Kapite 8

He Koʼe Koa ʼe Fakagafua e Te ʼAtua Ia Te ʼu Mamahi?

1, 2. ʼI te agamāhani, koteā te ʼu manatu ʼa te hahaʼi ʼo ʼuhiga mo te ʼu mamahi ʼa te tagata?

KA HOKO he ʼu tuʼutāmaki, ʼo maumau ai te ʼu ʼapi pea mo mamate ai te hahaʼi, ʼe mole mahino ki te tokolahi pe koʼe ʼe hoko te ʼu faʼahiga tuʼutāmaki ʼaia. Ko ʼihi ʼe nātou lotohoha ʼi te mafola ʼo te aga fekai, pea mo te hoko ʼo te fai fakapō pea mo te agamālohi. Mo koutou foki e lagi koutou fai te fehuʼi ʼaenī, ‘He koʼe koa ʼe fakagafua e te ʼAtua ia te ʼu mamahi?’

² ʼI tanatou mole maʼu he tali ʼe mata feʼauga ki te fehuʼi ʼaia, tokolahi ʼe mole kei nātou tui ki te ʼAtua. ʼI tanatou manatu ʼe mole tokaga ia ki te malamanei. Ko ʼihi ʼaē ʼe nātou tali te ʼu mamahi ohage ko he meʼa ʼe hoko moʼoni ʼi te maʼuli, ʼe nātou ʼiʼita pea mo tukugakoviʼi te ʼAtua ʼo ʼuhiga mo te ʼu agakovi fuli ʼaē ʼe hoko ʼi te malamanei. Kapau neʼe kua koutou maʼu te ʼu taʼi manatu ʼaia, ʼe lagi koutou fia ʼiloʼi anai pe koteā te ʼui ʼa te Tohi-Tapu ʼo ʼuhiga mo te ʼu faʼahi ʼaia.

NEʼE MOLE FAKATUPU E TE ʼATUA TE ʼU MAMAHI

3, 4. He koʼe ʼe feala ke tou ʼiloʼi papau ko te agakovi pea mo te ʼu mamahi ʼe mole fakatupu e Sehova?

³ ʼE fakamoʼoni mai e te Tohi-Tapu kia tatou ko te ʼu mamahi ʼaē ʼe tou sisio kiai ʼi ʼotatou tafaʼaki ʼe mole fakahoko e Sehova ʼAtua. Ohage la, neʼe tohi fēnei e te tisipulo Kilisitiano ko Sake: “Ke ʼaua naʼa ʼui e he tahi ʼi te ʼahiʼahi: ‘ ʼe ʼahiʼahiʼi ʼau e te ʼAtua.’ Koteʼuhi ʼe mole pe feala ke ʼahiʼahiʼi te ʼAtua ʼaki te kovi, pea ko ia totonu ʼe mole ina ʼahiʼahiʼi he tahi.” (Sake 1:13) Koia, ʼe mole feala ai ke tou ʼui neʼe fakatupu e te ʼAtua te ʼu faigataʼaʼia lahi ʼaē ʼe fakatupu mamahi ki te malamanei. ʼE mole ina ʼahiʼahiʼi te hahaʼi ke feala hanatou maʼuʼuli ʼi te lagi, pea ʼe mole ina fakamamahiʼi te hahaʼi ʼo ʼuhiga mo he ʼu agakovi neʼe lagi nātou fai ʼi muʼa atu ʼi te tahi maʼuli.—Loma 6:7.

⁴ Tahi ʼaē meʼa, logope la neʼe lahi te ʼu meʼa fakamataku neʼe fai ʼaki te huafa ʼo te ʼAtua peʼe ko Kilisito, ʼe mole ʼi ai he faʼahi ʼi te Tohi-Tapu ʼe ina ʼui mai ai neʼe kua nā tali te ʼu aga ʼaia. Ko te ʼAtua pea mo Kilisito ʼe mole nā fakatahi mo nātou ʼaē ʼe nātou ʼui ʼe nātou tauhi kia nāua, kae ʼe nātou gāue fakakākā, mo nātou fai fakapō pea mo kaihaʼa, pea mo ʼihi age ʼu meʼa ʼe fakatupu ai te mamahi ʼa te tagata. ʼI tona fakahagatonu, “ko te ala ʼo te tagata agakovi ʼe ko he meʼa fakalialia ia kia Sehova.” Ko te ʼAtua “ ʼe mamaʼo ia ʼi te hahaʼi agakovi.”—Tāʼaga Lea 15:9, 29.

