Kapite 7

Koteā Te Meʼa Neʼe Fai e Te ʼAtua Moʼo Hāofaki ʼo Te Malamanei

1, 2. (a) Neʼe feafeaʼi te mahino ʼa te tagata solia Loma kia ia ʼaē ko te ʼAlo ʼo te ʼAtua? (b) He koʼe neʼe fakagafua e Sehova ke mate ia Sesu?

ʼI HE hoʼatā ʼo he fasiga taʼu mātala kua teitei hili nei kiai taʼu e 2 000, neʼe sio te tagata solia Loma ki te ʼu tagata e toko tolu ʼe nātou tau tugaki. Neʼe tokagaʼi tāfito e te tagata solia te tagata e tahi ʼi te toko tolu ʼaia—ko Sesu Kilisito. Neʼe tutuki ia Sesu ʼi he pou ʼakau. ʼI te vaelua mālie ʼo te ʼaho, neʼe fakapōʼuli te lagi ʼi te fakaōvi ʼaē ki tona mate. ʼI te temi ʼaē neʼe mate ai, neʼe galulu mālohi te kele, pea neʼe ʼui fēnei e te tagata solia: “ ʼE moʼoni ia, ko ia nei neʼe ko te ʼAlo ʼo te ʼAtua.”—Maleko 15:39.

² ʼE ko te ʼAlo ia ʼo te ʼAtua! Neʼe totonu te talanoa ʼa te tagata solia. Neʼe sio mata ia ki te meʼa maʼuhiga ko tona hoki hokoe ʼi te kele. ʼI te tahi ʼu lakaga ki muʼa atu, neʼe higoaʼi totonu e te ʼAtua ia Sesu ko tona ʼAlo ʼofaina. (Mateo 3:17; 17:5) He koʼe koa neʼe fakagafua e Sehova ke mate tona ʼAlo? Koteʼuhi, ʼaki te puleʼaki ʼaia neʼe feala ai ke hāofaki e te ʼAtua ia te malamanei mai te agahala pea mo te mate.

NEʼE FILI ʼO ʼUHIGA MO HE FAKATUʼUTUʼU MAKEHE

3. He koʼe neʼe tau mo feʼauga mo te ʼAlo ʼulu tokotahi ʼo te ʼAtua ke fili ia ia ki he fakatuʼutuʼu makehe ʼo ʼuhiga mo te malamanei?

³ Ohage ko tatatou ako ʼi muʼa atu ʼo te tohi ʼaenī, neʼe maʼuli ia Sesu ʼi te lagi. Neʼe higoa ia ko te “ ʼAlo ʼulu tokotahi” ʼo te ʼAtua, koteʼuhi neʼe fakatupu totonu ia e Sehova. Ki muli age neʼe fakaʼaogaʼi e te ʼAtua ia Sesu moʼo fakatupu ʼo te ʼu meʼa fuli ʼaē. (Soane 3:18; Kolose 1:16) Neʼe ʼofa tāfito ia Sesu ki te malamanei. (Tāʼaga Lea 8:30, 31) Koia, ʼe mole fakapunamaʼuli te haga ʼa Sehova ʼo fili tona ʼAlo ʼulu tokotahi ke ina fakahoko he fakatuʼutuʼu makehe ʼi te temi ʼaē neʼe tō ai te malamanei ki te tautea ʼo te mate!

4, 5. Ia muʼa ʼo te haʼu ʼa Sesu ki te kele, koteā te meʼa neʼe fakahā e te Tohi-Tapu ʼo ʼuhiga mo te Hāko Faka Mesianike?

⁴ ʼI te temi ʼaē neʼe ina fakahā ai tana tautea kia Atama, mo Eva, pea mo Satana ʼi te ʼōloto ʼo Eteni, neʼe talanoa te ʼAtua ki te Fakamaʼuli ohage ko he “hāko.” Ko te Hāko ʼaia, peʼe ko te hōloga, ʼe tonu anai ke ina pulihi te ʼu fihifihia fakamataku ʼaē neʼe fakatupu e Satana te Tevolo, “te gata olisinale.” ʼI tona fakahagatonu, ko te Hāko ʼaē neʼe fakapapauʼi mai ʼe ina fakavolu anai ia Satana pea mo nātou ʼaē neʼe mulimuli kia te ia.—Senesi 3:15; 1 Soane 3:8; Fakahā 12:9.

