Te Fīmālie Moʼoni: Ko Te Tauhi ʼAē Kia Sehova

“Manuʼia ia ia ʼaē ko tona tauʼaga ko te ʼAtua ʼo Sakopo, pea ko tona falala aga ko Sehova, tona ʼAtua.” — Pesalemo 146:5.

1, 2. Koteā ʼaē neʼe ʼui ʼo ʼuhiga mo te fakamatala ʼo te fīmālie, pea koteā te ʼuhiga ʼo te fīmālie maʼa te tokolahi ʼi totatou temi?

KOTEĀ te ʼuhiga ʼo te fīmālie? Ko nātou ʼaē ʼe nātou sivi te ʼu lea, mo te kau filosofia pea mo te kau teolosia neʼe nātou ʼahiʼahi fakamatala te ʼuhiga ʼo te kupu ʼaia lolotoga ʼo te ʼu sekulo. Kae, neʼe mole nātou maʼu hona fakamatala tatau. ʼE ʼui e te Tohi lahi fakapilitānia fēnei: Ko te kupu ʼaē “ ‘Fīmālie’ ʼe ko he kupu faigataʼa ia ʼi te ʼu kupu fuli”. Ko te kupu ʼaē fīmālie ʼe faka ʼuhiga kehekehe e te hahaʼi ʼo ʼuhiga mo tanatou ʼu manatu ʼaē ki te maʼuli.

² Maʼa te tokolahi, ko te fīmālie, ko te maʼuli haohaoa, te maʼu ʼo te ʼu koloā fakamālama, pea mo te ʼu kaumeʼa ʼofa. Kae, ʼe hahaʼi ia nātou ʼaē ʼe nātou maʼu te ʼu meʼa fuli ʼaenī, kae ʼe mole nātou fiafia ai pe la. Ki te ʼu tagata pea mo te ʼu fafine ʼaē kua nātou foaki tonatou maʼuli ki te ʼAtua, ko te Tohi-Tapu ʼe ina fakahā ʼo ʼuhiga mo te fīmālie, ko tona fakamatala ʼe mole tatau ia mo te manatu ʼa te tokolahi.

Te manatu kehekehe ʼo ʼuhiga mo te fīmālie

3, 4. a) Ko ai koa ʼaē neʼe ʼui e Sesu ʼe fiafia? b) Koteā ʼaē ʼe feala ke tou fakatokagaʼi ʼi te ʼu meʼa ʼaē ʼo ʼuhiga mo te fīmālie ʼaē neʼe talanoa ki ai ia Sesu?

³ ʼI te akonaki ʼaē ʼa Sesu ʼi te moʼuga, neʼe mole ina ʼui ia ko te fīmālie ʼe maʼu mai te maʼuli haohaoa mai te ʼu mahaki, mai te ʼu koloā fakamālama, pea mo ʼihi age pe ʼu meʼa tatau. Neʼe ina ʼui ko te fīmālie moʼoni ʼe ia nātou “ ʼaē ʼe nātou ʼiloʼi te maʼuhiga ʼo te ʼu meʼa fakalaumālie kia nātou” pea mo “nātou ʼaē ʼe fia kakai pea mo fia ʼiʼinu ki te faitotonu”. ʼI tana fakahā te ʼu meʼa maʼuhiga ʼaia e lua ʼo ʼuhiga mo te fīmālie moʼoni, neʼe tala e Sesu te tahi meʼa ʼe teitei tatau, ʼo fēnei: “Manuʼia ia nātou ʼaē ʼe lotomamahi, heʼe fakafimālie anai ia nātou.” (Mateo 5:3-6). ʼAua leva naʼa manatu, neʼe ʼui e Sesu ʼe fiafia anai he tahi mokā puli hona kāiga neʼe ʼofa ki ai. Neʼe ina talanoa ia kia nātou ʼaē ʼe lotomamahi ʼo ʼuhiga mo tonatou natula agahala pea mo tona ʼu fua kovi.