5. Koteā te ʼu kalitate ʼo Sehova, pea e feafeaʼi tana aga ki te ʼu meʼa ʼaē neʼe ina fakatupu?

⁵ ʼE fakahā e te Tohi-Tapu ko Sehova ʼe “fonu ʼi te ʼofa pea mo te manavaʼofa.” (Sake 5:11) ʼE ina toe fakahā ko “Sehova ʼe ʼofa ki te faitotonu.” (Pesalemo 37:28; Isaia 61:8) ʼE mole lotokovi ia. ʼAki te manavaʼofa ʼe tokaga ia ki te ʼu meʼa ʼaē neʼe ina fakatupu, pea ʼe ina foaki kia nātou fuli te meʼa ʼe lelei ki tonatou maʼuli fīmālie. (Gāue 14:16, 17) Neʼe fai e Sehova ia te faʼahi ʼaia talu te kamata ʼo te maʼuli ʼi te kele.

KO HE KAMATAʼAGA HAOHAOA

6. ʼE fakamatala feafeaʼi e ʼihi ʼu fagana te ʼu ʼaluʼaga ʼo te hisitolia ʼo te malamanei ʼi te kamataʼaga?

⁶ Ko tatou fuli kua tou māhani ʼi te sio ki te ʼu mamahi pea mo tou lotomamahi ʼuhi ko te ʼu faʼahi ʼaia. E lagi faigataʼa tatatou fakakaukauʼi he temi ʼe mole toe ʼi ai anai te ʼu mamahi, kae neʼe feiā te ʼaluʼaga ʼo te malamanei ʼi te kamataʼaga ʼo te hisitolia ʼo te tagata. Māʼiape la mo te ʼu fagana ʼa ʼihi fenua ʼe talanoa ki te kamataʼaga fakafiafia ʼaia. ʼI te mitolosia faka Keleka, ko te ʼuluaki “Taʼu e Nima ʼo Te Tagata” neʼe higoaʼi ko te “Taʼu Aulo.” Neʼe maʼuʼuli fiafia ai te hahaʼi, ʼo nātou ʼāteaina mai te gāue kinakina, te ʼu mamahi, pea neʼe mole nātou matutuʼa. ʼE ʼui e te kau Siaina ʼi te lolotoga hau faka mitolosia ʼa te Tuʼi Legalega (ko Huangdi), neʼe maʼuli te hahaʼi ʼi te tokalelei, ʼo nātou faifaitahi ʼi te fakafiafia, ʼo feiā aipe ki te ʼu agaaga ʼo te kele pea mo te ʼu manu fekai. Ko te hahaʼi ʼo Pelesia, ʼo Esipito, ʼo Tibet, ʼo Pelu, pea mo te kau Mekesike ʼe nātou maʼu fuli te ʼu fagana ʼo ʼuhiga mo te temi fiafia pea mo te maʼuli haohaoa ʼi te kamataʼaga ʼo te hisitolia ʼo te tagata.

7. He koʼe neʼe fakatupu e te ʼAtua te kele pea mo te tagata?

⁷ Ko te ʼu fagana ʼo te ʼu fenua ʼe ko he toe fakamatala pe ia ʼo te tohi ʼāfea ʼo te hisitolia ʼo te tagata, ia te Tohi-Tapu. ʼE ina fakahā mai kia tatou ko te ʼAtua neʼe ina ai te ʼuluaki taumatuʼa, ia Atama mo Eva, ki he palatiso neʼe higoa ko te ʼōloto ʼo Eteni pea neʼe ina fakatotonu fēnei age kia nāua: “Koulua fanaunau, pea ke koulua liliu ʼo hahaʼi, pea ke koulua fakafonu te kele, pea ke koulua puleʼi.” (Senesi 1:28) Ko tatatou ʼu ʼuluaki mātuʼa neʼe nā maʼuli haohaoa pea neʼe nā maʼu te ʼamanaki ʼaē ko te sio ki te kele katoa ʼe liliu ko he palatiso, pea mo nofoʼi e he famili haohaoa ʼe maʼuli ʼi te tokalelei pea mo te fiafia heʼegata. Neʼe ko te fakatuʼutuʼu ʼaia ʼa te ʼAtua ʼi tana fakatupu te kele pea mo te tagata.—Isaia 45:18.

