Ko Te Ako Takitokotahi ʼe Ina Fakaliliu Tatou Ko He Kau Faiako Popoto

“Fakakaukau ki te ʼu meʼa ʼaia; nofo katoa ai, ke ʼiloga tau tuputupu ki te hahaʼi fuli. Ke ke tokaga tuʼumaʼu kia koe, pea mo tau faiako.”—1 Timoteo 4:15, 16, MN.

1. Koteā ʼaē ʼe moʼoni ʼo ʼuhiga mo te temi pea mo tatatou ako takitokotahi?

ʼE ʼUI fēnei ʼi te Tohi-Tapu ia Tagata Tānaki 3:1: “Kia meʼa fuli ʼe ʼi ai tona temi kua fakakatofa.” ʼE moʼoni te faʼahi ʼaia ʼo ʼuhiga mo te ako takitokotahi. ʼE faigataʼa ki te tokolahi hanatou fakakaukau ki te ʼu meʼa fakalaumālie, mo kapau ʼe mole ko tona temi ʼaia pea mo kapau ʼe mole ko te koga meʼa lelei ʼaia. Ohage la, ʼi takotou ʼosi gāue kinakina ʼi te ʼaho katoa pea mo kai lelei ʼi te afiafi, ʼe koutou fia ako koa ʼi te temi ʼaia, tāfito la mo kapau ʼe koutou heheka ʼi muʼa ʼo te televisio? Kailoa ia. Koteā te puleʼaki ʼe tonu ke tou fai? ʼE mahino ia, ʼe tonu ke tou fili te temi pea mo te koga meʼa ʼaē ka tou fai ai tatatou ako, ʼaki te fakatuʼutuʼu ʼaē ke fua lelei lahi kia tatou tatatou ʼu faiga.

2. ʼI te agamāhani, ko te temi fea ʼaē ʼe lelei ai ke tou ako takitokotahi?

² Tokolahi ʼe nātou manatu ʼe lelei age te uhu ke fai ai tanatou ako, he ko te temi ʼaia ʼe nātou ʼalaʼala lelei ai. ʼE fakaʼaogaʼi e ʼihi he kiʼi temi nounou ʼi te fetapā ke nātou ako ai. ʼI te ʼu faʼifaʼitaki ʼaenī, koutou tokagaʼi te temi ʼaē neʼe fakahoko ai te ʼu gāue fakalaumālie maʼuhiga. Neʼe tohi fēnei e te Hau ko Tavite ʼo te Iselaele ʼāfea: “ ʼI te uhu, fai ke ʼau logo ki tou manavaʼofa, he neʼe ʼau tuku taku falala kia te koe. Fakahā mai kia te ʼau te ala ʼaē ʼe tonu ke ʼau haʼele ai, he neʼe ʼau hiki atu toku nefesi kia te koe.” (Pesalemo 143:8) Neʼe toe fakahā e te polofeta ko Isaia tana leleiʼia te ako ʼi tana ʼui fēnei: “Ko te Tuʼi ʼAliki ko Sehova neʼe ina foaki totonu mai te lea ʼa nātou neʼe akoʼi, koteʼuhi ke ʼau poto ʼi te tali ʼaki he palalau ki ʼaē ʼe gaʼegaʼe. ʼE ina fakaʼala ʼi te uhu fuli; ʼe ina fakaʼala toku taliga moʼo fagono kia nātou neʼe akoʼi.” Tatau aipe peʼe ko te temi fea ʼi te ʼaho, kae ʼe tonu ke tou ako pea mo palalau takitokotahi kia Sehova ʼi te ʼu temi ʼaē ʼe ʼalaʼala lelei ai tatatou fakakaukau.—Isaia 50:4, 5; Pesalemo 5:3; 88:13.