⁴ Neʼe palalau ia te ʼapositolo ko Paulo ki te hahaʼi ʼaē ʼe goʼegoʼe ʼi te agahala ʼuhi ko te falala ʼaē ka nātou “ ʼāteaina mai anai mai te popūla ʼo te fakahala”. (Loma 8:21,22.) Ko te ʼu hahaʼi ʼaē ʼe nātou tali te fakatuʼutuʼu ʼofa ʼaē mai ia Sehova ʼaki te sakilifisio ʼo Sesu pea mo nātou fai te finegalo ʼo te ʼAtua, ʼe nātou fīmālie moʼoni anai pea mo fiafia (Loma 4:6-8). ʼI te akonaki ʼaē ʼi te moʼuga, neʼe toe ʼui e Sesu manuʼia “ia nātou ʼaē ʼe agamālū”, “ ʼe manavaʼofa”, “loto maʼa” pea “mo manako ki te tokalelei”. ʼE ina foaki te fakapapau, logope he fakataga, ko te kau agavaivai ʼaia ʼe molemo puli ia nātou ʼaia te fīmālie (Mateo 5:5-11). ʼE maʼuhiga te ʼiloʼi ʼaē ko te ʼu meʼa ʼaia ʼo ʼuhiga mo te fīmālie maʼoluga, ko te tagata maʼu meʼa pea mo te tagata masiva ʼe mole honā kehekehe.

Te tafitoʼaga ʼo te fīmālie moʼoni

5. ʼE fakatafito koa ki te ā te fīmālie ʼaē ʼa te ʼu kaugana ʼa te ʼAtua?

⁵ Ko te matapuna ʼo te fīmālie moʼoni ʼe mole maʼu mai ia mai te ʼu koloā fakamālama. Ko te hau poto ʼaē ko Salomone neʼe ina ʼui fēnei: “Ko te tapuakina ʼa Sehova — ko ia ʼaia ʼe maʼuhiga, pea ʼe mole maʼu ai he ʼu mamahi.” (Tāʼaga Lea 10:22). Ki te ʼu meʼa maʼuli ʼaē ʼe nātou ʼiloʼi ko Sehova ko te Tuʼi Pule ʼo te ʼatulaulau, ko te fīmālie ʼe pikipiki tāfito ki te ʼu tapuaki ʼa te ʼAtua. Ko he tahi kua ina foaki tona maʼuli kia Sehova kua ina maʼu pea mo logoʼi Tana tapuaki, ʼe fiafia moʼoni ia. Ko te manatu faka tohi-tapu, ko te fīmālie ʼe ʼalu tahi mo tatatou fiafia ʼo ʼuhiga pea mo te gataʼaga ʼo totatou maʼuli pea mo fiafia ʼi te gāue ʼa Sehova.

6. Koteā ʼaē ʼe tonu ke fai e te hahaʼi ʼa Sehova ke nātou maʼu te fiafia moʼoni?

⁶ Ko te fīmālie moʼoni ʼe fakalogo ki te vahaʼa lelei ʼaē mo Sehova. ʼE fakatafito ʼaki te ʼofa ʼaē ki te ʼAtua pea mo te agatonu ʼaē kia te ia. Ko te ʼu kaugana ʼa Sehova kua foaki tonatou maʼuli kia te ia, neʼe nātou muliʼi katoa te ʼu palalau ʼaenī ʼa Paulo: “ ʼE mole he tahi ia tatou ʼe maʼuli ʼo ʼuhiga pe maʼa ia (...), ʼE tou maʼuʼuli maʼa Sehova, (...) kua foaki tatou maʼa Sehova.” (Loma 14:7, 8). Koia ʼaē, ko te fīmālie moʼoni ʼe maʼu mai pe ia mai te fakalogo ʼaē kia Sehova pea mo fai fakafiafia tona finegalo. Neʼe ʼui fēnei e Sesu: “Manuʼia ia nātou ʼaē ʼe nātou fagono ki te folafola a te ʼAtua pea mo nātou taupau.” — Luka 11:28.

Te ʼu meʼa faka temi ʼo he fīmālie

7, 8. a) ʼE feafeaʼi koa hatatou faka ʼaluʼalu te ʼu meʼa ʼo ʼuhiga mo te fīmālie? b) Koteā tatatou ia ʼui ʼo ʼuhiga mo te ʼohoana pea mo te fanaunau?

