Ko Te Lotu Faka Kilisitiano Moʼoni ʼe Tuputupu
KO TE minisitelio ʼa Sesu Kilisito neʼe malave mālohi ki te mālama ʼo te ʼuluaki sēkulō. Neʼe ʼofolele te hahaʼi, koteʼuhi ko tana logo neʼe fakaloto mālohi, mo ina faka mālamaʼi te hahaʼi, pea mo malave ki tonatou loto. Tokolahi ia nātou ʼaē neʼe fakalogo ki tana faiakonaki, neʼe malave ki tonatou loto tana ʼu palalau.—Mateo 7:28, 29.
ʼAki he lototoʼa, neʼe fakafisi ia Sesu ki te faifaitahi mo te kau takitaki lotu agakovi, pea mo te kau takitaki faka politike agakovi ʼo tona temi, kae neʼe ina tuku ke fakaōvi age kia te ia te hahaʼi fuli pe. (Mateo 11:25-30) Neʼe ina tala fakahagatonu ko te ʼu laumālie agakovi ʼe nātou pule ki te kele pea mo ina fakahā kia nātou ʼaia te mālohi ʼaē neʼe foaki age e te ʼAtua kia te ia. (Mateo 4:2-11, 24; Soane 14:30) Ko Sesu neʼe ina fakamahino lelei te pikipikiga maʼuhiga ʼo te mamahi pea mo te agahala, pea ʼaki he agaʼofa neʼe ina fakahā ʼe tou maʼu anai he fakafīmālie ʼo heʼegata ʼaki te Puleʼaga ʼo te ʼAtua. (Maleko 2:1-12; Luka 11:2, 17-23) Neʼe ina fakamahino ʼo talu ai te ʼulugaaga moʼoni ʼo tana Tāmai, ʼo ina fakaʼilo te huafa ʼo te ʼAtua kia nātou fuli ʼaē neʼe nātou fia felogoi takitokotahi mo Ia.—Soane 17:6, 26.
Koia ʼe mole fakapunamaʼuli ai ki te mafola vave ʼa te logo fakafiafia ʼaia neʼe tala e te ʼu tisipulo, logola tonatou fakatagaʼi mālohi e te lotu pea mo te politike. Ia teitei taʼu e 30, neʼe fakatuʼu te ʼu kokelekasio faka Kilisitiano lotomālohi ʼi Afelika, mo Asia, pea mo Eulopa. (Kolose 1:23) Ko te ʼu moʼoni faigafua ʼaē neʼe akoʼi e Sesu neʼe nātou fakamālamaʼi te loto ʼo te hahaʼi agavaivai pea mo faitotonu ʼaē neʼe nonofo ʼi te Puleʼaga katoa ʼo Loma.—Efeso 1:17, 18.
Kae ʼe lava feafeaʼi anai ki te ʼu tisipulo foʼou fuli ʼaia ʼaē ʼe kehekehe tonatou maʼuli faka ekonomika, tonatou agaʼi fenua, tanatou lea, pea mo tanatou lotu, ke nātou logo tahi moʼoni ʼi he “tui e tahi,” ohage ko tona ʼui e te ʼapositolo ko Paulo? (Efeso 4:5) Koteā ʼaē ka tokoni anai kia nātou ke nātou ‘palalau ʼi he logo tahi’ kae ke ʼaua naʼa nātou femaveteʼaki? (1 Kolonito 1:10) ʼUhi ko te mole logo tahi ʼo nātou ʼaē ʼe ʼui ko he kau Kilisitiano ʼi te temi nei, ʼe lelei ke tou vakaʼi te meʼa ʼaē neʼe akoʼi e Sesu totonu.
Te Tafitoʼaga ʼo Te Logo Tahi Moʼoni Faka Kilisitiano
ʼI tona fakamāuʼi ia muʼa ʼo Posio Pilato, neʼe tala e Sesu te tafitoʼaga ʼo te logo tahi faka Kilisitiano. Neʼe ina ʼui fēnei: “Ko te mea aeni, nee au tupu mai ai pea nee au haele mai ai ki te malama-nei, ke au fakamooni ki te mooni. Ko natou fuape o te mooni e natou fakalogo ki toku leo.” (Sonae 18:37) Koia, ko te tali ʼo te ʼu akonaki ʼa Sesu pea mo te ʼu akonaki katoa ʼo te Folafola ʼa te ʼAtua, te Tohi-Tapu, ʼe ko he mālohi lahi ʼaia moʼo faka logo tahi te ʼu tisipulo moʼoni ʼa Kilisito.—1 Kolonito 4:6; 1 Timoteo 3:16, 17.