⁵ Lolotoga te ʼu sēkulō, neʼe fakahā māmālie e te ʼAtua te ʼu meʼa ʼo ʼuhiga mo te Hāko, ʼaē ʼe toe higoaʼi foki ko te Mesia. Ohage ko tona fakahā ʼi te talanoa ʼaē ʼi te pasina 37, ʼe lahi te ʼu lea faka polofeta neʼe nātou fakahāhā te ʼu faʼahiga meʼa ʼo ʼuhiga mo te ʼu agaaga ʼe lahi ʼaupito ʼo tona maʼuli ʼi te kele. Ohage la, neʼe tonu ke ina kātakiʼi tona gaohi koviʼi ke feala ai hana fakahoko tana tuʼulaga ʼi te fakatuʼutuʼu ʼa te ʼAtua.—Isaia 53:3-5.

HE KOʼE NEʼE TONU KE MATE IA TE MESIA

6. Ohage ko tona fakahā ia Taniela 9:24-26, koteā anai te meʼa ʼe fakahoko e te Mesia, pea ʼo feafeaʼi?

⁶ Ko te lea faka polofeta ʼaē neʼe fakahā ia Taniela 9:24-26 neʼe ina fakakikite ko te Mesia—te Fakanofo ʼa te ʼAtua—ʼe ina fakahoko anai he fakatuʼutuʼu lahi. ʼE haʼu anai ki te kele “moʼo fakagata ʼo te talagataʼa, pea mo pulihi te agahala, pea mo fai he fai fakalelei ʼo ʼuhiga mo te hala, pea mo fakahū te faitotonu” ke talu ai. ʼE hāofaki anai e te Mesia te hahaʼi agatonu mai te tautea ʼo te mate. Kae ʼe feafeaʼi anai tana fai te faʼahi ʼaia? ʼE fakamahino mai e te lea faka polofeta ʼe “toʼo” anai ia ia, peʼe matehi ia ia.

7. He koʼe neʼe fai e te kau Sutea te ʼu sakilifisio manu, pea koteā ʼaē neʼe fakatātā e te ʼu sakilifisio ʼaia?

⁷ Neʼe māhani te kau Iselaelite ki te manatu ʼaē ki te fai fakalelei ʼo ʼuhiga mo te hala. ʼI tanatou tauhi ki te Lao ʼaē neʼe foaki age e te ʼAtua kia nātou ʼaki ia Moisese, neʼe nātou fai tuʼumaʼu he ʼu sakilifisio manu. Ko te ʼu sakilifisio ʼaia neʼe manatuʼi ai e te hahaʼi ʼo Iselaele, ʼe ʼaoga ki te hahaʼi he meʼa moʼo fai fakalelei, peʼe moʼo ʼuʼufi ʼo tanatou ʼu agahala. Neʼe talanoa fakanounou te ʼapositolo ko Paulo ki te fakatuʼutuʼu ʼaia ʼo fēnei: “Kapau ʼe mole liligi he toto pea ʼe mole ʼi ai he fakamolemole.” (Hepeleo 9:22) Ko te kau Kilisitiano ʼe mole kei nātou mulimuli ki te Lao Faka Moisese mo te ʼu fakamaʼua ʼaia, ohage la ko te ʼu sakilifisio. (Loma 10:4; Kolose 2:16, 17) ʼE nātou ʼiloʼi foki ko te ʼu sakilifisio manu, ʼe mole feala ke nātou fakamolemole katoa pea ke talu ai te ʼu agahala. Kae, ko te ʼu sakilifisio ʼaia neʼe fai, neʼe nātou fakatātā te sakilifisio ʼe maʼuhiga age—ko te sakilifisio ʼa te Mesia, peʼe ko Kilisito. (Hepeleo 10:4, 10; vakaʼi ia Kalate 3:24.) Kae, ʼe feala ke koutou fai te fehuʼi ʼaenī, ‘Neʼe ʼaoga moʼoni koa ke mate te Mesia?’

