ʼE Tāu ʼAupito Ke Vikiʼi Ia Sehova
ʼE Fai Anai Te Taumafa ʼa Te ʼAliki ʼi Te ʼAho 16 ʼo ʼApelili
1 ʼE tuputupu te fiafia ʼi tatatou fakaōvi ki te ʼaho 16 ʼo ʼApelili 2003. ʼI te po ʼaia ʼe tou fakamanatu anai te mate ʼo Sesu, ʼo tou fakatahi mo te toko lauʼi miliona kau atolasio ʼi te malamanei katoa moʼo faka kolōlia ki te huafa ʼo Sehova. ʼE tonu ke tou vikiʼi fuli ia Sehova ʼuhi ko tana ʼu fakatuʼutuʼu fakaofoofo ʼo ʼuhiga mo te totogi. ʼAki te totogi ʼaia, ʼe ina foaki anai he ʼu tapuakina taulekaleka maʼa te hahaʼi fakalogo fuli pe. ʼAki totatou loto katoa ʼe tou kalaga fakatahi mo te tagata fai pesalemo: “ ʼE māʼoluga ia Sehova pea ʼe tāu ʼaupito ke vikiʼi ia ia.”—Pes. 145:3.
2 ʼE ko te temi ʼaenī ke tou metitasio ki te agalelei ʼo te ʼAtua pea mo totatou loto fakafetaʼi lahi kia Sehova ʼi tana fekauʼi mai “tona Alo ulutokotahi ki te malama-nei, ke tou mauli aki iaʼia.” (1 Soa. 4:9, 10) ʼI tatatou mulimuli fakalelei ki te Taumafa ʼa Te ʼAliki ʼe malave ai ki totatou loto te ʼiloʼi ʼaē ko “Sehova ʼe finegaloʼofa pea mo loto manavaʼofa . . . mo lahi ʼi te lotoʼofa.” (Pes. 145:8) ʼI tona ʼuhiga moʼoni, ko te totogi ʼe ko te fakahā lahi ʼaupito ʼaia ʼo te ʼofa ʼo Sehova ki te malamanei katoa. (Soa. 3:16) Ka tou fakakaukauʼi te ʼofa ʼo te ʼAtua pea mo tou vakavakaʼi te nofo agatonu ʼa Sesu, ʼe uga ai tatou ke tou vikiʼi ia Sehova. ʼI he ʼu temi heʼegata, ʼe tou vikiʼi anai ia ia ʼuhi ko tona ʼofa lahi ʼaē neʼe ina fakahā ʼi tana foaki ia te fealagia ke tou maʼuʼuli ʼo heʼegata.—Pes. 145:1, 2.
3 Tou Tokoni Ki Te Hahaʼi Ke Nātou Vikiʼi Ia Sehova: ʼI tatatou fakafetaʼi lahi ki te meʼa ʼofa lahi ʼa te ʼAtua ʼaē ko te totogi, ʼe ina uga ai tatou ke tou fakaafe te hahaʼi ke nātou fakatahi mo tatou ʼo tou vikiʼi ia Sehova. Neʼe takitaki e te laumālie ʼa te ʼAtua ia te tagata fai pesalemo ke ina tohi fēnei: “ ʼE lahi anai tanatou talanoa ʼo ʼuhiga mo te mahu ʼo tana agaʼofa, pea ʼe nātou kalaga fakafiafia anai ʼuhi ko tau faitotonu.” (Pes. 145:7) ʼI te taʼu pe ʼaenī kua hili, ʼi te malamanei katoa neʼe fakaʼaogaʼi e te kau Fakamoʼoni ʼa Sehova te miliale hola ʼi te gāue fai faka mafola. Neʼe koteā te ʼu fua ʼo tanatou ʼu faiga ʼaia? ʼI te vāhaʼa fuli, neʼe fakafuafua ko te toko 5 100 tupu hahaʼi neʼe nātou papitema moʼo fakahā tanatou kua foaki tonatou maʼuli kia Sehova. Neʼe ko hahaʼi e toko 15 597 746 neʼe nātou kau ki te ʼAho Fakamanatu, ʼo kau ai te toko 9 miliona tupu ʼaē neʼe mole heʼeki nātou kamata vikiʼi ia Sehova ʼo liliu ko he ʼu kaugā fai faka mafola, ʼo mahino ai ko he tuputupu lahi ka ʼamanaki hoko anai! ʼI totatou ʼuhiga kau fai faka mafola ʼo te Puleʼaga, ʼe maʼuhiga kia tatou tatatou pilivilesio ʼaē ke tou tala te logo lelei pea mo taki te hahaʼi kia Sehova, mo tona ʼAlo, pea mo te Puleʼaga.