KO TE FAKAFIFIHI NEʼE FAKATUPU KOVI

8. Neʼe koteā te fakatotonu ʼaē neʼe tonu ke fakalogo kiai ia Atama mo Eva, kae koteā te meʼa ʼaē neʼe hoko?

⁸ Ke feala hanā nonofo ʼi te ʼofa ʼo te ʼAtua, neʼe tonu ke ʼaua naʼa kai e Atama mo Eva ki “te fuʼu ʼakau ʼo te ʼiloʼi ʼo te meʼa ʼaē ʼe lelei pea mo te meʼa ʼaē ʼe kovi.” (Senesi 2:16, 17) Kanapaula neʼe nā fakalogo ki te lao ʼa Sehova, ka na ʼaua la neʼe mole maʼu te mamahi ʼaē ʼe fakatupu kovi ki te maʼuli ʼo te tagata. Kapau la neʼe nā fakalogo ki te fakatuʼutuʼu ʼa te ʼAtua, neʼe feala ai ke nā fakahā tonā ʼofa kia Sehova pea mo tanā agatonu ʼaē kia te ia. (1 Soane 5:3) Kae ohage ko te meʼa ʼaē neʼe tou vakaʼi ʼi te Kapite 6, neʼe mole nā fai te ʼu faʼahi ʼaia. ʼI tona fakaneke e Satana, neʼe kai e Eva te fua ʼo te fuʼu ʼakau ʼaia. Ki muli age, neʼe kau foki mo Atama ki te kai ʼo te fuaʼi ʼakau ʼaia ʼaē neʼe tapuʼi.

9. Koteā te fehuʼi neʼe lagaʼi e Satana ʼe pipiki kiai ia Sehova?

⁹ ʼE koutou mahino koa ki te kovi ʼaupito ʼo te ʼu meʼa ʼaē neʼe hoko? Neʼe fakafeagai ia Satana ki te tuʼulaga ʼo Sehova ʼaē ko te Māʼoluga. ʼI tana ʼui ʼaē, “ ʼE moʼoni ʼe mole koulua mamate anai,” neʼe fakafeagai te Tevolo ki te ʼu palalau ʼa te ʼAtua ʼi tana ʼui ʼaē, “ ʼE moʼoni, ʼe koulua mamate anai.” ʼI te ʼu palalau ʼaē neʼe fai e Satana, neʼe ina fia ʼui age kia Atama mo Eva neʼe mole fakahā age e Sehova ʼe feala ke nā liliu ʼo tatau mo te ʼAtua, pea mo nā liliu ʼo faʼitaliha ʼi te fili ʼo te meʼa ʼaē ʼe lelei pea mo te meʼa ʼaē ʼe kovi. Koia ko te fakafeagai ʼa Satana neʼe ko he fakafifihi ki te ʼui ʼaē ʼe tonu ke pule faʼitaliha ia Sehova ʼi te ʼatulaulau.—Senesi 2:17; 3:1-6.

10. Koteā te ʼu meʼa ʼaē neʼe lau e Satana ʼo ʼuhiga mo te hahaʼi?

¹⁰ Neʼe toe ʼui foki e Satana te Tevolo ʼe fakalogo anai te hahaʼi kia Sehova koteʼuhi ʼe ina foaki age he ʼu meʼa kia nātou. Ko tona faka ʼuhiga, neʼe ina fakatupu te loto mahalohalo ʼo ʼuhiga mo te nofo agatonu ʼa te tagata. Neʼe lau e Satana ʼe mole he tagata ʼe nofo agatonu anai ki te ʼAtua mo tona loto katoa. Ko te talanoa hala ʼaia neʼe fai e Satana ʼe hā lelei ʼi te fakamatala ʼa te Tohi-Tapu ʼo ʼuhiga mo Sopo, ko he kaugana agatonu ʼa Sehova ʼaē neʼe tau mo te ʼahiʼahi lahi kua hili kiai taʼu e 1600 ʼi muʼa ʼo totatou temi. Kapau ʼe koutou lau te ʼu ʼuluaki kapite e lua ʼo te tohi ʼo Sopo, pea ʼe koutou mahino anai ki te tupuʼaga ʼo te ʼu mamahi ʼa te tagata pea mo te tupuʼaga ʼo te fakagafua e te ʼAtua ia te ʼu mamahi ʼaia.