8, 9. Koteā te ʼu meʼa maʼuhiga ʼaē neʼe pulihi e Atama mo Eva, pea neʼe koteā tona ʼu fua ki tonā hōloga?

⁸ ʼE mahino ia, neʼe tonu ke mate te Mesia ke feala ai he hāofaki ʼo te malamanei. Moʼo fakamahino ʼo te faʼahi ʼaia, ʼe tonu ke tou manatuʼi ia te ʼōloto ʼo Eteni pea ke tou faigaʼi ke tou mahino ki te meʼa maʼuhiga ʼaē neʼe pulihi e Atama mo Eva ʼi tanā agatuʼu ʼaē ki te ʼAtua. Neʼe tuku age kia nāua te maʼuli heʼegata! Tahi ʼaē meʼa, ʼi tonā ʼuhiga fānau ʼa te ʼAtua, neʼe nā maʼuli fiafia ʼi tana felogoi fakahagatonu ʼaē mo ia. Kae ʼi tanā fakafisi leva ki te ʼuhiga pule ʼa Sehova, neʼe nā pulihi te ʼu meʼa fuli ʼaia pea neʼe tupu ai te agahala pea mo te mate ʼa te malamanei.—Loma 5:12.

⁹ ʼE feala pe ke tou ʼui neʼe pulihi e ʼatatou ʼuluaki mātuʼa te toe koloā ʼaupito, ʼo tau ai mo nāua te toe maʼua lahi. Neʼe tuku e Atama mo Eva te maʼua ʼaia ki tona hōloga. Koteʼuhi neʼe mole tou tupu haohaoa, koia ko tatou fuli ʼe tou agahala pea tou mamate. Ka tou mahaki peʼe tou fai he palalau ʼe fakatupu kovi ʼe tou fakaʼamu ke molehi te faʼahi ʼaia, ʼe ko te ʼu fua ʼaia ʼo te maʼua ʼaē neʼe tuku mai kia tatou—ʼaē ko te maʼuli heʼe haohaoa. (Loma 7:21-25) Ko tatatou fakaʼamu pe e tahi, ke tou toe maʼu te meʼa ʼaē neʼe pulihi e Atama. Kae, ʼe mole feala ke tou aʼu ki te maʼuli haohaoa. Koteʼuhi ko te tagata fuli ʼe heʼe haohaoa pea ʼe nātou agahala, koia ʼe tou aʼu fuli ai ki te mate, kae mole ko te maʼuli.—Loma 6:23.

10. Koteā te meʼa neʼe ʼaoga moʼo totogi ʼo te meʼa ʼaē neʼe pulihi e Atama?

¹⁰ Kae, ʼe mole feala koa la ke foaki he meʼa moʼo fetogi ʼaki te maʼuli ʼaē neʼe pulihi e Atama? Ko te lekula ʼa te ʼAtua ʼo ʼuhiga mo te faitotonu ʼe ina fakamaʼuaʼi ke foaki he meʼa ʼe tatau, ko he “nefesi moʼo fetogi ʼo he nefesi.” (Ekesote 21:23) Koia neʼe maʼua ke foaki he maʼuli moʼo totogi ʼo te maʼuli ʼaē neʼe pulihi, kae ʼe mole feala ke fai ʼaki he maʼuli ʼo he tagata heʼe haohaoa. ʼE ʼui fēnei ia Pesalemo 49:7, 8 ʼo ʼuhiga mo te tagata agahala: “ ʼE mole he tahi ia nātou ʼe feala ke ina totogi he tēhina, peʼe ina foaki ki te ʼAtua he totogi maʼa ia; (pea ʼi te lahi ʼaupito ʼo te totogi ʼo tonatou maʼuli, kua ina tuku ia ʼo aʼu ki he ʼu temi ʼe mole ʼiloʼi hona gataʼaga).” ʼE hā mai koa ʼi te faʼahi ʼaia ʼe mole ʼi ai he falalaʼaga? Kailoa ia.