4 Ko te faʼahi lelei ʼe feala ke tou fai ke fakaʼapaʼapa ai te hahaʼi kia Sehova ʼe ko te fakaafe nātou ke nātou kau mo tatou ki te Taumafa ʼa Te ʼAliki. Neʼe kua koutou tohi kua he lisi ʼo nātou fuli ʼaē ʼe koutou fia fakaafe pea mo nātou ʼaē ʼe tonu ke tou fakamanatuʼi kia nātou te ʼaho pea mo te hola? Neʼe kua koutou ʼosi foaki koa he pepa fakaafe kia nātou fuli ʼaē ʼe tuʼu ʼi takotou lisi? Kapau mole heʼeki koutou fai, koutou faiga lahi ke koutou foaki kia nātou he pepa fakaafe ʼi te temi ʼaenī kei toe. Tokoni kia nātou ke nātou mahino ki te fakatuʼutuʼu ʼo te toʼotoʼoga ʼaia. ʼI te fakatahi ʼaia, koutou tokagaʼi ia nātou ʼaē ʼe foʼofoʼou. Koutou tau ʼalofa kia nātou ke nātou logo fīmālie, ke nātou feʼiloʼiʼaki mo ʼihi pea koutou fakamālo ki tanatou ʼōmai.
5 Ko te kau ki te ʼAho Fakamanatu ʼe feala ke ina uga te hahaʼi foʼou ke nātou tuputupu ʼi te faʼahi fakalaumālie. Ko te tagata neʼe ina ako te Tohi-Tapu, pea neʼe mataku tuʼumaʼu ʼuhi ko te meʼa neʼe hoko kia ia ʼi muʼa atu, ʼo faigataʼa ai kia ia hana ʼalu ki he koga meʼa ʼe hahaʼi ai, neʼe haʼu ki te ʼAho Fakamanatu. ʼI te fehuʼi age ʼaē pe koteā tana manatu ʼo ʼuhiga mo te fono, neʼe ina ʼui fēnei: “ ʼI te po ʼaia neʼe hoko ai te meʼa maʼuhiga, pea neʼe ʼau kau ai.” Talu mai ai neʼe kamata kau ki te ʼu fono.
6 Hili Te ʼAho Fakamanatu: Koteā ʼaē ʼe feala ke tou fai moʼo tokoni ki te hahaʼi ʼaia ke nātou vikiʼi ia Sehova? ʼE tokakaga anai e te ʼu tagata ʼāfea ki te hahaʼi foʼou ʼaē ka kau ki te ʼAho Fakamanatu, pea mo nātou fai he ʼu fakatuʼutuʼu ke foimo ʼaʼahi nātou e he ʼu kaugā fai faka mafola kua fakapotopoto, ʼi te hili ʼo te ʼAho Fakamanatu, ke nātou toe vakaʼi te ʼu manatu fakafimālie ʼaē neʼe nātou ako pea mo te ʼu meʼa ʼaē neʼe nātou tokagaʼi. Ko ʼihi ʼe lagi nātou loto anai ki he ako Tohi-Tapu. ʼE tonu ke toe fakaafe foki nātou ki te ʼu fono ʼaē ʼo te vāhaʼa, heʼe ko tanatou kau tuʼumaʼu kiai ʼe feala ke tuputupu ai tanatou ʼatamai mālama ʼo ʼuhiga mo te Tohi-Tapu.
7 ʼE ʼi ai te ʼu fakatuʼutuʼu ʼe fai moʼo fakaloto mālohiʼi nātou fuli ʼaē ʼe mole kei kau tuʼumaʼu ki te ʼu fono pea mo te fai faka mafola. Kapau ʼe kole atu e te kau tagata ʼāfea ke koutou tokoni ki he tahi ʼe mole kei fai faka mafola ke toe kau kiai, pea koutou tali ʼaki he lotolelei. Ko te fakahā ʼo te tokaga ʼofa ʼaia ki totatou ʼu tēhina ʼe ʼalutahi mo te tokoni ʼaenī ʼa te ʼapositolo ko Paulo: “ ʼI te temi fuli pe ʼaē ʼe tou maʼu ai hotatou temi faigamālie, tou fai te meʼa ʼaē ʼe lelei ki te hahaʼi fuli pe, kae tāfito foki kia nātou ʼaē ko ʼotatou kāiga ʼi te tui.”—Kal. 6:10, MN.
8 Tou faiga fuli ke tou kau ki te ʼAho Fakamanatu ʼi te ʼaho 16 ʼo ʼApelili. ʼE mole tou fia tō ʼi te lakaga maʼuhiga ʼaupito ʼaia moʼo vikiʼi ia Sehova. Ei, ʼi te temi nei pea ʼo talu ai, tou vikiʼi ia Sehova ʼuhi ko tana ʼu gāue lalahi!—Pes. 145:21.