Neʼe Nātou “Fai ʼo Mulimuli Pe Kiai”

“Koʼeni te faka ʼuhiga ʼo te ʼofa ʼaē ki te ʼAtua, ke tou maʼuliʼi tana ʼu fakatotonu.”—1 Soane 5:3.

1. Koteā te meʼa ʼe feala ke ʼui ʼo ʼuhiga mo te lahi ʼo te ʼofa ʼa te ʼAtua?

“KO TE ʼATUA ʼE ʼOFA.” Ko nātou fuli ʼaē ʼe nātou ʼiloʼi te ʼAtua pea mo fakalogo ki tana ʼu fakatotonu, ʼe nātou loto fakafetaʼi ʼaupito ki te ʼofa lahi ʼaia. “Ko te ʼofa ʼi te faʼahi ʼaia, neʼe mole ko tatou ʼaē neʼe ʼofa ki te ʼAtua, kae ko ia ʼaē neʼe ʼofa kia tatou pea mo ina fekauʼi mai tona ʼAlo, ko he sakilifisio faifakalelei ʼo ʼuhiga mo ʼatatou ʼu agahala.” Kapau ʼe tou haga tui ki te sakilifisio maʼuhiga ʼaia ʼa Sesu, pea ʼe tou ‘nofo ʼi te ʼofa ʼo te ʼAtua.’ (1 Soane 4:8-10, 16) Koia ʼi te temi nei, ʼe feala hatatou maʼu he ʼu tapuakina fakalaumālie ʼe lahi ʼaupito, pea ʼi te tuʼu ʼo te ʼu faʼahiga meʼa ʼaē ka haʼu, ʼe tou maʼu anai te maʼuli heʼegata.—Soane 17:3; 1 Soane 2:15, 17.

2. Koteā te ʼu fua lelei neʼe maʼu e te ʼu kaugana ʼa te ʼAtua ʼi tanatou mulimuli ki tana ʼu fakatotonu?

² ʼE lahi te ʼu fakamatala ʼe tou maʼu ʼi te Tohi-Tapu ʼo ʼuhiga mo te ʼu faʼifaʼitaki ʼo te hahaʼi ʼaē neʼe nātou mulimuli ki te ʼu fakatotonu ʼa te ʼAtua, pea neʼe lahi ʼaupito te ʼu fua lelei neʼe nātou maʼu. Ia nātou ʼaia, ʼe kau ai te kau fakamoʼoni ʼaē neʼe maʼuʼuli ʼi muʼa ʼo te ʼu temi faka Kilisitiano, ʼaē neʼe ʼui fēnei e Paulo ʼo ʼuhiga mo ʼihi ia nātou ʼaia: “Neʼe mamate ia nātou fuli ʼaia ʼi te tui, kae neʼe mole heʼeki nātou maʼu te fakahoko ʼo te fakapapau, kae neʼe nātou sio mamaʼo kiai pea neʼe nātou tali pea neʼe nātou tala fakahāhā ko nātou ko te kau matāpule pea ko te ʼu hahaʼi ʼe nonofo faka temi ʼi te fenua.” (Hepeleo 11:13) Ki muli age, ko te ʼu kaugana ʼaē kua foaki tonatou maʼuli ki te ʼAtua, neʼe nātou maʼu “te ʼofa makehe pea mo te moʼoni [ʼaē] neʼe hā ʼaki ia Sesu Kilisito.” (Soane 1:17) Lolotoga te ʼu taʼu e 6 000 ʼo te hisitolia ʼo te tagata, neʼe fakapale e Sehova te kau fakamoʼoni faitotonu, ʼaē neʼe fakalogo ki tana ʼu fakatotonu ʼaē “ ʼe mole mamafa.”—1 Soane 5:2, 3.