11. Neʼe ko te tagata feafeaʼi ia Sopo, kae koteā te fakakovi ʼaē neʼe fai e Satana?

¹¹ Neʼe tauʼi e Satana ia Sopo, “ko he tagata ʼe mole hana lākahala pea ʼe totonu ia.” ʼUluaki, neʼe lau e Satana te ʼu manatu hala ʼo ʼuhiga mo Sopo ʼi tana lagaʼi te fehuʼi ʼaenī, “ ʼE mole ʼi ai koa la he tupuʼaga ʼo te manavasiʼi ʼa Sopo ki te ʼAtua?” Pea, ko te Tevolo aga fakakākā neʼe ina fakatupu te loi ʼo ʼuhiga mo te ʼAtua pea mo Sopo ʼi tana ʼui ʼaē neʼe totogi e Sehova ia te agatonu ʼa Sopo ʼaki tana puipui pea mo tana tapuakina ia ia. Neʼe fakafifihi ia Satana kia Sehova ʼo ina ʼui fēnei: “Kae, moʼo fetogi, fakalelei muʼa, ka ke faoʼi atu tou nima ki ai, pea ke fā ki te ʼu meʼa fuli ʼa ʼana, pea ke sio peʼe mole laukovi anai kia te koe ki tou fofoga.”—Sopo 1:8-11.

12. (a) Koteā te ʼu fehuʼi neʼe feala ke maʼu hona ʼu tali ʼi te fakagafua e te ʼAtua ke ʼahiʼahiʼi ia Sopo e Satana? (b) Koteā te ikuʼaga ʼo te ʼahiʼahi ʼaē neʼe fai kia Sopo?

¹² Neʼe tauhi koa ia Sopo kia Sehova ʼuhi pe ko te ʼu meʼa lelei ʼaē neʼe ina maʼu mai ia te Ia? Neʼe feala koa kia Sopo ke nofo agatonu ʼi te ʼu ʼahiʼahi? Pea ʼo ʼuhiga mo Sehova, neʼe lahi koa tana falala ki tana kaugana moʼo faka fealagia ke ʼahiʼahiʼi? Ko te ʼu fehuʼi ʼaia neʼe hoki feala te maʼu ʼo tona tali ʼi te fakagafua e Sehova kia Satana ke ina fakahoko kia Sopo te ʼahiʼahi fakamataku ʼaupito. Ko te agatonu ʼa Sopo ʼi te ʼahiʼahi ʼaia neʼe faka fealagia e te ʼAtua, ohage ko tona fakamatala ʼi te tohi ʼo Sopo, neʼe fakamoʼoni ai te faitotonu ʼa Sehova pea mo te agatonu ʼa te tagata.—Sopo 42:1, 2, 12.

13. He koʼe ʼe toe kau mo tatou ki te ʼu meʼa ʼaē neʼe hoko ʼi Eteni pea mo te ʼu meʼa ʼaē neʼe hoko kia Sopo?

¹³ Kae, ko te meʼa ʼaē neʼe hoko ʼi te ʼōloto ʼo Eteni pea mo te meʼa ʼaē neʼe hoko ki te tagata ko Sopo, ʼe ʼi ai tona ʼuhiga lahi age. Ko te ʼu fehuʼi ʼaē neʼe lagaʼi e Satana ʼe kau kiai te malamanei katoa, ʼo kau ai mo tatou ia ʼaho nei. Ko te huafa ʼo te ʼAtua neʼe leakoviʼi, pea neʼe fakafihiʼi tona ʼuhiga pule faʼitaliha. Neʼe toe fakafihiʼi mo te faitotonu ʼo te fakatupu ʼa te ʼAtua, ia te tagata. Ko te ʼu fehuʼi ʼaia neʼe tonu ke fai kiai hona ʼu tali.

