Tou Fakafetaʼi Kia Sehova “ ʼi Te ʼAho Katoa”
1 ʼE tuʼu ia Pesalemo 145:2 te fakapapau ʼaē neʼe fai e te Hau ko Tavite kia Sehova: “ ʼE ʼau fakafetaʼi anai kia te koe ʼi te ʼaho katoa, pea ʼe ʼau vikiviki anai ki tou huafa ki he ʼu temi ʼe mole ʼiloʼi hona gataʼaga, ʼio, ʼo talu ai.” ʼE tou maʼu foki mo te ʼu tupuʼaga ʼaē ʼe uga ai ia tatou ke tou fakafetaʼi pea mo vikiviki ki tatatou Tāmai ʼaē ʼe ʼi selo! Kae ʼe lava feafeaʼi hatatou mulimuli ki te faʼifaʼitaki ʼa Tavite ʼi te hikihiki ʼo te pule faʼitaliha ʼa Sehova “ ʼi te ʼaho katoa”?
2 Tou Fakafonu Totatou ʼu Loto ʼAki He Loto Fakafetaʼi Kia Sehova: Ko te ako tuʼumaʼu ʼo te Folafola ʼa te ʼAtua ʼe ina fakatuputupu tatatou loto fakafetaʼi ʼo ʼuhiga mo te ʼu meʼa ʼaē neʼe fai e Sehova maʼa tatou, te ʼu meʼa ʼaē ʼe ina fai, pea mo te ʼu meʼa ʼaē ka ina toe fai anai maʼa tatou. ʼI te tuputupu ʼo totatou loto fakafetaʼi ʼo ʼuhiga mo tana ʼu gāue fakatalakitupua, ʼe tou fia palalau tuʼumaʼu anai ʼo ʼuhiga mo tana agalelei. (Pes. 145:7) ʼE tou vikiviki anai kia Sehova ʼaki he lotomālohi ʼi te ʼu temi faigamālie fuli.
3 Tou Vikiviki Kia Sehova ʼi Te ʼu Fai Palalau ʼi Te ʼAho Fuli Pe: ʼI tatatou palalau mo te ʼu vāhaʼa fale, te ʼu kaugā ako, te ʼu kaugā gāue pea mo ʼihi ʼaē ʼe tou felāveʼi mo nātou ʼi te ʼaho fuli, ʼe feala ke tou maʼu ai he ʼu faigamālie moʼo fakahā age tatatou ʼamanaki. ʼE lagi palalau anai he vāhaʼa fale ʼo ʼuhiga mo te ʼu fakapō ʼaē ʼe hoko ʼi te kolo; ʼe lagi tuʼania anai he kaugā ako ʼo ʼuhiga mo te toloke peʼe ko te ʼu aga heʼeʼaoga; ʼe lagi fakahā anai e he tahi kaugā gāue tana manatu ʼo ʼuhiga mo he meʼa faka politike. ʼE feala ke tou fakahā age te ʼu pelesepeto pea mo te ʼu fakapapau ʼi te Tohi-Tapu ʼaē ʼe fakamahino ai te puleʼaki fakaʼosi ki te ʼu fihifihia ʼaia pea mo te faʼahiga aga ʼaē ʼe tonu ke tou fai ʼi te temi nei. Ko te ʼu tai palalau ʼaia ʼe feala ke liliu ko he tapuakina mokā ʼe fai ʼi tona “temi totonu”!—Taag. 15:23.
4 Tou Palalau ʼo ʼUhiga Mo Sehova ʼi Te Temi Katoa: Ko ia ʼaē ʼe lahi tona loto fakafetaʼi kia Sehova ʼe ina fia fakahā te logo lelei ki te hahaʼi fuli. (Pes. 40:8-10) ʼO ʼuhiga mo te faʼahi ʼaia, ʼe tonu ke tou fai te fehuʼi ʼaenī, ‘ ʼE ʼau fai koa te ʼu meʼa fuli ʼaē ʼe feala ke ʼau fai ʼo mulimuli pe ki toku ʼaluʼaga?’ ʼE fakatokagaʼi e te tokolahi neʼe feala ke nātou liliu ko he ʼu pionie katoa ʼi tanatou fai te ʼu fetogi ʼaē neʼe ʼaoga kiai? Kapau ʼe mole feala te faʼahi ʼaia ʼi te temi nei, ʼe feala koa ke tou pionie vaeluaʼi temi? ʼI te fakaōvi mai ʼo te ʼAho Fakamanatu ʼe ko he temi lelei moʼo fai lahi te gāue, ʼe lelei anai te māhina ʼo Malesio pea mo ʼApelili moʼo fakalahi tatatou gāue ʼaki te pionie vaeluaʼi temi.
5 Tou Tokoni Ki Te Hahaʼi Foʼofoʼou Ke Fakafetaʼi Kia Sehova Mo Tatou: Ko te toʼotoʼoga ʼo te ʼAho Fakamanatu ʼo te mate ʼa Sesu ʼe ina fakamanatuʼi tuʼumaʼu mai te ʼu tupuʼaga ʼaē ʼe tonu ai ke tou fakamālo kia Sehova pea mo vikiviki Tona huafa. Ko te temi ʼaia ʼe lelei ʼaupito ke fakaloto mālohiʼi ai te kau ako Tohi-Tapu ke nātou kau kia tatou ki te faka mafola ʼo te ʼafio ʼo Sehova. Koutou uga ia nātou ke nātou fakakaukauʼi ʼi te faikole ʼo ʼuhiga mo te meʼa ʼaē ʼe ʼui ʼi te palakalafe 7 ki te 9 ʼi te pasina 173 ki te 175 ʼi te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Kapau ʼe feala ke nātou kamata fai faka mafola, ʼe mole tonu ke nātou ʼui ʼe mole heʼeki feala ke nātou fai te faʼahi ʼaia ʼuhi ko tanatou mole heʼeki māhani ʼi te fai faka mafola. ʼE ʼi ai te ʼu kaugā fai faka mafola kua popoto ʼi te faʼahi ʼaia, ʼe feala ke nātou fakahā age peʼe feafeaʼi te fai ʼo te gāue faka mafola ʼo te Puleʼaga. Kapau ko te ʼu kaugā fai faka mafola foʼou ʼe nātou lototoʼa moʼo fakahā te logo lelei, ʼe feala ke nātou tui papau ʼe tokoni anai ia Sehova kia nātou.—Gāue 4:31; 1 Tes. 2:2.
6 ʼE tou maʼu he ʼu fua lelei ʼe heʼegata maʼa tatou pea mo te hahaʼi ʼaē mokā ʼe tou faigaʼi ke tou fakafetaʼi kia Sehova ʼi te ʼaho katoa.