Kapite 3

Ko Ai Te ʼAtua Moʼoni?

1. He koʼe ʼe tokolahi te hahaʼi ʼe nātou lototahi mo te ʼu ʼuluaki palalau ʼa te Tohi-Tapu?

KA KOUTOU sioʼi te lagi ʼi he po ʼe māhina ai, ʼe mole koutou punamaʼuli koa ʼi takotou sio ʼe lahi te ʼu fetuʼu? E feafeaʼi hakotou fakamahino pe neʼe nātou tutupu feafeaʼi? Pea e feafeaʼi ia te ʼu meʼa maʼuli ʼi te kele—te ʼu fisiʼi teu e lanu kehekehe, te ʼu manulele mo ʼanatou tagi mālie, te mālohi ʼo te ʼu tāfolaʼa ʼi te moana? ʼE kei lahi atu te tahi ʼu meʼa ʼe feala hatatou talanoa kiai. Ko te ʼu meʼa fuli ʼaia neʼe mole feala ia ke hoko fakafokifā pe. ʼE mole fakapunamaʼuli te lototahi ʼa te tokolahi mo te ʼu palalau ʼaē ʼi te kamataʼaga ʼo te Tohi-Tapu: “ ʼI te kamataʼaga neʼe fakatupu e te ʼAtua ia te lagi pea mo te kele”!—Senesi 1:1.

2. Koteā te meʼa ʼaē ʼe ʼui mai e te Tohi-Tapu ʼo ʼuhiga mo te ʼAtua, pea koteā te meʼa ʼaē ʼe ina fakaloto mālohiʼi tatou ke tou fai?

² ʼE lahi te logo kehekehe ʼi te malamanei ʼo ʼuhiga mo te ʼAtua. ʼI te manatu ʼa ʼihi ko te ʼAtua ʼe ko he mālohi pe ia. Ko te ʼu lauʼi miliona hahaʼi ʼe nātou tauhi ki tanatou ʼu kui ʼaē kua mamate, heʼe nātou ʼui ko te ʼAtua ʼe mamaʼo fau, ʼe mole feala hanatou fakaōvi ki ai. Kae ʼe fakahā mai e te Tohi-Tapu ko te ʼAtua moʼoni ʼe ko he tahi moʼoni ia, ʼe ina fakahā tana tokaga fakaʼofa kia tatou takitokotahi. Koia la ʼaē ʼe fakaloto mālohiʼi ai tatou ke tou “kumi te ʼAtua,” ʼaki te ʼui ʼaē: “ ʼE mole mamaʼo ia, ia tatou takitokotahi.”—Gāue 17:27.

3. He koʼe ʼe mole feala ke fai he paki ʼo te ʼAtua?

³ E feafeaʼi te agaaga ʼo te ʼAtua? Ko te tokosiʼi ʼo tana kau kaugana neʼe nātou mamata ki tana ʼafio faka kolōlia ʼi he ʼu meʼa neʼe hā fakatomuʼa. ʼI te ʼu meʼa ʼaia neʼe hā fakatomuʼa, neʼe hā fakatātā ia ia totonu ʼe heka ʼi te hekaʼaga faka hau, pea ko te mālama fakatalakitupua ʼe hifo mai ia te ia. Kae, ko nātou ʼaē neʼe mamata ki te ʼu meʼa ʼaia neʼe hā, neʼe mole feala hanatou sisio fakalelei ki tona fofoga. (Taniela 7:9, 10; Fakahā 4:2, 3) Mai tona ʼaluʼaga ʼaē, ko te “ ʼAtua ʼe Laumālie”; ʼe mole ʼi ai hona sino kakano. (Soane 4:24) ʼI tona fakahagatonu, ʼe mole feala ia ke fai he paki totonu ʼo te fofoga ʼo totatou Tupuʼaga, koteʼuhi “neʼe mole heʼeki sio he tahi ki te ʼAtua.” (Soane 1:18; Ekesote 33:20) Kae, ʼe lahi te meʼa ʼe ako mai e te Tohi-Tapu ʼo ʼuhiga mo te ʼAtua.