E FEAFEAʼI TE TALI KI TE ʼU FEHUʼI ʼAIA?

14. Ka fakafihiʼi he tahi, koteā te meʼa ʼaē ʼe lelei age ke ina fai?

¹⁴ Moʼo fakamahino ʼo te faʼahi ʼaia tou vakaʼi he faʼifaʼitaki: ko koutou ko he faʼe peʼe ko he tāmai ʼofa ʼe lahi takotou fānau pea ko tokotou famili ʼe ko he famili ʼe maʼuli fakafiafia. Ko he tahi ʼi tokotou vāhaʼa fale e lagi ʼe ina faka mafola he ʼu loi, ʼo ʼui ai ko koutou ko he faʼe peʼe ko he tāmai agakovi. ʼE feafeaʼi anai mo kapau ʼe ina lau ʼe mole ʼoʼofa takotou fānau kia koutou, kae ʼe nātou nonofo mo koutou ʼuhi pe heʼe mole nātou ʼiloʼi he puleʼaki ʼe lelei age, pea ʼe nātou mavae anai ia koutou mo kapau ʼe fakahā age e he tahi he fealagia ke nātou mavae ai ʼi tonatou ʼapi. ʼE feala ke koutou ʼui ‘ ʼE mole moʼoni te ʼu meʼa ʼaē ʼe ina lau!’ E lagi moʼoni, kae ʼe feafeaʼi anai hakotou fakamoʼoni ia te faʼahi ʼaia? Ko ʼihi ʼu mātuʼa ʼe lagi ʼiʼita anai. Kae ʼe fakatupu ʼaki he ʼu fihifihia ʼe lahi age, pea tahi ʼaē meʼa, ko te taʼi agamālohi ʼaia ʼe ina toe fakamoʼoni te ʼu loi ʼaē neʼe fai ʼo ʼuhiga mo koutou. Ko te faʼahi ʼaē ʼe lelei age moʼo tauʼi ʼo te fihifihia ʼaia, ʼe tonu ke koutou faka fealagia kia ia ʼaē ʼe ina tukugakoviʼi koutou ke ina fakamoʼoni te ʼu meʼa ʼaē ʼe ina lau pea mo faka fealagia ki takotou fānau ke nātou fakahā peʼe nātou ʼoʼofa moʼoni kia koutou.

15. Neʼe feafeaʼi te fakatuʼutuʼu e Sehova ke ina tauʼi te fihi ʼa Satana?

¹⁵ Ko Sehova ʼe tatau mo he tāmai peʼe ko he faʼe ʼofa. ʼE feala ke fakatatau ia Atama mo Eva ki te fānau, pea ko Satana ʼe fakatatau kia ia ʼaē ʼi te vāhaʼa fale ʼe gutuloi. ʼE poto te ʼAtua, koia neʼe mole ina fakaʼauha ai ia Satana, mo Atama, pea mo Eva ʼi te moʼi temi pe ʼaia, kae neʼe ina faka fealagia ki te hahaʼi agakovi ʼaia ke hoko atu tonatou maʼuli ʼi he kiʼi temi. Ko te faʼahi ʼaia neʼe faka fealagia ai ki tatatou ʼu ʼuluaki mātuʼa ke nā fakatupu te famili fakatagata, pea neʼe tuku age te fealagia ki te Tevolo ke ina fakahā peʼe moʼoni tana ʼu palalau ke feala ai ke fai he ʼu tali ki te ʼu fehuʼi ʼaē neʼe lagaʼi. Kae, talu mai te kamataʼaga, neʼe ʼiloʼi e te ʼAtua ʼe agatonu anai ʼihi hahaʼi kia te ia, pea ʼe nātou fakamoʼoni ai anai ko Satana ʼe gutuloi. Ke tou fakafetaʼi kia Sehova ʼi tana tapuakina hoholo pea mo tana tokoni kia nātou ʼaē ʼe ʼoʼofa kia te ia!—2 Fakamatala 16:9; Tāʼaga Lea 15:3.

KOTEĀ TE MEʼA ʼAĒ NEʼE FAKAHĀ?