11. (a) Koteā te faka ʼuhiga ʼo te kupu “totogi” ʼi te lea faka Hepeleo? (b) Ko ai te tokotahi ʼaē ʼe feala ke ina totogi te malamanei, pea koteā tona tupuʼaga?

¹¹ ʼI te lea faka Hepeleo, ko te kupu “totogi” ʼe faka ʼuhiga ki he falā ʼe foaki moʼo totogi ʼo he tahi ʼe maʼuli popūla pea ʼe toe faka ʼuhiga foki te kupu ʼaia ki he meʼa ʼe tatau. ʼE gata pe ki he tagata ʼe maʼuli haohaoa ʼe feala ke ina foaki he meʼa ʼe tatau moʼo totogi ʼo te maʼuli ʼaē neʼe pulihi e Atama. Ki muli mai ia Atama, ko te tagata haohaoa pe e tahi neʼe tupu ʼi te kele ko Sesu Kilisito. Koia, ʼe higoaʼi e te Tohi-Tapu ia Sesu “ko te Atama fakamuli” pea ʼe ina fakamoʼoni mai kia tatou ko Kilisito “neʼe ina foaki ia ia totonu ko he totogi ʼe feʼauga maʼa te hahaʼi fuli.” (1 Kolonito 15:45; 1 Timoteo 2:5, 6) Neʼe foaki e Atama te mate ki tana fānau, kae neʼe foaki e Sesu kia nātou ia te maʼuli heʼegata. ʼE fakamahino fēnei mai ia ʼuluaki Kolonito 15:22: “Ohage pe ko te mamate ʼa te hahaʼi fuli ia Atama, ʼe toe feiā pe mo te hahaʼi fuli ʼe toe fakaliliu anai ia nātou ki te maʼuli ia Kilisito.” Koia la ʼaē, neʼe higoa tonu ai ia Sesu ko te “Tāmai heʼegata.”—Isaia 9:6, 7.

NEʼE FEAFEAʼI TE FAI ʼO TE TOTOGI

12. Neʼe ko te temi fea ʼaē neʼe liliu ai ia Sesu ko te Mesia, pea neʼe koteā te meʼa ʼaē neʼe ina fai ʼi te lolotoga ʼo tona maʼuli?

¹² ʼI te fasiga taʼu fakatōlau ʼo te taʼu 29 ʼo totatou temi, neʼe ʼalu ia Sesu ki tona kāiga ko Soane ke papitemaʼi ia ia pea ʼi te faʼahi ʼaia ke ina foaki ia ia totonu moʼo fai ʼo te finegalo ʼo te ʼAtua. ʼI te lakaga ʼaia, neʼe fakanofo e Sehova ia Sesu ʼaki te laumālie maʼoniʼoni. Neʼe liliu ai ia Sesu ko te Mesia, pe ko Kilisito, te Fakanofo ʼa te ʼAtua. (Mateo 3:16, 17) ʼOsi ʼaia pea neʼe kamata e Sesu tona minisitelio, ʼo fai lolotoga ia taʼu e tolu vaelua. Neʼe feʼaluʼaki ia ʼi tona fenua katoa, ʼo faka mafola ia te Puleʼaga ʼo te ʼAtua pea mo tātānaki he ʼu tisipulo agatonu. Kae ohage ko te meʼa ʼaē neʼe kua tala fakatomuʼa, neʼe mole tuai pea malaga te fakafeagai kia te ia.—Pesalemo 118:22; Gāue 4:8-11.