ʼE moʼoni, ʼi ʼihi temi ʼe lagaʼi anai ʼi te lotolotoiga ʼo te kau tisipulo ʼa Sesu, he ʼu fehuʼi maʼuhiga peʼe nātou fetokakoviʼaki. Koteā ʼaē ka tokoni anai kia nātou? Neʼe fakamahino fēnei e Sesu: “Ka haʼu anai ia ia ʼaia, te laumālie ʼo te moʼoni, pea ʼe ina takitaki anai koutou ʼi te moʼoni katoa, heʼe mole palalau anai ia ʼi tona loto tokotahi, kae ko meʼa fuli ʼaē ʼe logo kiai, ʼe ina tala anai pea ʼe ina tala atu anai kia koutou te ʼu meʼa ʼe hoko mai.” (Soane 16:12, 13, MN ) Koia, ko te laumālie maʼoniʼoni ʼo te ʼAtua ʼe ina faka fealagia ki te ʼu tisipulo moʼoni ʼa Sesu ke nātou mahino ki te moʼoni ʼaē ka fakahā māmālie kia nātou e te ʼAtua. Pea ʼe fakatupu anai e te laumālie ʼaia tona fua, ohage ko te ʼofa, te fiafia pea mo te tokalelei, ʼaē ka lagolago anai ki tanatou logo tahi.—Gaue 15:28; Kalate 5:22, 23.
Neʼe mole loto ia Sesu ke hoko he ʼu tokakovi peʼe ko he ʼu maveuveu ʼi tana ʼu tisipulo, pea neʼe mole ina fakagafua kia nātou ke nātou fakamahino te ʼu moʼoni ʼa te ʼAtua ʼo mulimuli ki tanatou ʼu manatu, moʼo fakaʼalutahi mo te agaʼi fenua peʼe ko tanatou ʼu talatisio faka lotu. Kae ʼi tana pō fakamuli mo nātou, neʼe faikole fakamalotoloto fēnei: “ ʼE mole ʼau fai he kole ʼo ʼuhiga pe mo nātou ʼaenī, kae ʼe ʼau toe fai foki te kole ʼo ʼuhiga mo nātou ʼaē ʼe nātou tui kia te ʼau, ʼuhi ko tanatou palalau. Koteʼuhi ke feala ke nātou logo tahi fuli, ohage pe ko koe Tāmai ʼe ke logo tahi mo ʼau, pea ʼe ʼau logo tahi mo koe, ke toe feiā foki mo nātou ke nātou logo tahi mo tāua, koteʼuhi ke tui te malamanei neʼe ke fekauʼi mai ʼau.” (Soane 17:20, 21, MN ) Ko te logo tahi moʼoni ʼaia ʼi te laumālie pea mo te moʼoni, neʼe ko te fakaʼiloga makehe ʼaia ʼa te ʼu tisipulo ʼa Kilisito talu mai te kamata ʼo aʼu mai ki totatou temi. (Soane 4:23, 24) Kae ia ʼaho nei, ko te ʼu lotu ʼe mole nātou logo tahi, kae ʼe nātou mavetevete. Koteā tona tupuʼaga?
