʼa Te ʼAliki ʼae neʼe fakatuʼu e Sesu, ʼe mole tonu leva ke tou manatu neʼe mole kei ina leleiʼia te toko 70 ʼu tisipulo pe kua natou liʼaki ia ia. ʼI te po ʼaia, neʼe fia fakatahi pe ia Sesu mo ʼana apositolo ki te toʼotoʼoga ʼaia.
Ko te toko 12 pea mo te toko 70, neʼe ko te ʼu tisipulo fuli ʼaia ʼa Sesu. Neʼe ʼuluaki filifili e Sesu ia he ʼu tagata ʼe toko 12 mai ʼana tisipulo ʼe kaugamalie pea neʼe ina fakahigoaʼi natou ko te kau apositolo. (Luka 6:12-16) Neʼe nofo ia Sesu ʼi Kalilea ʼi tana “pauʼi te toko Hogofulu-ma-lua” pea “neʼe ina fekauʼi ai natou ke natou olo ʼo fakamafola te Puleʼaga ʼo te ʼAtua pea mo fakamalolo te hahaʼi.” (Luka 9:1-6) Ki muli age, neʼe natou hifo ki Suta. Neʼe hinoʼi ai e Sesu te “toko 70 ke natou olo taki toko lua.” (Luka 9:51; 10:1) Koia, neʼe ʼi ai te ʼu tisipulo ʼa Sesu ʼi te ʼu koga meʼa kehekehe ke natou fakamafola te logo lelei.
Ko te kau Sutea ʼae neʼe liliu ko ni tisipulo ʼa Sesu, neʼe lagi kei natou fai pe te Pasikate ʼi te taʼu fuli, mo natou fai fakatahi mo ʼonatou famili. (Eke. 12:6-11, 17-20) ʼI te kua ovi mai ʼo tana mate, neʼe olo ia Sesu mo ʼana apositolo ki Selusalemi. Kae neʼe mole ina pauʼi ʼana tisipulo fuli ʼae mai Sutea mo Kalilea pea mo Pelea ke natou ʼomai ʼo fai fakatahi te Pasikate. ʼO ha mai ai neʼe lagi fia fakatahi pe ia Sesu mo ʼana apositolo ki te toʼotoʼoga ʼaia. Neʼe ina ui fenei kia natou: “Neʼe au fakaʼamu lahi ke au kai te Pasikate ʼaeni mo koutou ʼi muʼa ʼo taku mamahi.”—Luka 22:15.
Neʼe ʼi ai te tupuʼaga lelei ʼo tana loto ʼae ki te fahaʼi ʼaia. Neʼe kua vave mate ia Sesu “te Akeno ʼa te ʼAtua, ʼae ʼe ina toʼo te agahala ʼo te malamanei!” (Soa. 1:29) ʼE mate anai ʼi Selusalemi te kolo ʼae neʼe momoli ai te ʼu sakilifisio talu mai fualoa ki te ʼAtua. Ko te akeno ʼo te Pasikate neʼe fakamanatu ai ki te kau Iselaele ia tonatou fakaʼateainaʼi e Sehova mai Esipito. Kae ʼe fakahoko anai e Sesu ʼaki tona sakilifisio he fakaʼateaina ʼe lahi age. ʼEi ʼe ina fakaʼateainaʼi anai te malamanei katoa mai te agahala pea mo te mate. (1 Ko. 5:7, 8) ʼAki te sakilifisio ʼo Sesu, ʼe fakafealagia ai ki te toko Hogofulu-ma-lua ke natou liliu ko te ʼu ʼuluaki hahaʼi ʼa te kokelekasio Fakakilisitiano pea ke maʼuhiga tanatou gaue ʼi ai. (Efe. 2:20-22) ʼE feala ke tou tokagaʼi ko Selusalemi, te kolo maʼoniʼoni ʼe ko ʼona “maka fakatafito ʼe 12” pea neʼe tohi ʼi ai “te ʼu higoa ʼe 12 ʼo te ʼu apositolo ʼe toko 12 ʼa te Akeno.” (Fkha. 21:10-14) Koia, ʼe maʼuhiga anai te gaue ʼa te kau apositolo agatonu moʼo fakahoko ia te fakatuʼutuʼu ʼa te ʼAtua. ʼE tou mahino lelei ai pe koʼe neʼe loto e Sesu ke fakatahi mo natou ʼi te Pasikate fakaʼosi ʼaia pea ʼi te Taumafa ʼa Te ʼAliki ʼae neʼe hoa ki ai.
Ko te toko 70 pea mo te tahi ʼu tisipulo neʼe mole natou fakatahi mo Sesu ki te taumafa ʼaia. Kae ko te ʼu tisipulo fuli ʼae neʼe nonofo agatonu ʼe natou maʼu te ʼu fua lelei mai te Taumafa ʼa Te ʼAliki ʼae neʼe fai e Sesu. ʼAki te temi, ko te ʼu Kilisitiano ʼae neʼe fakanofo ʼaki te laumalie maʼoniʼoni ʼe natou kau anai ki te fuakava ki te puleʼaga ʼae neʼe palalau ki ai ia Sesu mo ʼana apositolo ʼi te po ʼaia.—Luka 22:29, 30.