Tou Fiafia ʼi Tatatou Ako Takitokotahi Te Folafola ʼa Te ʼAtua

“Ei, ʼe ʼau metitasio anai ki tau ʼu gāue fuli, pea ʼe ʼau tokagaʼi anai tau ʼu faʼahiga aga.”—Pesalemo 77:12.

1, 2. (a) He koʼe ʼe tonu ke tou toʼo he temi ke tou metitasio ai? (b) Koteā te faka ʼuhiga ʼo he tahi ʼe “metitasio” pea mo “fakakaukau”?

ʼUHI ko tatou ko te ʼu tisipulo ʼa Sesu Kilisito, ʼe tonu ke maʼuhiga kia tatou tatatou ʼu felogoi mo te ʼAtua pea mo te ʼu tupuʼaga ʼo tatatou fia tauhi kia te Ia. Kae ia ʼaho nei, ʼe maʼumaʼua ʼaupito te hahaʼi tokolahi ʼo mole maʼu honatou temi ke nātou metitasio. ʼE nātou tokakaga tāfito ke nātou maʼu koloā, mo totogi meʼa, pea mo kumi fakavalevale te ʼu fakafiafia. E feafeaʼi hatatou tekeʼi te ʼu meʼa noa ʼaia? Ohage pe ko tatatou toʼo he temi moʼo fai he ʼu gāue maʼuhiga, ohage ko te kai pea mo te moe, ʼe toe maʼua foki ke tou toʼo he temi ʼi te ʼaho fuli ke tou metitasio ki te ʼu gāue pea mo te ʼu aga ʼa Sehova.—Teutalonome 8:3; Mateo 4:4.

² Kua koutou toʼo koa he temi ke koutou metitasio ai? Koteā te faka ʼuhiga ʼo te metitasio? ʼE fakamahino e te tikisionalio, ko he tahi ʼe metitasio ʼe “ko he tahi ʼe ina fakahaga tana ʼu manatu ki he meʼa ke fakakaukau kiai.” Pea ko he tahi ʼe “fakakaukau” ʼe ko he tahi “ ʼe manatu ki he meʼa: ʼe fakakaukau kiai . . . ʼe manatu peʼe ina vakaʼi fakalelei, ʼi te fakalogologo pea mo tona fai ke loloto.” Koteā tona faka ʼuhiga kia tatou?

3. Koteā ʼaē ʼe pipiki ki te tuputupu fakalaumālie ʼa he tahi?

³ ʼUluaki, ʼe tonu ke tou manatuʼi neʼe tohi fēnei e te ʼapositolo ko Paulo ki tona kaugā gāue ko Timoteo: “ ʼO aʼu ki taku ʼalu atu, haga tokaga lelei ki tau lautohi ʼi muʼa ʼo te hahaʼi, mo tau fai ʼekenaki, mo tau faiakonaki. Fakakaukau ki te ʼu meʼa ʼaia; nofo katoa ai, ke ʼiloga tau tuputupu ki te hahaʼi fuli.” Ei, neʼe tonu ke tuputupu, ke haʼele ki muʼa, pea neʼe fakahā e te ʼu palalau ʼa Paulo ʼe pipiki kiai te fakakaukau e he tahi te ʼu manatu fakalaumālie pea mo tana tuputupu. ʼE toe moʼoni pe te faʼahi ʼaia ia ʼaho nei. Ke tou fiafia ʼi tatatou tuputupu fakalaumālie, ʼe tonu ke tou haga ‘fakakaukauʼi’ pea mo ‘nofo katoa’ ʼi te ʼu manatu ʼaē ʼe tuʼu ʼi te Folafola ʼa te ʼAtua.—1 Timoteo 4:13-15, MN.

