ʼE Fakagata Anai e Sesu Te Tau

ʼI tana ʼi te kele, neʼe fakaha e Sesu he ʼofa lahi ki te hahaʼi, ʼo aʼu ki te sakilifisioʼi ʼo tona maʼuli maʼa natou. (Mateo 20:28; Soane 15:13) Ka hani toe fakaha e ia tona ʼofa ki te hahaʼi ʼaki tana fakaʼaogaʼi tona ʼuhiga Hau ʼo te Puleʼaga ʼo te ʼAtua moʼo “fakagata te ʼu tau ʼi te kele katoa.”—Pesalemo 46:9.

Kotou tokagaʼi te meʼa ʼae ʼe ui ʼi te Tohi-Tapu ʼo ʼuhiga mo te meʼa ka fai anai e Sesu:

• “ʼE ina haofaki anai te tagata masiva ʼae ʼe kole tokoni age, ʼo toe feia mo ia ʼae ʼe mole maʼuhiga pea mo ia ʼae ʼe hala tokoni. ʼE ʼofa anai kia ia ʼae ʼe mole maʼuhiga pea mo ia ʼae ʼe masiva, pea ʼe ina haofaki anai te maʼuli ʼo te kau masisiva. ʼE ina haofaki anai natou mai te taʼomia mo te agamalohi.”—Pesalemo 72:12-14.

ʼE tou fakaha feafeaʼi tatatou fakafetaʼi kia meʼa fuli neʼe fai e Sesu pea mo toe fai anai maʼa tatou? ʼE feala ke toe lahi age tatatou ako pe kotea “te logo lelei ʼo te Puleʼaga ʼo te ʼAtua” ʼae neʼe ina fakamafola. (Luka 4:43) Lau te alatike “Kotea Ia Te Puleʼaga ʼo Te ʼAtua?”