ʼI Te ʼu ʼAho ʼo Noe

3. Ko te faʼahi fea ʼaē neʼe fai e Noe “ ʼo mulimuli pe kiai?”

³ ʼE fakamatala fēnei e te Tohi-Tapu: “ ʼAki te tui, ko Noe ʼaē neʼe fakahā age ki ai e te ʼAtua te ʼu meʼa ʼaē neʼe mole heʼeki hā, neʼe ina fakahā tana manavasiʼi fakaʼatua ʼo ina faʼu te aleka moʼo hāofaki tona famili; pea ʼaki te tui neʼe ina tauteaʼi te malamanei, pea neʼe ina maʼu te tofiʼa ʼo te faitotonu ʼaē ʼe ʼalutahi mo te tui.” ʼI tona ʼuhiga “tagata faka mafola faitotonu,” neʼe fakalogo katoa ia Noe ki te ʼAtua, ʼo ina fakatokagaʼi te hahaʼi ʼi muʼa ʼo te hoko mai ʼo te Tulivio, ʼo ʼuhiga mo te fakamāu ʼa te ʼAtua ʼaē ka haʼu. (Hepeleo 11:7; 2 Petelo 2:5) ʼI tana faʼu te aleka, neʼe mulimuli fakalelei ia Noe ki te fakatuʼutuʼu ʼaē neʼe fakatotonu age e te ʼAtua ke ina fai. Pea neʼe ina fakahū ki te loto aleka te ʼu manu ʼaē neʼe hinoʼi age e te ʼAtua pea mo hanatou ʼu meʼa kai. “Neʼe fai e Noe ia meʼa fuli, ʼo mulimuli pe ki te ʼu meʼa ʼaē neʼe fakatotonu age e te ʼAtua. Pea neʼe ina fai ʼo mulimuli pe kiai.”—Senesi 6:22.

4, 5. (a) Neʼe mālohi feafeaʼi te agakovi ki te hahaʼi ʼo temi ʼaia? (b) He koʼe ʼe tonu ke tou “fai ʼo mulimuli pe kiai” ʼi tatatou fakalogo ki te ʼu fakatotonu fakaʼatua?

⁴ Neʼe tonu ke tauʼi e Noe pea mo tona famili te ʼu agakovi ʼa te kau ʼaselo talagataʼa. Neʼe kofuʼi e te ʼu foha ʼaia ʼo te ʼAtua te ʼu sinoʼi tagata pea neʼe nātou ʼohoana mo te ʼu fafine, ʼo tupu ai te ʼu foha faikehe ʼaē neʼe nātou gaohi koviʼi te hahaʼi. “Neʼe liliu te malamanei ʼo kovi ia mata ʼo te ʼAtua moʼoni pea neʼe fonu te kele ko te agamālohi.” Neʼe fakahoko e Sehova te Tulivio moʼo pulihi ʼo te taʼiake agakovi ʼaia. (Senesi 6:4, 11-17; 7:1) Talu mai te ʼu ʼaho ʼo Noe, neʼe mole kei fakagafua ki te kau temonio ke nātou kofuʼi he ʼu sinoʼi tagata. Kae, ‘ko te malamanei katoa ʼe kei takoto ia ʼi te mālohi ʼo te agakovi,’ ia Satana te Tevolo. (1 Soane 5:19; Fakahā 12:9) ʼI tana lea faka polofeta, neʼe fakatatau e Sesu te taʼiake talagataʼa ʼo te ʼu ʼaho ʼo Noe, ki te taʼiake ʼaē neʼe nātou līaki ia ia talu te hā ʼo te fakaʼiloga ʼo tana “ ʼi henī” ʼi te taʼu 1914.—Mateo 24:3, 34, 37-39; Luka 17:26, 27.

