Te Tohi Mai Te Kolesi Pule
ʼI TATATOU fakaōvi ki te hoko mai ʼo te tuʼu foʼou, ʼe maʼuhiga ke tou haga fakatalitali kiā Sehova. (Sofo. 3:8) Neʼe ʼui e te polofeta ko Taniela ko te “ ʼAtua . . . ʼe ina Fakahā te ʼu meʼa fakalilo, pea neʼe ina fakahā . . . te meʼa ʼaē ʼe tonu ke hoko ʼi te koga fakamuli ʼo te ʼu ʼaho.” (Tan. 2:28) ʼE ko he pilivilesio lahi hatatou māʼuʼuli ʼi te fakaōvi mai ʼo te temi ʼaia neʼe fakakikite, pea mo tou mahino ki te ʼu meʼa fakalilo ʼa Sehova, pea mo tou fakahā ki niʼihi!
ʼAki “te tagata kaugana agatonu mo poto,” neʼe fakahā māmālie e Sehova ia tana fakatuʼutuʼu ʼaē ke ina fakatahiʼi ʼi te “ ʼu ʼaho fakamuli” faigataʼa ʼaenī ia te ‘toe kau atolasio e tokolahi’ mai te malamanei kātoa. (Mat. 24:45, MN; Apk. 7:9; 2 Tim. 3:1, MN ) Iā Isaia 2:2, 3, ʼe fakamatalatala ai te gāue faka malamanei ʼaē ʼe hoko “ ʼi te koga fakamuli ʼo te ʼu ʼaho.” ʼI te taʼu fuli, ʼe fakatahiʼi ai te hahaʼi ʼi te lotolotoiga ʼo te mālama ʼe maveuveu pea mo fai fakapō.
Mai Sānualio ki Tesepeli 2004, neʼe tou mahino lahi ʼe tonu ke tou fakalogo ki te ʼu palalau ʼaenī ʼa Sesu: “Koutou alaʼala . . . Koutou nofo teuteu.” (Mat. 24:42, 44) ʼIo, ko te ʼu meʼa ʼaē ʼe lolotoga hoko ʼi te malamanei ʼe ʼi ai tona ʼuhiga lahi ki te kau Kilisitiano, heʼe nātou ʼiloʼi “te u fakaʼiloga o te u temi” pea ʼe nātou gāue ʼo mulimuli pe kiai. (Mat. 16:1-3) Ohage ko tona fakahā ʼi tana Folafola, ʼe haga tokoni anai ia Sehova ki tana hahaʼi ʼaē ʼe fakalogo ki tana ʼu fakatuʼutuʼu faka teokalatike, logola te ʼu faigataʼaʼia ʼaē ʼe tau mo nātou.
Logola te ʼu faiga ʼa ʼihi moʼo tāʼofi te faka mafola ʼo te Puleʼaga, kae ʼe hoko atu pe e te ʼu tēhina ia tanatou faka mafola te moʼoni pea mo tanatou tānaki te hahaʼi. (Gaue 5:19, 20; Hep. 10:24, 25) ʼI Lusia ʼi te māhina ʼo Sūnio 2004, ko te telepinale ʼi Moscou neʼe lagolago ki te tonu neʼe fai e te tahi telepinale veliveli moʼo tapuʼi te gāue ʼa te kau Fakamoʼoni ʼa Sehova pea mo toʼo tanatou pilo gāue ʼi te kolo ʼaia. Kae ko te ʼu tēhina neʼe mole nātou mātataku, heʼe nātou ʼiloʼi ia te finegalo ʼo te ʼAtua, pea ʼe nātou fakalogo kiā ia ohage ko honatou Pule, kae mole nātou fakalogo ki te tagata. (Gaue 5:29) ʼE tou falala ko Sehova ʼe ina takitaki anai tana ʼu kaugana ʼi te ʼu temi ʼaē ʼe fakafeagai ai te puleʼaga ki tanatou fai faka mafola.
ʼI te ʼu taʼu ʼaenī kua hili, ʼi te Lepupilika ʼo Géorgie, neʼe faʼao te ʼu koloā ʼa te ʼu tēhina, neʼe gaohi koviʼi nātou e te hahaʼi agamālohi, pea neʼe tutu tanatou ʼu tohi faka Tohi-Tapu. Kae neʼe mole ʼi ai he fakafeagai neʼe mālo ia nātou. (Isa. 54:17) ʼI te taʼu gāue 2004, neʼe toe fakagafua ʼi Géorgie ia te gāue ʼa te kau Fakamoʼoni ʼa Sehova. Neʼe fai te ʼu fakatahi lalahi, pea neʼe fetuku mai ki te fenua te ʼu tohi faka Tohi-Tapu. Neʼe lahi te kau fai faka mafola foʼou, pea mo te hahaʼi neʼe kau ʼi te ʼAho Fakamanatu.
