Koutou Kai Lelei ʼi Te Faʼahi Fakalaumālie
1 ʼE ʼi ai te tāʼaga lea ʼe ina ʼui ‘ ʼe fakalogo tokita mālohi ki te ʼu meʼa ʼaē ʼe kita kai.’ ʼI tona fakahagatonu, ko tatatou faʼahiga kai ʼe malave ki totatou mālohi pea mo totatou maʼuli lelei ʼi te faʼahi fakasino. Mai tona ʼaluʼaga ʼaē neʼe ʼui fēnei e Sesu: “E mole gata pe ki te pane e mauli ai anai te tagata, kae e mauli anai i te folafola fuape e mavae maia fofoga o te Atua,” koia ko tatatou faʼahiga kai ʼi te faʼahi fakalaumālie ʼe fua lelei peʼe fua kovi kia tatou. (Mat. 4:4) Koia ʼe lelei koa takotou kai ʼi te faʼahi fakalaumālie? ʼE koutou kai filifili koa? ʼE koutou kai fakavilivili koa? Peʼe koutou toʼo koa he temi ke koutou kai ʼi te ʼu temi kai fuli, mo koutou kai fakapotopoto pea ke fua lelei kia koutou takotou kai ʼi te faʼahi fakalaumālie?
2 Koutou Sivisivi Takotou Kai: ʼE foaki e Sehova te “meʼa kai ʼi tona temi totonu” pea mo “he kātoaga meʼa kai neʼe loloʼi lelei,” ʼaki “te tagata kaugana agatonu mo poto.” (Mat. 24:45, MN; Isa. 25:6) Ke tou maʼu te ʼu fua lelei fuli ʼo te ʼu meʼa kai ʼaē ʼe foaki fakaʼofa mai, ʼe tonu ke tou kai fakalelei ki te meʼa kai fakalaumālie.
3 ʼE feala ke koutou fai kia koutou te ʼu fehuʼi ʼaenī: ‘ ʼE ʼau lau koa ʼi te ʼaho fuli te vaega faka Tohi-Tapu ʼo te ʼaho pea mo tona fakamatala? ʼE ʼau lau koa pea mo metitasio ʼi te ʼaho fuli te Tohi-Tapu? ʼE ʼau teuteuʼi koa te ʼu fono, ʼo ʼau vakaʼi fakatomuʼa te ʼu meʼa ka tou palalau kiai? Kua ʼau lau fuli koa te ʼu tohi fakamuli, ohage ko te ʼu tohi e lua La prophétie dʼIsaïe, lumière pour tous les humains.
4 Neʼe fakapapau fēnei e Sesu: “Manuʼia ia nātou ʼaē ʼe nātou ʼiloʼi tonatou masiva fakalaumālie . . . Manuʼia ia nātou ʼaē ʼe fia kakai pea mo fia ʼiʼinu ki te faitotonu, heʼe nātou makokona anai.” (Mat. 5:3, 6, MN ) Koia koutou kakai fakalelei ʼi te faʼahi fakalaumālie ʼo fakafonu tokotou ʼatamai pea mo tokotou loto ʼaki te ʼatamai mālama ʼo te ʼAtua.