ʼE Tonu Ke Tou ʼIloʼi Pe Ko Ai Te ʼAtua

NEʼE mole heʼeki koa la koutou ōfo ʼi te pōʼuli, ʼi hakotou sioʼi te lagi mo ʼona fetuʼu? Peʼe ko te mamanu ʼo he ʼu fisiʼi teu matalelei? Peʼe koutou fakalogo ki te tagi ʼa te ʼu manulele pea mo te logoaʼa ʼa te matagi mokā fakalaka ʼi te ʼu lauʼakau? Pea ʼe ko he meʼa fakaofoofo takita sio ki te ʼu tāfolaʼa pea mo te tahi ʼu manu ʼo te tai! Pea ʼe ʼi ai mo te tagata mo te ʼu meʼa ʼaē neʼe tupu ake mo ia, ia te leʼo ʼo loto, fakatahi mo tona ʼuto ʼaē ʼe kei lahi tona ʼu koga ʼe mole heʼeki mahino kiai te kau tōketā. Koteā takotou manatu ki te ʼu meʼa taulekaleka fuli ʼaē ʼe koutou sisio kiai?

ʼE ʼui e ʼihi ko te ʼu meʼa fuli ʼaia neʼe hoko fakafokifā pe ia. Kae kapau ko ia ʼaia, he koʼe koa ʼe tui te hahaʼi ki te ʼAtua? He koʼe koa ko he fakatahi fakafokifā ʼo he ʼu faʼahiga meʼa ʼe ina fakatupu he ʼu hahaʼi ʼe nātou ʼiloʼi ʼe ʼaoga kia nātou te ʼu meʼa fakalaumālie?

“Ko te lotu ʼe tauaka loloto ʼi te tagata ʼi te potu fuli ʼo tona maʼuli faka ekonomika pea mo te ʼu faʼahi fuli ʼo tana ako.” Ko te ʼu palalau ʼaia ʼe ina fakamatala fakanounou te sivi neʼe fai e te polofesea ko Alister Hardy ʼi tana tohi The Spiritual Nature of Man (Te Maʼuli Fakalaumālie ʼo Te Tagata). Neʼe fakatokagaʼi e te ʼu sivi neʼe hoki fai pe e te kau tōketā ʼe gāue ki te ʼuto ʼo te tagata, ʼe ʼiloga ia neʼe kua “polokalamaʼi ʼi te sino ʼo te tagata” te fealagia ʼaē ke tauhi lotu. Koʼeni te manatu mai te tohi Is God the Only Reality? (Ko Te ʼAtua, ʼe Ko Te Meʼa Pe Koa ʼAia ʼe Moʼoni?): “ ʼI te ʼu fenua fuli pea mo te taʼiake fuli pea talu mai te tupu ʼa te tagata, mo tana fakaʼaogaʼi te lotu ke mahino ki te ʼuhiga ʼo te maʼuli.”

Tou vakaʼi age muʼa te ʼu palalau neʼe fai e te tagata poto kua hili kiai taʼu e 2 000. Neʼe ina tohi fēnei: “Ko te api fuape e i ai tona tufuga, kae ko te tufuga o meafuape e ko te Atua.” (Hepeleo 3:4) ʼE tala fakahagatonu fēnei e te ʼuluaki vaega ʼo te Tohi-Tapu: “ ʼI te kamataʼaga neʼe fakatupu e te ʼAtua ia te lagi pea mo te kele.”—Senesi 1:1.

Kae ko ai koa te ʼAtua? ʼE kehekehe te ʼu tali ʼe fai e te hahaʼi ki te fehuʼi ʼaia. Neʼe fehuʼi age ki te tūpulaga Saponia ko Yoshi pe ko ai te ʼAtua, pea neʼe ina tali fēnei: “ ʼE mole ʼau ʼiloʼi lelei ʼau. ʼE ʼau Putisi, kae ʼe mole maʼuhiga kia ʼau te ʼiloʼi pe koa ai te ʼAtua.” Kae neʼe fakamoʼoni e Yoshi ko Puta ʼe tauhi ki ai te hahaʼi ohage ko he ʼatua. Ko Nick, ko he tagata kua taʼu 60 tupu pea ʼe ʼi ai tana matani gāue, ʼe tui ki te ʼAtua kae maʼa ia ko te ʼAtua ʼe ko he mālohi pe ia. ʼI te fehuʼi age ke ina fakamahino te meʼa ʼaē ʼe ina ʼiloʼi ʼo ʼuhiga mo te ʼAtua, neʼe ina fakakaukauʼi fualoa pea ina tali fēnei: “ ʼE ko he fehuʼi ʼe faigataʼa ʼaupito. Ko te meʼa pe ʼaē ʼe ʼau ʼiloʼi, ʼe ʼi ai te ʼAtua, ʼe maʼuli.”

Ko ʼihi hahaʼi ʼe “nātou atolasioʼi pea mo tauhi ki te ʼu meʼa ʼaē neʼe fakatupu e te ʼAtua, kae mole nātou atolasio ki tonatou Tupuʼaga.” (Loma 1:25, Today’s English Version) Ko te ʼu lauʼi miliona hahaʼi ʼe nātou tauhi ki tanatou ʼu kui ʼaē kua mamate, heʼe nātou ʼui ko te ʼAtua ʼe mamaʼo fau, ʼe mole feala hanatou fakaōvi ki ai. ʼI te lotu Inituisi, ʼe lahi te ʼu ʼatua tagata pea mo te ʼu ʼatua fafine. ʼI te temi ʼo te kau ʼapositolo ʼa Sesu Kilisito, neʼe atolasioʼi te ʼu tuʼuga ʼatua, ohage ko Siase mo Helemesi. (Gaue 14:11, 12) ʼE lahi te ʼu lotu ʼo te Keletiate ʼe nātou akoʼi ko te ʼAtua ʼe ko te Tahitolu, ko tona faka ʼuhiga ʼe ʼAtua te Tāmai, mo te ʼAlo, pea mo te Laumālie Maʼoniʼoni.

ʼE moʼoni, ʼe ʼui e te Tohi-Tapu “ ʼe kaugamālie te ʼu ‘ ʼatua’ mo kaugamālie te ʼu ‘ ʼaliki.’ ” Kae ʼe ina toe ʼui pe foki: “Ka kia tatou ko te ʼAtua pe e tahi, te Tāmai, ʼaē neʼe tupu mai ai te meʼa fuli.” (1 Kolonito 8:5, 6; MN ) Ei, ʼe ʼi ai te ʼAtua moʼoni pe e tahi. Kae ko ai koa ia ia? E feafeaʼi tona agaaga? ʼE maʼuhiga kia tatou ke tou ʼiloʼi te ʼu tali ki te ʼu fehuʼi ʼaia. Neʼe ʼui tonu e Sesu ʼi tana faikole ki ai: “Ko te mauli heegata aeni, ke natou iloi koe, te Atua e tahi mo mooni pea mo ia ae nee ke fekaui mai, ia Sesu Kilisito.” (Soane 17:3) ʼE ʼi ai te tupuʼaga ʼo tatatou tui ko totatou maʼuli heʼegata ʼe fakalogo ki tatatou ʼiloʼi lelei te ʼAtua.

[Paki ʼo te pasina 3]

Neʼe tutupu feafeaʼi te ʼu meʼa ʼaenī?

[Haʼuʼaga ʼo te paki]

Whale: Courtesy of Tourism Queensland