4. Koteā ʼaē ʼe feala ke koutou fakaʼaogaʼi moʼo tokoni atu ke koutou fakakaukau tuʼumaʼu ki te Folafola ʼa te ʼAtua?

⁴ ʼE fakalogo kia koutou pea mo te ʼaluʼaga ʼo tokotou famili te filifili ʼo te temi ʼaē ʼe lelei ai ke koutou metitasio. Tokolahi ʼe nātou fakakaukauʼi he vaega faka Tohi-Tapu ʼi te kei māfoatā, mokā nātou lau tanatou kiʼi kaupepa Tou Vakaʼi Te Tohi-Tapu ʼi Te ʼAho Fuli. Ko te toko 20 000 tēhina mo tuagaʼane ʼi te ʼu Petele ʼi te malamanei ʼe nātou kamata te ʼaho ʼaki te vakaʼi lolotoga minuta e 15 te vaega Tohi-Tapu ʼo te ʼaho. ʼI te uhu fuli, ʼi te famili ʼo te Petele ko ʼihi ʼe hinoʼi nātou ke nātou fai hanatou kiʼi palalau, pea fakakaukau ia te toe ʼo te famili ki te ʼu palalau ʼaē ʼe fai pea mo te lautohi. Ko ʼihi kau Fakamoʼoni ʼe nātou fakakaukau ki te Folafola ʼa te ʼAtua ʼi tanatou ʼolo ki tanatou gāue. ʼE nātou fakalogo te ʼu foʼi kaseti ʼo te Tohi-Tapu pea mo Te Tule Leʼo mo te Réveillez-vous ! ʼaē ʼe maʼu ʼi te ʼu lea kehekehe. Tokolahi te hahaʼi fafine ʼe nātou fai feiā ʼi tanatou lolotoga fai tanatou gāue ʼi te loto fale. ʼE nātou faʼifaʼitakiʼi moʼoni ai te tagata fai pesalemo ko Asafe ʼaē neʼe ina tohi fēnei: “ ʼE ʼau manatuʼi anai te ʼu gāue ʼa Sah; heʼe ʼau manatuʼi anai tau ʼu gāue fakaofoofo ʼaē neʼe ke fai ki muʼa atu. Ei, ʼe ʼau metitasio anai ki tau ʼu gāue fuli, pea ʼe ʼau tokagaʼi anai tau ʼu faʼahiga aga.”—Pesalemo 77:11, 12.

ʼE Tou Maʼu Anai He ʼu Fua Lelei Mokā Tou Taupau He Manatu ʼe Lelei

5. He koʼe ʼe tonu ke maʼuhiga kia tatou te ako takitokotahi?

⁵ ʼI te temi ʼaenī ʼo te televisio, mo te viteo, pea mo te ʼu olotinatea, kua siʼisiʼi peʼe mole kei lautohi te hahaʼi. ʼE mahino ia ʼe mole moʼoni te faʼahi ʼaia maʼa te kau Fakamoʼoni ʼa Sehova, koteʼuhi ʼaki te lau ʼo te Tohi-Tapu ʼe tou haga felogoi ai mo Sehova. ʼI te ʼu taʼu e afe ki muʼa atu, neʼe fetogi e Sosue ia Moisese ʼi te tuʼulaga takitaki ʼo Iselaele. Ke ina maʼu te tapuakina ʼa Sehova, neʼe tonu ke lau e Sosue te Folafola ʼa te ʼAtua. (Sosue 1:8; Pesalemo 1:1, 2) ʼE ko he faʼahi ʼe kei fakamaʼua ia ʼaho nei. Kae ʼuhi ʼaē he neʼe mole ako fualoa ʼihi, ʼe lagi faigataʼa kia nātou te lautohi pea mo lagi fakakinakina kia nātou. Koteā ʼaē ʼe feala ke tokoni mai ke tou fia lau pea mo ako te Folafola ʼa te ʼAtua? ʼE feala ke tou maʼu te tali ʼi te ʼu palalau neʼe fai e te Hau ko Salomone ʼaē ʼe tuʼu ia Tāʼaga Lea 2:1-6. Koutou avahi takotou Tohi-Tapu pea mo koutou lau te ʼu vaega ʼaia. ʼE tou fai palalau anai ki te ʼu vaega ʼaia.

6. ʼE tonu ke tou feafeaʼi ʼo ʼuhiga mo te ʼatamai mālama ʼo ʼuhiga mo te ʼAtua?

