Tou Uga Te Hahaʼi Ke Nātou Tokagaʼi “Te Malama o Te Malama-nei”
1. Koteā te mālama lahi ʼaē neʼe fakakikite ʼi te Folafola ʼa te ʼAtua, pea ko te toʼotoʼoga fea ʼaē ʼe feala ai ke tokagaʼi e te hahaʼi ia te mālama ʼaia?
1 ʼAki te polofeta ko Isaia, neʼe fakakikite fēnei e Sehova: “Ko te hahaʼi ʼaē neʼe haʼele ʼi te fakapōʼuli neʼe nātou sisio ki he mālama lahi. Kae ko nātou ʼaē neʼe nātou nonofo ʼi te fenua ʼo te fakapōʼuli ʼaoʼao, kiā nātou neʼe tapa kiai te mālama.” (Isa. 9:2) Ko te “mālama lahi” ʼaia neʼe hā ʼi te ʼu aga ʼo Sesu Kilisito, te ʼAlo totonu ʼo te ʼAtua. Ko te gāue ʼaē neʼe ina fai ʼi tona maʼuli ʼi te kele pea mo te ʼu lelei ʼo tana sākilifisio, neʼe ina hikihiki ia te ʼaluʼaga fakalaumālie ʼo te hahaʼi ʼaē neʼe nonofo ʼi te fakapōʼuli. ʼE ko te mālama ʼaia ʼaē ʼe ʼaoga ki te hahaʼi ʼi te ʼu temi fakapōʼuli ʼaenī. Ko te Taumafa ʼo te ʼAliki ʼe ko he faigamālie maʼa tatou ke tou uga te hahaʼi ke nātou tokagaʼi “te malama o te malama-nei.” (Soa. 8:12) ʼI te taʼu ʼaenī kua hili, neʼe fakahā e te lauʼi miliona hahaʼi tanatou tui, ʼo nātou fakatahi mo tatou moʼo fakalogo ki te fakatotonu ʼaenī ʼa Sesu: “Koutou haga fai te meʼa ʼaenī moʼo fakamanatu kiā te au.” (Luka 22:19, MN ) ʼI te taʼu ʼaenī, ʼi te ōvi mai ʼo te ʼAho Fakamanatu, koteā ʼaē ʼe feala ke tou fai moʼo uga te hahaʼi ke nātou tokagaʼi te mālama lahi ʼaē ʼe fakagigila e Sehova?—Filp. 2:15.
2. Koteā ʼaē ʼe feala ke tou fai moʼo fakatuputupu hotatou loto fakafetaʼi ki te sākilifisio faitotogi, pea koteā anai tona fua?
2 Tou Fakahā Tatatou Loto Fakafetaʼi: Ko te māhina ʼaē ʼe fai ai te ʼAho Fakamanatu, ʼe ko he faigamālie ʼaia kiā tatou moʼo metitāsio ki te ʼofa lahi ʼa Sehova pea mo Sesu ʼi tanā foaki te sākilifisio faitotogi maʼa te malamanei. (Soa. 3:16; 2 Ko. 5:14, 15) Kapau ʼe tou metitāsio feiā, pea ʼe mahino papau ia ʼe tou fakahā anai he loto fakafetaʼi ki te toʼotoʼoga taputapu ʼaia. Ko te hahaʼi fuli ʼa te ʼAtua ʼe nātou fia fakaʼaogaʼi honatou temi moʼo lau pea mo metitāsio ki te lautohi makehe ʼo te Tohi-Tapu ʼo ʼuhiga mo te ʼAho Fakamanatu, ʼaē ʼe tuʼu ʼi te kaupepa Tou Vakaʼi Ia Te Tohi-Tapu ʼi Te ʼAho Fuli. Ka tou metitāsio ʼo ʼuhiga mo te ʼu kalitātē fakatalakitupua ʼa Sehova ʼaē ʼe hā ʼi tana fakatuʼutuʼu te totogi, ʼe tupu ai hatatou fiafia ʼi tatatou tauhi ki te ʼAtua ʼaia. Ko tatatou metitāsio ki te faka ʼuhiga ʼo te totogi maʼa tatou takitokotahi, ʼe ina toe fakatuputupu anai tatatou ʼofa ʼaē ki te ʼAtua pea mo tona ʼAlo, pea mo ina uga anai tatou ke tou faiga fakamalotoloto moʼo fakahoko ia te finegalo ʼo te ʼAtua.—Kal. 2:20.
