Lolotoga Te ʼu ʼAʼahi, Tou Kumi Ke Kamata He ʼu Ako Faka Tohi-Tapu
1 Ka tou maʼu he ʼu hahaʼi ʼe fia logo mai, ʼe tonu ke tou faigaʼi fakalelei ʼo taupau tanatou fia logo. Ko tatatou ʼu ʼaʼahi ʼe feala ke hoko ai he ʼu fai palalau faka tohi-tapu pea mo he ʼu ako faka tohi-tapu ke nātou maʼu ai te maʼuli. Tou fakasiosioʼi muʼa he ʼu manatu ke feala fai ai he ʼu ʼaʼahi fakapotopoto.
ʼI te ʼosi ʼo te ʼuluaki felōgoʼi, ʼe feala takotou fakatuʼu he tafitoʼaga ʼo he ʼaʼahi foʼou ʼo koutou lagaʼi te fehuʼi ʼaenī:
◼ “Neʼe kua koutou fehuʼi koa pe koteā te tupuʼaga ʼo te lahi ʼo te ʼu lotu?” Lolotoga te ʼaʼahi, ʼe feala ke koutou ʼui age: “ ʼI taku haʼu fakamuli, neʼe tou lagaʼi te fehuʼi ʼaenī: He koʼe koa ʼe lahi te ʼu lotu? ʼE lahi tona ʼu tupuʼaga. ʼE ʼau fia lau atu he manatu ʼaoga neʼe ʼau maʼu ʼi taku kumi te tali ki te fehuʼi ʼaia.” Koutou avahi te tohi Comment raisonner ʼi te pasina 310 pea koutou lau te ʼu palakalafe ʼi te kupu ʼaē “Pourquoi y a-t-il tant de religions?”
2 ʼE leleiʼia koa e te ʼAtua te ʼu lotu fuli? Ko te lelei ʼo he lotu ki te ʼAtua, ʼe tonu ke ʼi ai hona ʼu fua ʼe lelei.
Moʼo kamata he ʼaʼahi, ʼe feala ke koutou fehuʼi age:
◼ “Koteā koa te talatuʼu ʼo te lotu ʼe ʼaoga ki te maʼuli ʼo he tahi? Ko te palalau ʼa Sesu ʼe tuʼu ia Mateo 7:17-20 ʼe fakahā mai kia tatou te maʼuli totonu ʼe tonu ke muliʼi e te lotu moʼoni.” Koutou lau fakahagatonu te ʼu vaega ʼaia ʼi te fakaʼosi ʼo te palakalafe 19, ʼi te ʼu pasina 12 pea mo te 13 ʼo te tohi L’humanité à la recherche de Dieu. ʼOsi ʼaia koutou fehuʼi age pe koteā ʼaē ʼe sio ki ai ʼi te paki ʼo te pasina 13. “ ʼE ʼui e te ʼu lauʼi miliona hahaʼi ʼe nātou faka tui ki te ʼAtua, kae tokolahi ʼe nātou fakafisi kia ia ʼaki ʼanatou gāue ʼi tonatou maʼuli.” ʼOsi ʼaia pea koutou lau age te ʼu ʼuluaki laini e lua ʼo te palakalafe 20. “Ko te ʼu agamālohi ʼaia ʼe ina fakahāhā te ʼu lotu ʼaē ʼe mole nātou muliʼi te lao neʼe foaki e Kilisito ʼo ʼuhiga mo te feʼofaniʼaki, pea mo te ʼofa ʼaē ki tona ʼu fili. ʼI taku toe ʼaʼahi mai, ʼe feala anai ke tou palalau ki te ʼu fua lelei ʼe tonu ke fakahā e he lotu.”
3 Koteā te maʼuli ki ʼa muli ʼonatou ʼaē ʼe nātou kumi te ʼAtua moʼoni? Ko he fakasiosio ʼo te fehuʼi ʼaia mai te tohi L’humanité à la recherche de Dieu ʼe feala ai ke kamata he ako faka tohi-tapu.
Moʼo kamata he fai palalau, ʼe feala ke koutou ʼui age:
◼ “ ʼUhi ko te ʼu faʼahiga meʼa ekonomike ʼi te temi nei, tokolahi te hahaʼi ʼe nātou fehufehuʼi pe ʼe feala tanatou fakasiosio te temi ka haʼu ʼaki he manatu lelei. Neʼe ʼau maʼu ko te Tohi-Tapu ʼe fakaloto malohiʼi tatou ʼi tana palalau ʼo ʼuhiga mo te temi ki ʼa muli. ʼE ʼau fia fakahā atu te fakapapau ʼa te ʼAtua ia Isaia 65:21, 22, 25. [Koutou lau pea mo fakamahino te vaega ʼaia ʼo fakanounou.] Ko te tohi L’humanité à la recherche de Dieu ʼe tali ki te ʼu fehuʼi maʼuhiga ʼi te fahaʼi ʼaia, ʼo kamata ʼi te palakalafe 17, ʼo te pasina 372.” ʼOsi ʼaia, koutou fakahā age pe ʼe feafeaʼi te fai ʼo he ako faka tohi-tapu ʼo vakaʼi te ʼu palakalafe 17 ki te 20. “ ʼI te vāhaʼa ka haʼu, ʼe ʼau fia fakasiosio anai mo koutou te fehuʼi ʼaē: Koteā te tafitoʼaga ʼo te mālama foʼou neʼe fakapapau mai ʼi te Tohi-Tapu?”
4 Tou fakaʼaoga lelei te temi kei toe ke tou kau ai ki te faka mafola katoa ʼaē ʼe fai nei ki te ʼu puleʼaga fuli ʼo te kele (vakaʼi ia Gāue 20:21). Lolotoga te ʼu ʼaʼahi, tou kumi ke kamata he ʼu ako faka tohi-tapu, ko tona ʼuhiga kia nātou ʼaē ʼe tou fai faka mafola ki ai te maʼuli heʼe gata.