Tou Tokoni Kia Nātou Ke Nātou ʼIloʼi Lelei Ia Sesu

¹ Neʼe ʼui e te ʼapositolo ko Soane “neʼe mole feala ke ʼiloʼi e te mālama” ia Sesu. (1 Soane 3:⁠1) Ko tana logo fakaofoofo neʼe mole tokagaʼi e te tokolahi ʼi tona temi. ʼO toe feiā aipe mo totatou temi, ko te hahaʼi ʼaē ʼe nātou ʼui ko nātou ko te kau ‘Kilisi­tiano,’ ʼe mole nātou ʼiloʼi tuʼa tahi te ʼu akonaki ʼa Sesu, tana ʼu gāue, pea mo tona tuʼulaga ʼi te temi nei ʼi te ʼu fakatuʼutuʼu ʼa te ʼAtua. ʼE mole feala ke nātou maʼu te maʼuli heʼegata, kapau ʼe mole nātou maʼu te ʼatamai mālama ki te ʼu faʼahi ʼaia. (Soane 17⁠:⁠3) ʼE feala koa ke tou tokoni kia nātou?

² ʼI te ʼosi fakamālo ki te tagata ʼo te ʼapi ʼaē neʼe ina tali te tohi “Te Tagata ʼAē ʼe Lahi Tokotahi,” ʼe feala anai ke tou ʼui age:

◼ “Ohage pe ko taku tala atu ʼi taku ʼuluaki ʼaʼahi, ko te tohi Te Tagata ʼAē ʼe Lahi Tokotahi neʼe fai moʼo ako ʼaki te Tohi-Tapu. ʼE ʼau loto pe ke ʼau fakahā fakanounou atu peʼe feafeaʼi anai tona fakaʼaogaʼi lelei.” Tou avahi te tohi ki te kapite 1, “Te ʼu fagonogono mai lagi.” Tou hoko atu ʼaki te ʼu fehuʼi ʼaē ʼe tuʼu ʼi te tohi. Lau te ʼuluaki fehuʼi, pea vakaʼi te ʼu ʼuluaki palakalafe. Faka ʼalutahi mo te paki ʼo te pasina lua. Fakatokagaʼi te ʼu fehuʼi ʼaē kei toe, pea mo fakahā te ʼu tali mo kapau ʼe maʼu he temi. Ia muʼa ʼo te fakaʼosi ʼo te fai palalau, tou fakatuʼutuʼu ke tou toe liliu kiai.

³ Kapau neʼe tou palalau ʼo ʼuhiga mo Soane 17⁠:3 ʼi tatatou ʼuluaki ʼaʼahi, ʼe feala ke tou faka maʼuhigaʼi te ʼaoga ʼaē ʼo te ʼiloʼi lelei ia Sesu, ʼo tou ʼui fēnei:

◼ “ ʼI taku haʼu fakamuli, neʼe tā lau ia Soane 17:3 ʼaē ko te ʼiloʼi lelei ʼo te ʼAtua pea mo tona ʼalo ia Sesu Kilisito, ʼe feala ke ina taki ki te maʼuli heʼegata. ʼI te nofo ʼa Sesu ʼi te kele, neʼe ina fakaʼata te ʼu kalitate fakaofoofo ʼo te ʼAtua. ʼE mole ko he manatu lelei koa la, te ʼui ʼaē kapau ʼe tou ako ʼo ʼiloʼi lelei ia Sesu pea mo tona minisitelio, ʼe toe lahi ai tatatou ʼiloʼi tana Tāmai? [Tuku ke fai hana tali.] Fakatokagaʼi te talanoa ʼa te tohi ʼaenī, Te tagata ʼaē ʼe lahi tokotahi ʼo te ʼu temi fuli.” Tou lau te ʼuluaki mo te lua palakalafe ʼo te pasina 10 ʼo te kapite 116. Tou fakahā ko te tohi ʼaia ʼe maʼu fuli ai te ʼu fakamatala ʼo te ʼu Evaselio e fā ʼo ʼuhiga mo Sesu, pea ʼe fefakahoahoaʼaki te ʼu talanoa ʼaia ʼi te temi pe ʼaē neʼe hoko ai. Tou fakahā lelei te ʼu kupu tāfito ʼo te ʼu kapite, te ʼu lea fakatātā, pea mo te mape ʼaē ʼi te kamataʼaga ʼo te tohi.

⁴ Kapau neʼe koutou tuku te kiʼi pepa lotu “Ko te malamanei ʼo te temi ʼaenī ʼe hāo anai koa?” ki te tagata ʼo te ʼapi, ʼaē neʼe mole feala ke palalau mo koutou ʼuhi ko tana maʼumaʼua, ʼe feala anai ke koutou fakaʼaogaʼi te faʼifaʼitaki ʼaenī:

◼ “ ʼI taku haʼu fakamuli, neʼe ke maʼumaʼua ʼaupito. Neʼe ʼau tuku atu ke kiʼi pepa lotu neʼe ina lagaʼi te fehuʼi ʼo ʼuhiga mo te hāofaki ʼo te malamanei ʼi te ʼu temi fihifihia ʼaenī. ʼE tou lau ia Fakahā 21⁠:​4, ʼaē ʼe tuʼu ʼi henī ʼi te tohi, Te tagata ʼaē ʼe lahi tokotahi ʼo te ʼu temi fuli. [Lau te vaega ʼi te palakalafe 5 ʼo te kapite 133.] Ko te paki ʼaenī [ʼi te lalo pasina] ʼe ina fakahā mai peʼe feafeaʼi anai mokā haga te ‘ ʼAtua ʼo holoholoʼi te ʼu loʼimata fuli pe ʼi ʼotatou ʼu mata.’ Ko te tohi ʼaenī ʼe ina foaki mai te fakamoʼoni lelei ko te fakapapau ʼe fakahoko anai ʼi he temi ka haʼu kua ōvi mai pe. Kapau ʼe ke fia lau, ʼe ʼau tuku atu ki tona totogi fakaʼofa pe ko te falā 400.”

⁵ Koutou Fakahā age ʼe feala ke fai he ako Tohi-Tapu:

◼ Kapau ʼe tou tuku te tohi Te Tagata ʼAē ʼe Lahi Tokotahi ki te tagata ʼo te ʼapi peʼe kapau kua ina ʼosi maʼu ia, ʼe ko he meʼa lelei anai te fakahā age peʼe feafeaʼi te fai ʼo he ako Tohi-Tapu ʼo fakaʼaogaʼi te kapite 111. ʼE feala ke tou faʼifaʼitaki ki te faʼahiga fai ʼo te Ako Tohi ʼo Te Kokelekasio. Kapau ʼe haga tuputupu te ako, tou fetogi ʼo fai ʼi te tohi Te ʼAtamai Mālama ʼAē ʼe Ina Taki Ki Te Maʼuli Heʼegata.

⁶ ʼE moʼoni, ʼe tou maʼu anai he tokolahi ʼe fakamalotoloto, ʼe nātou tali anai pea mo lau te tohi ʼaia. Tou tokakaga ʼo ʼolo ʼo ʼaʼahi te hahaʼi fuli ʼaē neʼe tou tuku ki ai he tohi. ʼE tou maʼu anai he fiafia lahi ʼi tatatou tokoni kia nātou ke nātou ʼiloʼi pe ko ai “te ala.”​—Soane 14:⁠6.