ʼAua Naʼa Koutou Hala ʼi Te Ikuʼaga ʼo Te ʼĀteaina ʼAē Neʼe Foaki Mai e Te ʼAtua
“ ʼI te faʼahi ʼaē ʼe nofo ai te laumālie ʼo Sehova, ʼi te faʼahi ʼaia ʼe nofo ai te ʼāteaina.” — 2 Kolonito 3:17.
1. He koʼe ko te ʼu palalau ia Isaia 65:13, 14 ʼe tau mo te kau Fakamoʼoni ʼa Sehova?
KO SEHOVA ko te ʼAtua ʼo te ʼāteaina. Pea e ko he tapuakina foki te ʼāteaina ʼaē ʼe foaki e te ʼAtua! Koteʼuhi ko tana kau kaugana ʼe nātou maʼu te ʼāteaina ʼaia, ko te ʼu palalau ʼaenī ʼa te Pule ʼAliki ko Sehova ʼe tau mo nātou: “Koʼeni ko taku ʼu kaugana ʼe nātou kakai ānai, kae ko koutou, ʼe koutou pakupaku ānai. Koʼeni ko taku ʼu kaugana ʼe nātou ʼiʼinu ānai, kae ko koutou, ʼe koutou mamahi ānai ʼi te fia ʼinu. Koʼeni ko taku ʼu kaugana ʼe nātou fakafiafia ānai, kae ko koutou, ʼe koutou nonofo ānai ʼi te ufiufi. Koʼeni ko taku ʼu kaugana ʼe nātou kalaga ānai fakafiafia, koteʼuhi ko te tokalelei ʼo te loto, kae ko koutou, ʼe koutou tagi ānai, koteʼuhi ko te mamahi ʼo te loto, pea ʼe koutou tagi laulau ānai, ʼuhi ko te tahi ʼalu ʼo te laumālie.” — Isaia 65:13, 14.
2. He koʼe ʼe mahu fakalaumālie te hahaʼi ʼo te ʼAtua?
2 Ko te hahaʼi ʼo te ʼAtua ʼe nātou mahu ʼi te ʼaluʼaga fakalaumālie, heʼe taki nātou ʼe tona laumālie, pe ʼe ko tona mālohi gāue. Neʼe ʼui e te ʼapositolo ko Paulo: “Ko Sehova ko te Laumālie; pea ʼi te faʼahi ʼaē ʼe nofo ai te laumālie ʼo Sehova, ʼi te faʼahi ʼaia ʼe nofo ai te ʼāteaina.” (2 Kolonito 3:17). Koteā koa te fakatuʼutuʼu ʼo te ʼāteaina mai te ʼAtua? Pea koteā te meʼa ke tou fai ʼo ʼuhiga mo te fakaʼaoga fakalelei ʼo te ʼāteina ʼaia?
Ko te ʼAtua ʼe ʼāteaina
3. Ko te ʼāteaina feafeaʼi koa ʼaē ʼe tau mo te ʼAtua, pea koteā tona tupuʼaga?
3 Ko Sehova tokotahi ʼe ʼāteaina katoa. ʼE mole he meʼa ʼi te ʼu meʼa fuli neʼe fakatupu ʼe feala ke ina faka tuʼakoi tona ʼāteaina, koteʼuhi heʼe ko ia ko te ʼAtua Māfimāfi pea mo te Pule ʼo te Atulaulau. Ohage ko te ʼui ʼa te tagata agatonu ko Sopo: “Ko ai ʼaē ʼe feala ke fakafeagai kia te ia? ʼO ina ʼui age ānai: ‘Koteā koa ʼaē ʼe ke fai?’ ” (Sopo 9:12). ʼO toe feiā aipe, mo te hau papilone ko Nepukanesa neʼe ina fakamoʼoni ki te faʼahi ʼaia: “ ʼE mole he tahi ʼe ina fealagia te taʼofi [te] nima [ʼo te ʼAtua] pe ʼe feala hana ʼui age: ‘Koteā koa ʼaē ʼe ke fai?’ ” — Taniela 4:35.
