Kumi Ni Manatu Foʼou Moka Ke Ako Ia Te Tohi-Tapu

Ka ke teuteu fai tau ako tokotahi, ʼe feala ke ke fai te fehuʼi ʼaeni: ‘Kotea ʼae ka au ako?’ Kae ʼo hilifaki ki te ʼu faʼahi ka ke ako, ʼaua naʼa galo kia koe ʼe toe fia akoʼi atu e Sehova ia he manatu foʼou. Koia ka ke ako ia te Tohi-Tapu, ʼe feafeaʼi hau fakalogo ki he manatu ʼe fia akoʼi atu e Sehova?

Kole kia Sehova te poto. Kole kia Sehova ke tokoni atu ke ke mahino ki te manatu ʼae ʼe ina fia akoʼi atu lolotoga tau ako. (Sakp. 1:5) ʼAua naʼa ke nofo ʼaki pe te ʼu meʼa ʼae kua ke mahino ki ai.—Taag. 3:​5, 6.

Ke gaue ia koe te malohi ʼo te Folafola ʼa te ʼAtua. “Ko te folafola ʼa te ʼAtua ʼe maʼuli.” (Hep. 4:12) Koia la ʼae ʼi te temi fuli pe ʼae ʼe ke ako ai ia te Tohi-Tapu, ʼe feala ke ke ako ai he manatu foʼou pea ʼe ʼaoga te ʼu tokoni ʼae ʼe tuʼu ai ki te ʼu fahaʼi kehekehe ʼo tou maʼuli. Kae ʼe feala pe anai ke hoko ia te fahaʼi ʼaia mo kapau ʼe ke mahino ʼe tonu ke ke iloʼi te meʼa ʼae ʼe fia akoʼi atu e te ʼAtua.

Fakafetaʼi ki te ʼu fahaʼi fuli ʼae ʼe fakaʼaogaʼi e Sehova moʼo akoʼi ʼo koe. Ko te meʼa kai fakalaumalie ʼae ʼe ina foaki mai ʼe hage “he kaitahi ʼo ni meʼa kai lelei.” (Esa. 25:6) Koia la ʼae ʼe tonu ai ke ke ako ia fahaʼi fuli neʼe teuteuʼi e Sehova maʼa tatou maʼia mo ʼae ʼe mole ke leleiʼia. ʼE fua lelei anai kia koe pea ʼe ke leleiʼia moʼoni anai te ako ʼo te Tohi-Tapu!