3. Koteā te ʼu ʼaluʼaga ʼaē ʼe lelei ke feala ke ʼi ai he ʼu fua ʼo te ako?

³ Ke fua lelei tatatou ako ʼe mole tonu ke tou heheka faka fīfīmālie ʼi he hekaʼaga, ohage ko te ʼu hekaʼaga ʼo te salō. ʼE mole tokoni mai anai ke tou nofo ʼalaʼala. ʼI te ʼu temi ʼaē ʼe tou ako ai, ʼe tonu ke gāueʼi tuʼumaʼu tatatou fakakaukau, pea ʼe mole feala anai mo kapau ʼe malū fau totatou hekaʼaga. Ko te tahi meʼa ʼe lelei ki te ako pea mo te metitasio ʼe ko te mole logoaʼa pea ke mole he ʼu meʼa ʼe nātou fakaleluʼi tatou. ʼE mole koutou maʼu anai he ʼu lelei mokā koutou faiga ke koutou ako mo te haʼele ʼo te lātio, peʼe ko te televisio peʼe tonu ke koutou toe tokaga ki te fānau. ʼI te temi ʼaē neʼe fia metitasio ai Sesu, neʼe ʼalu ki he koga meʼa neʼe mole logoaʼa. Neʼe ina toe fakahā te maʼuhiga ʼaē ke tou maʼu he koga meʼa ʼāteaina ke tou faikole ai.—Mateo 6:6; 14:13; Maleko 6:30-32.

ʼAki Te Ako Takitokotahi ʼe Tou Lava Tali Ki Te ʼu Fehuʼi

4, 5. Koteā te ʼu faʼahi ʼaē ʼe feala ke tokoni mai ai te kaupepa Fakamaʼua?

⁴ ʼE tou leleiʼia anai te ako takitokotahi mo kapau ʼe tou fakaʼaogaʼi he ʼu tohi kehekehe ke tou mahino ai ki te Tohi-Tapu, ke lahi age tatatou ʼiloʼi te meʼa ʼe tou ako, tāfito mokā tonu ke tou tali ki he ʼu fehuʼi ʼa he ʼu hahaʼi ʼe nātou fia ʼiloʼi moʼoni. (1 Timoteo 1:14; 2 Timoteo 2:23) ʼI te kamata, ʼe tokolahi te hahaʼi foʼou ʼe nātou ako te kaupepa Koteā ʼAē ʼe Fakamaʼua Mai e Te ʼAtua Kia Tatou?,a ʼaē kua maʼu ʼi te temi nei ia lea e 261. ʼE ko he kaupepa ʼe faigafua kae fakamahino lelei, pea ʼe fakatafito katoa ki te Tohi-Tapu. ʼE tokoni kia nātou ʼaē ka nātou lau, ke nātou mahino fakavilivili ki te ʼu meʼa ʼaē ʼe fakamaʼua e te ʼAtua ʼo ʼuhiga mo te tauhi moʼoni. Kae ʼuhi ko te kaupepa, ʼe mole feala ke lahi te ʼu manatu ʼe fakahā ʼi te ʼu kapite fuli. Kapau ʼe fia ʼiloʼi moʼoni e ia ʼaē ʼe ako mo koutou he manatu ʼo te Tohi-Tapu neʼe koutou fai palalau kiai, koteā ʼaē ʼe feala ke koutou fai ke koutou maʼu he tahi ʼu manatu ka tokoni anai kia ia ke tali ki tana ʼu fehuʼi?

⁵ Kia nātou ʼaē ʼe nātou maʼu ʼi tanatou lea ia te Watchtower Library ʼi te CD-ROM, ʼe faigafua te maʼu ʼo he ʼu tuʼuga manatu ʼi te olotinatea. Kae feafeaʼi kia nātou ʼaē ʼe mole nātou maʼu? Tou vakaʼi te ʼu faʼahi e lua ʼe talanoa kiai te kaupepa Fakamaʼua, ke tou sio ai peʼe feafeaʼi hatatou mahino lahi age ki te ʼu faʼahi ʼaia pea mo tou lava tali lelei—tāfito la mo kapau ʼe fai mai te ʼu fehuʼi ʼaē, Ko Ai Te ʼAtua? pea neʼe ko ai moʼoni ia Sesu?—Ekesote 5:2; Luka 9:18-20; 1 Petelo 3:15.

Ko Ai Te ʼAtua?