4. He koʼe koa ko Sehova ʼe ina taʼofi tona ʼāteaina ʼaki he ʼu faʼahiga tuʼakoi?
4 Pea, ko te ʼu fakatuʼutuʼu agatonu ʼaē ʼa Sehova ʼe taʼofi te ʼāteaina katoa ʼaia ʼi te ʼu faʼahiga tuʼakoi. ʼE fakatā ʼi te meʼa ʼaē neʼe hoko kia Apalahamo ʼi tana ʼui ʼaē ʼo ʼuhiga mo te hahaʼi ʼe nonofo ʼi Sotoma ʼi tana fehuʼi age: “Ko te Tagata Fakamāu ʼo te kele katoa ʼe mole ina fai ānai koa te meʼa ʼaē ʼe totonu?” Ko te tali ʼaē ʼa te ʼAtua ʼe ʼiloga mai ai te maʼua ʼaē ʼo te fai ʼo te meʼa ʼe totonu. ʼE mole ina faka ʼauha ānai ia Sotoma mo kapau ʼe ʼi ai he ʼu hahaʼi agatonu ʼe nonofo ʼi te kolo ʼaia (Senesi 18:22-33). Ko te ʼAtua ʼe ina toe taʼofi tona ʼāteaina ʼaki tana ʼu faitotonu heʼe ko tona ʼofa pea mo tona poto ʼaē ʼe fakatuʼai ai tona ʼita pea mo taʼofi aipe ia ia. — Isaia 42:14.
Te ʼu tuʼakoi ʼo te ʼāteaina fakatagata
5. Koteā te ʼu meʼa ʼaē ʼe faka tuʼakoi ai te ʼāteaina ʼo te tagata?
5 Logo aipe te ʼāteaina katoa ʼaē ʼo Sehova, ko tana ʼu gāue neʼe ina fai faka tuʼakoi ʼuhi ko tonatou ʼu natula, pea mo tonatou ʼu fealagia, pea mo te ʼu ʼaluʼaga ʼo te hahaʼi, ohage pe la ko te nounou ʼo te temi maʼuli ʼuhi ko te agahala ʼo te ʼu tagata. Neʼe fakatupu e te ʼAtua te tagata mo te ʼāteaina haohaoa ke ina fakaʼaoga ʼi te faʼahi pe ʼaē ka foaki age e Sehova kia te ia. ʼE ʼi ai pe foki mo ʼihi age ʼu ʼaluʼaga kehekehe, ʼaē ʼe faka tuʼakoi ai te ʼāteaina ʼo te tagata.
6. Koteā ʼaē ʼe fakamaʼua ki totatou ʼāteaina ʼaē ki te ʼAtua?
6 ʼUluaki, ko te ʼāteaina ʼo te tagata ʼe faka tuʼakoi he neʼe fakatupu e te ʼAtua te tagata ke kaugana ki Tana fakatuʼutuʼu. Ko Sehova ‘ ʼe tau mo koe te kolōlia, pea mo te fakaʼapaʼapa, pea mo te mālohi, he ko koe ʼaē neʼe ke fakatupu te meʼa fuli, pea ʼaki tou finegalo neʼe maʼuli te ʼu meʼa ʼaia pea mo nātou tupu.’ (Fakahā 4:11). Ko ia ʼaē ko te tagata ʼe maʼua ki tona Pule, ʼaē neʼe ina fai fakalelei te ʼu lao moʼo taki ʼo te ʼu tagata. ʼI te Iselaele ʼāfea ʼi tonatou taki ʼaē e te Lao faka moisese, neʼe fakamaʼua te ʼAtua ke matematehi te ʼu hahaʼi ʼaē ʼe aga pauʼu ki tona huafa pea mo maumauʼi te lao ʼo te sapato (Ekesote 20:7; 31:14, 15; Levitike 24:13-16; Faka au 15:32-36). Logo aipe, ko tatou kau kilisitiano, ʼe mole kei tou fakamaʼua ki te Lao, ko totatou ʼāteaina ʼe faka tuʼakoi heʼe tou maʼua kia Sehova, ko totatou Tagata Fakamāu, Ko ia ʼaē ʼe ina foaki te ʼu fakatotonu, pea ko totatou Hau. — Isaia 33:22; Loma 14:12.
7, 8. a) ʼE feafeaʼi te faka tuʼakoi e te ʼu lao ʼo te atulaulau te ʼāteaina ʼo te tagata? b) Koteā ʼihi ʼu lao ʼo te ʼAtua ʼe nātou faka tuʼakoi totatou ʼāteaina fakatagata?
