He ʼUluaki ʼAʼahi Fakapotopoto
1 Ko te ʼu hahaʼi ʼe lahi tonatou ʼu maʼumaʼua ʼuhi ko tanatou ʼu gāue takitokotahi pe ʼe kua nātou tataʼofi hanatou ʼu manatu totonu ʼo ʼuhiga mo te lotu, koia ko te fealagia ʼo te fai palalau ʼi te fai faka mafola ʼe ko he meʼa ʼe faigataʼa. Koteā te ʼu manatu ʼe tokoniʼi ai tatou ke tou fai he ʼuluaki ʼaʼahi fakapotopoto?
2 ʼE feala ha kotou kamata palalau ʼo fēnei, ʼi te temi ʼe hoko ai te ʼu ʼaho lafeti:
◼ “ ʼI te temi ʼaia ʼo te taʼu, ʼe tou manatuʼi ai te sakilifisio ʼaē ʼo Sesu. ʼI takotou manatu, koteā koa te meʼa ʼe fai nei e Sesu?” Tuku ke fai mai hana tali. ʼE feala takotou fakahā age ia Fakahā 6:2 ʼe hā ai Sesu ʼe heka ʼi te hosi hina pea moʼo fakaʼosi tana mālo. Fakahā tana ʼu gāue faka hau pea mo te ʼu manuʼia heʼe gata ʼe foaki mai anai lolotoga tana pule ki te ʼu hahaʼi fuli ʼe fakalogo.
3 Moʼo fakahā te alatike ʼo te ʼaho 1 ʼo ʼapelili ko tona kupu tāfito “Ko te ʼāteaina moʼoni ʼe haʼu koa maifea? ” ʼe feala ke koutou ʼui age:
◼ “ ʼI te kele katoa ʼe fuhu te hahaʼi ʼo ʼuhiga mo te ʼāteaina. Kae ko te ʼāteaina ʼaē neʼe fakapapau e te ʼu puleʼaga fakatagata neʼe heʼeki hoko ia. Ko te lotu ʼo Sehova, te ʼAtua moʼoni, ʼe ina foaki mai te ʼāteaina heʼe gata.” Koutou lau ia 2 Kolonito 3:17 pea ke kotou fakahā ko te numelo ʼaia ʼo Te Tule Leʼo ʼe ina fakahāhā te fakapapau ʼa te ʼAtua pea ʼe ina fakahā pe ʼe feafeaʼi te hā mai ʼi te ʼu faʼahiga meʼa ʼe hoko ʼi te mālama kua vave pe totatou ʼāteaina.
4 ʼE feala takotou fakahā “Te Tule Leʼo” ʼo te ʼaho 15 ʼo ʼapelili 1992 ʼo palalau ai ʼo ʼuhiga mo te faikole:
◼ “ ʼI te temi tau, ʼe faikole te hahaʼi ke nātou maʼu te mālo. ʼI takotou manatu ʼe tali koa e te ʼAtua te ʼu kole ʼaia pea ʼe kau koa ia kia ai? [Tuku ke fai mai hana tali.] Koʼeni te ʼui mai ʼa te Tohi-Tapu.” Koutou lau pea mo fakamahino age ia 1 Petelo 3:12. ʼI te ʼosi ʼo he fakamatala nounou, fakahā he manatu ʼi he alatike ʼo Te Tule Leʼo ʼe ina uga ai he tahi ke ina lau te nusipepa ʼaia. Kapau ʼe koutou sisio ʼe fia logo fakamalotoloto ia, ʼe ʼaoga ke koutou fakahā ki ai ʼe feala tana apone.
5 Koutou manatuʼi ko totatou maʼua e ko te fai ʼo te ʼu ako faka tohi-tapu. Tokolahi ʼe pionie vaeluaʼi temi ʼi ʼapelili, ko te faigaʼi ʼaia ke maʼu te ʼu hahaʼi ʼaē ʼe holi ke nātou ako te Tohi-Tapu. Kae tatau aipe pe ʼe mole feala hatatou pionie vaeluaʼi temi ʼi ʼapelili, ʼe feala pe hatatou fai he fakatuʼutuʼu ke kamata he ako faka tohi-tapu.
6 Neʼe fakaʼaogaʼi e te kau faka mafola te ʼu kiʼi pepa lotu moʼo kamata ʼo he ako faka tohi-tapu lolotoga te ʼuluaki ʼaʼahi.
Moʼo fakahā te kiʼi pepa lotu “Une vie paisible dans un monde nouveau”, ʼe feala ke kotou ʼui age:
◼ “ ʼE mātou ʼaʼahi te hahaʼi fuli mole totogi. Tuku mai he fealagia ke ʼau tuku atu te kiʼi pepa lotu ʼaenī ʼe ina fakamahino atu te ʼaluʼaga ʼo tamatou gāue. ʼI takotou manatu ʼe feala koa ke liliu te kele ʼi he ʼaho ohage ko te paki ʼaenī? ” ʼI tana ʼosi tali mai, ʼe feala ha kotou palalau mo ia ki te ʼu ʼuluaki palakalafe ʼo fakamahino lelei ia Mateo 6:9, 10 pea mo Pesalemo 37:29.
7 Koutou fakakaukauʼi lelei te fakaʼaluʼalu ʼo takotou palalau. ʼE ʼi ai te ʼu manatu tāfito ʼe tuʼu ʼi te tohi Comment raisonner ʼi te ʼu pasina 9 ki te 15. Kapau ʼe koutou fakaʼaogaʼi fakalelei te ʼu ʼuluaki palalau ʼaia, ʼe koutou fai anai he ʼuluaki ʼaʼahi fakapotopoto.