⁵ Ia ʼaho nei, ohage pe ko te ʼu ʼaho ʼo Noe, ʼe faigaʼi e Satana ke ina pulihi te malamanei pea mo totatou kele. (Fakahā 11:15-18) Koia ʼe maʼuhiga ke tou tokakaga ki te fakatotonu ʼaē ʼe haʼu mai te ʼAtua: “Koutou kofuʼi te teu tau katoa ʼo te ʼAtua, ke feala ai hakotou mālohi moʼo fakafeagai ki te ʼu kākā ʼa te Tevolo.” (Efesi 6:11, nota ʼi te lalo pasina, tā fakapilitānia) ʼI te faʼahi ʼaia, ʼe tou lotomālohi ʼi tatatou ako te Folafola ʼa te ʼAtua, pea mo tatatou maʼuliʼi ia te Folafola ʼaia. Tahi ʼaē meʼa, ʼe tokaga lelei te kautahi ʼa Sehova kia tatou, mo te “tagata kaugana agatonu mo poto” ʼaē neʼe fakanofo, pea mo te kau tagata ʼāfea loto manavaʼofa, ʼaē ʼe nātou takitaki lelei tatou ʼi te ala ʼaē ʼe tonu ke tou ʼolo ai. ʼE ʼi ai tatatou gāue faka mafola ʼe tonu ke tou fakahoko ʼi te malamanei katoa. (Mateo 24:14, 45-47) Ohage ko Noe, ʼaē neʼe fakalogo fakalelei ki te ʼu fakatotonu fakaʼatua, ʼe tou faiga tuʼumaʼu ke tou “fai ʼo mulimuli pe kiai.”

Ko Moisese—Ko Te Tagata ʼAē ʼe Agavaivai ʼi Te Tagata Fuli Pe

6, 7. (a) Koteā te meʼa ʼaē neʼe fili e Moisese? (b) Koteā te faʼifaʼitaki lototoʼa ʼaē neʼe tuku mai e Moisese kia tatou?

⁶ Tou vakaʼi te tahi tagata tui—ko Moisese. Neʼe feala pe hana maʼu te fīmālie ʼi te ʼu koloā ʼo Esipito. Kae neʼe ina fili “ke gaohi koviʼi ia ia mo te hahaʼi ʼa te ʼAtua, ʼi tana maʼu te ʼu fakafiafia faka temi ʼo te agahala.” ʼI tona ʼuhiga kaugana ʼa Sehova, “neʼe sio fakamaʼu ia ki te totogi ʼo te fakapale [pea] neʼe nofo mālohi ia ohage neʼe sio kia Ia ʼaē ʼe fakapulipuli.”—Hepeleo 11:23-28.

⁷ ʼE tou lau fēnei ia Faka au 12:3: “Ko te tagata ko Moisese neʼe agavaivai ia ʼo lahi ake ʼi te tagata fuli pe ʼaē neʼe nonofo ʼi te fuga kele.” Neʼe mole tatau ia mo te Falaone ʼo Esipito, ʼaē neʼe fiatuʼu ʼi te tagata fuli pe. ʼI te fakatotonu age e Sehova kia Moisese pea mo Alone ke nā fakahā tana fakamāu kia Falaone, neʼe feafeaʼi koa tanā tali ki te faʼahi ʼaia? ʼE tou lau fēnei: “Ko Moisese pea mo Alone neʼe nā fai ohage pe ko te fakatotonu age e Sehova kia nāua. Neʼe nā fai ʼo mulimuli pe kiai.” (Ekesote 7:4-7) ʼE ko he faʼifaʼitaki fakaloto mālohi kia tatou ʼaē ʼe tou fakahā te ʼu fakamāu ʼa te ʼAtua ia ʼaho nei!

8. Koteā te ʼu meʼa neʼe fakatotonu ki te kau Iselaelite ke nātou “fai ʼo mulimuli pe kiai,” pea ʼe feafeaʼi anai te tatau ʼo te fiafia ʼaē neʼe nātou maʼu pea mo te fiafia ʼi te temi ka haʼu?