7 Lua, ʼe faka tuʼakoi te ʼāteaina ʼo te tagata, ʼuhi ko te ʼu lao ʼa te ʼAtua ʼi te atulaulau. Ohage la, ko te lao ʼaē ʼo te takafoli, ʼe mole feala ke fakato he tagata mai he fuga fale maʼoluga ʼaupito ʼo mole lavea pe ʼe mole mate. ʼE ʼiloga lelei mai, ko te ʼu lao ʼa te ʼAtua ʼi te atulaulau ʼe ina faka tuʼakoi te ʼāteina ʼo te tagata ʼo ʼuhiga mo te ʼu meʼa ʼaē ʼe ina fai.
8 Tolu, ʼe faka tuʼakoi te ʼāteaina ʼo te tagata, ʼuhi ko te ʼu lao ʼo ʼuhiga mo te aga. Lagi neʼe kua koutou fakatokagaʼi foki te ikuʼaga ʼo te meʼa ʼaē neʼe tohi e Paulo ia Kalate 6:7, 8, (T.T.K.): “ ʼAua tautou fakakaukau hala, he é molemo feala ke kâkâí te ʼAtua. ʼIloga te meá neé tó e te tagata, ko iape ia e ina utu ake. Ko ia e gâuepe ki tona sino, pea é ina maúpe te kovi o te sino, pea ko ia e gâue ki te laumâlie, pea é ina maú mai te laumâlie te maúli heé gata.” ʼE ʼiloga lelei mai ai, ko te ʼu lao ʼa Sehova ʼAtua ʼo ʼuhiga mo te aga ʼe nātou toe faka tuʼakoi totatou ʼāteaina, kae kapau ʼe tou fakalogo ki ai, ʼe ina fealagia kia tatou ke tou maʼu te maʼuli.
9. He koʼe koa ʼi tatatou nonofo ʼi te sosiete fakatagata ʼaenī ʼe faka tuʼakoi totatou ʼāteaina?
9 Fā, ʼe faka tuʼakoi te ʼāteaina ʼo te tagata, ʼuhi ʼi tana nofo ʼi te sosiete fakatagata ʼaenī. Kae, ʼe ina maʼu ānai he ʼāteaina mo kapau ʼe mole kau ki te ʼu meʼa heʼe agatonu. Ko te kau kilisitiano ʼe tonu ke nātou fakalogo ki te ʼu “puleʼaga maʼoluga”, mo kapau ʼe mole fakafeagai ki te ʼu lao ʼo te ʼAtua (Loma 13:1; Gāue 5:29). Ohage la, ʼe tonu ke tou fakalogo ki te ʼu lao ʼo ʼuhiga mo te totogi ʼo te ʼu tukuhau, pea mo te faka tuʼakoi ʼo te haʼele vave ʼo tatatou ʼu motokā, pea mo ʼihi age pe ʼu meʼa. ʼI tatatou fakalogo foki ʼaē ki te ʼu lao ʼaia ʼa “Sesale” ʼe ʼiloga ai ko te ʼāteaina ʼaē ʼe foaki mai e te ʼAtua ʼe faka tuʼakoi. — Maleko 12:17; Loma 13:7.
He koʼe ko te ʼāteaina ʼe faka tuʼakoi?
10, 11. He koʼe neʼe foaki e te ʼAtua te ʼāteaina faka tuʼakoi ki te ʼu tagata?
10 He koʼe koa neʼe foaki e te ʼAtua ki te ʼu tagata te ʼāteaina faka tuʼakoi? Ko tona tahi tupuʼaga foki he ko te ʼAtua mālohi neʼe ʼi ai tana faʼu ʼatamai ʼi te kele, ka nātou foaki ānai kia te ia te fakaʼapaʼapa pea mo te fakavikiviki ʼaki tanatou ʼu palalau pea mo tanatou ʼu aga. Ko te ʼu tagata ʼe feala ke nātou fai te faʼahi ʼaia, kae ko te ʼu manu ʼe mole nātou fealagia. Ko te ʼu manu ia ʼe taki nātou e te polokalama kua fai fakatomuʼa, ʼe mole nātou mahino foki la nātou ki te lao ʼaē ʼo ʼuhiga mo te aga. ʼE feala ke tou akoʼi he kuli ke mole ina toʼo he meʼa, kae ʼe mole feala ānai hatatou akonakiʼi ʼo ʼuhiga mo te heʼe agatonu ʼo te kaihaʼa. ʼI tanatou ʼu agaaga ʼaē kua fakatuʼutuʼu fakatomuʼa, ko te manu ʼe mole feala hana fakavikiviki pea mo fakaʼapaʼapa ki te ʼAtua, kae ki te tagata ʼe fakalogo pe kia ia tana tauhi ki tona Tupuʼaga, ʼaki he loto ʼofa pea mo he loto fakafetaʼi.