KO TE ʼATUA MOʼONI ʼE ʼI AI TONA HUAFA

4. Koteā he ʼu higoa fakatuʼulaga, ʼe fakaʼaoga ki te ʼAtua ʼi te Tohi-Tapu?

⁴ ʼI te Tohi-Tapu, ʼe fakahā te ʼAtua moʼoni ʼaki te ʼu higoa ʼaē ko te “ ʼAtua Māfimāfi,” “te Māʼoluga,” “te Tupuʼaga Lahi,” “te Faiako Lahi,” “te Tuʼi ʼAliki,” pea mo te “Hau ʼo te heʼegata.” (Senesi 17:1; Pesalemo 50:14; Tagata Tānaki 12:1; Isaia 30:20; Gāue 4:24; 1 Timoteo 1:17) Ko te metitasioʼi ʼo te ʼu higoa fakatuʼulaga ʼaia ʼe feala ke tokoni ai kia tatou ke tuputupu tatatou maʼu ia te ʼatamai mālama ʼo ʼuhiga mo te ʼAtua.

5. Ko ai te huafa ʼo te ʼAtua, pea ʼe hā tuʼa fia ʼi te ʼu Tohi Faka Hepeleo?

⁵ Kae, ko te ʼAtua ʼe ʼi ai tona huafa totonu ʼo ia, pea ʼe teitei tuʼa 7 000 tona hā ʼi te ʼu Tohi Faka Hepeleo—ʼo lahi age ʼi te ʼu higoa fakatuʼulaga ʼaē ʼe fakaʼaogaʼi ʼo ʼuhiga mo ia. ʼI he ʼu taʼu e 1 900 ki muʼa atu, neʼe mole kei fakaʼaogaʼi e te kau Sutea te huafa ʼo te ʼAtua, ʼuhi heʼe ʼi tanatou manatu ʼe maʼoniʼoni fau. Ko te ʼu tohi faka Tohi-Tapu ʼaē neʼe fai ʼi te lea faka Hepeleo neʼe mole ʼi ai he ʼu voyelles. Koia, ʼe mole tou maʼu totonu pe neʼe feafeaʼi te puʼaki ʼaē e Moisese, Tavite peʼe ko ʼihi age ʼi te ʼu temi ʼāfea ia te ʼu consonnes ʼaē e fā (יהוה) ʼaē ʼe nātou faʼufaʼu te huafa ʼo te ʼAtua. Ko ʼihi tagata ako Tohi-Tapu neʼe nātou ʼui ko te huafa ʼo te ʼAtua ʼe puʼaki ko “Yahweh,” kae ʼe mole nātou ʼiloʼi papau. Ko te puʼaki ʼo te huafa ko “Sehova” neʼe fakaʼaoga talu mai te ʼu sēkulō, pea ʼe lahi te ʼu lea neʼe fakaliliu ki ai te huafa ʼaia ʼe tali lelei ia ʼaho nei.—Vakaʼi ia Ekesote 6:3 pea mo Isaia 26:4 ʼi te Version du roi Jacques.

HE KOʼE ʼE TONU KE KOUTOU FAKAʼAOGAʼI TE HUAFA ʼO TE ʼATUA

6. Koteā ʼaē ʼe fakahā ia Pesalemo 83:18 ʼo ʼuhiga mo Sehova, pea he koʼe ʼe tonu ke tou fakaʼaogaʼi tona huafa?

⁶ Ko te huafa ʼo te ʼAtua ʼaē ʼe faka ʼuhiga pe kia ia totonu, ko Sehova, ʼe fakaʼaogaʼi moʼo fakakeheʼi ʼo ia mai te ʼu ʼatua fuli ʼaē. Ko te tupuʼaga la ʼaia ʼo te hā tuʼumaʼu ʼo te huafa ʼaia ʼi te Tohi-Tapu, tāfito ʼi te ʼu tohi faka Hepeleo. Tokolahi te hahaʼi fai fakaliliu Tohi-Tapu ʼe mole nātou fakaʼaogaʼi te huafa ʼo te ʼAtua, kae ʼe fakahā lelei mai ia Pesalemo 83:18: “Ko koe, ʼaē ko tou huafa ko Sehova, ko koe tokotahi pe, te Māʼoluga ʼAupito ʼi te kele katoa.” Koia ʼe lelei tatatou fakaʼaogaʼi te huafa totonu ʼo te ʼAtua mokā tou palalau ʼo ʼuhiga mo ia.