13. Koteā te ʼu meʼa neʼe hoko ʼo iku ai mo te mate ʼo Sesu ko he tagata agatonu?

¹³ Neʼe lototoʼa ia Sesu ʼo fakahā te malualoi ʼa te kau takitaki lotu pea neʼe nātou faiga ke nātou matehi ia ia. Ki muli age, neʼe nātou fai he fakatuʼutuʼu fakalialia ke lavakiʼi ia ia, ʼo nātou puke ai ia ia ka neʼe mole ina fai he meʼa ʼe kovi, ʼo fai te fakamāu kia ia ʼe mole ʼalutahi mo te Lao, pea mo nātou fai te tukugakovi hala ʼo ʼui maʼa nātou ʼe fakafeagai ia ki te puleʼaga. Neʼe tā ai ia Sesu, mo ʼanuʼanuhi, mo fakalainoaʼi, pea mo haha ʼaki te huipi neʼe gaohi moʼo hae ʼaki tona sino. Pea ko te kovana Loma ko Posio Pilato neʼe ina fakatūʼa ia ia ke matehi ʼi te pou fakamamahi. Neʼe tutuki ia ia ki he pou ʼakau pea nātou tautau ia ia ʼi ai. ʼI te ʼu temi fuli pe ʼaē neʼe mānava ai neʼe fakatupu mamahi kia ia, pea neʼe fualoa tana tau tugaki. Lolotoga te ʼu mamahi fuli ʼaia, neʼe taupau maʼu e Sesu tana agatonu haohaoa ki te ʼAtua.

14. He koʼe neʼe faka fealagia e te ʼAtua ke mamahi pea mo mate tona ʼAlo?

¹⁴ Koia, ʼi te ʼaho 14 ʼo Nisani ʼo te taʼu 33 ʼo totatou temi, neʼe foaki e Sesu tona maʼuli ko “he totogi moʼo fetogi ʼaki ʼo te tokolahi.” (Maleko 10:45; 1 Timoteo 2:5, 6) Mai te lagi, neʼe feala te sio ʼa Sehova ki te mamahi pea mo te mate ʼo tona ʼAlo ʼofaina. He koʼe koa neʼe fakagafua e te ʼAtua ke hoko te meʼa fakamataku ʼaia? Neʼe ina fai te faʼahi ʼaia koteʼuhi ʼe ʼofa ia ki te malamanei. Neʼe ʼui fēnei e Sesu: “Ko te ʼAtua ʼi tona ʼofa lahi ʼaē ki te malamanei neʼe ina foaki ai tona ʼAlo ʼulu tokotahi, koteʼuhi ko ʼaē ʼe tui kia te ia ke ʼaua naʼa fakaʼauha, kae ke ina maʼu te maʼuli heʼegata.” (Soane 3:16) Tahi ʼaē meʼa, ko te mate ʼo Sesu ʼe ina akoʼi mai kia tatou ko Sehova ʼe ko te ʼAtua ʼe haohaoa ʼi te faitotonu. (Teutalonome 32:4) Ko ʼihi ʼe lagi nātou ʼui anai pe koʼe neʼe mole lītuʼa te ʼAtua ki tana fakatuʼutuʼu faitotonu, ʼaē ʼe maʼua ke foaki he nefesi moʼo fetogi ʼo he nefesi pea mo fakafisi ki te totogi ʼaē ʼe fakamaʼuaʼi e te agahala ʼa Atama. Ko tona tupuʼaga ʼaē heʼe ko Sehova ʼe agatonu tuʼumaʼu ʼi tana ʼu lao pea ʼe lagolago ki tana ʼu lao ʼaia, tatau aipe peʼe lahi te meʼa ʼaē ka fakamaʼua ke ina fai.

15. ʼI te mole tonu ʼaē ke nofo ia Sesu ʼi te mate ʼo talu ai, neʼe koteā koa te meʼa neʼe fai e Sehova?