11 ʼE toe foaki foki e te ʼAtua te ʼāteaina ʼaia ke nātou lelei pea mo fīmālie. ʼE feala hanatou fakaʼaoga tonatou ʼāteaina faka tuʼakoi ʼaia ʼo nātou fakakaukau he ʼu meʼa ke nātou fai, pea mo loto manavaʼofa pea mo nātou gāue fakatahi. ʼE toe maʼu foki e te ʼu tagata te ʼāteaina ʼaē ʼo te fili ʼo tanatou gāue pea mo tonatou nofoʼaga. ʼI te temi nei, ko te ʼu meʼa faka koloā pea mo faka politike ʼe nā faka tuʼakoi foki te fili ʼo te ʼāteaina ʼaia, ʼuhi mai te mānumānu ʼa te tagata, kae ʼe mole tupu mai ia ʼi te faʼahiga fakatupu ʼaē e te ʼAtua te hahaʼi.
12. He koʼe kua hahaʼi ʼi te malamanei te to ki te popūla?
12 Logo aipe te foaki ʼaē e Sehova te ʼāteaina lahi ki te ʼu tagata, tokolahi ʼi te temi nei kua nātou to ki te fakaʼofaʼofa. Koteā koa ʼaē neʼe hoko? Ko te ʼuluaki tau matuʼa, ia Atama mo Eva, neʼe hala ia nāua te ikuʼaga ʼo te ʼāteaina mai te ʼAtua. Neʼe nā fakalaka nāua ʼi te ʼu tuʼakoi fakaʼatua ki tonā ʼāteaina pea neʼe nā fakafifihi te ʼu takitaki agatonu ʼaē ʼa te ʼAtua kia nāua te Pule ʼAliki ia Sehova (Senesi 3:1-7; Selemia 10:10; 50:31). ʼI tanā mole fia fakaʼaoga tonā ʼāteaina moʼo vikiviki ki te ʼAtua, neʼe nā fakaʼaoga ʼo manatu pe kia nāua, ʼo nā fakatotonu ke nā faʼifaʼitaliha ʼo fakatotonu te meʼa ʼaē ʼe nā leleiʼia pea mo te meʼa ʼaē ʼe kovi, ʼo nā kau ai foki mo Satana ʼi tana fakafeagai ʼaē kia Sehova. ʼO mole ʼui ke nā kumi he ʼāteaina lahi, kae ko Atama mo Eva, neʼe nā to ki te ʼu fakamāu pea ki te popūla, pea mo te puli mamalie ʼo tonā ʼāteaina, ʼaē ʼo hoko ai mo tonā mamate. Ko tonā hōloga neʼe puli ia nātou te ʼāteaina ʼaia. “Ko tatou fuli neʼe agahala pea ʼe mole tou aʼu ki te kolōlia ʼo te ʼAtua.” “Ko te totogi ʼo te agahala, ko te mate.” — Loma 3:23; 5:12; 6:23.
13. He koʼe neʼe feala ke fakapōpulaʼi e Satana te hahaʼi?
13 ʼAki te fakafeagai foki ʼaē ʼi Eteni, ko Atama pea mo tonā hōloga neʼe nātou liliu ʼo popūla kia Satana ko te Tevolo. He koʼe koa, “ko te malamanei ʼe takoto ʼi te agakovi”. (1 Soane 5:19.) Koteʼuhi ko tona mālohi maʼoluga pea mo tona faiva ʼaē neʼe feala ai e Satana te loʼiaki pea mo fakapopūlaʼi te malamanei ʼaē ʼe mavae mai te ʼAtua. Ko ia ʼaia, ko te ʼu tagata agakākā neʼe nātou puleʼi ʼonatou kau feʼao ʼaki te ʼu meʼa ʼe mole totonu (Tagata Tānaki 8:9). Pea, ko te hahaʼi fuli kua nonofo nei ʼi te popūla ki te agahala pea mo te mate, kia Satana pea mo tana kau temonio, pea mo te mālama faka politike, pea mo te ʼu maʼuaga koloā, pea mo te faʼahiga tuʼu faka lotu.