16. Neʼe liliu feafeaʼi te malamanei ko he meʼa ʼe puleʼi e Satana?

¹⁶ Lolotoga te hisitolia ʼo te tagata, neʼe fakahoko faʼifaʼitaliha e Satana tana ʼu fakatuʼutuʼu ʼo ʼuhiga mo te puleʼi ʼo te malamanei. ʼI ʼihi faʼahi, neʼe ina tuku tona mālohi ki te ʼu mālohi faka politike pea ʼaki he faiva kākā, neʼe ina ʼeke te ʼu lotu ke nātou takitaki ia te tauhi ʼaē kia ia, kae mole ko te tauhi ʼaē kia Sehova. Koia ko te Tevolo kua liliu ia ko “te ʼatua ʼo te tuʼu ʼo te ʼu faʼahiga meʼa ʼaenī,” pea ʼe higoa ia ko “te pule ʼo te mālama ʼaenī.” (2 Kolonito 4:4; Soane 12:31) ʼE moʼoni, “ko te malamanei katoa ʼe takoto ia ʼi te mālohi ʼo te agakovi.” (1 Soane 5:19) ʼE faka ʼuhiga ʼaki koa ʼe moʼoni te ʼui ʼa Satana ʼe feala ke ina fakamaliu fuli te malamanei mai ia Sehova ʼAtua? Kailoa ia! Logope la tana faka fealagia ʼaē ke maʼuli ia Satana, neʼe fakahoko e Sehova tana fakatuʼutuʼu. Koia, koteā koa te meʼa ʼe fakahā mai e te Tohi-Tapu ʼo ʼuhiga mo te fakagafua e te ʼAtua te agakovi?

17. Koteā te meʼa ʼe tonu ke tou manatuʼi ʼo ʼuhiga mo te tupuʼaga ʼo te agakovi pea mo te ʼu mamahi?

¹⁷ Ko te agakovi pea mo te ʼu mamahi ʼe mole fakatupu e Sehova. Mai tona ʼaluʼaga ʼaē ko Satana ko te pule ʼo te mālama ʼaenī pea ʼe ko te ʼatua ʼo te tuʼu ʼo te ʼu faʼahiga meʼa ʼaenī, ko ia pea mo nātou ʼaē ʼe lagolago ki ai, ʼaē ʼe nātou fakatupu te ʼaluʼaga ʼo te sosiete fakatagata ʼaenī pea mo te ʼu mamahi ʼaē ʼe hoko ʼi te malamanei. ʼE mole he tahi ʼe feala ke ina ʼui ko te ʼAtua ʼaē ʼe ina fakatupu ia te ʼu mamahi ʼaia.—Loma 9:14.

18. Koteā ʼaē neʼe fia fakahā e Sehova ʼi tana fakagafua te agakovi pea mo te ʼu mamahi ʼo ʼuhiga mo te fia ʼāteaina mai te ʼAtua?

¹⁸ ʼI tana fakagafua te agakovi pea mo te ʼu mamahi neʼe fakahā lelei ai e Sehova ko te līaki ʼo te ʼAtua ʼe mole ina fakatupu he malamanei ʼe lelei age. ʼE mahino ia, neʼe fakaʼiloga te hisitolia e he ʼu tuʼutāmaki ʼe liuliuga. Neʼe hoko te faʼahi ʼaia he neʼe fili e te hahaʼi ke nātou mulimuli pe ki tonatou loto faʼifaʼitaliha pea neʼe mole nātou tokakaga moʼoni ki te folafola ʼa te ʼAtua pea mo tona finegalo. ʼI te temi ʼaē neʼe mulimuli ai te hahaʼi ʼa Sehova pea mo tonatou ʼu takitaki heʼe agatonu ki te “ala ʼo te hahaʼi” pea mo nātou līaki tana folafola, neʼe fua kovi kia nātou. ʼAki tana polofeta ko Selemia, neʼe ʼui age e te ʼAtua kia nātou: “Ko te ʼu hahaʼi fakapotopoto kua nātou liliu ʼo ufiufi. Kua nātou matataku pea puke anai nātou. Koʼeni! Kua nātou līaki te folafola ʼa Sehova, pea ko te fakapotopoto fea koa ʼaē ʼe nātou maʼu?” (Selemia 8:5, 6, 9) ʼI tana mole tokaga ʼo muliʼi te ʼu lekula ʼa Sehova, kua liliu te malamanei katoa ohage he vaka ʼe mole hona foe, ʼe fetafeaʼaki ʼi he tai ʼe tokakovi.