¹⁵ Ko te faitotonu ʼa Sehova neʼe ina toe fakamaʼua foki ke ʼi ai he ikuʼaga fakafiafia ʼo te mate ʼa Sesu. Pea, ʼe ko he faitotonu koa mo kanapaula neʼe ina tuku ke mate ʼo heʼegata ia Sesu ʼaē neʼe agatonu? Kailoa! Neʼe fakakikite e te ʼu Tohi Faka Hepeleo ko te tagata agatonu ʼa te ʼAtua ʼe mole nofo anai ia ʼi te faitoka. (Pesalemo 16:10; Gāue 13:35) Neʼe nofo ia ʼi te mate ia ʼaho e tolu, ʼosi ʼaia pea fakatuʼuake ia ia e Sehova ʼAtua ki te maʼuli ko he laumālie mālohi.—1 Petelo 3:18.

16. Koteā te meʼa neʼe fai e Sesu ʼi tana liliu ʼaē ki te lagi?

¹⁶ ʼI tona mate, neʼe fakafisi ai ia Sesu ki tona maʼuli fakatagata ʼo talu ai. Neʼe fakatuʼuake ia ki te maʼuli ʼi te lagi, ʼo liliu ia ko he laumālie ʼe ina foaki te maʼuli. Pea tahi ʼaē meʼa, ʼi te hake ʼa Sesu ki te potu taputapu ʼaupito ʼo te ʼatulaulau, neʼe toe fakatahi ia mo tana Tāmai ʼofaina pea neʼe feala ke ina fakahā totonu kia te Ia te maʼuhiga ʼo tona maʼuli fakatagata haohaoa. (Hepeleo 9:23-28) Ko te maʼuhiga ʼo te maʼuli ʼaia kua feala ke fakaʼaogaʼi maʼa te malamanei ʼaē ʼe talagafua. Koteā koa te faka ʼuhiga ʼo te faʼahi ʼaia kia koutou?

TE TOTOGI ʼAĒ NEʼE FOAKI E KILISITO PEA MO KOUTOU

17. E feafeaʼi te fakamolemole ʼo tatou totonu ʼaki te sakilifisio faitotogi ʼa Kilisito?

¹⁷ Tou vakaʼi te ʼu faʼahi e tolu ʼe feala ai hakotou maʼu he fua lelei mai te sakilifisio faitotogi ʼa Kilisito ʼi te temi ʼaenī. ʼUluaki, ʼe ina faka fealagia te fakamolemole ʼo te ʼu agahala. ʼAki te tui ki te taʼataʼa ʼo Sesu ʼaē neʼe liligi, ʼe tou maʼu ia “te ʼāteaina ʼaki te totogi,” ʼio, “te fakamolemole ʼo tatatou ʼu hala.” (Efesi 1:7) Koia, kapau neʼe tou fai he agahala mamafa, ʼe feala ke tou kole ki te ʼAtua ke fakamolemole mai kia tatou ʼaki te huafa ʼo Sesu. Kapau ʼe tou fakahemala moʼoni, ʼe fakaʼaogaʼi e Sehova kia tatou te maʼuhiga ʼo te sakilifisio faitotogi ʼo tona ʼAlo. ʼE fakamolemole mai te ʼAtua kia tatou, ʼo ina foaki mai he leʼo ʼo loto ʼe lelei, kae mole ina fakamaʼuaʼi mai he tūʼa ki te mate ʼaē ʼe tou maʼu ʼuhi ko te agahala.—Gāue 3:19; 1 Petelo 3:21.