7. Koteā te ako ʼe tou maʼu ʼo ʼuhiga mo te ʼAtua ʼi te faka ʼuhiga ʼo tona huafa ʼaē ko Sehova?

⁷ Ko te huafa ʼaē ko Sehova ʼe haʼu mai te kupu faka Hepeleo ko tona faka ʼuhiga ko te “fakahoko.” Koia, ko te huafa ʼo te ʼAtua ʼe faka ʼuhiga fēnei “ ʼE ina fakahoko.” Ko Sehova ʼAtua ʼe ina fakamoʼoni totonu ko Ia ko he tahi ʼe ina fai he Fakatuʼutuʼu Lahi. ʼE ina fakaliliu tuʼumaʼu tana ʼu fakatuʼutuʼu ke hoko moʼoni. ʼE gata pe ki te ʼAtua moʼoni ʼe feala ke ina maʼu tonu te huafa ʼaia, heʼe mole feala ke ʼiloʼi papau e te tagata peʼe hoko moʼoni anai tana ʼu fakatuʼutuʼu. (Sake 4:13, 14) Ko Sehova tokotahi pe ʼe feala ke ina ʼui fēnei: “ ʼE hoko feiā anai te folafola ʼaē ʼe ʼalu atu ʼi toku gutu. . . . ʼE mahino papau ia ʼe ina fakahoko anai te meʼa ʼaē neʼe ʼau fekauʼi kiai.”—Isaia 55:11.

8. Ko te fakatuʼutuʼu fea ʼaē neʼe fai e Sehova ʼaki ia Moisese?

⁸ Ko te kau pateliaka Hepeleo ʼaē ko Apalahamo, Isaake, pea mo Sakopo neʼe nātou “fakaʼaogaʼi te huafa ʼo Sehova,” kae neʼe mole nātou mahino ki te ʼuhiga katoa ʼo te huafa ʼo te ʼAtua. (Senesi 21:33; 26:25; 32:9; Ekesote 6:3) ʼI te temi ʼaē neʼe fakahā ai e Sehova tana fakatuʼutuʼu moʼo hāofaki ʼo tonatou hōloga, te kau Iselaelite, mai te maʼuli fakapōpula ʼi Esipito pea mo foaki age kia nātou “he fenua ʼe tafe ai te huʼa pipi pea mo te meli,” neʼe hage te meʼa ʼaia neʼe mole feala ke hoko. (Ekesote 3:17) Kae, neʼe fakamahino age e te ʼAtua te ʼuhiga heʼegata ʼo tona huafa ʼaki tana palalau ʼaē ki tana polofeta ko Moisese: “Koʼeni te meʼa ʼaē ʼe tonu anai ke ke ʼui age ki te ʼu foha ʼo Iselaele: ‘Ko Sehova, te ʼAtua ʼo takotou ʼu kui, te ʼAtua ʼo Apalahamo, te ʼAtua ʼo Isaake pea mo ʼAtua ʼo Sakopo, neʼe ina fekauʼi mai ʼau kia koutou.’ Koʼena toku huafa ʼo aʼu ki he ʼu temi ʼe mole ʼiloʼi hona gataʼaga pea koʼena toku memoliale ki te taʼiake mo te taʼiake.”—Ekesote 3:15.

9. Neʼe koteā ʼaē neʼe ʼui e Falaone ʼo ʼuhiga mo Sehova?

⁹ Neʼe kole age e Moisese kia Falaone, te hau ʼo Esipito, ke ina tuku age te kau Iselaelite ke nātou ʼolo ʼo tauhi kia Sehova ʼi te toafa. Kae ko Falaone, ʼaē neʼe faka ʼuhiga ko he ʼatua pea neʼe tauhi ia ki te tahi ʼu ʼatua ʼo Esipito, neʼe tali maʼana: “Ko ai ia Sehova ke ʼau fakalogo ki tona leʼo ʼo fakamavae ia Iselaele? ʼE mole ʼau ʼiloʼi ia Sehova pea tahi ʼaē meʼa, ʼe mole ʼau fakamavae anai ia Iselaele.”—Ekesote 5:1, 2.

10. ʼI te Esipito ʼāfea, koteā te meʼa ʼaē neʼe fai e Sehova moʼo fakahoko ʼo tona finegalo ʼo ʼuhiga mo te kau Iselaelite?