19. Koteā te fakamoʼoni ʼe mole feala ke fakamaliu e Satana te hahaʼi fuli ke nātou fakafeagai ki te ʼAtua?

¹⁹ ʼI te fakagafua e te ʼAtua te agakovi pea mo te ʼu mamahi, neʼe ina toe fakamoʼoni ai ʼe mole feala ke fakamaliu fuli e Satana te malamanei mai ia Sehova. ʼE fakahā e te hisitolia neʼe ʼi ai tuʼumaʼu pe te ʼu hahaʼi neʼe nonofo agatonu ki te ʼAtua māʼia mo te ʼu temi neʼe hoko ai kia nātou te ʼu fakahala pea mo te ʼu ʼahiʼahi. Lolotoga te ʼu sēkulō, neʼe hā te mālohi ʼo Sehova ki tana kau kaugana pea neʼe kalagaʼi tona huafa ʼi te kele katoa. (Ekesote 9:16; 1 Samuele 12:22) ʼE fakahā mai e Hepeleo kapite 11 kia tatou te lisi loaloaga ʼo te hahaʼi agatonu, ʼo kau ai ia Apele, Enoke, Noe, Apalahamo, pea mo Moisese. ʼE higoa ia nātou ia Hepeleo 12:1 ko ‘te toe ʼao ʼo te kau fakamoʼoni.’ Neʼe ko he ʼu faʼifaʼitaki ʼo he hahaʼi neʼe tui mālohi kia Sehova. ʼO toe feiā aipe ʼi totatou temi, tokolahi neʼe nātou mamate he neʼe nātou taupau mālohi tanatou agatonu ki te ʼAtua. ʼAki tanatou tui pea mo tonatou ʼofa, ʼe nātou fakamoʼoni ai ʼe mole feala ke fakamafuli e Satana te malamanei katoa ke fakafeagai ki te ʼAtua.

20. ʼI tana fakagafua ʼaē ke hoholo te agakovi pea mo te ʼu mamahi neʼe fakamoʼoni ai teā ʼo ʼuhiga mo Sehova pea mo te malamanei?

²⁰ Pea, ʼi tana fakagafua te agakovi mo te ʼu mamahi ke hoholo ai, ʼe fakamoʼoni e Sehova ko Ia tokotahi pe, te Tupuʼaga, ʼe feala pea mo tāu ke pule ki te malamanei, koteʼuhi ʼe feala ke ina foaki kia nātou te tapuakina pea mo te fiafia heʼegata. Lolotoga te ʼu sēkulō, neʼe fakatuʼutuʼu e te malamanei te ʼu faʼahiga puleʼaga. Kae neʼe koteā koa tona ʼu fua? Ko te ʼu fihifihia lahi pea mo te ʼu lakilisi ʼaē ʼe tau mo te ʼu puleʼaga ia ʼaho nei ʼe ina fakamoʼoni, ohage ko tona fakahā fakalelei mai e te Tohi-Tapu, “ ʼe pule te tagata ʼo fakatupu kovi ki te tagata.” (Tagata Tānaki 8:9) ʼE gata pe kia Sehova ʼe feala ke ina hāofaki tatou pea mo fakahoko tana fakatuʼutuʼu ʼaē ʼi te kamataʼaga. ʼE feafeaʼi anai tana fai te faʼahi ʼaia, pea ʼe ina fai anai ʼi te temi fea?