Ko te ʼāteaina moʼoni ʼe feala ke tuʼu
14. ʼE pipiki koa ki te ā te falala ʼa te ʼu tagata ʼo ʼuhiga mo te ʼāteaina moʼoni?
14 Ko te ʼāteaina ʼaē mai te agahala, mai te mate, pea mai te Tevolo pea mo tona mālama agakovi, ʼe pipiki ki te fakatotonu ʼaē ʼa te ʼAtua ke ina fakatokatoka te fehuʼi ʼaē ʼo ʼuhiga mo tana Tuʼi Pule ʼo te atulaulau. Koteʼuhi neʼe fakafihiʼi e Satana te faʼahi ʼaia, pea ko Sehova neʼe ina tuku ke maʼuli, ohage pe ko te meʼa ʼaē neʼe hoko kia Falaone. Ke fakahā ai e Sehova tona māfimāfi pea mo tona huafa ki te kele katoa (Ekesote 9:15, 16). Ko te ʼAtua ka ina vave fakahā ānai tona Pule ki te atulaulau pea mo fakamaʼa tona huafa taputapu ʼo ina tauteaʼi te fakafeagai ʼa Satana, mo Atama pea mo Eva. Ko ia ʼaē ko nātou ʼaē ʼe manavasiʼi kia Sehova ʼe nātou hāofaki ānai mai te popūla ʼo te agahala, pea mo te mate, pea ko nātou ʼaia ʼe fakahu ānai ki te mālama foʼou, ʼaē ʼe nātou maʼu ai te ʼāteaina ʼe foaki e te ʼAtua. — Loma 8:19-23.
15. Koteā te tuʼuluga ʼa Sesu ʼo ʼuhiga mo te toe foaki ʼo te ʼāteaina ki te malamanei?
15 Ke feala ke toe maʼu e te malamanei te ʼāteaina, neʼe fekauʼi mai e te ʼAtua tona ʼAlo ki te kele ʼo tupu tagata. ʼAki tana foaki fakalelei tona maʼuli haohaoa fakatagata, ko te ʼAlo ʼo te ʼAtua, ia Sesu Kilisito, neʼe ina foaki te totogi ʼe tau, ko te fakatafito aga ʼaia ʼo te hāofaki ʼo te malamanei (Mateo 20:28). Neʼe ina toe faka mafola foki te logo ʼo ʼuhiga mo te ʼāteaina. ʼI te kamata ʼo tana minisitelio, neʼe ina ʼui te ʼu palalau ʼaenī ʼo ʼuhiga mo ia: “Ko te laumālie ʼo te Tuʼi ʼAliki ko Sehova ʼe ia te ʼau, he neʼe ina fakanofo ʼau ke ʼau fakahā ki te kau fia mālalo he logo lelei. Neʼe ina fekauʼi ʼau ke ʼau faitoʼo ia nātou ʼe lotomamahi, moʼo faka mafola kia nātou ʼe pilisoni he ʼāteaina, pea ki te kau kivi ke nātou toe sio.” — Isaia 61:1; Luka 4:16-21.