6, 7. (a) Koteā te fehuʼi ʼe lagaʼi ʼo ʼuhiga mo te ʼAtua? (b) Koteā te hala mamafa neʼe fai e te tagata takitaki lotu ʼi tana akonaki?

⁶ ʼI te ako 2 ʼo te kaupepa Fakamaʼua, ʼe tali ki te fehuʼi maʼuhiga, Ko Ai Te ʼAtua? ʼE ko he manatu maʼuhiga koteʼuhi ʼe mole feala ke tauhi he tahi ki te ʼAtua moʼoni, mo kapau ʼe mole ina ʼiloʼi ia Ia peʼe lagi lotolotolua ki te maʼuli moʼoni ʼo te ʼAtua. (Loma 1:19, 20; Hepeleo 11:6) Pea tahi ʼaē meʼa, ʼi te malamanei ʼe lahi ʼaupito te ʼu manatu ʼe maʼu e te hahaʼi ʼo ʼuhiga mo te ʼAtua. (1 Kolonito 8:4-6) Ko te ʼu filosofia faka lotu kehekehe ʼe mole tatau tanatou ʼu tali ki te fehuʼi ʼaē pe ko ai te ʼAtua. ʼI te Keletiate ʼe lahi te ʼu lotu ʼe nātou ʼui ko te ʼAtua ʼe ko he Tahitolu. Ko te tagata takitaki lotu Amelika ʼiloa neʼe ina fai tana akonaki neʼe ko tona kupu tāfito “ ʼE Koutou ʼIloʼi Koa Te ʼAtua?,” kae neʼe mole ina fakahā tuʼa tahi ʼi tana faiakonaki te huafa ʼo te ʼAtua, logola neʼe tuʼa lahi tana fakaʼaogaʼi te Tauhi ʼĀfea. ʼE mahino ia neʼe ina fakaʼaogaʼi te Tohi-Tapu ʼe mole matala lelei ai te ʼu manatu pea ʼe fakaʼaogaʼi ai te kupu “ ʼAliki” ʼe mole ʼi ai he higoa ʼe pipiki mai kiai, kae mole ina fakaʼaogaʼi ia Sehova peʼe ko Iave.

⁷ ʼE ko he puani maʼuhiga neʼe mole fakahā e te tagata takitaki lotu ʼaia ʼi tana talanoa kia Selemia 31:33, 34: “ ‘ ʼE mole akoʼi anai e he tahi tona kāiga, pea mo tona tēhina ʼo ʼui maʼana: “Ke ke ʼiloʼi te ʼAliki” [faka Hepeleo, “Ke ke ʼiloʼi ia Sehova”], heʼe nātou ʼiloʼi fuli anai ia ʼAu, mai ia ia ʼaē ʼe veliveli ia nātou kia ia ʼaē ʼe lahi,’ ko te ʼui ʼaia ʼa te ʼAliki [faka Hepeleo, ko Sehova].” Ko te fakaliliu ʼaē neʼe ina fakaʼaogaʼi neʼe mole tuʼu ai te huafa ʼo te ʼAtua, ko Sehova.—Pesalemo 103:1, 2.

8. Koteā ʼaē ʼe ina fakahā te maʼuhiga ʼo te fakaʼaogaʼi ʼo te huafa ʼo te ʼAtua?

⁸ ʼE fakahā ia Pesalemo 8:9 pe koʼe ʼe maʼuhiga te fakaʼaogaʼi ʼo te huafa ʼo Sehova: “Ê Sehova tomatou ʼAliki, ʼe fakaʼaliʼaliki tou huafa ʼi te kele katoa!” Koutou fakatatau mo te ʼu palalau ʼaenī: “Ê ʼAliki, tomatou ʼAliki, ʼe takimuʼa tou huafa ʼi te kele katoa!” (King James Version; vakaʼi mo te The New American Bible, The Holy Bible—New International Version, Tanakh—The Holy Scriptures) Pea tahi ʼaē meʼa, ohage ko tona fakahā ʼi te ʼuluaki alatike, ʼe feala ke tou maʼu “te ʼatamai mālama ʼo ʼuhiga mo te ʼAtua” mo kapau ʼe tou tuku ke faka mālamaʼi tatou e tana Folafola. Kae koteā te tohi ʼe feala ke tokoni mai ʼi te ako ʼo te Tohi-Tapu, ka tali lelei anai ki tatatou ʼu fehuʼi ʼo ʼuhiga mo te maʼuhiga ʼo te huafa ʼo te ʼAtua?—Tāʼaga Lea 2:1-6.