ʼI Amelika, ʼi Érythrée, ʼi Lepupilika ʼo Kolea, ʼi Rwanda, pea mo Turkménistan, neʼe pilisoniʼi ai te ʼu tēhina ʼuhi ko tanatou tui. Logola tonatou gaohi koviʼi ʼaia, kae ʼe nātou ʼiloʼi ʼaki tanatou ako ia te Tohi-Tapu ia te tupuʼaga ʼo tonatou ʼu ʼahiʼahi, koia ʼaē ʼe nātou nofo agatonu ai ʼo fakatalitali ki te hāofaki ʼa Sehova.—1 Pet. 1:6; 2 Pet. 2:9.
Kapau ʼe koutou lau te Tānaki Gāue ʼo Te Taʼu 2004 ʼi Te Tule Leʼo ʼo te ʼaho 1 ʼo Fepualio 2005, ʼe koutou fiafia anai ʼi te lotoʼofa ʼo Sehova. (Pes. 31:19; 65:11) ʼAki te tānaki gāue ʼaia, ʼe mātou fakaʼamu ʼe koutou lotomālohi ai anai pea mo koutou haga fakafiafia anai ia te ʼAtua.—1 Tes. 4:1.
ʼE kei hoko atu te ʼu faiga lahi moʼo faka mafola te moʼoni ki te hahaʼi fuape. Ohage la, moʼo tokoni ʼi te faʼahi fakalaumālie ki te hahaʼi tuli pea mo te hahaʼi kivi neʼe fai te ʼu foʼi fime viteo, mo te ʼu DVD, pea mo te tahi ʼu meʼa gāue ʼi te lea ʼa te kau tuli pea mo te ʼu tohi ki te hahaʼi kivi. Tokolahi te kau fai faka mafola neʼe nātou ako te tahi ʼu lea ke feala hanatou palalau mo te hahaʼi matāpule ʼaē ʼe nonofo ʼi tonatou fenua.
Pea tahi, ko te ʼu kiʼi kūtuga ʼaē ʼe nonofo mamaʼo neʼe akoako nātou ke feala hanatou ʼolo ʼo fai faka mafola ʼi te ʼu telituale ʼaē ʼe faigataʼa ia te faka aʼu kiai. Ko te filiale neʼe ina akoako te kau fai faka mafola e toko 7 000 tupu ʼo te ʼu kūtuga e 300 tupu ʼaē ʼe nonofo mamaʼo. ʼE hā ʼaki mai ʼe maʼu anai he tahi ʼu kokelekasio foʼou! Tahi ʼaē, ʼi te toko 16 760 607 hahaʼi ʼaē neʼe kau ki te ʼAho Fakamanatu ʼi te taʼu ʼaenī, ko te toko 10 miliona ʼe ko te ʼu hahaʼi ʼe mole nātou tauhi kiā Sehova. ʼE ʼasi mai ʼe kei toe te taʼukai lahi ʼaē ʼe tonu ke tānaki.
ʼE tou fakafetaʼi kiā Sehova ʼo ʼuhiga mo tana tapuakina lahi pea mo tona ʼofa ʼi tana tokaga kiā tatou ia ʼaho nei. (Taag. 10:22; Mala. 3:10; 1 Pet. 5:7) ʼE tou falala kiā Sehova ʼi tatatou logo tahi lolotoga “te koga fakamuli ʼo te ʼu ʼaho” ʼaenī. Logola te ʼu fihifihia ʼaē ʼe tau mo tatou, kae tou manatuʼi tuʼumaʼu te vaega Tohi-Tapu ʼo te taʼu 2005: “Ko toku tokoni ʼe haʼu mai ia Sehova, te Tupuʼaga ʼo te lagi pea mo te kele.” (Pes. 121:2) ʼE mātou ʼofa atu pea mo hūfaki koutou.
Tokotou ʼu tēhina,
Te Kolesi Pule ʼa Te Kau Fakamoʼoni ʼa Sehova