16. Koteā te ʼu meʼa neʼe tonu ke fai e te kau sutea ʼo te ʼuluaki sekulo ke nātou maʼu ai te ʼāteaina moʼoni?
16 ʼE feafeaʼi ānai te maʼu e te hahaʼi te ʼāteaina ʼaia? Neʼe ʼui e Sesu: “Kapau ʼe koutou maʼuʼuli ʼi taku folafola, ko koutou ko taku kau tisipulo moʼoni, pea ʼe koutou ʼiloʼi ānai te moʼoni, pea ko te moʼoni ʼe ina hāofaki ānai koutou.” ʼE moʼoni, ko te kau tisipulo ʼa Sesu neʼe nātou maʼu te ʼāteaina fakalaumālie (Soane 8:31, 32, 36). Ohage ko te ʼui age ʼa Sesu ki te kovana ko Pose Pilato: “Neʼe ʼau tupu ko te potu ʼaenī, pea neʼe ʼau haʼu ki te malamanei ko te potu ʼaenī: ko te fakamoʼoni ki te moʼoni. Ko ʼaē ʼe ʼi te faʼahi ʼo te moʼoni, ʼe fakalogo ki toku leʼo.” (Soane 18:37). Ko te kau Sutea ʼaē neʼe nātou tali te moʼoni ʼo nātou faka mafola pea mo nātou faʼifaʼitakiʼi Sesu ʼo nātou fakahemala ki ʼanatou ʼu agahala, pea mo nātou fakatotonuʼi tanatou ʼu aga ʼāfea, pea mo foaki tonatou maʼuli kia Sehova, neʼe nātou papitema ohage ko te papitema ʼaē ʼo Sesu (Mateo 3:13-17; Gāue 3:19). ʼAki te meʼa ʼaia ʼe nātou maʼu ai te ʼāteaina ʼaē ʼe foaki mai e te ʼAtua.
17. He koʼe ʼe foaki e Sehova te ʼāteaina ki tana kau kaugana?
17 ʼE foaki e Sehova ki tana ʼu kaugana agatonu te ʼāteaina moʼo fakamaʼa tona ʼuhiga Tuʼi ʼAliki pea mo nātou toe fīmālie aipe. Neʼe ina hāofaki te kau Iselaele mai tanatou popūla ʼi Esipito ke nātou fakatahi ohage ko he puleʼaga faka pelepitelo, ia nātou ko tana kau Fakamoʼoni ʼo faka kolōlia kia te ia (Ekesote 19:5, 6; Isaia 43:10-12). Tatau aipe, mo te temi ʼaē neʼe toʼo mai ai e Sehova tana hahaʼi mai Papilone, ke nātou toe faʼu te fale lotu pea mo toe fakamaʼuli te tauhi moʼoni (Esitalasi 1:2-4). ʼI te kua tokaga pe ʼaē ʼa te kau Iselaele ki tonatou ʼu lelei fakakoloa, neʼe fekauʼi e Sehova tana ʼu polofeta ko Asea pea mo Sakalia ke nā fakatokaga kia nātou tonatou ʼu maʼua ki te ʼAtua. ʼI te fakaʼaoga ʼo tonatou ʼāteaina ki he fakatuʼutuʼu tāfito, ʼaē ko te fakaʼosi ʼo te fale lotu, moʼo faka kolōlia ʼo te ʼAtua, pea mo te fīmālie ʼo tona hahaʼi.
ʼAua naʼa hala ʼi te ikuʼaga ʼo te ʼāteaina ʼaē neʼe foaki mai e te ʼAtua
18. He koʼe koa neʼe ʼui ko te kau kaugana ʼa Sehova ʼo te temi nei, neʼe mole hala ia nātou te ʼāteaina mai te ʼAtua?
18 Koteā koa te ʼui ʼo ʼuhiga mo te kau kaugana ʼa te ʼAtua ʼo te temi nei? ʼI tonatou ʼuhiga kautahi, neʼe mole hala ia nātou te ikuʼaga ʼo te ʼāteaina mai te ʼAtua. ʼI te taʼu 1870, neʼe nātou hāo mai te ʼu akonaki papilone pea mo nātou maʼu te ʼāteaina lahi faka kilisitiano. Ohage ko te ʼui ʼaē ia Tāʼaga Lea 4:18: “Kae ko te ala ʼo te kau faitotonu ʼe hage ko te mālama ʼo te ʼaho ʼaē ʼe mafaofao mamalie ʼo aʼu ki te katoa ʼo te mālama ʼo te ʼaho.” Pea, ohage pe ko te hahaʼi ʼāfea ʼo te ʼAtua ʼaē neʼe pilisoniʼi faka temi ʼi papilone, tatau aipe mo te taʼu 1918 ko te ʼu kaugana ʼa Sehova neʼe nātou popūla ʼi te Papilone Lahi (Fakahā 17:1, 2, 5). Ko te ʼu hahaʼi ʼo te puleʼaga faka malamanei ʼo te lotu hala neʼe nātou fiafia ʼi te temi ʼaē neʼe fakatā e “te ʼu fakamoʼoni e lua” ʼi tanā mamate fakalaumālie. Kae ʼaki te agalelei makehe ʼaē ʼa te ʼAtua, ʼi te taʼu 1919 ko te kau kaugana fakanofo neʼe toe tutuʼu ake mai te mate fakalaumālie, ʼonatou ʼāteaina fakalaumālie ai (Fakahā 11:3, 7-11). ʼI tanatou fakaʼaoga ʼaē te ʼāteaina mai te ʼAtua, neʼe nātou liliu ko te kau fakamoʼoni faiva ʼa te Maʼoluga. Ko ia ʼaē, neʼe tau lelei ai tanatou fakaʼaoga ʼaē ʼi te taʼu 1931 te higoa ʼaē ko te kau Fakamoʼoni ʼa Sehova! (Isaia 43:10-12). Kae tāfito talu mai te taʼu 1935 neʼe fakatahi ki te kau Fakamoʼoni fakanofo, te “toe hahaʼi tokolahi” ʼaē ʼe falala ʼe nātou maʼu te maʼuli heʼe gata ʼi te kele. Neʼe mole hala foki ia nātou te ʼāteaina ʼaē mai te ʼAtua. — Fakahā 7:9-17.