3. ʼE tou lava fakahā feafeaʼi tatatou loto fakafetaʼi ki te ʼAho Fakamanatu?
3 Kapau ʼe tou fakatuputupu totatou loto fakafetaʼi ki te fakatuʼutuʼu ʼa Sehova ʼo ʼuhiga mo te fakamaʼuli, pea ko tatatou fiafia ʼo ʼuhiga mo te ʼAho Fakamanatu ʼe toe malave anai ki te kau ako Tohi-Tapu, kiā nātou ʼaē ʼe tou ʼaʼahi, ki ʼotatou ʼu kāiga, ki ʼotatou ʼu vāhaʼa fale, ki te kau ako, ki te kau gāue, pea mo ʼihi atu ʼaē ka tou fakaafe anai ki te lakaga makehe ʼaia. (Luka 6:45) Koia, tou faiga lahi ʼo fakaafe ia te hahaʼi fuli ʼaia, ʼo tou tufa age he pepa fakaafe ki te ʼAho Fakamanatu ke feala hanatou manatuʼi. Ke mole galoʼi he tahi, tokolahi neʼe nātou sio ki te ʼaoga ʼaē ke nātou tohi te ʼu higoa ʼo nātou fuli ʼaē ʼe nātou fakaafe tuʼumaʼu ki te ʼAho Fakamanatu, ʼo nātou hilifaki he ʼu higoa foʼou ʼi te taʼu fuli. Kapau ʼe tou fai he ʼu fakatuʼutuʼu lelei pea mo tou faiga mālohi ke tou fakaafe te hahaʼi ʼaē ʼe fia logo, ʼe tou fakahā lelei ai totatou loto fakafetaʼi kiā Sehova ʼAtua “ ʼo ʼuhiga mo tana meʼa ʼofa fakatalakitupua ʼaē ʼe ina foaki noa.”—2 Ko. 9:15, MN.
4. Koteā ʼaē ʼe feala ke ina fakatuputupu tatatou minisitelio ʼi te ʼu māhina ʼo Malesio mo ʼApelili?
4 Tou Fakalahi Tatatou Gāue ʼi Te Minisitelio: ʼE feala koa ke lahi age takotou gāue ʼi te minisitelio ʼi te ʼu māhina ʼo Malesio mo ʼApelili? ʼE tapuakina moʼoni anai tatou e te ʼAtua ʼi tatatou faiga ʼaē ke tou vaevae mo te hahaʼi “te logo lelei faka kolōlia ʼo ʼuhiga mo Kilisito.” Neʼe fakatotonu fēnei e Sehova, te Matapuna ʼo te mālama fakalaumālie fuli: “Ke gigila te mālama mai te lotolotoiga ʼo te fakapōʼuli.” (2 Ko. 4:4-6, MN ) Kapau ʼe ʼaoga, pea ʼe fakatuʼutuʼu anai e te ʼu tagata ʼāfea he tahi age ʼu fono gāue ʼi te ʼu hola kehekehe pea ʼi te tahi age ʼu koga meʼa, ʼo nātou lagolago ki te kau fai faka mafola ʼi te ʼu māhina ʼaia. ʼE feala ke fakatuʼutuʼu he fai fagonogono ʼi te ala ʼi te kei ʼuhuʼuhu, peʼe ko he fai faka mafola ʼi te ʼu telituale ʼaē ʼe tuʼu ai te ʼu matani gāue pea mo te fai faka mafola ʼaki te telefoni ʼi te hili hoʼatā peʼe ʼi te afiafi. Ke feala hakotou fakalahi takotou ʼu gāue ʼi te minisitelio, koutou fakatuʼutuʼu te ʼu hola ʼaē ʼe koutou fia maʼu ʼi te ʼu māhina ʼaia, pea koutou gāue mālohi moʼona maʼu. Maʼa te tokolahi, ko te meʼa lelei ʼaupito ʼaē ʼe feala ke nātou foaki kiā Sehova, ʼe ko te toʼo ʼo te selevisi pionie vaeluaʼi temi.—Kol. 3:23, 24.
