ʼAki Te Tagata ʼAē ʼe Lahi Tokotahi ʼo Te ʼu Temi Fuli
1 ʼI te māhina ʼo Fepualio, ʼe fakatafito anai tatatou ʼu fai palalau ʼi te ʼu ʼapi kia Sesu, pea mo tou fakaloto mālohiʼi anai te hahaʼi ke nātou ʼiloʼi lelei ia ia. ʼI te faka maʼuhigaʼi ʼo te ʼu manatu ʼaē ʼe tuʼu ʼi te tohi Tagata ʼAē ʼe Lahi Tokotahi, ʼe feala ai ke tou tokoni ki te hahaʼi ke nātou sio kia Sesu, ʼo mole gata pe ʼi tona ʼuhiga faka hisitolia, kae ke nātou sio ki ai ohage ko te ʼAlo ʼo te ʼAtua pea kua ʼafio ʼi tona ʼuhiga Hau ʼi te puleʼaga ʼaē ka ina fakatokatoka anai te ʼu fihifihia fuli ʼo te malamanei.
2 Koteā koa te ʼu kiʼi puani lelei ʼo te tohi ʼaia ʼe feala ke tou fakahā? Ko te kapite 5 ʼe ina lagaʼi te fehuʼi ʼaenī, “Te tupu ʼo Sesu: ʼifea pea neʼe hoko ʼanafea?” ʼE feala anai ke tou lagaʼi te fia logo ʼa he tūpulaga ʼaki te talanoa fakaofoofo ʼo te kapite 44, “Neʼe faka gona e Sesu te afā fakamataku.” Ko he tahi ʼe tau mo he mahaki fakasino peʼe ko he māʼimoa ʼe loto fīmālie moʼoni anai ʼaki te kapite 57, “Agaʼofa ki te kau lotomamahi.” Ko te kapite 90, “Te falala ki te toe tuʼuake,” ʼe leleiʼia anai e nātou ʼaē neʼe mate he tahi neʼe nātou ʼoʼofa mamahi ai. Ko he fai palalau ʼo ʼuhiga mo te ʼu ʼaluʼaga ʼaē ʼe hoko ʼi te malamanei ʼe feala ke fakatafito ki te kapite 111, “Te fakaʼiloga ʼo te ʼu ʼaho fakamuli.”
3 Ohage la ʼe feala ke koutou kamata fēnei takotou palalau:
◼ “Koteā koa te meʼa ʼaē ʼe loto te ʼAtua ke tou fai ʼi totatou ʼuhiga Kilisitiano? ʼE fakahā mai e te Tohi-Tapu ke tou muliʼi te faʼifaʼitaki neʼe tuku mai e te tagata ʼaē ʼe lahi tokotahi ʼi te malamanei, ko Sesu Kilisito. [Koutou lau ia 1 Petelo 2:21.] Neʼe ina akoʼi ki tana kau tisipulo te ʼofa ʼaē ki ʼonatou ʼu tatau, ke nātou taupau maʼu te aga maʼa, pea ke nātou faikole ke hoko mai te Puleʼaga ʼo te ʼAtua. Ko totatou hāofaki ʼe fakalogo ki tatatou loto fakafetaʼi pea mo tatatou fakalogo ʼaē kia Sesu totatou Fakamaʼuli. [Koutou lau ia Soane 14:6.] Neʼe mole hage ia Sesu ko te tagata fuli. Ko te tohi ʼaenī ʼe talanoa ʼo ʼuhiga mo ia ohage ko te tagata ʼaē ʼe lahi tokotahi ʼo te ʼu temi fuli. Ko te kapite 59 ʼe ina fakamoʼoni te faʼahi ʼaia, ʼo ina fakahā ko ia ko ‘Kilisito, te ʼAlo ʼo te ʼAtua maʼuli.’ Mai tona ʼaluʼaga ʼaē ʼe fakalogo totatou hāofaki kia te ia, ʼe mole hake koa la ʼi tokotou ʼu loto te manatu ʼaē ʼe tonu ke lahi ʼaupito tatatou ako te ʼuhiga ʼo tana gāue pea mo tana ʼu akonaki? Ko te tohi ʼaenī neʼe teuteuʼi tāfito ʼo ʼuhiga mo te faʼahi ʼaia, pea ʼe ʼau fiafia anai ʼi te tuku atu te tohi ʼaenī maʼa koe, ko tona totogi fakaʼofa pe ko te falā 400.”