9. (a) Ko te tohi fea ʼaē ʼe feala ke tokoni mai ke tou fakamahino ki te maʼuhiga ʼo te fakaʼaogaʼi ʼo te huafa ʼo te ʼAtua? (b) Neʼe fakahā feafeaʼi e te kau fakaliliu tanatou mole fakaʼapaʼapa ki te huafa ʼo te ʼAtua?

⁹ ʼE feala ke tou vakaʼi te kaupepa Le nom divin qui demeure à jamais, ʼaē neʼe fakaliliu kia lea e 69.b ʼI te kupu tāfito “Te Huafa ʼo Te ʼAtua—Tona Faka ʼUhiga Pea Mo Tona Faʼahiga Puʼaki” (pasina 6 ki te 11) ʼe fakahā lelei ai ko te Tetalakalame faka Hepeleo (mai tona faka ʼuhiga ʼi te faka Keleka “te ʼu mataʼi tohi e fā”) ʼe hā teitei tuʼa 7 000 ʼi te ʼu tohi faka Hepeleo ʼāfea. Kae ko te kau takitaki lotu pea mo te kau fakaliliu ʼo te lotu Sutea pea mo te Keletiate, neʼe nātou molehi te huafa ʼaia ʼi te ʼu Tohi-Tapu ʼe lahi neʼe nātou fakaliliu.c ʼE lava feafeaʼi hanatou ʼui ʼe nātou ʼiloʼi te ʼAtua pea mo felogoi lelei mo ia, kae mole nātou fia fakaʼaogaʼi tona huafa? Ko te mahino ki tona huafa moʼoni ʼe feala ai ke tou mahino ki tana ʼu fakatuʼutuʼu pea mo tona ʼulugaaga. Pea koteā anai te ʼaoga ʼo te koga ʼo te faikole ʼaē neʼe akoʼi e Sesu ʼaē ʼe ʼui “ko tamatou Tāmai ʼe ʼi selo, ke tāpuhā tou huafa,” mo kapau ʼe mole fakaʼaogaʼi te huafa ʼo te ʼAtua?—Mateo 6:9, MN; Soane 5:43; 17:6.

Ko Ai Ia Sesu Kilisito?

10. E feafeaʼi hatatou maʼu he ʼu manatu katoa ʼo ʼuhiga mo te maʼuli pea mo te minisitelio ʼo Sesu?

¹⁰ Ko te kupu tāfito ʼo te ako 3 ʼi te kaupepa Fakamaʼua ʼe “Ko Ai Ia Sesu Kilisito?” Ia palakalafe pe e ono, ʼe ina fakahā fakanounou te ʼu faʼahi maʼuhiga ʼo ʼuhiga mo Sesu, tona haʼuʼaga, pea mo te tupuʼaga ʼo tana haʼu ki te kele. Kae kapau ʼe koutou fia maʼu he fakamatala katoa ʼo tona maʼuli—ʼo hilifaki ki te ʼu fakamatala ʼo te ʼu Evaselio—ʼe ʼi ai mo te tohi Te tagata ʼaē ʼe lahi tokotahi ʼo te ʼu temi fuli, ʼaē ʼe feala ke maʼu ia lea e 111.d ʼE fakamatala katoa ai te temi ʼaē neʼe hoko ai te ʼu meʼa ʼi te maʼuli ʼo Kilisito pea mo tana fai te ʼu akonaki, ʼo fakatafito ki te ʼu Evaselio e fā. ʼE talanoa ʼi te ʼu kapite e 133 ki te ʼu meʼa neʼe hoko ʼi te maʼuli pea mo te minisitelio ʼo Sesu. Kapau ʼe koutou loto ki he tahi fakamahino, ʼe feala ke koutou vakaʼi te 2 Tohi Étude perspicace, ʼi te kupu “Sesu Kilisito.”