18. Ko te faʼahi fea ʼaē ʼe foaki mai ai e te sakilifisio ʼa Sesu ia te ʼamanaki?

¹⁸ Lua, ko te sakilifisio faitotogi ʼa Kilisito ʼe ina fakatuʼu te fakatafito ʼo tatatou ʼamanaki ki te temi ka haʼu. ʼI te meʼa neʼe hā fakatomuʼa, neʼe sio te ʼapositolo ko Soane ki “te toe hahaʼi tokolahi, ʼe mole feala tona lau e he tahi” ʼe nātou hāo ʼi te tuʼutāmaki ʼaē kua fakaōvi mai, ʼaē ka ina pulihi anai te tuʼu ʼo te ʼu faʼahiga meʼa ʼaenī. He koʼe ʼe nātou hāo ʼi te temi ʼaē ka fakaʼauha ai e te ʼAtua te tokolahi ʼo te hahaʼi? Neʼe ʼui age e te ʼaselo kia Soane ko te toe hahaʼi tokolahi ʼaia neʼe nātou “fō tonatou ʼu kofu loloa pea mo nātou fakahihina ʼi te taʼataʼa ʼo te Akeno,” ʼaē ko Sesu Kilisito. (Fakahā 7:9, 14) Kapau ʼe tou haga tui ki te taʼataʼa ʼaē neʼe liligi e Sesu Kilisito pea mo tou maʼuliʼi te ʼu fakatuʼutuʼu fakaʼatua, ʼe tou maʼa anai ia mata ʼo te ʼAtua pea ʼe tou maʼu anai te ʼamanaki ʼo te maʼuli heʼegata.

19. ʼE fakamoʼoni feafeaʼi e te sakilifisio ʼa Kilisito ʼe ʼofa ia ia pea mo tana Tāmai kia koutou?

¹⁹ Tolu, ko te sakilifisio faitotogi ʼe ko te fakamoʼoni lahi ʼaupito ʼaia ʼo te ʼofa ʼo Sehova. Ko te mate ʼo Kilisito neʼe hā ai te ʼu ʼofa lahi e lua ʼi te hisitolia ʼo te ʼatulaulau: (1) Te ʼofa ʼo te ʼAtua ʼi tana fekauʼi mai tona ʼAlo ke haʼu ʼo mate maʼa tatou; (2) Te ʼofa ʼo Sesu ʼi tana lotolelei ʼaē ke ina foaki ia ia totonu ko he totogi. (Soane 15:13; Loma 5:8) Kapau ʼe tou haga maʼuliʼi moʼoni te tui, ʼe tou maʼu anai te ʼu fua lelei ʼo te ʼofa ʼaia. Neʼe ʼui fēnei e te ʼapositolo ko Paulo: “Ko te ʼAlo ʼo te ʼAtua . . . neʼe ʼofa kia te ʼau pea mo ina foaki ia ia ʼuhi ko ʼau.”—Kalate 2:20; Hepeleo 2:9; 1 Soane 4:9, 10.

20. He koʼe ʼe tonu ke tou haga tui ki te sakilifisio faitotogi ʼa Sesu?

²⁰ Koia, tou fakahā totatou loto fakafetaʼi ki te ʼofa ʼaē neʼe fakahā e te ʼAtua pea mo Kilisito, ʼo tou haga tui ki te sakilifisio faitotogi ʼa Sesu. Ko te fai ʼo te faʼahi ʼaia ʼe ina taki ai tatou ki te maʼuli heʼegata. (Soane 3:36) Kae, ko totatou fakamaʼuli ʼe mole ko te tupuʼaga tāfito ʼaia ʼo te haʼu ʼa Sesu ʼo maʼuli pea mo mate ʼi te kele. Kailoa, neʼe haʼu tāfito ki te kele koteʼuhi neʼe lagaʼi te fehuʼi lahi ʼi te ʼatulaulau. Ohage ko te meʼa ʼaē ka tou vakaʼi anai ʼi te kapite ka hoa mai, ko te fehuʼi ʼaia ʼe tou kau fuli kiai koteʼuhi ʼe fakahā ai, pe koʼe neʼe fakagafua e te ʼAtua ke hoko fualoa te agakovi pea mo te mamahi ʼi te mālama ʼaenī.

TE SIVI ʼO TOKOTOU ʼATAMAI MĀLAMA

He koʼe neʼe tonu ke mate ia Sesu moʼo hāofaki ʼo te malamanei?

Neʼe feafeaʼi te fai ʼo te totogi?

Ko te ʼu faʼahi fea ʼaē ʼe koutou maʼu ai he ʼu fua lelei ʼo te totogi?