4 Peʼe ʼi te ʼosi ʼo takotou fakamālo, ʼe feala ke koutou ʼui age:
◼ “ ʼE mātou fehuʼi ki te hahaʼi peʼe nātou ʼio ki te ʼui ʼaē ko Sesu Kilisito, neʼe ko ia pe ko te tagata ʼaē ʼe lahi tokotahi ʼo te ʼu temi fuli. [Tuku ke tali mai.] ʼE moʼoni ʼe tokolahi te ʼu tagata neʼe nātou fetogi te ʼaluʼaga ʼo te maʼuli ʼo te tagata, pea ko ʼihi neʼe nātou kau ki te fakahaʼele ʼo te sosiete fakatagata ki muʼa ʼo te temi nei, kae koutou fakatokagaʼi muʼa te meʼa ʼaē ʼe kehekehe ai Sesu mo nātou fuli ʼaia. [Lau ia Soane 17:3.] ʼE mole he tahi atu ʼe ina maʼu te mālohi moʼo foaki ʼo te maʼuli heʼegata ki te malamanei. ʼI te temi ʼaē neʼe nofo ai Sesu ʼi te kele, neʼe ina fakahāhā te ʼu faʼahiga meʼa ka hoko ʼi muʼa ʼo te fakaʼosi ʼo te mālama ʼaenī. Kae neʼe ina toe fakaloto mālohiʼi foki tana ʼu tisipulo ke nātou fakafiafia, he ko te ʼu meʼa ʼaia ka hoko, ʼe faka ʼuhiga kua ōvi mai te Hāofaki.” ʼI takotou ʼosi palalau fakanounou ki he ʼu faʼahi ʼo te fakaʼiloga ʼo te ʼi henī ʼa Kilisito ʼi te kapite 111, koutou fakatokagaʼi age te kapite fakaʼosi, ʼaē ʼe fakahā ai te tahi ʼu tapuakina ʼaē ka tou maʼu anai ʼaki te takitaki ʼo tona Puleʼaga.
5 Kapau ʼe maʼumaʼua ia ia ʼaē ʼo te ʼapi, ʼe feala anai ke fakaʼaogaʼi te kiʼi pepa lotu ‘Te Malamanei ʼe Hāo Anai Koa?’ pea mo ʼui fēnei:
◼ “Kapau ʼe maʼu hou kiʼi temi, ʼe ʼau loto pe ke ʼau tuku atu te kiʼi pepa lotu ʼaenī [peʼe ko he nusipepa] ko tona kupu tāfito [tou fili he kiʼi pepa lotu peʼe ko he alatike ʼe tāu]. Pea ʼe ʼau fakaloto mālohiʼi koe ke ke lau. Pea ka ʼau toe liliu mai, ʼe ʼau fia ʼiloʼi anai pe koteā tau manatu ʼo ʼuhiga mo te faʼahi ʼaia.”
6 ʼE foaki e te Puleʼaga te ʼamanaki moʼoni ki te malamanei. Tou fakahā tatatou holi mālohi ʼaē ke tou vaevae mo te hahaʼi fuli ʼaē ʼe fetaulaki mo tatou ia te “ ʼatamai mālama totonu ʼo ʼuhiga mo te misitelio tapu ʼa te ʼAtua, ʼaē ko Kilisito.”—Kolose 2:2.