⁷ ʼE feala ke tou faka ʼuhiga te ʼu meʼa ʼaenī kua hili age ʼo ʼuhiga mo te fīmālie ʼe “maʼuhiga tāfito” pe ʼe “tuʼumaʼu”, heʼe lelei pe ia ki te kau kaugana ʼa Sehova ʼi te ʼu temi fuli pe. Kae, ʼe ʼi ai pe ʼihi ʼu meʼa ʼe feala ke tou toʼo “ko he ʼu meʼa faka temi”, he ʼu meʼa ʼe feala ke nātou foaki te fīmālie ʼi hona temi totonu, kae siʼisiʼi leva ia, pe ʼe noa pe la ia ʼi he tahi age lakaga. ʼI te ʼu temi ʼo te ʼu pateliaka pea ʼi muʼa atu ʼo te temi kilisitiano, ko te ʼohoana pea mo te fanaunau neʼe ko he meʼa maʼuhiga ia ke tupu ai he fīmālie. ʼE ʼiloga te faʼahi ʼaia ʼi te temi ʼaē neʼe kole age ai e Lasele kia Sakopo, ʼo fēnei: “Foaki mai kia te ʼau haku fānau, naʼa ʼe ʼau hage anai he mate.” (Senesi 30:1). Ko te manatu ʼaia ʼo ʼuhiga mo te fanaunau neʼe tau mo te fakatuʼutuʼu ʼa Sehova ʼo ʼuhiga mo te temi ʼaia. — Senesi 13:14-16; 22:17.

⁸ Neʼe faka ʼuhiga e te ʼu kaugana ʼa Sehova ʼo te ʼu temi ʼaia ia te ʼohoana pea mo te fanaunau ohage ko he ʼu tapuakina mai te ʼAtua. Kae ko te ʼu meʼa ʼaia pea mo ʼihi age pe ʼu meʼa, neʼe toe fakatupu mamahi aipe ia kia nātou ʼi te ʼu temi faigataʼa ʼo tonatou maʼuli (fakatatau mo Pesalemo 127, 128 pea mo Selemia 6:12; 11:22; Tagilāulau 2:19; 4:4, 5). ʼE ʼiloga mai ai, ko te ʼohoana pea mo te fanaunau neʼe mole ko he ʼu meʼa ʼo he fīmālie heʼe gata.

Te kau selipatea fiafia ʼo te temi ʼāfea

9. He koʼe neʼe maʼu e te ʼofafine ʼo Sosafate te ʼu fakavikiviki ʼi te taʼu fuli pe?

⁹ Tokolahi te kau kaugana ʼa Sehova neʼe nātou maʼu te fīmālie moʼoni logope ʼe mole heʼeki nātou ʼohoana. ʼI tana fakaʼapaʼapa ki te fakapapau ʼa tana matuʼa, ko te ʼofafine ʼo Sosafate neʼe nofo selipatea. Lolotoga ʼo he temi, ko ia pea mo tona ʼu kaumeʼa neʼe nātou fetagihi ki tona taupoʼou. Kae, ʼe ko he meʼa fakafiafia ʼaē neʼe ina maʼu ʼi tana gāue katoa ʼi te fale ʼo Sehova, lagi ia nātou ʼaē “ko te ʼu fafine kaugana neʼe nātou fai ʼi te huʼaga ʼo te fale fono he gāue neʼe faʼufaʼu”! (Ekesote 38:8.) ʼI te taʼu fuli pe neʼe ina maʼu te ʼu fakavikiviki. — Kau Fakamāu 11:37-40.

10. Koteā ʼaē neʼe loto ki ai Sehova ʼo ʼuhiga mo Selemia, pea neʼe tupu ai koa hona maʼuli malaʼia?

¹⁰ ʼI te faigataʼa ʼo te temi ʼo te polofeta ko Selemia, neʼe fakatotonu age e te ʼAtua ke ʼaua naʼa ʼohoana pea mo fanaunau (Selemia 16:1-4). Pea neʼe sio foki ia Selemia ki te moʼoni ʼo te ʼu palalau ʼaenī ʼa te ʼAtua: “Tapuakiʼi te tagata maʼuli ʼaē ʼe ina tuku tana falala kia Sehova, pea kua liliu ia Sehova ko tona tauʼaga!” (Selemia 17:7). Lolotoga taʼu e 40 ʼo tana gāue faka polofeta, neʼe gāue agatonu ia Selemia ki te ʼAtua ʼi tona temi selipatea. ʼI te ʼu meʼa ʼaē ʼe tou mahino ʼo ʼuhiga mo ia, neʼe mole ʼohoana ia pea mo maʼu hana fānau. Pea tahi, ko ai ʼe lotolotolua anai mo te fiafia ʼaē ʼo Selemia, feiā aipe ki te kau agatonu ʼo te toe ʼaē ʼo te kau sutea ʼaē neʼe nātou ‘liliu ʼo fiafia ʼo ʼuhiga mo te loto ʼofa ʼo Sehova’? — Selemia 31:12.

