Ko Te Tohi-Tapu—Ko Te Matapuna ʼo Te Fakafimālie Pea Ko Te Falalaʼaga ʼi He Mālama Tokakovi
1 Ko te malamanei ʼe tau mo te ʼu fihifihia pea ʼe ʼaoga kiai te fakafimālie pea mo te ʼamanaki. Ko te Tohi-Tapu ʼe ko te matapuna pe ʼaia e tahi ʼo te fakafimālie moʼoni. ʼE ina foaki mai te ʼamanaki ki he mālama foʼou ʼe ʼi ai te faitotonu. (Lom. 15:4; 2 Pe. 3:13) Ko te tohi Auxiliaire, ʼi te pasina 207, ʼe tuʼu ai te fakatokaga ʼaenī: “Ka na ʼaua la te Tohi-Tapu ʼe mole tou ʼiloʼi anai ia Sehova, mo te ʼu tapuakina fakatalakitupua ʼo te sakilifisio faitotogi ʼo Kilisito, ʼo feiā aipe ki te ʼu meʼa ʼe fakamaʼua ke tou fai, ke feala ai tatatou maʼu te maʼuli heʼegata ʼo mulimuli ki te taki ʼa te Puleʼaga faitotonu ʼa te ʼAtua.”
2 ʼI Novepeli ʼe tou fakatokaga tāfito anai te hahaʼi ki te gāue ʼa te Folafola ʼa te ʼAtua, te Tohi-Tapu, moʼo tokoni kia nātou ke nātou tauʼi te ʼu fihifihia ʼe haʼu mai te mālama. ʼE tou fakahā anai te Tohi-Tapu Traduction du monde nouveau pea mo te tohi Mauli O Heegata. Koteā te meʼa ʼe feala ke tou talanoa kiai moʼo tokoniʼi ʼo nātou ʼaē ʼe lotolelei ke nātou mahino ki te maʼuhiga ʼo te Tohi-Tapu?
3 ʼI te ʼosi fakahā ʼo tokotou higoa, ʼe feala hakotou ʼui age fēnei:
◼ “E lagi ʼe koutou loto tahi mo ʼau, ʼaki te ʼu fihifihia ʼaē ʼe tau mo tatou, ʼe faigataʼa te tokalelei ʼo totatou ʼatamai. ʼE tou maʼu koa ʼifea he ʼu tokoni ʼaoga moʼo tauʼi ʼo te ʼu faigataʼa ʼaia? [Koutou faka fealagia ke fai hana tali.] Neʼe ʼau fakatokagaʼi ko te Tohi-Tapu ʼe fakaloto mālohi, koteʼuhi ʼe ina akoʼi mai peʼe feafeaʼi tatatou maʼu ia te fiafia. [Lau ia Luka 11:28.] Ko te fakatuʼutuʼu ʼo tamatou gāue, ko te fakaloto mālohiʼi ʼo te hahaʼi ke nātou lau te Tohi-Tapu pea ke nātou maʼu te fua lelei ʼo te ako ʼaia. Ko te ako ʼo te Tohi-Tapu ʼaki te tohi, Mauli O Heegata, ʼe feala ke tokoni kia koutou ʼi te faʼahi ʼaia. ʼE feala pe hatatou fakatokagaʼi te meʼa ʼe ina ʼui mai ʼo ʼuhiga mo te tupuʼaga ʼo te ʼu faigataʼaʼia lahi ʼi te malamanei. Ko te tupuʼaga ʼo te lahi ʼo te ʼu mamahi ʼe tau mo te mālama, ko tana mole maʼuliʼi te ʼu tokoni ʼaē ʼe haʼu mai te Folafola ʼa te ʼAtua. [Fakahā age te kapite 29 ʼi te pasina 238.] Kapau ʼe koutou fia lau te tohi ʼaenī, ʼe ʼau fiafia ʼi tona tuku atu ʼaki te Tohi-Tapu ʼaenī Traduction du monde nouveau ki tona meʼa ʼofa pe ko te falā afe.”
4 ʼE feala pe ke koutou fili he faʼahiga palalau ʼe faigafua ohage la ko te manatu ʼaenī:
◼ “ ʼE mātou faiga ke mātou fakaloto mālohiʼi te hahaʼi ke lahi tanatou fakaʼapaʼapa ki te Folafola ʼa te ʼAtua, te Tohi-Tapu. ʼE ʼau fia tuku atu te kiʼi pepa lotu ʼaenī, Ko Te Malamanei ʼo Te Temi ʼAenī ʼe Hāo Anai Koa? ʼE ina fakamahino pe koʼe ʼe feala ke tou maʼu ʼi te Tohi-Tapu he ʼamanaki moʼoni ʼo ʼuhiga mo he mālama ʼe lelei age. Koutou lau te kiʼi pepa lotu ʼaenī, pea ʼi taku toe liliu mai, ʼe koutou fakahā mai pe koteā takotou manatu ʼo ʼuhiga mo te ʼamanaki ʼaē ʼe foaki mai e te Tohi-Tapu.”
5 Ko ʼihi kaugā faka mafola e lagi nātou fia fakaʼaogaʼi te palalau fakahagatonu ʼaenī moʼo kamata ʼo he ako faka Tohi-Tapu:
◼ “ ʼE ʼau haʼu ʼo fakahā atu ʼe feala he fai ʼo hakotou ako faka Tohi-Tapu ʼi tokotou ʼapi ʼe mole totogi. Ko te Tohi-Tapu ʼe haʼu mai te ʼAtua, pea ko tana akonaki ʼe feala ke ina tokoniʼi tatou ke tou fakatotonuʼi te ʼu meʼa fuli. Ko te fakaliliu ʼo te Tohi-Tapu Traduction du monde nouveau ʼi te lea ʼo te temi nei neʼe fakatuʼutuʼu ʼo ʼuhiga mo he ako takitokotahi. Ko te Tohi-Tapu ʼaia neʼe ʼiloʼi e te lauʼi miliona hahaʼi lau Tohi-Tapu ʼi te mālama. Tuku muʼa ke ʼau fakahā fakanounou atu peʼe feafeaʼi takotou fakaʼaogaʼi. [Fakahā age te pasina 1659, pea koutou fakatokagaʼi ia ia ki te 36A. ʼO mulimuli ki te meʼa ʼaē ʼe fia logo kiai, koutou vakaʼi he vaega e tahi peʼe lua ʼe tuʼu ʼi ai pea koutou palalau ki te puani ʼaē ʼe ʼaoga. Koutou fakamahino age ko te vakaʼi ʼo te ʼu vaega ʼaē ʼe tuʼu ʼi ai ʼaē ʼe nātou fakahā anai te fakatuʼutuʼu ʼa te ʼAtua ʼaē ka ina fakahoko ʼaki tona Puleʼaga.] ʼE ʼau fiafia anai ʼi te toe liliu mai pea ke tā palalau ki te ʼamanaki ʼa te Puleʼaga ki te temi ka haʼu.”
6 Ko te Tohi-Tapu ʼe ko te matapuna ʼo te fakafimālie pea mo te falalaʼaga, pea mo te moʼoni ʼaē ʼe ina taki tatou ki te maʼuli heʼegata. (Soane 17:3, 17) Ko te vaevae ʼo te mālama ʼo te Tohi-Tapu mo niʼihi, ʼe fakatupu fiafia kia Sehova, “ ʼaē ʼe loto ke hāofaki te hahaʼi fuli.”—1 Tim. 2:4.