⁶ ʼI te kamata ʼe tou lau te tokoni ʼaenī: “Ê toku foha, kapau ʼe ke tali taku ʼu folafola pea mo ke taupau fakalelei ia te koe taku ʼu fakatotonu, ke feala ai hau tokaga ki te poto ʼaki tou taliga, ke ke fakafalele ai tou loto ki te fakasiosio tonu; . . .” (Tāʼaga Lea 2:1, 2) Koteā ʼaē ʼe tou ako mai te ʼu palalau ʼaia? ʼE tou tahi maʼu te maʼua ʼaē ke tou ako te Folafola ʼa te ʼAtua. Koutou tokagaʼi te ʼui ʼaē “kapau ʼe ke tali taku ʼu folafola.” ʼE maʼuhiga te ʼui ʼaē “kapau,” heʼe tokolahi ʼi te malamanei ʼe mole nātou tokagaʼi te Folafola ʼa te ʼAtua. Ke tou maʼu te fiafia ʼi te ako ʼo te Folafola ʼa te ʼAtua, ʼe tonu ke tou lotolelei ʼo tali te ʼu folafola ʼa Sehova pea ke hage kia tatou ko he meʼa maʼuhiga ʼe mole tou fia tuku anai. ʼE mole tonu ke tou liliu ʼo maʼumaʼua fau peʼe fakaleluʼi tatou e te ʼu gāue ʼaē ʼe tou fai ʼi te ʼaho fuli, ʼo mole kei maʼuhiga kia tatou te Folafola ʼa te ʼAtua, peʼe mole kei tou tui kiai.—Loma 3:3, 4.

7. Mokā ʼe feala, he koʼe ʼe tonu ke tou kau pea mo tokaga ki te ʼu fono?

⁷ ʼE tou “tokaga” moʼoni koa pea mo fakalogo lelei koa mokā fakamahino te Folafola ʼa te ʼAtua ʼi tatatou ʼu fono? (Efeso 4:20, 21) ʼE tou ‘fakafalele koa totatou loto’ ke tou maʼu te fakasiosio tonu? Ko te tēhina faiakonaki ʼe lagi mole ko ia ʼaē ʼe poto ʼaupito, kae mai tona ʼaluʼaga ʼaē ʼe ina fakaʼaogaʼi te Folafola ʼa te ʼAtua, ʼe tonu ke tou fakalogo lelei. ʼE moʼoni, ke feala hatatou tokaga ki te poto ʼo Sehova, ʼe tonu ke tou kau ki te ʼu fono, mokā ʼe feala. (Tāʼaga Lea 18:1) Koutou fakakaukauʼi age muʼa te lotomamahi ʼo he tahi mokā neʼe mole kau ki te fono ʼaē neʼe fai ʼi te kogafale fata ʼi Selusalemi ʼi te Penikosite 33 ʼo totatou temi. Logola ko tatatou ʼu fono ʼe mole fakaofoofo ohage ko te fono ʼaia, kae ʼe tou fai palalau ai ki te Tohi-Tapu. Koia ʼe feala ke tou maʼu he ʼu lelei ʼi te ʼu fono fuli mo kapau ʼe tou tokaga pea mo tou mulimuli ki te lau ʼo te ʼu vaega ʼi tatatou Tohi-Tapu.—Gaue 2:1-4; Hepeleo 10:24, 25.

8, 9. (a) Koteā ʼaē ʼe fakamaʼua mai mokā tou fai tatatou ako takitokotahi? (b) ʼE koutou fakatatau feafeaʼi anai koa te maʼuhiga ʼo te aulo mo te mālama ki te ʼatamai mālama ʼo ʼuhiga mo te ʼAtua?

⁸ ʼE toe hoko atu fēnei e te hau poto: “Kapau leva ʼe ke pāui ki te ʼatamai pea mo kapau ʼe ke kalaga ʼaki tou leʼo ki te fakasiosio tonu, . . .” (Tāʼaga Lea 2:3) Koteā te aga ʼe fakahā mai kia tatou ʼi te ʼu palalau ʼaia? Ke tou holi ʼaupito ke tou mahino ki te Folafola ʼa Sehova! ʼE tonu ke tou fia ako ʼaki te fakatuʼutuʼu ʼaē ke tou maʼu te fakasiosio tonu, ke tou mahino ki te finegalo ʼo Sehova. ʼE mahino ia ʼe fakamaʼua e te faʼahi ʼaia he ʼu faiga, pea taki ai tatou ki te ʼu palalau pea mo te fakatātā ʼaē ʼe fai e Salomone ki muli age.—Efeso 5:15-17.