11. (a) Koteā ʼaē ʼe kehe ai te tui ʼa te kau Fakamoʼoni ʼa Sehova ʼo ʼuhiga mo Sesu? (b) Koteā ʼihi vaega Tohi-Tapu ʼe fakahā lelei ai te hala ʼo te akonaki ʼo te Tahitolu, pea koteā te tohi ʼaē ʼe feala ke tokoni mai ʼi te faʼahi ʼaia?

¹¹ ʼI te Keletiate, neʼe fia ʼiloʼi tāfito ʼo ʼuhiga mo Sesu peʼe ko “te ʼAlo ʼo te ʼAtua” peʼe ko “te ʼAtua te ʼAlo”—ko tona faka ʼuhiga, ko te fihi ʼo ʼuhiga mo te faʼahi ʼaē ʼe fakahigoaʼi e te Catechism of the Catholic Church ko “te misitelio tāfito ʼo te tui faka Kilisitiano,” te Tahitolu. ʼO mole hage ko te ʼu lotu ʼo te Keletiate, ʼe tui ia te kau Fakamoʼoni ʼa Sehova ko Sesu neʼe fakatupu e te ʼAtua kae ʼe mole ko ia te ʼAtua. ʼE tou maʼu te talanoa lelei ki te faʼahi ʼaia ʼi te kaupepa Doit-on croire à la Trinité ?, neʼe fakaliliu kia lea e 95.e ʼI te ʼu tuʼuga vaega ʼaē ʼe fakaʼaogaʼi ai moʼo fakahā te hala ʼo te akonaki ʼo te Tahitolu, ʼe tou maʼu ai ia Maleko 13:32 pea mo 1 Kolonito 15:24, 28.

12. Koteā te tahi fehuʼi ʼe tonu ke tou vakaʼi?

¹² Ko tatatou palalau ʼaia ʼo ʼuhiga mo te ʼAtua pea mo Sesu Kilisito ʼe fakahā ai peʼe tonu ke feafeaʼi tatatou fai tatatou ako takitokotahi, ke feala ke tou tokoni kia nātou ʼe fia mālama ki te Tohi-Tapu ke nātou maʼu te ʼatamai mālama totonu. (Soane 17:3) Kae e feafeaʼi ʼo ʼuhiga mo nātou ʼaē kua fualoa tanatou fakatahitahi mo te kokelekasio? ʼUhi kua nātou maʼu te ʼatamai mālama ʼo ʼuhiga mo te Tohi-Tapu, ʼe kei tonu koa ke nātou tokaga ʼo ako takitokotahi te Folafola ʼa te ʼAtua?

He Koʼe ʼe Tonu Ke Tou “Tokaga”?

13. Koteā te manatu hala ʼe feala ke maʼu e ʼihi ʼo ʼuhiga mo te ako takitokotahi?

¹³ Ko ʼihi kua fualoa tanatou kau ʼi te kokelekasio, ʼe feala ke liliu ko he agamāhani te falala ki tanatou ʼatamai mālama ki te Tohi-Tapu ʼaē neʼe nātou maʼu ʼi te ʼu ʼuluaki taʼu ʼaē neʼe nātou liliu ai ko he kau Fakamoʼoni ʼa Sehova. ʼE faigafua hakita fakakaukauʼi fēnei: “ ʼE mole ʼaoga ke ʼau ako fakalelei ohage ko nātou ʼaē kei foʼofoʼou. Kua tuʼa lahi taku lau te Tohi-Tapu pea mo te ʼu tohi faka Tohi-Tapu lolotoga ni ʼu taʼu.” Kapau ʼe tou palalau feiā, pea ʼe hage pe ʼe kita ʼui fēnei: “ ʼE mole ʼaoga moʼoni kia ʼau ke ʼau tokaga ʼi te temi nei ke ʼau kai, koteʼuhi kua lahi te ʼu meʼa kai kua ʼau kai kiai ʼi te ʼu taʼu ʼaenī kua hili.” ʼE tou ʼiloʼi ʼe tonu ke fafaga tuʼumaʼu totatou sino ʼaki he meʼa kai lelei, neʼe teuteuʼi lelei, ke tou mālohi tuʼumaʼu. ʼE mahino ia ʼe toe maʼuhiga age ʼi te faʼahi fakalaumālie ke tou nonofo mālolohi tuʼumaʼu.—Hepeleo 5:12-14.