19, 20. a) Koteā te faʼahi maʼuhiga ʼaē ʼe fakaʼaoga lelei ki ai te ʼāteaina ʼo te hahaʼi ʼa Sehova? b) Koteā te tahi age meʼa maʼuhiga ʼe fakaʼaoga lelei e te kau Fakamoʼoni ʼa Sehova te ʼāteaina ʼaē neʼe foaki age e te ʼAtua kia nātou?
19 Ko te hahaʼi ʼa Sehova neʼe nātou fakaʼaogaʼi lelei tonatou ʼāteaina ʼaē mai te ʼAtua ki te ʼu faʼahi tāfito e lua maʼuhiga. Ko te ʼuluaki meʼa, ʼe nātou fakaʼaoga moʼo fai aipe te meʼa ʼaē ʼe totonu (1 Petelo 2:16). Pea ʼe ʼiloa lelei pe la nātou! Ohage la, ko te tagata neʼe hu ki te Fale ʼo te Puleʼaga ʼi Zurich, ʼi Suisi, pea neʼe fia liliu ko he Fakamoʼoni ʼa Sehova. ʼI te fehuʼi age ʼaē pe koteā tona tupuʼaga, neʼe ina fakahā ko tona tuagaʼane kua fakamavae ʼuhi ʼi tana agavale fakasino. Neʼe ina ʼui: ‘Ko te kautahi ʼaia ʼaē ʼe ʼau fia kau ki ai — heʼe mole ʼi ai he aga ʼe kovi ʼe fakagafua ʼi loto.’ Ko ia ʼaē ko te Nouvelle Encyclopédie catholique neʼe ina fakahā ko te kau Fakamoʼoni ʼa Sehova ʼe nātou tau mo te ʼiloa lelei heʼe “ko nātou tokotahi pe ʼe lelei tanatou aga ʼi te ʼu kūtuga ʼo te malamanei.
20 Neʼe toe fakaʼaoga e te kau Fakamoʼoni ʼa Sehova tonatou ʼāteaina mai te ʼAtua moʼo fai tanatou gāue ʼaē ko te faka mafola ʼo te logo lelei ʼo te Puleʼaga, ohage ko tona fai ʼaē e Sesu (Mateo 4:17). ʼAki tanatou fai faka mafola ʼi tanatou ʼu lea pea mo te fakaʼaoga ʼo te ʼu tohi, ʼe nātou kalagaʼi aipe te Puleʼaga ʼo te ʼAtua. ʼAki te ʼu meʼa ʼaia, ʼe nātou maʼu aipe te ʼu lelei lahi ʼo nātou fakamālohi aipe tanatou tui pea mo tanatou falala. Ko te ʼu gāue ʼaia ʼe hāofaki aipe nātou pea mo nātou ʼaē ʼe fakalogo age (1 Timoteo 4:16). ʼO ʼuhiga mo te gāue ʼaia, ko te tohi Mouvements religieux dynamiques ʼe ina ʼui: “ ʼE faigataʼa ānai he maʼu ʼo ni ʼu hahaʼi ʼo he tahi age ʼu kūtuga ʼe gāue lahi ohage ko te kau Fakamoʼoni.”