Te Tupuʼaga ʼo Te Mavetevete ʼa Te ʼu Lotu
ʼE tupu te kehekehe lahi ʼo te ʼu akonaki pea mo te ʼu toʼotoʼoaga faka lotu ʼa te hahaʼi ʼaē ʼe nātou lau ko ni kau Kilisitiano ia ʼaho nei, ʼuhi he neʼe mole nātou mulimuli ki te ʼu akonaki ʼa Sesu. Neʼe ʼui fēnei e te tagata faitohi: “Ohage ko te temi muʼa, ko te kau Kilisitiano ʼo te temi nei ʼe nātou toʼo pe nātou te ʼu akonaki ʼa te Tohi-Tapu ʼaē ʼe ʼalutahi mo te ʼu meʼa ʼaē ʼe nātou loto kiai—pea ʼe nātou meʼa noaʼi te ʼu akonaki ʼaē ʼe mole ʼalutahi mo tanatou lotu ʼaē neʼe tutupu ai.” Neʼe ko te meʼa ʼaia ʼaē neʼe fakakikite e Sesu pea mo tana kau ʼapositolo.
Ohage la, ʼaki te laumālie maʼoniʼoni neʼe tohi fēnei e te ʼapositolo ko Paulo ki tona kaugā gāue ko Timoteo: “ ʼE hoko mai anai he temi ʼe mole nātou kātakiʼi anai te akonaki ʼo te fakamaʼuli, kae ʼo mulimuli ki tonatou ʼu holi, ʼe nātou tānaki anai he kau faiakonaki maʼa nātou totonu, ke feala he alaala lelei ʼo tonatou ʼu taliga. Pea ʼe nātou fakamaliu anai tonatou ʼu taliga mai te moʼoni, kae ʼe nātou fakahaga anai ki te ʼu fagana.” ʼE fakahēʼia anai koa te kau Kilisitiano fuli? Kailoa. Neʼe hoko atu fēnei e Paulo: “Kae ko koe, taupau tau poto ia meʼa fuli, kātakiʼi te mamahi, fai te gāue ʼa te tagata faka mafola evaselio, fakahoko katoa tau minisitelio.” (2 Timoteo 4:3-5, MN; Luka 21:8; Gaue 20:29, 30; 2 Petelo 2:1-3) Ko Timoteo pea mo te tahi kau Kilisitiano agatonu neʼe nātou mulimuli ki te tokoni fakaʼatua ʼaia.
ʼE Kei Logo Tahi Te Kau Kilisitiano Moʼoni
Ohage ko Timoteo, ko te kau Kilisitiano moʼoni ia ʼaho nei ʼe nātou aga fakapotopoto ʼo līʼaki te ʼu manatu fakatagata pea mo fakatafito pe tanatou ʼu akonaki ki te Tohi-Tapu. (Kolose 2:8; 1 Soane 4:1) ʼO mulimuli ki te faʼifaʼitaki ʼa te kau Kilisitiano ʼo te ʼuluaki sēkulō, ʼe fakahoko e te kau Fakamoʼoni ʼa Sehova tonatou minisitelio ia fenua e 230 tupu, ʼo nātou tala ki te hahaʼi ʼi te ʼu potu fuli pe, te logo lelei ʼo te Puleʼaga ʼaē neʼe tala e Sesu. Tou vakaʼi te ʼu faʼahi maʼuhiga e fā ʼe nātou faʼifaʼitaki ai kia Sesu ʼi te logo tahi, pea mo maʼuliʼi te Lotu Faka Kilisitiano moʼoni ʼi te ʼu potu fuli pe ʼaē ʼe nātou maʼuʼuli ai.
ʼE fakatafito tanatou ʼu akonaki ki te Folafola ʼa te ʼAtua. (Soane 17:17) Ko te patele ʼi Pelesike neʼe ina tohi fēnei ʼo ʼuhiga mo nātou: “Ko te meʼa ʼaē ʼe feala ke tou ako [ʼi te kau Fakamoʼoni ʼa Sehova] ʼe ko tanatou lotolelei ʼaē ke nātou fakalogo ki te Folafola ʼa te ʼAtua pea mo tanatou lototoʼa ʼo faka mafola te Tohi-Tapu.”