14. He koʼe ʼe tonu ke tou tokaga tuʼumaʼu kia tatou?

¹⁴ Koia ko tatou fuli, peʼe kua fualoa tatatou ako te Tohi-Tapu peʼe kailoa, ʼe tonu ke tou manatuʼi te tokoni fēnei ʼa Paulo kia Timoteo, ʼaē neʼe kua liliu ʼi te temi ʼaia ko he tagata taupau kua fakapotopoto pea mo fakahoko tona ʼu maʼua: “Ke ke tokaga tuʼumaʼu kia koe, pea mo tau faiako. Haga fai te ʼu meʼa ʼaia, heʼe kapau ʼe ke fai feiā, pea ʼe ke hāofaki anai ia koe, pea mo nātou ʼaē ʼe fakalogo kia te koe.” (1 Timoteo 4:15, 16, MN ) He koʼe ʼe tonu ke tou tokaga ki te tokoni ʼaia ʼa Paulo? Koutou manatuʼi, neʼe toe fakahā lelei e Paulo ʼe tonu ke tou tauʼi “te u puleaki a te temonio” pea mo “te u laumalie o te kovi e mauli i te u lagi.” Pea neʼe fakatokaga e te ʼapositolo ko Petelo ʼo ʼuhiga mo te Tevolo ʼe ina “kumi he tahi ke ina kai,” pea ʼe feala pe ko he tahi ia tatou. Ko tatatou fakafīfīmālie ʼe feala ke liliu ko te faigamālie ʼaia ʼaē ʼe kumi e Satana.—Efeso 6:11, 12; 1 Petelo 5:8.

15. Koteā ʼaē ʼe tou maʼu ʼi te faʼahi fakalaumālie ke tou lava tauʼi ia Satana, pea ʼe lava feafeaʼi hatatou taupau ke lelei te meʼa ʼaia?

¹⁵ Koia, koteā ʼaē ʼe ʼaoga kia tatou ke tou lava tauʼi ia Satana? ʼE fakamanatuʼi fēnei mai e te ʼapositolo ko Paulo: “Koutou toʼo te teu tau katoa ʼo te ʼAtua, ke feala ai hakotou tekeʼi te ʼaho ʼo te agakovi pea, ʼi te kua ʼosi ʼo te fai ʼo te meʼa fuli ke koutou tuʼu mālohi.” (Efeso 6:13, MN ) Ke puipui lelei tatou e te teu tau ʼaia ʼe tonu ke lelei te teu tau ʼaia pea ke taupau ke lelei tuʼumaʼu. Koia ʼe tonu ke kau ki te teu tau katoa ʼaia mai te ʼAtua ia te ʼatamai mālama totonu ʼo ʼuhiga mo te Folafola ʼa te ʼAtua. ʼE fakahā lelei e te faʼahi ʼaia te maʼuhiga ke totonu tuʼumaʼu tatatou mahino ki te moʼoni ʼaē ʼe fakahā e Sehova ʼi tana Folafola pea mo te kalasi ʼo te tagata kaugana agatonu mo poto. Ko te ako takitokotahi tuʼumaʼu te Tohi-Tapu pea mo te ʼu tohi faka Tohi-Tapu, ʼe maʼuhiga ke lelei tuʼumaʼu tatatou teu tau fakalaumālie.—Mateo 24:45-47; Efeso 6:14, 15.