21. Koteā ʼaē kua ʼiloga ai ko Sehova ʼe ina tapuakina te minisitelio ʼo tona hahaʼi?
21 ʼE ko he tapuakina ʼaē ʼe foaki mai e te ʼāteaina mai ia Sehova! ʼE ʼiloga te meʼa ʼaia ʼi te tānaki ʼo te gāue ʼi te taʼu ʼaenī kua ʼosi atu — kua fakalaka ʼi te toko fā miliona hahaʼi faka mafola, pea neʼe fakalaka ʼi te toko hogofulu miliona te hahaʼi neʼe kau ki te ʼaho Fakamanatu ʼo te mate ʼo Sesu. ʼI Ilelani ʼi te lolotoga ʼo te ʼu māhina e 29 neʼe tau fakalaka tona hahaʼi faka mafola; ʼi Mekesike neʼe laka tona hahaʼi ʼi te toko 78 ia māhina e 80; pea ʼi Saponia neʼe laka tona hahaʼi ʼi te 153!
Tou fakaʼaoga lelei totatou ʼāteaina mai te ʼAtua
22. Koteā te maʼuhiga ʼo te ʼu fehuʼi ʼaē ʼe tonu ke tou fakakaukau takitokotahi ki ai?
22 ʼE tou fakaʼaoga lelei koa totatou ʼāteaina ʼaē neʼe foaki mai e te ʼAtua, mo kapau ko tatou ko he kau Fakamoʼoni kua foaki totatou maʼuli kia Sehova? ʼE tonu ke tou fakakaukau lelei takitokotahi pea mo fai te ʼu fehuʼi ʼaenī: ʼE ʼau tokaga fakalelei koa ʼo fakaʼaoga toku ʼāteaina ke ʼaua naʼa lave kovi ki he tahi ʼuhi ko he aga ʼe mole lelei? ʼE ʼau fakalogo fakalelei koa ki te ʼu lao ʼa Sesale, logo aipe haku tuku ki muʼa te lao ʼa te ʼAtua? ʼE ʼau gāue fakalelei koa mo te ʼu tagata ʼāfea ʼo te kokelekasio? ʼE ʼau fakaʼaoga fakalelei koa toku ʼāteaina mai te ʼAtua moʼo faka mafola te logo lelei? ʼE lahi tuʼumaʼu koa haku “ ʼu tuʼuga gāue ʼi te ʼAliki”? ʼE ʼau holi koa ki he gāue ʼi te mālama, logo pe te feala ʼo taku fakaʼaoga toku ʼāteaina ke fakalahi toku minisitelio, pea mo faka maʼuhiga age niʼihi ʼu maʼua ʼi te kokelekasio pe ʼe ʼi te gāue pione katoa? — 1 Kolonito 15:58.
23. Koteā ānai ka tou fai ke mole tou hala ʼi te ikuʼaga ʼo te ʼāteaina ʼo te ʼAtua?
23 ʼE feala ke tou “ ʼahiʼahi pea mo ʼiloʼi ko Sehova ʼe lelei”! (Pesalemo 34:8). Tou falala kia te ia, pea mo mulimuli ki tana ʼu lao, pea mo faka kolōlia tona huafa taputapu ʼaki he kalagaʼi fakamālohi ʼo tona Puleʼaga. Tou manatuʼi ko nātou ʼaē ʼe ‘to fakalahi ʼe nātou toe utu fakalahi ānai’. (2 Kolonito 9:6.) Ko ia, ke tou foaki kia Sehova he gāue ʼaki he loto katoa pea mo tou fakahā ʼe mole tou hala ʼi te ʼāteaina ʼo te ʼAtua.
ʼE feafeaʼi ānai ha koutou tali?
◻ Ko te faʼahiga ʼāteaina feafeaʼi ʼaē ʼe maʼu e te ʼAtua?
◻ Koteā te ʼu meʼa ʼaē ʼe faka tuʼakoi ʼaki te ʼāteaina ʼo te tagata?
◻ ʼE feafeaʼi koa te fealagia ʼo te maʼu ʼo te ʼāteaina moʼoni?
◻ Koteā koa te meʼa ʼaē ʼe tonu ke tou fai ke ʼaua naʼa tou hala ʼi te ikuʼaga ʼo te ʼāteaina ʼaē ʼe foaki mai e te ʼAtua?
[Paki ʼo te pasina 9]
Ko te ʼāteaina ʼo te tagata ʼe faka tuʼakoi ʼaki te ʼu faʼahiga meʼa ohage ko te lao ʼo te atulaulau.