11. ʼI te Tohi-Tapu, ko ai koa te ʼu faʼifaʼitakiʼaga ʼe tou maʼu ai ʼo ʼuhiga mo te ʼu kaugana agatonu ʼa Sehova neʼe fiafia logope neʼe mole honatou ʼohoana?

¹¹ Tokolahi ʼihi ʼu hahaʼi kei selipatea pe ʼe ko ni ʼu fafine vitua neʼe nātou gāue fiafia kia Sehova logope neʼe mole honatou ʼohoana. Ia nātou ʼaia, neʼe kau ai te fafine polofeta ko Ana; lagi mo Dorcas pe ʼe ko Tapita; te ʼapositolo ko Paulo; pea mo te faʼifaʼitakiʼaga lahi ʼo tatou fuli: ko Sesu Kilisito.

Selipatea kae fiafia pe ʼi totatou temi

12. Koteā ʼaē ʼe fakamuʼamuʼa ʼe ʼihi kaugana fiafia ʼa Sehova ia ʼaho nei, pea koteā tona tupuʼaga?

¹² Ia ʼaho nei, ko te lauʼi afe kau Fakamoʼoni ʼa Sehova ʼe nātou kaugana agatonu ki te ʼAtua logope ʼe mole nātou ʼohoana. Ko ʼihi neʼe feala ke nātou tali te fakaafe ʼa Sesu ʼaenī: “Ko ʼaē ʼe ina fealagia te faʼahi ʼaia [te nofo selipatea], ke nofo ʼi te faʼahi ʼaia!” Neʼe nātou fai te meʼa ʼaia “ ʼuhi ko te puleʼaga ʼo selo”. (Mateo 19:11, 12.) Ko tona ʼuhiga, neʼe nātou fakaʼaoga lelei tonatou ʼāteaina ʼaē mai te ʼAtua ʼo foaki he temi ʼe lahi pea mo foaki tonatou mālohi moʼo lagolago te ʼu gāue ʼo te Puleʼaga. Tokolahi ia nātou ʼaia ʼe nātou pionie, misionea, pe ʼe kau ki te famili ʼo te Petele ʼi te Kolesi pule ʼo te Sosiete Watch Tower pe ʼe ʼi hona ʼu filiale.

13. Koteā koa te ʼu faʼifaʼitakiʼaga ʼe ʼiloga mai ai ko he kilisitiano ʼe feala nofo selipatea pea mo fiafia?

¹³ Ko te hisitolia ʼo te tuagaʼane ʼofaina kua finematuʼa ia ʼaho nei, neʼe fakamatala fakapilitānia tona maʼuli ʼi te alatike ʼe fēnei tona tite maʼuhiga: “Ko he pionie finetaka pea mo fiafia.” (Te Tule Leʼo (fakapilitānia), ʼaho 1 ʼo maio 1985, te ʼu pasina 23 ki te 26). Ko he tahi tuagaʼane finetaka neʼe gāue ʼi te Petele lolotoga ʼi taʼu e 50 tupu neʼe ina ʼui fēnei: “ ʼE ʼau fiafia ʼaupito ʼi toku maʼuli pea mo taku gāue. ʼE ʼau fai toku maʼua, ʼe ʼau fakapelepeleʼi pea kua toe ʼasili age taku gāue mālohi. ʼE mole ʼau fakahemala pe la. Kapau ko he meʼa ʼe tonu ke toe kamata, ʼe ʼau toe fai pe anai te tonu ʼaenī.” — Te Tule Leʼo (fakafalani), ʼaho 15 ʼo sepetepeli 1982, pasina 15.

14, 15. a) ʼI te ʼapositolo ko Paulo, koteā ʼaē ʼe maʼuhiga moʼo taupau te nofo selipatea? b) He koʼe ʼe ʼui e Paulo ko he tahi ʼe selipatea “ ʼe lelei age ia” pea mo ‘fīmālie age ia’?

