Te Fakafimālie ʼi Te ʼu Temi Faigataʼa
ʼE MOLE fakaloto fīmālie ia te ʼu logo ʼo te temi ʼaenī. Neʼe tohi fēnei e te tagata: “Kua fakahaʼuhaʼu ʼo faigataʼa tatatou fia sio ki te ʼu tala logo ʼo te uhu, koteʼuhi ʼe fakaʼofaʼofa fau te ʼu meʼa ʼaē ʼe hoko ʼi te temi nei.” Kua fonu ʼi te malamanei ia te tau, te ʼu agamālohi, te mamahi, te fai fakapō, pea mo te mahaki—pea lagi kua ʼamanaki ke hoko kia tatou totonu te ʼu agakovi ʼaia, peʼe lagi kua ʼosi hoko kia tatou.
Ko te Tohi-Tapu neʼe ina fakakikite te ʼu meʼa fuli ʼaia. ʼI tana fakamatala ʼo totatou temi, neʼe ʼui e Sesu ʼe ʼi ai anai te ʼu tau lalahi, te ʼu mahaki, te ʼu hoge, pea mo te ʼu mafuike. (Luka 21:10, 11) ʼO toe feiā mo te ʼapositolo ko Paulo, neʼe faitohi ʼo ʼuhiga mo te “u temi faigataa,” ʼo ina ʼui ko te hahaʼi ʼe nātou aga fekai anai, kaumeʼa mo te paʼaga, pea mo nātou fehiʼa ki te meʼa ʼaē ʼe lelei. Neʼe ina fakahigoaʼi te temi ʼaia ko “te u aho fakamuli.”—2 Timoteo 3:1-5.
Koia, ko te ʼu fakamatala ʼo ʼuhiga mo te ʼu ʼaluʼaga ʼo te malamanei, ʼe tatau mo te ʼu meʼa ʼaē neʼe fakakikite e te Tohi-Tapu, pea gata aipe. ʼE fakahā e te Tohi-Tapu te fakatuʼutuʼu ʼe mole talanoa kiai te ʼu tala logo. ʼAki te Folafola ʼa te ʼAtua, ʼe feala ke tou mahino pe koʼe ʼe lahi te agakovi, pea koteā anai ka hoko ʼi te ka haʼu.
Koteā Te Manatu ʼa Te ʼAtua ʼo ʼUhiga Mo Te Agakovi
ʼE fakamahino e te Tohi-Tapu, pe koteā te manatu ʼa te ʼAtua ʼo ʼuhiga mo te ʼu ʼaluʼaga fakaʼofaʼofa ʼo totatou temi. Tatau aipe pe neʼe fakakikite e te ʼAtua te ʼu temi mamahi ʼaenī, kae ʼe mole ina leleiʼia pea ʼe mole ina tuku anai ke hoholo atu te ʼu ʼaluʼaga ʼaia. ʼE ʼui e te ʼapositolo ko Soane: “Ko te ʼAtua ʼe ʼofa.” (1 Soane 4:8, MN ) ʼE tokaga moʼoni ia Sehova ki te hahaʼi pea ʼe fehiʼa ki te agakovi. Koia ʼe tau mo feʼauga ke tou kumi te fakaloto fīmālie ki te ʼAtua, heʼe agalelei pea mo manavaʼofa, pea ʼe ina maʼu te mālohi pea ʼe ina pulihi anai te agakovi ʼi te kele. Neʼe tohi fēnei e te tagata fai pesalemo: “[Ko te Hau ʼaē neʼe fakanofo e te ʼAtua ʼi selo ʼe] ina hāofaki anai te masiva ʼaē ʼe pāui ke tokoni age he tahi ki ai, ʼo toe feiā mo ia ʼaē ʼe lotomamahi pea mo ia ʼaē ʼe mole he tahi ke tokoni age ki ai. ʼE fakaʼofaʼofa anai kia ia ʼaē ʼe veliveli pea mo ʼaē ʼe masiva, pea ʼe ina hāofaki anai te ʼu nefesi ʼo te kau masiva. Mai te taʼomia pea mo te agamālohi ʼe ina totogi anai tonatou ʼu nefesi, pea ʼe maʼuhiga anai tonatou toto ki ʼona mata.”—Pesalemo 72:12-14.
ʼE koutou ʼofa koa kia nātou ʼaē ʼe maʼuli mamahi? ʼE mahino ia. Ko te lotoʼofa ʼe ko he kalitate neʼe ʼai e Sehova kia tatou, he neʼe ina fakatupu tatou ki tona paki. (Senesi 1:26, 27) Koia ʼe feala ke tou falala ko Sehova ʼe ʼofa ki te hahaʼi ʼaē ʼe maʼuli mamahi. Ko Sesu ʼaē neʼe ina ʼiloʼi lelei age ia Sehova ia tatou fuli, neʼe ina akoʼi ki te hahaʼi ko Sehova ʼe tokaga lahi kia tatou pea ʼe fonu ia ʼi te manavaʼofa.—Mateo 10:29, 31.
ʼE fakamoʼoni e te ʼu meʼa fuli ʼaē neʼe ina fakatupu ia te tokaga ʼa te ʼAtua ki te malamanei. Neʼe ʼui e Sesu ko te ʼAtua “e ina fakahopoʼake tana laa ki te hahai agakovi mo te hahai agalelei, pea e ina fakaʼua ifo ki te hahai agatonu mo te hahai agahala.” (Mateo 5:45) Ki te hahaʼi ʼo te kolo ʼo Lusitala, neʼe ʼui fēnei e te ʼapositolo ko Paulo: “[Ko te ʼAtua] ʼe mole ina tuku feiā he meʼa kae mole ina fai he fakamoʼoni ʼi tana fai te meʼa ʼaē ʼe lelei, ʼo ina foaki atu kia koutou te ʼua mai te lagi pea mo te ʼu fasiga taʼu ʼe mahu tona ʼu fua, ʼo fakafonu ʼokotou ʼu loto ʼaki te meʼa kai pea mo te fiafia.”—Gaue 14:17, MN.
Ko Ai ʼAē ʼe Tupu Ai Te Agakovi?
ʼE koutou fakatokagaʼi pe koteā ʼaē neʼe ʼui e Paulo ki te hahaʼi ʼo Lusitala: “Nee fakagafua e ia [te ʼAtua] i te u taitupu afea, ki te atu puleʼaga, ke tahi alupe te puleaga i ona ala.” Koia ko te ʼu puleʼaga—peʼe ko te hahaʼi totonu pe—ʼaē ʼe tupu ai tonatou ʼu malaʼia. ʼE mole ko te ʼAtua ʼaē ʼe tonu ke tukugakoviʼi ki te faʼahi ʼaia.—Gaue 14:16.
He koʼe ʼe fakagafua e Sehova ke hoko te ʼu meʼa ʼaia? ʼE mole ina fai anai koa he puleʼaki kiai? ʼE feala pe ke tou maʼu te ʼu tali ki te ʼu fehuʼi ʼaia ʼi te Folafola ʼa te ʼAtua. Koteʼuhi ko te tali ki te fehuʼi ʼaia ʼe ʼi ai tona pikipikiga mo te tahi laumālie fakapulipuli pea mo te fehuʼi neʼe ina lagaʼi ʼi te potu fakalaumālie.
[Paki ʼo te pasina 4]
Ko te hahaʼi ʼe lotoʼofa. ʼE meʼa noaʼi koa e te ʼAtua te ʼu mamahi ʼo te malamanei?