Toe ʼAʼahi: ʼE Feafeaʼi Te Kamata ʼo He Fai Palalau
1 Moʼo kamata ʼo he fai palalau mo he tahi neʼe fia logo mai, koutou faigaʼi ʼo manatuʼi te ʼu meʼa neʼe koutou palalau ki ai ʼi takotou ʼuluaki ʼalu atu. Ko te fakatuʼutuʼu ʼe ko te tokoniʼi ʼo ia ke ina leleiʼia te ʼu manatu ʼe tuʼu ʼi ai pea mo te ʼu tohi neʼe koutou tuku age ki ai.
2 Koutou toʼo he temi moʼo teuteuʼi ai takotou toe ʼaʼahi. Koutou vakaʼi he ʼu manatu ʼe ʼaoga tāfito ʼo te tohi ʼe koutou fakaʼaogaʼi ānai. Koutou fakasiosio lelei ke koutou ʼiloʼi ai pe ʼe ko te ʼu manatu ʼe fia ʼe tonu ke fakaʼaogaʼi pea mo te loaloaga ʼo takotou nonofo. ʼE feala pe takotou palalau ki he manatu e tahi pe ʼe lua, ʼo fakalogo pe mokā ko ia ʼaenī ʼe fia logo tāfito ia. Vakaʼi te ʼu kupu tāfito ki muli mai:
3 Kapau e ko te kele e ko te nofoʼaga heʼe gata ʼo te tagata, koteā te ʼu meʼa ʼo ʼuhiga mo te maʼuli ʼe tou fakatalitali ki ai? Ko te fai palalau ʼaia ʼe fakatuʼutuʼu kia Isaia 25:6 pea 65:21, 22. ʼE feala ha koutou fakaʼaogaʼi te ʼu manatu ʼi te kapite 133 ʼo te tohi Le plus grand homme de tous les temps.
ʼE feala ke kamata fēnei takotou fai palalau:
◼ ʼI taku haʼu fakamuli, neʼe tou vakaʼi ai ko te ʼAtua neʼe ina fakatuʼutuʼu ko te kele ʼe tuʼu ānai ia ʼo heʼe gata. Kae ʼi taku mavae neʼe ʼau fai atu te fehuʼi ʼaenī: ʼE ko te maʼuli fea koa ʼaē ka hoko ānai? ʼE ʼau fiafia ʼi taku toe maʼu koutou moʼo fakahā atu te tali ʼa te Tahi-Tapu.”
4 Te meʼa ke tou fai ke tou maʼuli ai ʼi te takitaki ʼa te Puleʼaga ʼa te ʼAtua. Ko te kupu tāfito ʼaenī ʼe feala tona fakamoʼoni mai e Soane 4:23, ʼe feala takotou fakaʼaogaʼi te ʼu manatu ʼo te tohi Le plus grand homme de tous les temps ʼi te kapite 132.
Moʼo kamata te fai palalau, ʼe feala takotou ʼui age:
◼ “Neʼe ʼau leleiʼia tatatou fai palalau ʼo ʼuhiga mo te fakapapau ʼa te ʼAtua ʼaē ka ina pulihi ānai te agakovi. [ʼUi age kia ia ke toʼo tana tohi Le plus grand homme de tous les temps.] Ko he fehuʼi ʼe ʼaoga kia tatou fuli: Koteā koa te meʼa ka tou fai ānai ke tou kau ai ki te fetogi ʼaia? Vakaʼi te palalau ʼa Sesu ia Soane 4:23”. Palalau mo ia ʼo fakaʼaogaʼi te ʼu manatu ʼe tuʼu ʼi te kapite 132 ʼo te tohi Le plus grand homme de tous les temps
5 Koteā te ʼu meʼa lelei ʼe tou maʼu ānai ʼi te palatiso ʼi te kele? ʼE feala ha kotou fakaʼaogaʼi ia Pesalemo 67:6, 7, ia Mikea 4:3, 4 pe ʼe ko Isaia 65:21, 22. ʼE kotou maʼu ānai he ʼu manatu tāfito ʼi te tohi Le plus grand homme de tous les temps ʼi te kapite 133.
ʼE feala ha kotou palalau ʼo fēnei:
◼ “ ʼI taku toe ʼaʼahi mai [fakahā te ʼaho],, neʼe tou palalau ai ki te fakapapau ʼa te ʼAtua ʼaē ʼo ʼuhiga mo te fakatuʼuake, ʼaki tona ʼAlo, ʼe ina fakatuʼuake ānai totatou ʼu kāiga ʼofaina ki te kele kua liliu ānai ko he palatiso. Koteā koa te ʼu manuʼia ʼe tou fakatalitali ānai ki ai? Ko takotou tohi ʼe ina fakahā mai ni manuʼia ʼo fakatuʼutuʼu ki te Tohi-Tapu.” ʼAki takotou fakaʼaogaʼi te ʼu kumi aga ʼe tuʼu ʼi ʼoluga, lau he vaega e tahi pe ʼe lua ʼi te Tohi-Tapu pea fakahā kia ia te ʼu manatu ʼe tuʼu ʼi te kapite 133 ʼo te tohi Le plus grand homme de tous les temps.
6 ʼE lahi te hahaʼi ʼe fia logo ki te logo ʼo te Puleʼaga ʼe tou faka mafola. Ia ʼihi, neʼe tou sisio ai ʼe nātou leleiʼia tatatou fai palalau faka tohi-tapu. Ko ia, tou ʼolo ʼo toe ʼaʼahi nātou fuli neʼe fia logo mai pea ke tou faiga ʼo akoʼi nātou ki te moʼoni. — Mat. 10:11; 28:19, 20; Soane 21:17; Fkhā. 22:17.