¹⁴ Koutou fakatokagaʼi te kupu ʼaenī: “tonu”. Neʼe tohi fēnei e Paulo: “Kapau ʼe fakatotonu lelei e he tahi ʼi tona loto, pea molemo nofo ʼi te faigataʼa ia, kapau ʼe pule faʼitaliha ki tona loto pea mo fakatotonu ʼi tona mafu: ke ina taupau tona nofo taupoʼou, ʼe ko he meʼa lelei ia. Pea tahi, ko ʼaē ʼe ina foaki tona taupoʼou ʼo ʼohoana ʼe lelei, kae ko ʼaē ʼe mole ina foaki ʼe toe lelei age ia.” (1 Kolonito 7:37, 38). He koʼe “ ʼe lelei age ia”? ʼE fakamahino mai e Paulo: “ ʼE ʼau loto ke koutou hala mai te tuʼania. Ko te tagata ʼaē ʼe mole ʼohoana ʼe ina tuʼania ia te ʼu meʼa ʼo te ʼAliki, ʼe feafeaʼi tana maʼu te ʼofa ʼo te ʼAliki. (...) Feiā aipe ki te fafine finetaka, ohage ko ia ʼe taupoʼou ʼe tuʼania ia te ʼu meʼa ʼo te Aliki (...). Kae ʼe ʼau ʼui atu te meʼa ʼaia ke fua lelei kia koutou takitokotahi, (...) ke koutou maʼuʼuli ʼi te meʼa ʼaē ʼe lelei pea mo te meʼa ʼaē ʼe fakaliliu ʼaki te tauhi katoa ki te ʼAliki, ʼe mole fakaleluʼi ia.” — 1 Kolonito 7:32-35.

¹⁵ “Te tauhi katoa ki te ʼAliki, ʼe mole fakaleluʼi ia”, neʼe fai moʼo maʼu “te ʼofa ʼo te ʼAliki”, ʼe maʼu ai koa te fīmālie? ʼI te talanoa ʼa Paulo, ei, ʼe maʼu ai te fīmālie. ʼO ʼuhiga mo he kilisitiano ʼe liliu anai ko he fafine vitua, neʼe ina ʼui fēnei: “Kua ʼāteaina ia ke ʼohoana mo he tahi ʼe loto ki ai, ʼi te ʼAliki pe. Kae, ʼe lagi fīmālie age pe ia, ʼi taku manatu, kapau ʼe maʼuli tokotahi. ʼE ʼau manatu pe foki ʼe ʼau toe nofo mo te laumālie ʼo te ʼAtua.” — 1 Kolonito 7:39, 40.

Te ʼu maui mālie ʼo te selipatea

16. Koteā te ʼu faʼahiga ʼaluʼaga maui mālie ʼe tau mo te kau Fakamoʼoni ʼa Sehova ʼaē ʼe mole heʼeki ʼohoana?

¹⁶ Kapau ʼe nofo selipatea he kilisitiano he neʼe ina fakatotonu ke nofo feiā pe ʼe ʼuhi ko ni ʼu faʼahiga ʼaluʼaga kehe age, ko tona ʼaluʼaga ʼaia ʼe fua kia ia te ʼu ʼaluʼaga ʼe maui mālie lahi. Ko te hahaʼi selipatea ʼe lahi tonatou temi moʼo ako te Folafola ʼa te ʼAtua pea mo metitasioʼi. Kapau ʼe nātou fakaʼaoga lelei tonatou ʼaluʼaga ʼaia, ko tonatou maʼuli fakalaumālie ʼe toe ʼasili ake ia. ʼI te mole ʼi ai honatou hoa ke nātou palalau ki ʼonatou fihifihia, tokolahi ia nātou ʼaia ʼe nātou ako ʼo falala ʼaupito kia Sehova pea mo kumi tana taki ʼi te ʼu faʼahi fuli (Pesalemo 37:5). ʼO toe tokoni aipe kia nātou ke nātou fakaloloto tonatou vahaʼa pea mo Sehova.

17, 18. a) Koteā te ʼu fealagia ki te kau kaugana ʼa Sehova ʼaē ʼe mole heʼeki nātou ʼohoana ke nātou gāue lahi ai? b) Koteā koa te ʼui ʼa te kau kaugana ʼa Sehova ʼaē ʼe mole heʼeki ʼohoana ʼo uhiga mo tonatou fīmālie?

