Te Tamasiʼi ʼAe Neʼe Fakapapauʼi Mai

Neʼe mole toe liliu ia Sosefo mo Malia ki Nasaleti, kaʼe neʼe nā nonofo ʼi Petelehemi. ʼI te kua ʼaho valu ʼo Sesu, neʼe tonu ke silikosisioʼi hili tana tupu, ohage pe ko tona fakatotonu ʼi te Lao ʼae neʼe foaki e te ʼAtua ki Iselaele. (Levitiko 12:2, 3) Pea neʼe ko he agaʼi fenua te foaki ki he tamasiʼi tagata tona higoa ʼi te ʼaho pe ʼaia. Neʼe nā fakahigoaʼi tana tamasiʼi ko Sesu, ohage pe ko tona fakatotonu age e te ʼaselo ko Kapeliele.

Kua ʼaho 40 ia Sesu. Neʼe ʼave kifea ia ia e ʼana matuʼā? Neʼe nā ʼave ki te fale lotu, ʼi Selusalemi, ʼae ʼe mole faʼa mamaʼo mai te koga meʼa ʼae neʼe nā nonofo ai. Neʼe ui ʼi te Lao, hili ʼaho ʼe 40 ʼi te kua ʼosi fanauʼi e he fafine hana tamasiʼi tagata, neʼe tonu ke ina momoli ʼi te fale lotu he molaga ʼo te fakamaʼa.—Levitiko 12:4-8.

Neʼe fai e Malia te faʼahi ʼaia. Ko te molaga ʼae neʼe ina ʼaumai neʼe ko te ʼu kiʼi manulele ʼe lua. ʼE tou mahino ai ki te agaaga ʼo te maʼuli ʼo Sosefo mo Malia. ʼI te Lao, neʼe tonu ke momoli he ovi tagata kei mui pea mo he manulele. Kaʼe kapau neʼe mole feala ke foaki e he fafine he ovi tagata, pea neʼe feʼauga pe ʼi he taluaʼi kulukulu peʼe ko he taluaʼi lupe. Pea neʼe ko te meʼa ʼaia neʼe foaki e Malia.

ʼI te fale lotu, neʼe fakaovi age kia Sosefo mo Malia ia te tagata kua matuʼa. Neʼe higoa ko Simeone. Neʼe fakaha age e te ʼAtua kia ia, ʼe sio anai ʼi muʼa ʼo tana mate ki te Mesia, peʼe ko Kilisito, ʼae neʼe fakapapauʼi mai e Sehova. ʼI te ʼaho ʼaia, neʼe taki e te laumalie maʼoniʼoni ia Simeone ki te fale lotu, ʼae neʼe ina maʼu ai ia Sosefo mo Malia pea mo tanā kiʼi tamasiʼi. Neʼe toʼo e Simeone ia te kiʼi tamasiʼi.

ʼI tana fua te kiʼi tamasiʼi, neʼe fakafetaʼi ia Simeone ki te ʼAtua, ʼo ina ui fenei: “ ʼI te temi nei, Tuʼi ʼAliki, kua feala leva ke alu tau kaugana ʼi te fimalie, ʼo mulimuli pe ki tau folafola. Koteʼuhi kua au sio ki te haofaki ʼae neʼe ke teuteuʼi ia muʼa ʼo te ʼu puleʼaga fuli, ko he malama moʼo toʼo te pulou mai te ʼu puleʼaga pea ko te kololia ʼo tau hahaʼi ko Iselaele.”—Luka 2:29-32.

Neʼe punamaʼuli ia Sosefo mo Malia ʼi tanā logo ki te ʼu palalau ʼaia. Neʼe tapuakiʼi e Simeone ia naua pea neʼe ina ui age kia Malia ko tau tama “neʼe filifili moʼo fakatukia pea mo toe fakatuʼuake te tokolahi ʼi Iselaele.” Neʼe ina toe ui ʼe logoʼi anai e Malia he lotomamahi, ohage ko he heleta masila ʼe ina hukiʼi ia ia.—Luka 2:34.

ʼI te ʼaho ʼaia, ʼi te fale lotu, neʼe ʼi ai foki mo he fafine polofeta ko Ana, kua taʼu 84. ʼI tona fakahagatonu, neʼe mole puli ʼi he ʼaho ʼi te fale lotu. Neʼe toe haʼu mo ia kia Sosefo, mo Malia pea mo te kiʼi toe ko Sesu. Neʼe fakafetaʼi ia Ana ki te ʼAtua pea mo palalau ʼo ʼuhiga mo Sesu kia natou fuli ʼae neʼe fia logo.

Fakakaukauʼi age muʼa te toe fiafia lahi ʼae neʼe maʼu e Sosefo mo Malia ʼuhi ko te ʼu meʼa ʼaia neʼe hoko ʼi te fale lotu! ʼE mahino ia, neʼe ko te fakamoʼoni ʼaia kia naua ko tanā kiʼi tamasiʼi neʼe ko Ia ʼae neʼe Fakapapauʼi mai e te ʼAtua.