¹⁰ Pea neʼe fai māmālie e Sehova tana gāue moʼo fakahoko ʼo tana fakatuʼutuʼu, ʼo ʼalutahi mo te faka ʼuhiga ʼo tona huafa. Neʼe ina fakahoko te ʼu tautea e hogofulu ki te Esipito ʼo te temi ʼāfea. Ko te tautea fakaʼosi neʼe matehi ai te ʼu ʼuluaki tupu ʼa te kau Esipito, ʼo kau ai mo te foha ʼo te Falaone fialahi. Pea neʼe loto ʼaupito e te kau Esipito ke mavae te kau Iselaele. Kae, neʼe ʼi ai mo te kau Esipito neʼe ōfo ʼi te mālohi ʼo Sehova, ʼo nātou fakatahi ai ki te kau Iselaelite ʼi te temi ʼaē neʼe nātou mavae ai ʼi Esipito.—Ekesote 12:35-38.

11. Ko te milakulo fea ʼaē neʼe fai e Sehova ʼi te Tai Kula, pea koteā te meʼa neʼe mahino kiai tona ʼu fili?

¹¹ Ko te Falaone logogataʼa pea mo tana kautau, mo tana ʼu saliote tau e lauʼi teau, neʼe ina faigaʼi ke ina toe puke tana ʼu hahaʼi popūla. ʼI te fakaōvi ʼo te kau Esipito, neʼe vaheʼi faka milakulo e te ʼAtua te Tai Kula ʼo feala ai te fakalaka ʼa te kau Iselaelite ʼi te kele kua moamoa. ʼI te temi ʼaē neʼe hū ai te kau Esipito ki te lotomalie ʼo te tai, ko Sehova “neʼe ina toʼo te ʼu teka ʼo tanatou ʼu saliote, ʼo faigataʼa ai tanatou taki te ʼu saliote.” Neʼe kalaga ai te kautau ʼo Esipito ʼo fēnei: “Ke tou feholaki mamaʼo naʼa tou felāveʼi mo Iselaele, heʼe tau moʼoni ia Sehova maʼa nātou ʼo fakafeagai ki te kau Esipito.” Kae neʼe kua tauhala ia. Ko te ʼu kaupā vai neʼe mapeʼe ifo kia nātou pea “neʼe lōmakiʼi ai te ʼu saliote tau pea mo te kau tagata heka hōsi ʼaē neʼe kau ʼi te ʼatu kautau fuli ʼa Falaone.” (Ekesote 14:22-25, 28) Neʼe liliu ai te huafa ʼo Sehova ʼo lahi ʼaupito, pea ko te meʼa ʼaia neʼe hoko ʼe mole heʼeki galoʼi ia ʼo aʼu ki te temi nei.—Sosue 2:9-11.

12, 13. (a) Koteā te faka ʼuhiga ʼo te huafa ʼo te ʼAtua kia tatou ia ʼaho nei? (b) Koteā te meʼa ʼe ʼaoga ke ako fakavilivili e te hahaʼi, pea koteā tona tupuʼaga?

¹² Ko te huafa ʼaē neʼe fai e te ʼAtua kia ia totonu, ʼe ʼi ai tona ʼuhiga lahi kia tatou ʼi te temi nei. Ko tona huafa, ʼaē ko Sehova, ʼe ko he fakamoʼoni ko te ʼu meʼa fuli ʼaē neʼe ina fakatuʼutuʼu ʼe ina fakahoko moʼoni anai. ʼE kau kiai te fakahoko ʼo tana ʼuluaki fakatuʼutuʼu ʼaē ko te fakaliliu ʼo te kele ko he palatiso. (Senesi 1:28; 2:8) ʼO ʼuhiga mo te faʼahi ʼaia, ʼe fakaʼauha anai e te ʼAtua ia nātou fuli ʼaē ʼe fakafeagai ki tona pule faʼitaliha ia ʼaho nei, koteʼuhi neʼe ina ʼui fēnei: “ ʼE nātou ʼiloʼi anai ko ʼau Sehova.” (Esekiele 38:23) ʼOsi ʼaia pea fakahoko anai e te ʼAtua tana fakapapau ʼaē ko te fakahū ʼo tana hahaʼi tauhi ki he mālama foʼou ʼe maʼu ai te faitotonu.—2 Petelo 3:13.