¹⁷ Ko te kau kilisitiano kei selipatea ʼe feala ke nātou gāue ʼaupito ki te fakavikiviki ʼaē ʼo Sehova. Ko te faʼufaʼu makehe ʼaē ʼe fai e te Sosiete ʼi te Ako faka minisitelio ʼaē ʼe foaki pe ki te ʼu tēhina kei selipatea pe ʼe kua mamate tonatou ʼu hoa. ʼE toe ʼāteaina pe foki mo te ʼu tuagaʼane selipatea ʼaē ʼe nātou loto ki ni ʼu pilivilesio ʼo ʼuhiga mo te gāue ʼaē ki te ʼAtua. Ko te tuagaʼane ʼaē neʼe kua tou palalau ki ai ʼi te palakalafe 13, neʼe ʼina tali lelei ke ʼalu ʼo gāue ʼi Afilika, logope ohage ko tana ʼui “ko ia ko te fafine pelepelegesi kua taʼu 50 tupu”. Logope te tapuʼi ʼaē ʼo te gāue ʼi te fenua ʼaia pea mo te kapu ʼaē ʼo te ʼu misionea fuli, neʼe nofo ai pe ia. ʼE lolotoga pionie nei ʼi te fenua ʼaia, logope tona kua taʼu 80 tupu. ʼE fiafia koa ia? ʼI te hisitolia ʼo tona maʼuli, ʼe ina tohi fēnei: “Neʼe feala ke ʼau fakaʼaoga toku ʼāteaina pea mo te ʼu fealagia lahi ʼo te taka selipatea moʼo gāue mālohi ʼi te minisitelio, pea neʼe ʼau maʼu ai te fīmālie lahi. (...) Lolotoga ʼo te ʼu taʼu, ko toku vahaʼa pea mo Sehova neʼe toe ʼasili loloto ia. ʼI toku ʼuhiga fafine selipatea ʼi te fenua ʼo Afilika, ko ia pe neʼe ʼau fakaʼaoga ohage ko hoku Taupauʼaga.”

¹⁸ ʼE toe maʼuhiga foki te ʼu palalau neʼe fai e te tēhina neʼe kaugana ʼi te Kolesi pule ʼo te Sosiete Watch Tower lolotoga ʼi te ʼu temi ʼe loaloaga ʼaupito. Neʼe fiafia, logope neʼe mole hona ʼohoana pea mo ina taupau tana falala ʼaē ke maʼuli ʼi te lagi ʼaē ʼe mole hoko ai he fai ʼohoana. ʼI tona taʼu 80, neʼe ina tohi fēnei: “ ʼI te ʼaho fuli pe, ʼe ʼau kole ki tatatou Tāmai ʼaē ʼi selo ke ina tokoni mai pea mo foaki mai te fakapotopoto ke ʼau mālohi aipe ʼi te faʼahi fakalaumālie pea mo te faʼahi fakasino, pea mo maʼuli haohaoa koteʼuhi ke feala aipe he hoko atu ʼo taku fai tona finegalo. ʼI te ʼu taʼu ʼaē ʼe nimagofulu neʼe ʼau gāue ai kia te ia, neʼe lelei toku maʼuli, neʼe tapuakiʼi pea mo foaki mai kia te ʼau te ʼu fakafimālie lahi. ʼAki te agalelei makehe ʼaē ʼa Sehova, ʼe ʼau fakaʼamu aipe ke ʼau gāue ki tona huafa pea mo tona kolōlia, pea mo toe fua lelei ki tana hahaʼi. (...) [Ko te] fiafia ʼa Sehova neʼe ina tokoniʼi aipe ʼau ʼi te tau matalelei ʼo te tui, ʼo kaku ki te ʼaho ʼaē ko te kau fili ʼo te ʼAtua ʼe nātou pupuli anai pea ko te kele katoa ʼe fonu anai ʼi te kolōlia.” — Faka au 14:21; Nehemia 8:10; Te Tule Leʼo, ʼaho 1 ʼo novepeli 1969, te ʼu pasina 667 ki te 670.

Ko te fīmālie moʼoni ʼe fakalogo koa ki te ā?

19. ʼE fakalogo tuʼumaʼu koa ki te ā totatou fīmālie?

