Faʼahi 3—Tou Maʼu He ʼu Lelei ʼi Te Ako ʼo Te Minisitelio Faka Teokalatike 1996
1 Ko te ʼapositolo ko Paulo neʼe loto ke faikole tona ʼu tēhina ʼo ʼuhiga mo ia ke feala hana maʼu te poto ʼaē moʼo fakahā te logo lelei ʼaki he lototoʼa. (Ef. 6:18-20) ʼE tou fia fakatuputupu te poto ʼaia. Koia, ʼe tou leleiʼia te tokoni ʼaē ʼe foaki mai e te Ako ʼo Te Minisitelio Faka Teokalatike, pea ko te hahaʼi ʼaē ʼe kau ki te ʼu fono pea mo nātou maʼuliʼi te ʼu aga ʼaē ʼe fakamaʼua tāfito kiai, ʼe fakaloto mālohiʼi ia nātou ke nātou kau kiai.
2 Ohage ko he kau ako, ʼe foaki mai te ʼu tokoni kia tatou takitokotahi moʼo fakatuputupu tatatou ʼu fealagia ʼi te palalau mo te faiakonaki. (Taag. 9:9) ʼE toe feala foki ke tou maʼu he ʼu lelei mo kapau ʼe tou fakalogo ki te ʼu tokoni ʼaē ʼe foaki ki te tahi kau ako, ʼo fakaʼaogaʼi kia tatou te ʼu meʼa ʼaē ʼe tou ako. Ka tou teuteuʼi he fai palalau, ʼe tonu ke tou vakaʼi fakalelei te koga tohi ʼaē neʼe hinoʼi mai ke tou ʼiloʼi papau ko tatatou fakamatala ʼe totonu. ʼE tonu ke ʼalutahi te ʼu puani tāfito mo te ʼu vaega pea mo te kupu tāfito. Kapau ʼe ko he toko lua ʼaē ʼe nā fai te fai palalau ʼaia, ʼe tonu ke nā teuteuʼi lelei ʼi muʼa ʼo tanā fai ʼi te ako. ʼI tatatou tuputupu, ʼe tonu ke tou faigaʼi ke tou palalau fakahagatonu, ʼo fakaʼaogaʼi pe he ʼu nota, kae mole tohi te ʼu kupuʼi palalau katoa.
3 Ko nātou fuli ʼaē ʼe ʼi ai hanatou akonaki peʼe ko hanatou fai palalau ʼi te ako ʼaia, ʼe tonu ke nātou ʼōmai fakatomuʼa, ʼo nātou foaki tanatou kiʼi Pepa Tokoni ki te tagata taupau ʼo te ako pea mo heheka ʼi te ʼu ʼuluaki hekaʼaga ʼo te Fale Fono. ʼE tonu ke ʼui age fakatomuʼa e te ʼu tuagaʼane ki te tagata taupau ʼo te ako peʼe feafeaʼi anai te ʼaluʼaga ʼo tanatou fai palalau, peʼe tutuʼu anai peʼe heheka. Ko te lagolago ki te ʼu faʼahi ʼaia ʼe kau ki te fakahoko lelei ʼo te polokalama pea mo tokoni kia nātou ʼaē ʼe nātou teuteuʼi ia muʼa ke tokalelei fakatomuʼa ia meʼa fuli.
4 Te Teuteuʼi ʼo Te Akonaki N° 2: Ko he fakatuʼutuʼu ʼo te lautohi ʼo te Tohi-Tapu ko te tokoni kia ia ʼaē ʼe kau ki te ako ke tuputupu tana poto lautohi. ʼE lava feafeaʼi ke iku lelei te faʼahi ʼaia? ʼE ʼaoga ke ina lau liuliuga te ʼu vaega ʼo ina lau leʼolahi. Ke mahino ki te faka ʼuhiga mo te puʼaki ʼo te ʼu kupu ʼaē ʼe mole māhani ki ai, ʼe feala ke ina kole ki he Fakamoʼoni kua poto ʼi te faʼahi ʼaia.
5 ʼE feala ke tokoni te ʼu mātuʼa ki tanatou fānau ke nātou teuteuʼi te lautohi. ʼE kau kiai tanatou fakalogo ki te lautohi ʼa te tamasiʼi pea mo tanatou foaki kia ia he ʼu tokoni ʼe ʼaoga ki tana tuputupu ʼi te faʼahi ʼaia. Ko te ʼu minuta ʼaē ʼe tuku kia ia, ʼe feala ke ina fakaʼaogaʼi ai he ʼu ʼuluaki palalau pea mo he palalau fakaʼosi ʼe hā ai peʼe feafeaʼi te fakaʼaogaʼi ʼo te ʼu puani tāfito. Ko ia ʼaē ʼe ako ʼe tuputupu tana poto palalau fakahagatonu ʼo mole pipiki ki tana pepa.
6 Neʼe kole e te tagata fai pesalemo: “Ê Sehova, ke ke avahi ʼoku laugutu, ke fakahā ʼe toku gutu tou kolōlia!” (Pes. 51:15) ʼOfa pe ke tokoni kia tatou te Ako ʼo Te Minisitelio Faka Teokalatike ke tou tahi fakahoko te fakaʼamu ʼaia ohage ko te tagata fai pesalemo.