16. Koteā ʼaē ʼe feala ke tou fai ke tou ʼiloʼi papau ʼe mālohi tuʼumaʼu tatatou “meʼa tali tau lahi ʼo te tui”?

¹⁶ ʼE faka maʼuhigaʼi e Paulo te tahi faʼahi maʼuhiga ʼo tatatou teu tau, ko “te meʼa tali tau lahi ʼo te tui,” ʼaē ʼe feala ke tou tekeʼi pea mo maumauʼi te ʼu mahafu kakaha ʼa Satana, ʼaē ko te ʼu tukugakoviʼi hala pea mo te ʼu akonaki ʼaposita. (Efeso 6:16, MN ) Koia ʼe maʼuhiga ke tou vakavakaʼi te mālohi ʼo te meʼa tali tau ʼo tatatou tui pea mo te ʼu faʼahi ʼe tonu ke tou fai moʼona fakamālohiʼi. Ohage la, ʼe feala ke koutou fai te ʼu fehuʼi ʼaenī: ‘ ʼE feafeaʼi taku teuteuʼi te ako Tohi-Tapu ʼaē ʼe fai ʼi te vāhaʼa fuli, ʼaki Te Tule Leʼo? Neʼe feʼauga koa taku teuteu ke feala haku “uga ki te ʼofa pea mo te ʼu gāue lelei,” ʼo ʼau fai ʼi te fono he ʼu tali neʼe ʼau fakakaukauʼi lelei? ʼE ʼau avahi koa te Tohi-Tapu pea mo lau te ʼu vaega ʼaē ʼe tuʼu ʼi te alatike kae mole tohi katoa ai? ʼE ʼau fakaloto mālohiʼi koa ʼihi ʼaki taku kau fakafiafia ki te ʼu fono?’ Ko tatatou meʼa kai fakalaumālie ʼe loloto, pea ʼe ʼaoga ke tou fakakaukau lelei kiai ke fua lelei lahi kia tatou.—Hepeleo 5:14; 10:24, MN.

17. (a) Koteā te meʼa fakatupu kovi ʼe fakaʼaogaʼi e Satana ʼi tana faiga ke ina maumauʼi tatou ʼi te faʼahi fakalaumālie? (b) Koteā ʼaē ʼe feala ke tou fai ke mole malave kia tatou te mālohi kovi ʼaia ʼo Satana?

¹⁷ ʼE ʼiloʼi e Satana te ʼu vaivaiʼaga ʼo te hahaʼi agahala, pea ʼe kākā tana ʼu gāue. Ko tana faʼahiga fai moʼo faka mafola te aga ʼaē ʼe kovi ʼe ko tana fakaliliu ʼo faigafua te sio ki te ʼu paki ʼaē ʼe hā ai te ʼu felāveʼi fakasino heʼeʼaoga, ʼi te televisio, mo te Internet, mo te ʼu fime viteo, pea mo te ʼu tohi. Ko ʼihi Kilisitiano ʼuhi ko tonatou ʼu vaivaiʼaga, neʼe nātou tali ai te aga fakalialia ʼaia, pea neʼe puli ai tonatou ʼu pilivilesio ʼi te kokelekasio pe neʼe kovi age tona ʼu fua. (Efeso 4:17-19) Koteā ʼaē ʼe feala ke tou fai ke mole malave kia tatou te mālohi kovi ʼaia ʼo Satana? ʼE mole tonu ke tou tuku tatatou ako takitokotahi te Tohi-Tapu, mo tatatou ʼu fono, pea mo te teu tau katoa mai te ʼAtua. ʼAki te ʼu meʼa fuli ʼaia ʼe feala anai ke tou fakakehekeheʼi te meʼa ʼaē ʼe lelei mo te meʼa ʼaē ʼe kovi, pea mo tou fehiʼa ki te meʼa ʼaē ʼe fehiʼa kiai te ʼAtua.—Pesalemo 97:10; Loma 12:9.

18. ʼE lava tokoni feafeaʼi mai ia “te heletā ʼo te laumālie” ki tatatou tau fakalaumālie?