⁹ ʼE hoko atu fēnei: “Kapau ʼe ke haga kumi te meʼa ʼaia [te ʼatamai] ohage ko te siliva pea kapau ʼe ke kumi tuʼumaʼu ohage ko he ʼu koloā maʼuhiga neʼe fufū, . . .” (Tāʼaga Lea 2:4) ʼE tou manatu ki te ʼu gāue ʼa te ʼu tagata ʼi te ʼu lameni, ʼaē neʼe nātou kumi lolotoga ni ʼu sēkulō te meʼa maʼuhiga ʼaē neʼe higoa ko te siliva pea mo te aulo. Neʼe feala ke matehi e te ʼu tagata he tahi ʼu tagata ʼuhi pe ko te aulo. Ko ʼihi neʼe nātou kumi ʼi tonatou maʼuli katoa ke nātou maʼu he aulo. Kae koteā te maʼuhiga moʼoni ʼo te aulo? Kapau ʼe koutou hēʼia ʼi te toafa pea kua kovi tokotou fia ʼinu, koteā ʼaē ka koutou loto anai kiai, ko he aulo peʼe ko he ipu vai? Kae neʼe kumi mālohi e te ʼu tagata te aulo, ʼaē ʼe mole feala ke ʼaoga tuʼumaʼu kia nātou pea ʼe fetogitogi tuʼumaʼu tona tau!a ʼE tonu ke lahi age tatatou kumi mālohi te poto, te fakasiosio tonu, pea mo te ʼatamai ʼo ʼuhiga mo te ʼAtua pea mo tona finegalo. Kae koteā te ʼu lelei ʼo te fai ʼo he ʼu kumi feiā?—Pesalemo 19:7-10; Tāʼaga Lea 3:13-18.

10. Koteā ʼaē ʼe feala ke tou maʼu mo kapau ʼe tou ako te Folafola ʼa te ʼAtua?

¹⁰ ʼE hoko atu fēnei te ʼu palalau ʼa Salomone: “Pea ʼe ke mahino ai anai ki te manavasiʼi kia Sehova pea ʼe ke maʼu ai anai te ʼatamai mālama ʼo ʼuhiga mo te ʼAtua.” (Tāʼaga Lea 2:5) Ko he manatu fakaofoofo ʼaia, te feala ʼaē ki he ʼu hahaʼi agahala hanatou maʼu “te ʼatamai mālama ʼo ʼuhiga mo te ʼAtua,” ia Sehova, te Tui ʼAliki ʼo te ʼatulaulau! (Pesalemo 73:28; Gaue 4:24) Ko te hahaʼi fai filosofia pea mo te hahaʼi ʼaē ʼe ʼui ko te kau popoto ʼo te malamanei, neʼe nātou faiga lolotoga ni ʼu sēkulō ke nātou mahino ki te ʼu meʼa faigataʼa ʼo te maʼuli pea mo te ʼatulaulau. Kae neʼe mole nātou lava maʼu “te ʼatamai mālama ʼo ʼuhiga mo te ʼAtua.” Koteā tona tupuʼaga? Logola neʼe feala pe lolotoga ni ʼu taʼu e afe ke nātou maʼu te Folafola ʼa te ʼAtua, te Tohi-Tapu, kae neʼe nātou fakafisi kiai he kia nātou ʼe faigafua fau, ʼo mole nātou tali mo mahino ai kiai.—1 Kolonito 1:18-21.