¹³ Ko nātou fuli ʼaē ʼe nātou fia maʼu te ʼofa ʼo te ʼAtua ʼe tonu ke nātou ako ke nātou fetapā ki tona huafa ʼaki te tui. ʼE fakapapau mai e te Tohi-Tapu: “Ko ʼaē ia ʼe pāui ki te huafa ʼo Sehova ʼe fakamaʼuli anai ia.” (Loma 10:13) ʼIo, ko te huafa ʼo Sehova ʼe lahi tona faka ʼuhiga. Ko te pāui kia Sehova tokotou ʼAtua pea mo tokotou Hāofakiʼaga ʼe feala ke ina taki koutou ki te fīmālie heʼegata.

TE ʼU KALITATE ʼO TE ʼATUA MOʼONI

14. Koteā te ʼu kalitate tāfito ʼo te ʼAtua ʼe fakahāhā e te Tohi-Tapu?

¹⁴ Ko te ako ʼo ʼuhiga mo te fakamavae ʼo te kau Iselaele mai Esipito ʼe hā tāfito ai te ʼu kalitate maʼuhiga e fā ʼaē ʼe maʼu e te ʼAtua. Ko tana ʼu felogoi mo Falaone neʼe hā ai tona mālohi fakatalakitupua. (Ekesote 9:16) Ko te faʼahiga fakaʼaluʼalu e te ʼAtua ʼo te ʼaluʼaga faigataʼa ʼaia neʼe hā ai tona poto ʼaē ʼe mole hona tatau. (Loma 11:33) Neʼe ina fakahā tana faitotonu ʼi tana tuku ia te tūʼa ki te kau fakafeagai logogataʼa pea mo nātou ʼaē ʼe nātou gaohi koviʼi tana hahaʼi. (Teutalonome 32:4) Ko te ʼofa ʼe ko te kalitate tāfito ʼaia ʼo te ʼAtua. Neʼe fakahā e Sehova tona ʼofa fakatalakitupua ʼaki tana fakahoko ʼo tana fakapapau ki te ʼu hākoga ʼo Apalahamo. (Teutalonome 7:8) Neʼe ina toe fakahā foki tona ʼofa ʼi tana faka fealagia ʼaē ki ni hahaʼi ʼo Esipito ke nātou līaki tonatou ʼu ʼatua loi pea ke nātou maʼu he ʼu fua lelei lahi ʼaki tanatou fakafofoga te ʼAtua moʼoni pe ʼaē e tahi.

15, 16. Ko te ʼu faʼahi fea ʼaē neʼe fakahā ai e te ʼAtua tona ʼofa?

¹⁵ Lolotoga takotou lau te Tohi-Tapu, ʼe koutou tokagaʼi anai ko te ʼofa ʼe ko te kalitate tāfito ʼaia ʼo te ʼAtua, pea neʼe lahi ʼaupito te ʼu ʼaluʼaga neʼe ina fakahā ai tona ʼofa. Ohage la, neʼe ina fakahā tona ʼofa ʼi tana liliu ko te Tupuʼaga pea neʼe ina ʼuluaki vaevae te fiafia ʼo te maʼuli mo te ʼu meʼa maʼuli fakalaumālie. Ko te ʼu lauʼi teau miliona ʼaselo ʼaia ʼe nātou ʼoʼofa ki te ʼAtua pea mo nātou fakavikiviki kia te ia. (Sopo 38:4, 7; Taniela 7:10) Neʼe toe fakahā foki e te ʼAtua tona ʼofa ʼi tana fakatupu te kele pea mo teuteuʼi ke maʼuli fīmālie ai te tagata.—Senesi 1:1, 26-28; Pesalemo 115:16.

¹⁶ ʼE lahi ʼaupito te ʼu ʼaluʼaga ʼe tou maʼu ai te ʼofa ʼo te ʼAtua. ʼUluaki, ʼaki he lotoʼofa neʼe faʼu e te ʼAtua ʼotatou sino ʼi he ʼaluʼaga taulekaleka, ke feala ai hatatou fiafia ʼi totatou maʼuli. (Pesalemo 139:14) Ko tona ʼofa ʼe ʼiloga ʼi te ʼaluʼaga ʼo tana foaki mai kia tatou “mai te lagi te ʼu ʼua pea mo te ʼu fasiga taʼu, ʼo fakafonu ai [ʼotatou] loto ʼaki te meʼa kai pea mo te fiafia.” (Gāue 14:17) Ko te ʼAtua “ ʼe ina fakahopo ake tona laʼā ki te kau agakovi pea mo te kau agalelei, pea ʼe ina fakatō te ʼua ki te kau agatonu pea mo te kau heʼe agatonu.” (Mateo 5:45) Ko te ʼofa ʼe ina toe uga foki totatou Tupuʼaga ke tokoni mai kia tatou ke feala ai hatatou maʼu ia te ʼatamai mālama ʼo ʼuhiga mo te ʼAtua pea ke tou gāue fakafiafia kia te ia ohage hana hahaʼi tauhi. ʼIo, “ko te ʼAtua ʼe ʼofa.” (1 Soane 4:8) Kae ʼe lahi age te tahi ʼu koga ʼo tona ʼulugaaga.