¹⁸ Kapau ʼe tou taupau tatatou agamāhani ʼi te ako tuʼumaʼu ʼo te Tohi-Tapu, pea ʼe tou mālohi anai moʼo tauʼi ʼaki te ʼatamai mālama totonu ʼo te Folafola ʼa te ʼAtua, pea ʼe tou lava tauʼi anai ʼaki “te heletā ʼo te laumālie, te folafola ʼa te ʼAtua.” Ko te folafola ʼa te ʼAtua ʼe “gaue, e masilaʼage i te heleta mata lua fuape, e ulu o kaku ki te vaha o te loto mo te laumalie, ki te u hokoga-hui mo te u gakoi-hui, pea e ina fakamau te u fakakaukau mo te u manatu o te loto.” (Efeso 6:17, MN; Hepeleo 4:12) Kapau ʼe tou liliu ʼo poto ʼi te fakaʼaogaʼi lelei ʼo te “heletā” ʼaia, pea ka hoko he ʼu fakahala, ʼe mole kākāʼi anai tatou e he ʼu faʼahi ʼe hage ʼe mole tuʼutāmakiʼia, peʼe hage ko he meʼa ʼe lelei, kae ʼe ko he hele ʼe fakatupu mate ki ʼaē ʼe agakovi. Ko te ʼatamai mālama ʼo te Tohi-Tapu ʼaē neʼe tou maʼu pea mo tatatou mahino kiai, ʼe tokoni mai anai ke tou līaki te meʼa ʼaē ʼe kovi pea mo tou fai te meʼa ʼaē ʼe lelei. Koia ʼe tonu kia tatou fuli ke tou fai te ʼu fehuʼi ʼaenī: ‘ ʼE ʼau poto koa ʼi te fakaʼaogaʼi lelei ʼo te Folafola ʼa te ʼAtua peʼe kailoa? ʼE faigataʼa koa kia ʼau taku manatuʼi te ʼu vaega Tohi-Tapu ʼaē ʼe feala ke mālohi ai taku tauʼi ia Satana?’ Tou taupau tatatou ʼu agamāhani lelei ʼaē ko te ako ʼo te Tohi-Tapu pea ʼe tou lava tauʼi ai te Tevolo.—Efeso 4:22-24.

19. Koteā te ʼu lelei ʼe feala ke tou maʼu mo kapau ʼe tou tokaga lelei ki tatatou ako takitokotahi?

¹⁹ Neʼe tohi fēnei e Paulo: “E fakamalamai e te Atua te Tohi-tapu katoa, pea e aoga ia ki te faiʼakonaki, mo te fakailoilo o te hala, mo te fakatonutonu, pea mo te fakaʼako i te susitisia, koteuhi ke katoa te tagata a te Atua, kua teuteu o uhiga mo te gaue lelei fuape.” Kapau ʼe tou tokagaʼi te ʼu palalau ʼaē neʼe fai e Paulo kia Timoteo, pea ʼe feala ke tou mālolohi ai ʼi te faʼahi fakalaumālie pea ʼe feala ke fua lelei age totatou minisitelio. Ko te kau tagata ʼāfea pea mo te kau faifekau faka minisitelio ʼaē ʼe maʼuli fakalaumālie ʼe feala ke nātou tokoni lahi ki te kokelekasio, pea ʼe feala ke tou maʼu fuli he tui ʼe mālohi.—2 Timoteo 3:16, 17; Mateo 7:24-27.

[Kiʼi nota]

Kei Koutou Manatuʼi Koa?

• Koteā te ʼu ʼaluʼaga ʼe feala ai ke fua lelei kia tatou te ako takitokotahi?

• Koteā te hala neʼe fai e te kau fakaliliu tokolahi ʼo te Tohi-Tapu ʼo ʼuhiga mo te huafa ʼo te ʼAtua?

• Koteā te ʼu vaega faka Tohi-Tapu ʼe koutou fakaʼaogaʼi anai moʼo fakahā te hala ʼo te akonaki ʼo te Tahitolu?

• Koteā ʼaē ʼe tonu ke tou fai ke tou puipui tatou mai te ʼu aga kākā ʼa Satana, tatau aipe peʼe kua fualoa tatatou kau ki te kokelekasio?

[Paki ʼo te pasina 19]

Ke fua lelei tatatou ako takitokotahi, ʼe tonu ke tou maʼu he koga meʼa ʼe lelei pea ʼe mole logoaʼa

[Paki ʼo te pasina 23]

ʼE ʼau poto koa ʼi te fakaʼaogaʼi lelei ʼo te Folafola ʼa te ʼAtua peʼe kailoa?