11. Koteā he ʼu fua lelei ʼe tou maʼu mai te ako takitokotahi?

¹¹ ʼE fakahā lelei e Salomone te tahi fakaloto mālohi ʼaenī: “ ʼE foaki e Sehova totonu ia te poto; ʼe haʼu mai tona gutu te ʼatamai mālama pea mo te fakasiosio tonu.” (Tāʼaga Lea 2:6) ʼE fia foaki lahi e Sehova te poto, te ʼatamai mālama, pea mo te fakasiosio tonu ki ʼaē ʼe faiga moʼoni ki te ʼu meʼa ʼaia. ʼE mahino ia ʼe lahi te ʼu tupuʼaga ʼo tatatou fia ako takitokotahi ia te Folafola ʼa te ʼAtua, tatau aipe peʼe tonu ke tou faiga lahi, mo tou fakatonutonuʼi tatou pea mo tou sakilifisioʼi he ʼu meʼa. Pea tahi ʼe tou maʼu te Tohi-Tapu pea ʼe mole maʼua ke tou hiki he ʼu Tohi-Tapu ohage ko tona fai ʼi te temi muʼa!—Teutalonome 17:18, 19.

Tou Haʼele ʼi He ʼAluʼaga ʼe Tau Mo Feʼauga Mo Sehova

12. He koʼe ʼe tou fia maʼu te ʼatamai mālama ʼo ʼuhiga mo te ʼAtua?

¹² Koteā ʼaē ʼe tonu ke ina uga tatou ke tou fia ako takitokotahi? Ke hage ʼe tou poto age ʼi ʼihi? Ke tou fakahā he ʼatamai ʼe lahi? Ke tou ʼiloʼi lelei ʼaupito te Tohi-Tapu? Kailoa. ʼE tou fia ako heʼe tou fia liliu ko he kau Kilisitiano moʼoni, ʼi tatatou ʼu palalau pea mo tatatou aga, ʼo tou fia tokoni tuʼumaʼu ki te hahaʼi, ohage ko Kilisito ʼaē neʼe ina fakaloto fīmālie te hahaʼi. (Mateo 11:28-30) Neʼe fai e te ʼapositolo ko Paulo te fakatokaga ʼaenī: “ ʼE fiameʼameʼa te poto kae ko te ʼofa ʼe lagalaga.” (1 Kolonito 8:1, MN ) Koia ʼe tonu ke tou maʼu te loto agavaivai ʼaē neʼe maʼu e Moisese ʼi tana ʼui fēnei kia Sehova: “Fakahā mai tou ʼu ala, fakalelei siʼou loto, ke feala ai haku ʼiloʼi koe, koteʼuhi ke ke ʼofa kia te ʼau.” (Ekesote 33:13) Ei, ʼe tonu ke tou fia maʼu te ʼatamai mālama ke ʼofa te ʼAtua kia tatou, kae ke mole tou fia fakahāhā ki te tagata. ʼE tou fia liliu ko he ʼu kaugana agavaivai ʼe tau mo te ʼAtua. ʼE tou lava fakahoko feafeaʼi te faʼahi ʼaia?

13. Koteā ʼaē ʼe ʼaoga ke fai e he tahi ke liliu ko he kaugana ʼe tau mo te ʼAtua?

¹³ Neʼe tokoni ia Paulo kia Timoteo ʼo ʼuhiga mo te meʼa ʼaē ʼe tonu ke fai moʼo fakafiafia te ʼAtua, ʼo ina ʼui fēnei: “Faigai ia koe, o hage ko he tagata kua tuha ke ke tuu ia mua o te Atua, ko he tagata gaue e mole ufiufi, e ina ave fakahagatonu te folafola o te mooni.” (2 Timoteo 2:15) Ko te ʼui ʼaē “ave fakahagatonu” ʼe haʼu mai te kupu faka Keleka ʼaē ʼi te kamata neʼe ko tona faka ʼuhiga ko te “tuʼusi totonu.” (Kingdom Interlinear) ʼO mulimuli ki te manatu ʼa ʼihi hahaʼi sivi Tohi-Tapu, ʼe faka ʼuhiga ki he tagata fai tui ʼe ina tuʼusi he kofu ʼo mulimuli ki he faʼifaʼitaki, mo he tagata gāue kele ʼe ina fuli te kele ʼo fai faka ʼatu, pea ʼe feala ke faka ʼuhiga ki te tahi atu ʼu faʼahi. Kae ko te ʼu faʼahi ʼaia ʼe iku ki he meʼa ʼe totonu, peʼe mole pikopiko. Ke liliu ia Timoteo ko he kaugana ʼe tau pea mo ʼofainaʼi e te ʼAtua, neʼe tonu ke ‘faiga’ ke ʼalutahi tana akonaki pea mo tana aga mo te folafola ʼo te moʼoni—1 Timoteo 4:16.