“KO TE ʼATUA AGAʼOFA PEA MO MANAVAʼOFA”

17. Koteā te meʼa ʼaē ʼe tou ako ʼo ʼuhiga mo te ʼAtua ia Ekesote 34:6, 7?

¹⁷ ʼI te ʼosi fakalaka ʼa te kau Iselaelite ʼi te Tai Kula, neʼe kei ʼaoga ke nātou ʼiloʼi lelei te ʼAtua. Neʼe logoʼi e Moisese ʼi tona loto ʼe ʼaoga te faʼahi ʼaia pea neʼe faikole ai ʼo fēnei: “Fakalelei siʼou loto, kapau ʼe ke ʼofa kia te ʼau, fakahā mai tou ʼu ala, fakalelei siʼou loto, ke feala ai haku ʼiloʼi koe, koteʼuhi ke ke ʼofa kia te ʼau.” (Ekesote 33:13) Neʼe hoki ʼiloʼi lelei tāfito e Moisese te ʼAtua, ʼi tana logo ki tana ʼu palalau totonu ʼaenī: “Sehova, Sehova, ʼAtua agaʼofa pea mo manavaʼofa, tuai ʼi te ʼita pea mo mohu ʼi te lotoʼofa pea mo te moʼoni, ʼe ina taupau tona lotoʼofa ki te ʼu lauʼi afe, ʼe ina fakamolemole te hala pea mo te maumau lao pea mo te agahala, kae ʼe molemo ina fakahāo anai mai te tūʼa.” (Ekesote 34:6, 7) Ko te ʼAtua ʼe ina vaevae lelei tona ʼofa mo tana faitotonu, ʼo mole ina fakahāo te hahaʼi ʼaē ʼe agahala ʼi tonatou loto faʼitaliha mai te ʼu ikuʼaga kovi ʼo tanatou agakovi.

18. Neʼe fakahā feafeaʼi e Sehova tona manavaʼofa?

¹⁸ Ohage ko tona ako e Moisese, ko Sehova ʼe manavaʼofa. Ko he tahi ʼe manavaʼofa ʼe ʼofa ia kia nātou ʼaē ʼe mamahi pea ʼe faiga ke ina tuku age kia nātou te fīmālie. Koia neʼe fakahā e te ʼAtua tona ʼofa ki te malamanei ʼi tana fai he fakatuʼutuʼu ke nātou fīmālie ʼo heʼegata ʼo nātou hāo mai te mamahi, te mahaki, pea mo te mate. (Fakahā 21:3-5) Ko te hahaʼi tauhi ki te ʼAtua e lagi ʼe nātou felāveʼi mo te ʼu tuʼutāmaki ʼuhi pe ko te ʼu ʼaluʼaga ʼi te mālama agakovi ʼaenī, peʼe lagi neʼe nātou fai he ʼu aga ʼe mole ko he ʼu aga fakapotopoto, ʼo tupu ai la tanatou ʼu fihifihia. Kae kapau ʼe nātou haga kia Sehova ʼaki te agavaivai ke feala hana tokoni age kia nātou, ʼe ina fakafimālieʼi anai nātou pea mo tokoni kia nātou. Koteā tona tupuʼaga? Koteʼuhi ʼe ina fakahā tona loto manavaʼofa ʼaki tana agalelei ʼaē ki tana hahaʼi tauhi.—Pesalemo 86:15; 1 Petelo 5:6, 7.