¹⁹ Ko totatou vahaʼa maʼuhiga pea mo Sehova, tona ʼofa pea mo tana tapuaki, ko te ʼu meʼa ʼaia ʼe nātou foaki mai kia tatou te fīmālie heʼe gata. Kapau ʼe tou ʼio ki te faʼahi ʼaenī ʼo ʼuhiga mo te maʼu ʼo te fīmālie moʼoni, tatau aipe pea mo te ʼu kaugana ʼa Sehova kua ʼohoana ʼe nātou mahino ko te ʼohoana ʼe mole ko te faʼahi maʼuhiga ʼaia ʼo tonatou maʼuli. ʼE nātou muliʼi te tokoni ʼaenī ʼa te ʼapositolo ko Paulo: “Koʼeni ʼe ʼau ʼui atu, ʼu tēhina: te temi kua nounou. Koia, ko nātou fuli ʼe maʼu ʼohoana ke nātou maʼuʼuli ohage ʼe mole honatou ʼu ʼohoana.” (1 Kolonito 7:29). ʼAua leva naʼa ʼui ʼe tonu ke nātou meʼa noaʼi ʼonatou ʼohoana. Ko te ʼu tagata ʼohoana kilisitiano ʼaē kua nātou māhani ʼe nātou fakamuʼamuʼa aipe tanatou gāue kia Sehova, tatau aipe mo tonatou ʼu hoa ʼaē ʼe ʼoʼofa kia nātou pea mo tokoni kia nātou. Ko ʼihi pe foki la, ʼe nātou gāue katoa pea mo tonatou ʼu ʼohoana tagata. — Tāʼaga Lea 31:10-12, 28; Mateo 6:33.

20. Koteā te agapoto neʼe fai e te tokolahi ʼo te kau kilisitiano ʼo ʼuhiga mo tonatou ʼu maʼua faka taumātuʼa?

²⁰ Ko te ʼu tēhina ʼohoana ʼaē ko te ʼu taupau feʼaluʼaki, pe ʼe gāue ʼi te Petele, pea mo te ʼu tagata ʼāfea ʼi te kokelekasio — ʼio, te ʼu tagata kilisitiano fuli kua ʼohoana ʼaē ʼe nātou fakamuʼamuʼa te ʼu gāue ʼo te Puleʼaga — ‘ ʼe mole nātou fakaʼaogaʼi fau te malamanei’; ʼe nātou faiga aipe ke felōgoʼi tahi tonatou ʼu maʼua faka taumātuʼa pea mo tonatou ʼu maʼua ʼaē kia Sehova (1 Kolonito 7:31). Kae, ʼe nātou fiafia aipe. Koteā tona tupuʼaga? Koteʼuhi ko te matapuna tāfito ʼo tonā fīmālie ʼe mole ko tonā maʼuʼuli faka taumātuʼa kae ko tanā tauhi ʼaē kia Sehova. Pea tokolahi te ʼu taumātuʼa agatonu feiā aipe ki tanatou fānau, ʼe nātou fiafia aipe.

21, 22. a) Ohage ko tatatou lau ia Selemia 9:23, 24, koteā koa te tupuʼaga ke tou fiafia katoa ai? b) Koteā te ʼu meʼa ʼo ʼuhiga mo te fīmālie ʼe tuʼu ia Tāʼaga Lea 3:13-18?

²¹ Neʼe tohi fēnei e te polofeta ko Selemia: “Koʼeni te meʼa neʼe ʼui e Sehova: ‘ ʼAua naʼa laupisi te tagata poto ki tona poto, pea ʼaua naʼa laupisi te tagata mālohi ki tona mālohi! ʼAua naʼa laupisi te tagata maʼu meʼa ki tona ʼu koloā! Kae ko ʼaē ʼe laupisi ke ina laupisi ʼo ʼuhiga mo te meʼa ʼaenī: ke fakasiosio tonu pea mo ʼiloʼi ʼau, ke ʼiloʼi ko ʼau ia Sehova, ia Ia ʼaē ʼe faʼa manavaʼofa, fakamāu pea mo faitotonu ki te kele; koteʼuhi ko te ʼu meʼa ʼaia ʼe ʼau leleiʼia’, ko te tala ʼaia ʼa Sehova.” — Selemia 9:23, 24.