14. ʼE tonu ke malave feafeaʼi tatatou ako takitokotahi ki te ʼu meʼa ʼaē ʼe tou fai pea mo tatatou ʼu palalau?

¹⁴ Neʼe toe talanoa kiai ia Paulo ʼi tana uga te kau Kilisitiano ʼi Kolose ke nātou “haʼele ʼi he ʼaluʼaga ʼe tau mo feʼauga mo Sehova” ʼo nātou “haga fakatupu he fua ʼo te gāue lelei fuli pea mo tuputupu ʼi te ʼatamai mālama totonu ʼo ʼuhiga mo te ʼAtua.” (Kolose 1:10, MN ) ʼE ʼui ʼi henī e Paulo ke tou tau mo feʼauga mo Sehova ʼo tou “fakatupu he fua ʼi te gāue lelei fuli” pea “mo tuputupu ʼi te ʼatamai mālama totonu ʼo ʼuhiga mo te ʼAtua.” Ko tona faka ʼuhiga, ʼe mole lau pe e Sehova tatatou faka maʼuhigaʼi te ʼatamai mālama kae ʼe toe maʼuhiga kia ia tatatou mulimuli fakalelei ki te Folafola ʼa te ʼAtua ʼi te ʼu meʼa ʼaē ʼe tou fai pea mo tatatou ʼu palalau. (Loma 2:21, 22) Ko tona faka ʼuhiga ko tatatou ako takitokotahi ʼe tonu ke malave ki tatatou fakakaukau pea mo tatatou aga mo kapau ʼe tou fia fakafiafia te ʼAtua.

15. ʼE tou lava puipui pea mo tāʼofi feafeaʼi tatatou ʼatamai pea mo tatatou ʼu manatu?

¹⁵ Ia ʼaho nei, ʼe faiga ʼaupito Satana ke ina maumauʼi tatou ʼi te faʼahi fakalaumālie, ʼo ina tauʼi tatatou manatu. (Loma 7:14-25) Koia ʼe tonu ke tou puipui pea mo tou tāʼofi tatatou ʼatamai pea mo tatatou ʼu manatu ke tou tau ai mo feʼauga mo totatou ʼAtua, ia Sehova. Ko te mahafu ʼaē ʼe tou maʼu ʼe ko “te ʼatamai mālama ʼo ʼuhiga mo te ʼAtua,” ʼaē ʼe feala ke ina “puke te ʼu manatu fuli ke nātou fakalogo kia Kilisito.” ʼE ko te ʼu tupuʼaga tāfito ʼaia ʼo hatatou tokaga ʼo ako te Tohi-Tapu ʼi te ʼaho fuli, moʼo pulihi te ʼu manatu ʼo te kakano ʼi tatatou fakakaukau.—2 Kolonito 10:5, MN.

Te ʼu Tokoni Ke Tou Mahino

16. ʼE lava ʼaoga feafeaʼi kia tatou mokā akoʼi tatou e Sehova?