ʼE nātou ʼamanaki ki te Puleʼaga ʼo te ʼAtua moʼo pulihi te ʼu fihifihia ʼi te kele katoa. (Luka 8:1) ʼI Barranquilla, ʼi Colombie, neʼe palalau te Fakamoʼoni mo Antonio, ko he tagata neʼe lagolago mālohi ki te faʼahi faka politike. Neʼe mole lagolago te Fakamoʼoni ki tona faʼahi, pea neʼe mole palalau ia ki he tahi faʼahi faka politike. Kae neʼe ina fakaafe ia Antonio pea mo tona ʼu kiʼi tokolua veliveli ke nātou tali he ako faka Tohi-Tapu ʼe mole totogi. Mole tuai pea neʼe mahino ai kia Antonio ko te Puleʼaga ʼo te ʼAtua ʼe ko te ʼamanaki moʼoni pe ʼaia e tahi maʼa te hahaʼi māsisiva ʼo Colombie pea mo te malamanei katoa.
ʼE nātou fakaʼapaʼapa ki te huafa ʼo te ʼAtua. (Mateo 6:9) ʼI te ʼuluaki felāveʼi ʼa te kau Fakamoʼoni ʼa Sehova mo Maria, ko te fafine Katolika fakamalotoloto ʼe maʼuli ʼi ʼOsitalalia, neʼe ina fakagafua ki te kau Fakamoʼoni ke nātou fakahā age kia ia te huafa ʼo te ʼAtua ʼi te Tohi-Tapu. Neʼe malave feafeaʼi kia Maria? “Neʼe ʼau tagi ʼi taku ʼuluaki sio ki te huafa ʼo te ʼAtua ʼi te Tohi-Tapu. Neʼe malave lahi kia ʼau taku mahino ʼaē neʼe feala ke ʼau ʼiloʼi moʼoni pea mo fakaʼaogaʼi te huafa ʼo te ʼAtua.” Neʼe hoko atu e Maria tana ako te Tohi-Tapu, pea ko te ʼuluaki meʼa ʼaia kua hoko kia ia, ko tana ʼiloʼi te ʼulugaaga ʼo Sehova pea mo ina lava maʼu he ʼu felogoi mo ia ʼo talu ai.
ʼE nātou logo tahi ʼaki te ʼofa. (Soane 13:34, 35) Neʼe ʼui fēnei e te alatike ʼi te nusipepa The Ladysmith-Chemainus Chronicle, ʼi Kanata: “Tatau aipe peʼe koutou kau ʼi he lotu peʼe kailoa, kae ʼe tonu ke koutou fakamālo ki te toko 4 500 kau Fakamoʼoni ʼa Sehova ʼaē neʼe nātou gāue hoholo ʼi te ʼaho fuli pe lolotoga te vāhaʼa katoa pea mo ni ʼu ʼaho, moʼo laga te Fale ʼo te Fakatahi ko meta kale e 2 300 ʼi Cassidy . . . ʼE ʼiloga ko te lotu Faka Kilisitiano moʼoni, koteʼuhi ʼi te gāue ʼaia, neʼe mole nātou kē, mo fihi peʼe nātou laupisiʼi nātou.”
Koia, kua koutou tokagaʼi, ko te kau teolosia ʼo te Keletiate, mo te kau misionea, pea mo te hahaʼi ʼaē ʼe ʼolo ki te ʼēkelesia ʼe nātou haga fefihiʼaki ʼo ʼuhiga mo te kehekehe ʼo tanatou ʼu lotu, kae ko te Lotu Faka Kilisitiano moʼoni ʼe tuputupu ʼi te malamanei katoa. ʼE fakahoko e te kau Kilisitiano moʼoni te minisitelio ʼaē neʼe tuku age ke nātou faka mafola pea mo akoʼi ki te hahaʼi te Folafola ʼa te ʼAtua. (Mateo 24:14; 28: 19, 20) Kapau ʼe koutou kau ia nātou ʼaē ʼe “maʼuli mamahi pea mo fetagihi” ʼuhi ko te ʼu meʼa fakalialia ʼaē ʼe hoko ʼi te temi nei, pea mo nātou ʼaē ʼe maʼuli tuʼania ʼuhi ko te mavetevete ʼo te ʼu lotu ʼo te Keletiate, ʼe mātou fakaafe atu koutou ke koutou fakatahi mo te kau Fakamoʼoni ʼa Sehova ʼi te tauhi faka Kilisitiano logo tahi ʼo te ʼAtua moʼoni pe e tahi, ko Sehova.—Esekiele 9:4; Isaia 2:2-4.