5 Tokoni
Kotou Fakafīmālieʼi Tokotou Maʼuli Fakalaumālie
KOTEĀ ʼAĒ ʼE AKOʼI MAI ʼI TE TOHI-TAPU? “Fiafia ia nātou ʼaē ʼe natou ʼiloʼi tonatou masiva fakalaumālie.”—Mateo 5:3.
HE KO’Ē ʼE FAIGATAʼA? E lauʼi afe te ʼu lotu kehekehe, pea ʼe lahi ʼi te ʼu lotu ʼaia ʼe mole tatau tanatou faʼahiga faiakonaki moʼo fakafīmālieʼi ia tokotou maʼuli fakalaumālie. ʼE feafeaʼi hakotou ʼiloʼi peʼe ko te lotu fea ʼaē ʼe ina akoʼi te moʼoni pea mo leleiʼia moʼoni e te ʼAtua? ʼE ʼui e ʼihi tagata faitohi ʼiloa, ʼe mole ko he manatu fakapotopoto ia te tui ʼaē ki te ʼAtua pea mo te tauhi ʼaē kiā te ia, pea ʼe fakatupu kovi. ʼI te nusipepa Maclean’s, ʼe fakamatala fakanounou ai te ʼu manatu ʼa te tagata ʼiloa ʼe mole tui ki te ʼAtua: “ ʼI te akoʼi ʼaē e te Keletiate, ʼe mole faʼa maʼuhiga te maʼuli ʼo te temi ʼaenī, ʼe fakatupu ʼaki ai te vaʼiganoa ʼo te maʼuli ʼaenī, pea mo uga ai te hahaʼi ke natou fai he ʼu aga ʼe kovi.”
KOTEĀ ʼAĒ ʼE FEALA KE KOTOU FAI? Kotou vakaʼi te fakamoʼoni ʼaē ko te ʼAtua ʼe maʼuli. (Loma 1:20; Hepeleo 3:4) ʼAua naʼa kotou tuku ke fakalotovaivaiʼi koutou e he tahi ʼo ʼuhiga mo takotou kumi ʼaē ʼo te ʼu tali ki te ʼu fehuʼi maʼuhiga, ohagē lā ko te ʼu fehuʼi ʼaenī: He koʼē koa ʼe tou māʼuʼuli ʼi te kele? ʼE hoko atu koa te maʼuli ʼi te hili ʼo te mate? He koʼē ʼe lahi ʼaupitō te mamahi? Koteā ʼaē ʼe fakamaʼua mai e te ʼAtua kiā au? ʼE maʼuhiga te maʼu ʼo te ʼu tali ki te ʼu fehuʼi maʼuhiga ʼaia heʼe tokoni atu ke kotou maʼu ia he maʼuli fakafeʼauga.
Kae ʼaua naʼa kotou hoko tui ki te ʼu meʼa ʼaē ʼe tala atu e te hahaʼi. Ko te Folafola ʼa te ʼAtua ʼe ina fakalotomālohiʼi atu koutou ke kotou fakaʼaogaʼi “tokotou ʼatamai,” ke feala ai hakotou ʼiloʼi peʼe koteā te meʼa ʼaē ʼe lelei kiā te ia. (Loma 12:1, 2) ʼE tapuakiʼi anai takotou ʼu faiga. Kapau ʼe kotou tuku he temi ki te ako ʼo te Tohi-Tapu pea mo kotou maʼuliʼi tana ʼu tokoni, ʼe kotou tekeʼi ai anai te ʼu fihifihia, mo fakasiʼisiʼi ia tokotou loto hoha pea mo hikihiki age anai ia tokotou fiafia ʼaē ʼi tokotou maʼuli. ʼE feala ke kotou falala ki te fakapapau ʼaia. Ko te toko lauʼi miliona hahaʼi mai te ʼu haʼuʼaga kehekehe, neʼe fua lelei ki tonatou maʼuli ia tanatou ako te moʼoni ʼo ʼuhiga mo te ʼAtua pea mo tana ʼu fakatuʼutuʼu.
Kā kotou maʼuliʼi te ʼu tokoni fakapotopoto ʼaē ʼi te Tohi-Tapu, pea ʼe mālohi age anai takotou tauhi ʼaē ki te ʼAtua. Kotou tali te fakaafe ʼaē ʼe fai atu e te kau Fakamoʼoni ʼa Sehova, ke fai hakotou ako Tohi-Tapu. Kapau ʼe kotou fai te faʼahi ʼaia, pea ʼe mahino papau ia ʼe kotou manatu tahi anai mo te ʼapositolo ko Paulo ʼaē neʼe ina tohi fēnei: “ ʼE moʼoni, ʼe fakatupu maʼu koloa te pipiki ki te ʼAtua pea mo te maʼuli fakafeʼauga.”—1 Timoteo 6:6.
[Paki ʼo te pasina 8]
Ke kotou ʼiloʼi peʼe koteā te meʼa ʼaē ʼe lelei ki te ʼAtua