¹⁶ Ko te faiakonaki ʼa Sehova ʼe ina foaki he ʼu lelei ʼi te faʼahi fakalaumālie pea mo fakasino. ʼE mole hage ko he akonaki faka teolosia ʼaē ʼe mole fakaloto mālohi pea ʼe mole hona ʼaoga. ʼE tou lau fēnei: “Ko ʼau, Sehova, ko ʼau tou ʼAtua, ia Ia ʼaē ʼe ina akoʼi koe ke ʼaoga kia te koe, ia Ia ʼaē ʼe ina taki koe ʼi te ala ʼaē ʼe tonu ke ke haʼele ai.” (Isaia 48:17) ʼE fakahaʼele feafeaʼi tatou e Sehova ʼi te ala ʼaē ʼe lelei? ʼUluaki, ʼe tou maʼu tana Folafola, te Tohi-Tapu. Ko te tohi ʼaia ʼaē ʼe tou fakaʼaogaʼi tuʼumaʼu. Koia ʼe lelei ai ke tou fakalogo ki te ʼu meʼa ʼaē ʼe ʼui ʼi te ʼu fono ʼo tou avahi te Tohi-Tapu. ʼE feala ke tou sio ki te ʼu lelei ʼo te aga ʼaia, ʼi te fakamatala ʼo te enuke Etiopea, ʼaē ʼe tuʼu ia Gāue kapite 8.

17. Koteā ʼaē neʼe hoko ki te enuke Etiopea, pea koteā ʼaē ʼe fakahā ai?

¹⁷ Ko te enuke Etiopea neʼe tafoki ki te Lotu Faka Sutea. Neʼe tui moʼoni ki te ʼAtua, pea neʼe ina ako te Tohi-Tapu. ʼI tana fagona ʼi tana saliote, neʼe ina lolotoga lau te tohi ʼo Isaia kae lele age ia Filipo ki ʼona tafa pea mo fehuʼi fēnei age: “Pe e ke mahino kia mea e ke lau?” Neʼe koteā te tali age ʼa te enuke? “ ‘O feafeai haku mahino, e mole he tahi ke ina taki au?’ Pea nee faigaʼage kia Filipo ke kake ake o heka mo ia.” Pea ko Filipo, ʼaki te takitaki ʼa te laumālie maʼoniʼoni, neʼe tokoni ki te enuke ke mahino ki te lea faka polofeta ʼo Isaia. (Gaue 8:27-35) Koteā ʼaē ʼe fakahā mai? ʼE mole feʼauga pe hatatou lau takitokotahi te Tohi-Tapu. Ko Sehova, ʼaki tona laumālie, ʼe ina fakaʼaogaʼi te kalasi ʼo te tagata kaugana agatonu mo poto ke tokoni mai kia tatou ke tou mahino ki tana Folafola ʼi tona temi totonu. ʼE fakahoko feafeaʼi te faʼahi ʼaia?—Mateo 24:45-47; Luka 12:42.

18. ʼE tokoni feafeaʼi mai kia tatou ia te kalasi ʼo te kaugana agatonu mo fakapotopoto?

¹⁸ Logola ʼe ʼui ko te kalasi ʼo te kaugana ʼe “agatonu mo fakapotopoto,” kae neʼe mole ʼui e Sesu ʼe mole feala ke faihala. Ko te ʼu tēhina fakanofo ʼaia pea mo agatonu ʼe ko he ʼu Kilisitiano agahala. Logola tanatou faiga fakamalotoloto, kae ʼe feala pe ke nātou faihala, ohage ko tona fai ʼi ʼihi temi e ʼihi tagata ʼo te ʼuluaki sēkulō. (Gaue 10:9-15; Kalate 2:8, 11-14) Kae ʼe maʼa tonatou loto, pea ʼe fakaʼaogaʼi nātou e Sehova ke nātou foaki mai te ʼu tokoni ke tou ako te Tohi-Tapu, ke mālohi ai tatatou tui ki te Folafola ʼa te ʼAtua pea mo tana ʼu fakapapau. Ko te tokoni tāfito ʼaē neʼe foaki mai e te kaugana ki tatatou ako takitokotahi ʼe ko te Tohi-Tapu Les Saintes Écritures — Traduction du monde nouveau. ʼE feala ke maʼu ia ʼaho nei ia lea e 42, peʼe maʼu katoa peʼe faka koga, pea ko Tohi-Tapu e 114 miliona ʼaē neʼe tā. ʼE tou lava fakaʼaogaʼi lelei feafeaʼi ʼi tatatou ako takitokotahi?—2 Timoteo 3:14-17.

19. Koteā ʼihi agaaga ʼo te Tohi-Tapu Les Saintes Écritures — Traduction du monde nouveau — avec notes et références, ʼe feala ke tokoni kia tatou ʼi tatatou ako takitokotahi?