19. He koʼe ʼe feala ke tou ʼui ko te ʼAtua ʼe agaʼofa?

¹⁹ Tokolahi ia nātou ʼe maʼu tuʼulaga ʼe nātou aga fefeka ki niʼihi. ʼE kehekehe mo Sehova, heʼe agaʼofa ia ki tana kau kaugana agavaivai! Logope la ko ia tokotahi ʼaē ʼe pule māʼoluga ʼi te ʼatulaulau, ʼe ina fakahā tona finegaloʼofa makehe ʼo ina fai fakatatau ki te malamanei katoa. (Pesalemo 8:3, 4; Luka 6:35) ʼE toe agaʼofa foki ia Sehova ki te hahaʼi takitokotahi, ʼi tana tali ki tanatou ʼu kole ʼaē ʼe fai age ke nātou maʼu tona ʼofa. (Ekesote 22:26, 27; Luka 18:13, 14) ʼE mahino ia, ʼe mole ko he maʼua ʼo te ʼAtua ke ina fakahā tona ʼofa peʼe ko tona manavaʼofa ki he tahi. (Ekesote 33:19) Koia la ʼaē, ʼe ʼaoga ai ke tou fakahā he loto fakafetaʼi loloto ʼo ʼuhiga mo te manavaʼofa pea mo te agaʼofa ʼa te ʼAtua.—Pesalemo 145:1, 8.

ʼE TUAI ʼI TE ʼITA, ʼE MOLE FAKAPULEPULE, PEA ʼE FAITOTONU

20. Koteā ʼaē ʼe hā mai ai ko Sehova ʼe tuai ʼi te ʼita pea ʼe mole fakapulepule?

²⁰ Ko Sehova ʼe tuai ʼi te ʼita. Kae, ʼe mole faka ʼuhiga leva ʼe mole ina fai he meʼa, he neʼe ina fakaʼauha te Falaone talagataʼa pea mo tana kautau ʼi te Tai Kula. Tahi ʼaē meʼa, ko Sehova ʼe mole fakapulepule. Koia, ko tana hahaʼi ʼaē neʼe ʼofa ki ai, te kau Iselaelite, ki muli age neʼe mole kei nātou maʼu tona ʼofa, koteʼuhi neʼe hoholo tanatou fai te ʼu agakovi. ʼE tali e te ʼAtua te hahaʼi mai te ʼatu fenua fuli ke nātou tauhi kia te ia, kae ʼe gata pe kia nātou ʼaē ʼe nātou mulimuli ki tona ʼu ala faitotonu.—Gāue 10:34, 35.

21. (a) Koteā te meʼa ʼe akoʼi mai kia tatou ia Fakahā 15:2-4 ʼo ʼuhiga mo te ʼAtua? (b) Koteā anai te meʼa ʼaē ka ina faka faigafua kia tatou ke tou fai te meʼa ʼaē ʼe matatonu kia mata ʼo te ʼAtua?

²¹ Ko te tohi faka Tohi-Tapu ʼaē ko te Fakahā ʼe ina fakaʼiloga te maʼuhiga ʼo te ako ʼo te “ ʼu lao faitotonu” ʼa te ʼAtua. ʼE ina fakahā mai kia tatou ko te ʼu meʼa maʼuli ʼi te lagi ʼe nātou hiva fēnei: “ ʼE lahi pea mo fakaofoofo tau ʼu gāue, Sehova ʼAtua, te Māfimāfi. ʼE totonu pea mo moʼoni tou ʼu ala, Hau ʼo te heʼegata. Ko ai anai ʼaē ka mole manavasiʼi kia te koe, ʼo mole ina faka kolōliaʼi tou huafa? Heʼe ko koe pe ʼe ke agatonu tokotahi. Heʼe ʼōmai anai te ʼatu puleʼaga katoa pea ʼe nātou atolasio anai ʼi ʼou muʼa, heʼe kua fakahā tau ʼu lao ʼaē ʼe totonu.” (Fakahā 15:2-4) ʼE tou fakahā kia Sehova he manavasiʼi fakatupu hāofaki, peʼe ko he fakaʼapaʼapa kia te ia, ʼaki tatatou maʼuliʼi te ʼu meʼa ʼaē ʼe totonu ki ʼona mata. ʼE faigafua anai kia tatou te fai ʼo te faʼahi ʼaia mo kapau ʼe tou manatuʼi ia te poto pea mo te ʼofa ʼo te ʼAtua. Ko tana ʼu lao fuli ʼe lelei kia tatou.—Isaia 48:17, 18.