21. Koteā anai te meʼa ka fai kia Satana, pea ko ai ʼaē ka ina fakahoko anai te faʼahi ʼaia?

²¹ ʼI te hili pe ʼaē ʼo te higa ʼa Atama mo Eva ki te fakahala ʼa Satana, neʼe fakahā e te ʼAtua Tana fakatuʼutuʼu ʼo ʼuhiga mo te hāofaki ʼo te malamanei. Koʼeni te meʼa neʼe fakahā e Sehova ʼo ʼuhiga mo Satana: “ ʼE ʼau tuku anai he fehiʼa ia koe mo te fafine, ʼi tou hāko pea mo tona hāko. Pea ʼe ina fakavolu anai koe ʼi tou ʼulu pea ʼe ke fakavolu anai ia ia ʼi tona muliʼi vaʼe.” (Senesi 3:15) Ko te ʼu palalau ʼaia neʼe nātou fakamoʼoni ʼe mole fakagafua anai ki te Tevolo ke ina fai tana ʼu agakovi ʼo talu ai. ʼI tona ʼuhiga Hau ʼo te Puleʼaga Faka Mesianike, ko te Hāko ʼaē neʼe fakapapauʼi mai, ʼaē ko Sesu Kilisito, ʼe ina ‘malaki anai ia Satana ʼi tona lalo vaʼe.’ ʼIo, “kua vave pe,” pea ʼe fakaʼauha anai e Sesu ia ia ʼaē ʼe agatuʼu, ia Satana!—Loma 16:20.

KOTEĀ KOA TE MEʼA ʼAĒ KA KOUTOU FAI ANAI?

22. (a) Ko te ʼu fehuʼi fea ʼaē ʼe tonu ke koutou tali kiai? (b) Tatau aipe peʼe fakatō e Satana tona ʼita kia nātou ʼaē ʼe agatonu ki te ʼAtua, koteā te meʼa ʼe tonu ke nātou ʼiloʼi papau?

²² Kua koutou ʼiloʼi te ʼu fehuʼi ʼaē neʼe fai, koia ʼe koutou lagolago anai koa ki te faʼahi fea? ʼE koutou fakamoʼoni anai koa ʼi takotou ʼu aga, ʼe koutou lagolago ʼo nofo agatonu kia Sehova? ʼI te ʼiloʼi ʼaē e Satana kua nounou tona temi, ʼe ina fai anai ia meʼa fuli moʼo fakatō tona ʼita kia nātou ʼaē ʼe fia nofo agatonu ki te ʼAtua. (Fakahā 12:12) Kae ʼe feala ke koutou kole ki te ʼAtua ke tokoni kia koutou koteʼuhi “ ʼe ʼiloʼi e Sehova peʼe feafeaʼi te hāofaki ʼo te hahaʼi ʼaē ʼe aga faka lotu mai te ʼahiʼahi.” (2 Petelo 2:9) ʼE mole ina tuku anai ke fakahalaʼi koutou ʼo fakalaka ʼi te meʼa ʼaē ʼe feala ke koutou kātakiʼi, pea ʼe ina fai anai he fakatuʼutuʼu ke feala hakotou kātakiʼi te ʼu fakahala.—1 Kolonito 10:13.

23. Koteā te meʼa ʼe feala ke tou fakatalitali kiai ʼaki he loto falala?

²³ ʼAki te falala, tou fakatalitali ki te temi ʼaē ʼe kamata ai anai te gāue ʼa te Hau ko Sesu Kilisito kia Satana pea mo nātou fuli ʼaē ʼe mulimuli ia te ia. (Fakahā 20:1-3) Ko Sesu ʼe ina fakaʼauha anai ia nātou fuli ʼaē neʼe nātou fakatupu te ʼu mamahi pea mo te tuʼania ʼaē neʼe mamahi ai te malamanei. ʼO fakatalitali ki te temi ʼaia, ʼe ʼi ai te mamahi ʼe hoko tāfito kia tatou, ko te mate ʼo he tahi ʼe tou ʼoʼofa ai. Koutou lau te kapite ʼaē ʼe hoa mai, pea ʼe koutou ʼiloʼi anai te meʼa ʼaē ʼe hoko kia nātou ʼaē kua mamate.

TE SIVI ʼO TOKOTOU ʼATAMAI MĀLAMA

E feafeaʼi tatatou ʼiloʼi ʼe mole fakatupu e Sehova te ʼu mamahi ʼo te tagata?

Koteā te ʼu fehuʼi neʼe lagaʼi e Satana ʼi te ʼōloto ʼo Eteni pea neʼe ʼiloga lelei ʼi te temi ʼo Sopo?

ʼI te fakagafua e te ʼAtua ia te ʼu mamahi koteā te meʼa ʼaē neʼe fakamoʼoni ʼaki?