¹⁹ Ohage la ko te Tohi-Tapu Les Saintes Écritures — Traduction du monde nouveau — avec notes et références. ʼI te ʼu pasina, ʼe ʼi ai te faʼahi ʼe tohi ai te tahi ʼu vaega ʼe feala ke vakaʼi, mo he ʼu fakamahino ʼi te lalo pasina, mo he tānakiʼaga ʼe higoa ko te “ Index des mots bibliques ” pea mo te “ Index des notes, ” pea mo te Appendice ʼe tuʼu ai te ʼu fai palalau e 43 pea mo te ʼu paki mo te ʼu mape. ʼE ʼi ai mo te “ Introduction ” ʼe fakamahino ai te ʼu tuʼuga tohi ʼaē neʼe fakaʼaogaʼi ki te fakaliliu ʼo te Tohi-Tapu ʼaia. Kapau ʼe koutou maʼu te Tohi-Tapu ʼaia ʼi te lea ʼe koutou mahino kiai, pea koutou faiga ke koutou ʼiloʼi te ʼu faʼahi ʼaia pea mo koutou fakaʼaogaʼi. Kae ʼe tonu ke koutou kamata takotou polokalama ʼaki te Tohi-Tapu, pea ʼi te Traduction du monde nouveau, ʼe fakahā lelei ai te huafa ʼo te ʼAtua pea mo faka maʼuhigaʼi ai te pule ʼo te Puleʼaga ʼo te ʼAtua.—Pesalemo 149:1-9; Taniela 2:44; Mateo 6:9, 10.

20. Koteā te ʼu fehuʼi ʼo ʼuhiga mo te ako takitokotahi ʼe tonu ke tou tali kiai?

²⁰ ʼI te temi nei, ʼe lagi tou feʼekeʼaki fēnei: ‘Koteā te tahi ʼu tokoni ʼe ʼaoga kia tatou ke tou mahino ki te Tohi-Tapu? ʼE tou lava fakatuʼutuʼu feafeaʼi totatou temi ke tou fai ai tatatou ako takitokotahi? Koteā ʼaē ʼe feala ke tou fai ke ʼaoga lahi age kia tatou tatatou ako? E feafeaʼi tana malave ki tatatou ʼu felogoi mo te hahaʼi?’ ʼI te alatike ʼaē ka hoa mai ʼe tou vakaʼi ai anai te faʼahi maʼuhiga ʼaia ke tou haʼele ki muʼa.

[Kiʼi nota]

Kei Koutou Manatuʼi Koa?

• Koteā te faka ʼuhiga ʼo he tahi ʼe “metitasio” pea mo “fakakaukau”?

• ʼE tonu ke feafeaʼi tatatou manatu ʼo ʼuhiga mo te ako ʼo te Folafola ʼa te ʼAtua?

• He koʼe ʼe tonu ke tou fia ako takitokotahi?

• Koteā te ʼu tokoni ʼe tou maʼu ke tou mahino ai ki te Tohi-Tapu?

[Paki ʼo te pasina 15]

Ki te ʼu famili ʼo te ʼu Petele, ʼe ko he meʼa fakaloto mālohi ʼi te faʼahi fakalaumālie tanatou kamata te ʼaho fuli ʼaki te vakaʼi ʼo te vaega Tohi-Tapu

[Paki ʼo te pasina 15]

ʼE feala ke tou fakaʼaogaʼi te temi maʼuhiga ʼo tou fakalogo te ʼu foʼi kaseti ʼo te Tohi-Tapu mokā tou fai fagona

[Paki ʼo te pasina 16]

Neʼe gāue kinakina pea mo fualoa te ʼu tagata ke nātou maʼu te aulo. ʼE feafeaʼi anai takotou ʼu faiga mokā koutou ako te Folafola ʼa te ʼAtua?

[Haʼuʼaga ʼo te paki]

Courtesy of California State Parks, 2002

[Paki ʼo te pasina 17]

Ko te Tohi-Tapu ʼe ko he koloā ʼe feala ke ina taki ki te maʼuli heʼegata