²² Pe ʼe kei tou selipatea pe ʼe kailoa, ko totatou fīmālie ʼe tonu ke maʼu mai totatou mālama kia Sehova pea mo tatatou tui moʼoni ʼaē ʼe tou maʼu tana tapuakina heʼe tou fai tona finegalo. ʼE tou toe fiafia foki ʼi tatatou ʼiloʼi te meʼa tāfito ʼo te ʼu meʼa maʼuhiga, te ʼu meʼa ʼaē ʼe leleiʼia e Sehova. Ko te hau ko Salomone ʼaē neʼe lahi tona ʼu ʼohoana, neʼe mole ina ʼui ia ko te ʼohoana ko te meʼa tāfito ʼaia ʼo te fīmālie. Neʼe ina ʼui fēnei: “Manuʼia te tagata ʼaē neʼe ina maʼu te poto, pea mo te tagata ʼaē ʼe ina maʼu te fakasiosio tonu, heʼe ko te maʼu ʼo te faʼahi ʼaia ohage ko he totogi ʼe maʼuhiga age ia ʼi te maʼu ʼo te paʼaga ohage ko he totogi, pea ko tona maʼu ʼo te faʼahi ʼaia ʼe maʼuhiga age ia ʼi te aulo. ʼE maʼuhiga age ia ʼi te ʼu puga faka mātaga, pea ko tau ʼu atu koloā ʼaē ʼe muli anai nātou ia ia. Te loaloaga ʼo te ʼu ʼaho ʼe ʼi tona mataʼu; pea ʼi tona hema ko te koloā pea mo te faka kolōlia. Ko tona ʼu ala ko te ʼu ala ʼe matalelei ʼaupito, pea ko tana ʼu ala fuli pe ʼe tokalelei. ʼE ko he fuʼu ʼakau ia ʼo te maʼuli ʼo nātou ʼe nātou tapiki ki ai, pea ko nātou ʼaē ʼe nātou puke maʼu ʼe tonu ke kalagaʼi nātou hahaʼi fiafia.” — Tāʼaga Lea 3:13-18.

23, 24. He koʼe koa ʼe feala ke tou ʼiloʼi papau ko te ʼu kaugana agatonu fuli ʼaē ʼa Sehova ʼe nātou fiafia anai ʼi te tuʼu foʼou?

²³ Ko ʼaē ia tatou kua ʼohoana ke nātou maʼu te fiafia heʼe gata ʼi te fai ʼo te finegalo ʼo te ʼAtua. Pea ʼo ʼuhiga mo ʼotatou ʼu tēhina pea mo tuagaʼane kei selipatea, ʼuhi neʼe nātou taʼofi feiā ʼi tonatou ʼu loto pe ʼe tupu mai te ʼu faʼahi ʼaluʼaga kehe atu ʼi ʼonatou ʼu loto, ʼe nātou faʼa kātaki ʼonatou faigataʼa ia pea mo nātou maʼu te fiafia ʼi te gāue ʼa Sehova ʼi te temi nei ki te heʼe gata (Luka 18:29, 30; 2 Petelo 3:11-13). ʼI te tuʼu foʼou ʼaē ka vave fakatuʼu e te ʼAtua, ko te ʼu “takaiga tohi” ʼe avahi anai (Fakahā 20:12). ʼE maʼu anai te ʼu fakatotonu foʼou pea mo te ʼu pelesepeto ki he ʼu ʼamanaki taulekaleka pea mo toe kau aipe ki te fīmālie ʼo te ʼu tagata fakalogo.

²⁴ ʼE moʼoni papau, ʼe feala ke tou falala ko totatou “ ʼAtua fiafia” ʼe ina foaki mai anai te ʼu meʼa lelei taulekaleka ʼaē ke tou maʼu ai te fīmālie totonu (1 Timoteo 1:11). Ko te ʼAtua ʼe ina haga anai ʼo ‘folahi tona nima ke fafaga te loto ʼo te meʼa maʼuli fuli pe’. (Pesalemo 145:16.) Koia ʼe mole he fakapuna’maʼuli, ʼe maʼu tuʼumaʼu anai te fīmālie moʼoni mai te tauhi ʼaē kia Sehova.

Koteā anai takotou tali?

◻ ʼE fakatafito koa ki te ā te fīmālie ʼo te ʼu kaugana ʼa Sehova?

◻ Fakahāhā he kau selipatea neʼe nātou fiafia ʼi te gāue ʼaē kia Sehova ʼi te ʼu temi ʼāfea?

◻ He koʼe koa ʼe fakaloto mālohiʼi e Paulo te nofo selipatea, pea neʼe feafeaʼi te fiafia ʼa te kau kilisitiano ʼi te ʼaluʼaga ʼaia?

◻ ʼE fakalogo koa ki te ā totatou fīmālie?

◻ He koʼe ʼe feala ke tou ʼiloʼi lelei ko te kau agatonu fuli ʼe nātou ʼiloʼi anai te fīmālie ʼi te mālama foʼou?

[Paki ʼo te pasina 16]

Tokolahi te ʼu tuagaʼane selipatea ʼe nātou gāue fiafia kia Sehova ʼi tonatou ʼuhiga minisi katoa.

[Paki ʼo te pasina 18]

Ko te kaugana ʼaē ki te ʼu meʼa ʼa Sehova ʼaē ʼe tou maʼu ai te fīmālie.