“KO SEHOVA TOTATOU ʼATUA, ʼE KO TE TOKOTAHI PE”

22. He koʼe ko nātou ʼaē ʼe nātou tali ia te Tohi-Tapu ʼe mole nātou tauhi ki he Tahitolu?

²² ʼI te Esipito ʼāfea neʼe lahi te ʼu ʼatua neʼe tauhi kiai te hahaʼi, kae ko Sehova ʼe ‘ko he ʼAtua ʼe ina fakamaʼua he pipiki ʼāteaina pe kia te ia.’ (Ekesote 20:5) Neʼe fakamanatuʼi age e Moisese ki te kau Iselaelite ko “Sehova totatou ʼAtua, ʼe ko te Sehova pe e tahi.” (Teutalonome 6:4) Neʼe toe liuliuga e Sesu Kilisito te ʼu palalau ʼaia. (Maleko 12:28, 29) Koia, ko nātou ʼaē ʼe nātou tali te Tohi-Tapu ko te Folafola ʼa te ʼAtua, ʼe mole nātou atolasio ki he Tahitolu ʼe faʼufaʼu e he toko tolu peʼe ko he ʼu ʼatua e tolu ʼi he ʼatua e tahi. ʼI tona fakahagatonu, ko te kupu “Tahitolu” ʼe mole tuʼu ia ʼi te Tohi-Tapu. Ko te ʼAtua moʼoni ʼe ko te Tokotahi, ʼe kehe ia mo Sesu Kilisito. (Soane 14:28; 1 Kolonito 15:28) Ko te laumālie maʼoniʼoni ʼo te ʼAtua ʼe mole ko he tahi ia. ʼE ko te mālohi gāue ʼo Sehova, ʼaē ʼe fakaʼaogaʼi e te Māfimāfi moʼo fakahoko ʼo tana ʼu fakatuʼutuʼu.—Senesi 1:2; Gāue 2:1-4, 32, 33; 2 Petelo 1:20, 21.

23. (a) ʼE feafeaʼi anai te tuputupu ʼo tokotou ʼofa ki te ʼAtua? (b) Koteā te meʼa neʼe ʼui e Sesu ʼo ʼuhiga mo te ʼofa ki te ʼAtua, pea koteā te meʼa ʼe ʼaoga ke tou ako ʼo ʼuhiga mo Kilisito?

²³ Ka koutou fakatokagaʼi te fakatalakitupua ʼo Sehova, ʼi takotou manatu ʼe mole tāu koa la mo ia ke koutou tauhi kia te ia? ʼI te lolotoga ʼo takotou ako tana Folafola, ia te Tohi-Tapu, ʼe koutou ʼiloʼi lelei anai ia ia, pea ʼe koutou ako anai te meʼa ʼaē ʼe ina fakamaʼua ke koutou fai ke feala ai hakotou maʼuli ʼo heʼegata pea mo fīmālie. (Mateo 5:3, 6) Tahi ʼaē meʼa, ko takotou ʼofa ki te ʼAtua ʼe tuputupu anai. ʼE tau mo feʼauga te faʼahi ʼaia, koteʼuhi neʼe ʼui fēnei e Sesu: “ ʼE tonu ke ke ʼofa kia Sehova tou ʼAtua ʼaki tou loto katoa pea mo tou nefesi katoa pea mo tou laumālie katoa pea mo tou mālohi katoa.” (Maleko 12:30) ʼE mahino ia, neʼe maʼu e Sesu te taʼi ʼofa ʼaia ki te ʼAtua. Kae koteā koa te meʼa ʼe fakahā mai e te Tohi-Tapu ʼo ʼuhiga mo Sesu Kilisito? Koteā koa tona tuʼulaga ʼi te fakahoko ʼo te fakatuʼutuʼu ʼa Sehova?

TE SIVI ʼO TOKOTOU ʼATAMAI MĀLAMA

Ko ai te huafa ʼo te ʼAtua, pea ʼe tuʼa fia tona fakaʼaogaʼi ʼi te ʼu Tohi Faka Hepeleo?

He koʼe ʼe tonu ke koutou fakaʼaogaʼi te huafa ʼo te ʼAtua?

Ko te ʼu kalitate fea ʼo Sehova ʼAtua ʼaē ʼe koutou leleiʼia tāfito?

[Paki ʼo te pasina 29]

E feafeaʼi hakotou ʼiloʼi lelei ia te Tupuʼaga ʼo te ʼu meʼa fuli?