5. Koteā te ʼu lelei kua maʼu e te tokolahi ʼi te fakahifo ʼaē ʼo te ʼu hola ʼo te selevisi pionie vaeluaʼi temi?
5 ʼE Feala Koa Ke Koutou Pionie Vaeluaʼi Temi? Kua hili nei kiai taʼu e fitu talu mai te taʼu ʼaē neʼe fakahifo ai te ʼu hola ʼo te selevisi pionie vaeluaʼi temi. ʼAki te fetogi ʼaia, kua feala ki te tokolahi ke nātou ʼiloʼi ia te ʼu lelei pea mo te ʼu fiafia ʼo te selevisi ʼaia. Kua koutou ʼahiʼahi koa te selevisi pionie ʼaia? Ko ʼihi kua nātou māhani ʼi te pionie vaeluaʼi temi ʼi te taʼu fuli. ʼE lahi te ʼu kokelekasio, ʼe hahaʼi te kau fai faka mafola ʼe nātou toʼo fakatahi te selevisi, pea ʼe ko he fakapale maʼuhiga ʼaia ʼo te gāue ʼa te kokelekasio lolotoga te taʼu. ʼE feala koa ke koutou fakatuʼutuʼu he māhina fakafiafia ke koutou pionie vaeluaʼi temi ai ʼi te ʼu māhina ʼaē ʼe ōvi ki te ʼAho Fakamanatu? Maʼa ʼihi, ʼe lagi lelei anai te māhina ʼo ʼApelili, heʼe ko vāhaʼa e nima.
6. Koteā te ʼu fakatuʼutuʼu fakafiafia ʼaē ʼe feala hakotou kau kiai?
6 ʼE ʼaʼahi anai koa takotou kokelekasio e te tagata taupau faka siliko ʼi te māhina ʼo Malesio peʼe ko ʼApelili? ʼE ko he temi faigamālie ʼaia kiā koutou. Ohage ko tona fakahā ʼi te tahi Minisitelio, lolotoga te taʼu 2006, ko nātou fuli ʼaē ʼe pionie vaeluaʼi temi ʼi te māhina ʼo te ʼaʼahi ʼa te taupau faka siliko, ʼe fakaafe anai nātou ki te ʼuluaki vaeluaʼi hola ʼo te fono ʼa te ʼu pionie ʼaē ʼe fai ʼi te vāhaʼa makehe. ʼE mahino ia ko te ʼu manatu fakalaumālie pea mo fakaloto mālohi ʼaē ka foaki anai ʼi te fono ʼaia, ʼe tokoni anai ki te tokolahi ʼo te kau pionie vaeluaʼi temi ke nātou pionie kātoa. Tahi ʼaē meʼa, ʼi te māhina ʼo Malesio ʼe tou fiafia anai ʼi te tufa ʼo te tohi foʼou Koteā ʼaē ʼe akoʼi moʼoni mai ʼi te Tohi-Tapu? moʼo tokoni ki te hahaʼi ke nātou hū ki te mālama fakalaumālie. He koʼe ʼe mole koutou fakatuʼutuʼu ke koutou kamata he ako Tohi-Tapu ʼaki te tohi foʼou ʼaia?
