Te ʼu Fehuʼi ʼa Te Kau Lautohi

Ko te fakauku katoa ʼo te sino ki te vai, ʼe ko he fakamaʼua koa ki he tahi ʼe fia papitema, kae ʼe māʼimoa peʼe mahaki kovi, ʼo faigataʼa ai hona fakauku katoa?

Ko te kupu “papitema” ʼe haʼu mai te kupu faka Keleka baptô, ʼaē ʼe faka ʼuhiga ki te “peke.” (Soane 13:26) ʼI te Tohi-Tapu, ʼe faka ʼuhiga tatau te “papitema” mo te “uku.” ʼO ʼuhiga mo te papitema ʼo te tagata Etiopea ʼaē neʼe fakahoko e Filipe, ʼe ʼui fēnei e te Tohi-Tapu The Emphasised Bible ʼa Rotherham: “Neʼe nā hifo ai ki te vai, ia Filipe mo te enuke—pea neʼe ina papitemaʼi ia ia.” (Gaue 8:38) Koia, ko ʼaē ʼe papitemaʼi ʼe fakauku katoa ki te vai.—Mateo 3:16; Maleko 1:10.

Neʼe fakatotonu fēnei e Sesu ki tana kau tisipulo: “Koia, koutou olo o fakahoko he u tisipulo i te atu puleaga, papitema natou.” (Mateo 28:19, 20) ʼO mulimuli ki te koga ʼaia, ʼe fai e te kau Fakamoʼoni ʼa Sehova te ʼu fakatuʼutuʼu ke fai te ʼu papitema ʼi he ʼu foʼi māʼanuʼaga, peʼe ko he ʼu vaitafe ʼe ōvi mai ki te faiʼaga ʼo te fakatahi, kehe pe ke feʼauga te loloto ʼo te vai moʼo fakauku katoa ia nātou ʼaē ʼe fia papitema. Mai te ʼaluʼaga ʼaē ko te papitema ʼaē ke fakauku katoa ʼe ko he maʼua faka Tohi-Tapu, ʼe mole ʼi ai he tagata ʼe ina lava tāʼofi he tahi ke papitemaʼi feiā. Koia, ʼe tonu ke papitemaʼi he tahi kua loto ki te faʼahi ʼaia, tatau aipe peʼe tonu ke fai he ʼu fakatuʼutuʼu makehe. Ohage la, neʼe fai te ʼu papitema ʼi te ʼu foʼi māʼanuʼaga lalahi moʼo faka faigafua kia nātou ʼaē kua matutuʼa pea mo nātou ʼaē ʼe kovi tonatou mahaki. Neʼe fakamāfana te vai ʼo te foʼi māʼanuʼaga pea neʼe fakauku māmālie ia ia ʼaē neʼe ʼamanaki papitema, pea neʼe hoki fakauku katoa ia ia ʼi te kua māhani leva ʼo tona sino ki te māfana ʼo te vai.

Māʼia mo te ʼu hahaʼi neʼe lavea kovi neʼe nātou papitema. Ohage la, neʼe papitemaʼi te ʼu hahaʼi ʼe ʼi ai tonatou pu ʼi tonatou kia, pea mo ʼihi neʼe mānava ʼaki te masini. ʼE moʼoni, ʼe lagi tonu ke teuteuʼi fakalelei te taʼi papitema ʼaia. ʼE lagi lelei anai ke ʼi ai he afilimie ʼe poto lelei ʼi te taʼi ʼaluʼaga ʼaia peʼe ko he tōketā. Kae mokā fai he ʼu fakatuʼutuʼu makehe, ʼe feala te papitemaʼi ʼo te hahaʼi. Koia, ʼe tonu ai ke fai he ʼu fakatuʼutuʼu fakapotopoto ke papitemaʼi he tahi ʼi te vai, mo kapau ʼe loto moʼoni kiai he tahi pea mo ina tali ke uku logola te ʼu faigataʼaʼia ʼaē ʼe feala ke hoko ʼaki te potu ʼaia.