Ko Koutou Koa Ko He Fakamoʼoni ʼa Sehova ʼi Te Temi Fuli?
1 ʼE koutou ʼio anai koa ki te fehuʼi ʼaenī? Logope la ʼe mole ko te ʼu kaugana fuli ʼaē kua foaki tonatou maʼuli kia Sehova ʼaē ʼe kau ki te minisitelio ʼi te temi katoa, kae ʼe mole fakapotopoto koa la tatatou fakaʼamu ke tokagaʼi ia tatou ʼi totatou ʼuhiga ʼaē ko tana ʼu Fakamoʼoni ʼi te temi fuli? ʼE mahino papau ia ʼe tou fai anai te faʼahi ʼaia.
2 ʼE mole feala ke tou Kilisitiano faka temi pe. Neʼe ʼui fēnei e Sesu ʼo ʼuhiga mo tana Tāmai: “ ʼE ʼau fai tuʼumaʼu te ʼu meʼa ʼaē ʼe ina leleiʼia.” (Soane 8:29) Ko Paulo, ʼaē neʼe ina toe logoʼi mo ia te meʼa ʼaia, neʼe ina uga ia tatou ke tou “fai te ʼu meʼa fuli moʼo faka kolōliaʼi ʼo te ʼAtua.” (1 Ko. 10:31) Koia, ko tatou fuli ʼe tonu ke tou faka ʼuhiga ia tatou ko he ʼu Fakamoʼoni ʼa Sehova ʼi te temi fuli. Kapau ʼe tou manatu feiā pea ʼe lave lelei anai ki te ʼu gāue fuli ʼaē ʼe tou fai.
3 Tou Vakavakaʼi Te ʼu Fakamoʼoni: Ko totatou agaaga, tatatou ʼu palalau, pea mo tatatou aga ʼe feala ke ina fakahā ki te hahaʼi ko tatou ko he kau Fakamoʼoni ʼa Sehova. ʼE tou ʼiloʼi papau ʼe ʼaoga ke tou teuteu ʼaki he agavaivai, ʼi tatatou palalau katoa pea mo tatatou aga mokā tou kau ki te fai faka mafola peʼe tou kau ki te ʼu fono faka Kilisitiano. Kae, ko he meʼa pe ʼe tou fai ʼi te faleako, ʼi te gāue, peʼe ʼi te ʼu temi fakafiafia, ko meʼa fuli ʼe tonu ke tou fai moʼo fakamoʼoni ʼe tou mulimuli ki te ʼu lekula faitotonu ʼa Sehova.
4 Neʼe ʼui fēnei e Sesu: “ ʼE mole feala ke ū he kolo mokā ʼe tuʼu ʼi he fuga moʼuga. . . . Ke toe feiā pe te mū ʼo tokotou mālama ʼi muʼa ʼo te hahaʼi, koteʼuhi ke nātou mamata ki ʼakotou gāue lelei pea nātou faka kolōlia ai ki takotou Tāmai ʼaē ʼe ʼi selo.” (Mateo 5:14-16) Ko te faʼahi ʼaia ʼe tonu ke moʼoni ʼi te ʼu meʼa fuli ʼaē ʼe tou fai ʼi te temi fuli. Kapau ʼe tou tokagaʼi ʼe tou lotoloto lua ʼi te foaki ʼo he fakamoʼoni ʼuhi ko te potu ʼaē ʼe tou ʼi ai peʼe ko te meʼa ʼaē ʼe tou fai, ʼe tonu ke tou fai te fehuʼi ʼaenī, ‘ ʼE ʼau tauhi faka temi pe koa kia Sehova peʼe ʼi te temi katoa?’ Tou fakaʼaogaʼi te ʼu faigamālie fuli ke tou palalau ai ki te hahaʼi ʼo ʼuhiga mo te logo ʼo te Puleʼaga ʼo te ʼAtua.
5 Tou manatuʼi, ʼe tou faka maʼuhigaʼi ia Sehova pea ʼe ina leleiʼia tatou, mo kapau ʼe feala ke tou tali “Ei!” ki te fehuʼi ʼaenī “Ko koutou koa ko he Fakamoʼoni ʼa Sehova ʼi te temi fuli?”