7, 8. (a) Koteā ʼaē ʼe feala ke tokoni mai ke tou fai he polokalama ʼo ʼuhiga mo te pionie vaeluaʼi temi? (b) ʼE lava ʼaoga feafeaʼi te fetokoniʼaki ʼa te famili, pea koteā tona ʼu fua lelei ki te famili kātoa?
7 ʼI takotou fakakaukauʼi te ʼu hola e 50 ʼaē ʼe fakamaʼua ki te pionie vaeluaʼi temi, koutou fakatuʼutuʼu he polokalama ʼe feala ai anai hakotou faka gigila ia te mālama ʼo te moʼoni, ia hola e 12 ʼi te vāhaʼa fuli. Koutou fai palalau mo nātou ʼaē neʼe fua lelei tanatou fai ia te faʼahi ʼaia, pea mo ʼihi atu. ʼE nātou maʼu ai anai he lotomālohi ke nātou pionie mo nātou. ʼAki he polokalama neʼe fakatuʼutuʼu lelei, neʼe mole faigataʼa ai ki te kau fai faka mafola kua papitema, tūpulaga pea mo mātutuʼa, hanatou maʼu tanatou ʼu hola. Koutou palalau ki te faʼahi ʼaia ʼi takotou ʼu faikole. Pea kapau ʼe feala, koutou fai takotou ʼu fakatuʼutuʼu pea mo koutou fiafia ʼi te selevisi pionie vaeluaʼi temi!—Mal. 3:10.
8 Tokolahi te ʼu famili neʼe nātou tokagaʼi, ka fetokoniʼaki te famili kātoa, pea ʼe feala ai ki he tahi ʼi te famili ke pionie vaeluaʼi temi. Ko te tahi famili neʼe ina fai te tonu ʼaē ke pionie vaeluaʼi temi te toko nima ʼo nātou. Ko te ʼu toe e lua neʼe kei nā kaugā fagona, neʼe nā faiga lahi ke tuputupu tanā gāue. Neʼe koteā tona ʼu fua lelei ki te famili ʼo ʼuhiga mo tanatou ʼu faiga lahi ʼaia? Neʼe nātou tohi fēnei: “Neʼe ko he māhina fakafiafia lahi, pea neʼe mātou logoʼi te toe mālohi age ʼo tamatou ʼu felogoi faka famili. ʼE mātou fakamālo kiā Sehova ʼo ʼuhiga mo te tapuakina lahi ʼaia!”
9. ʼE lava feafeaʼi hatatou fakagigila tatatou mālama ʼi te ʼu māhina ʼaē ka fai ai te ʼAho Fakamanatu?
9 Ko tatatou gāue makehe ʼi Malesio pea mo ʼApelili ʼe ina fakaloto mālohiʼi anai koa tatou, ke toe lelei age tatatou ʼu felogoi mo tatatou Tāmai ʼaē ʼi selo? ʼE fakalogo tāfito ia te faʼahi ʼaia ki tatatou faiga ʼaē ke loloto age totatou ʼofa ki te ʼAtua pea mo tona ʼAlo, pea mo tou lagolago lelei ki te minisitelio. ʼOfa pe ke tou tukupau ohage ko te tagata fai pesalemo, ʼaē neʼe hiva fēnei: “ ʼE au fakafetaʼi lahi anai kiā Sehova ʼaki toku gutu, pea ʼe au vikiʼi anai ia ia ʼi te lotolotoiga ʼo te hahaʼi tokolahi.” (Pes. 109:30) ʼE tapuakina anai e Sehova tatatou gāue faʼafai ʼi te ʼu māhina ʼaia ʼo te ʼAho Fakamanatu. Koia, tou fakagigila lahi te mālama ke kaugamālie te hahaʼi ʼaē ʼe mavae mai te fakapōʼuli pea mo nātou “maù . . . te malama o te mauli.”—Soa. 8:12.