⁸ Neʼe lagolago lelei koa te kau Iselaelite kia Moisese? ʼI te hili ʼo te fakamamahiʼi e Sehova ia Esipito ʼaki te ʼu tautea e hogofulu, neʼe ina foaki age kia Iselaele te ʼu fakatotonu ʼo ʼuhiga mo te faʼahiga fai ʼo te Pāsikate. “Pea neʼe tulolo te hahaʼi pea mo nātou tuʼutuli. Ki muli age neʼe ʼolo te ʼu foha ʼo Iselaele pea neʼe nātou fai ʼo mulimuli pe ki te meʼa ʼaē neʼe fakatotonu age e Sehova kia Moisese pea mo Alone. Neʼe nātou fai ʼo mulimuli pe kiai.” (Ekesote 12:27, 28) ʼI te māʼupō ʼo te ʼaho maʼuhiga ʼaia, ʼi te ʼaho 14 ʼo Nisani 1513 ʼi muʼa ʼo totatou temi, neʼe tāmateʼi e te ʼaselo ʼa te ʼAtua te ʼu ʼuluaki tupu ʼo Esipito, kae fakalaka ia ʼi te ʼu ʼapi ʼo te kau Iselaelite. He koʼe neʼe hāo te ʼu ʼuluaki tupu ʼo Iselaele? Koteʼuhi neʼe hāofaki nātou e te toto ʼo te akeno ʼo te Pāsikate, ʼaē neʼe vali ʼi tonatou ʼu kaumatapā. Neʼe nātou mulimuli ki te meʼa ʼaē neʼe fakatotonu age e Sehova kia Moisese pea mo Alone. ʼIo, neʼe nātou “fai ʼo mulimuli pe kiai.” (Ekesote 12:50, 51) ʼI te Tai Kula, neʼe fakahoko e Sehova te tahi milakulo ʼi tana hāofaki tana hahaʼi fakalogo, kae neʼe ina fakaʼauha ia Falaone pea mo tana kautau mālohi. Neʼe fakafiafia te kau Iselaelite! Ohage pe ko te temi nei, tokolahi ia nātou ʼaē neʼe mulimuli ki te ʼu fakatotonu ʼa Sehova, ʼe nātou fiafia anai mokā ʼe nātou sio ki te ʼaho lagavaka ʼo Sehova ʼi Halamaketone.—Ekesote 15:1, 2; Fakahā 15:3, 4.

9. Koteā te ʼu pilivilesio ia ʼaho nei neʼe fakatātā e te ʼu meʼa ʼaē neʼe “fai ʼo mulimuli pe kiai” e te kau Iselaelite ʼo ʼuhiga mo te Tapenakulo?

⁹ ʼI te fakatotonu e Sehova kia Iselaele ke ina fai he ʼu meʼa ʼofa pea ke ina laga he tapenakulo ʼi te toafa, neʼe foaki fakaʼofa e te hahaʼi te ʼu meʼa moʼo lagolago ki te faʼahi ʼaia. Pea, neʼe mulimuli ia Moisese pea mo tana kau gāue lotolelei ki te ʼu kiʼi meʼa veliveli ʼo ʼuhiga mo te faʼahiga faʼu ʼo te tapenakulo ʼaē neʼe fakatotonu age e Sehova. “Pea neʼe ʼosi fuli te gāue ʼo ʼuhiga mo te tapenakulo ʼo te fale fehikitaki ʼo te fono, he neʼe mulimuli te ʼu foha ʼo Iselaele ki te ʼu meʼa fuli ʼaē neʼe fakatotonu age e Sehova kia Moisese. Neʼe nātou fai ʼo mulimuli pe kiai.” ʼO toe feiā pe, ʼi te fakanofo ʼo te kau pelepitelo, “neʼe mulimuli ia Moisese ki te ʼu meʼa fuli ʼaē neʼe fakatotonuʼi age e Sehova. Pea neʼe ina fai ʼo mulimuli pe kiai.” (Ekesote 39:32; 40:16) ʼI totatou temi, ʼe tou maʼu te fealagia ʼaē ko te lagolago mo totatou loto katoa ki te gāue fai faka mafola, pea mo te ʼu polokalama ʼo ʼuhiga mo te faka mafola ʼo te Puleʼaga. Koia ʼe tou maʼu te pilivilesio ʼaē ko te logo tahi ʼo tou fai tatatou gāue “ ʼo mulimuli pe kiai.”

Ko Sosue—Ko Te Tagata Lototoʼa Pea Mo Mālohi ʼAupito

10, 11. (a) Koteā te meʼa neʼe maʼu e Sosue ʼo fua manuʼia ai tona maʼuli? (b) Koteā te meʼa ʼe ina fakaloto mālohiʼi tatou ke tou tauʼi totatou ʼu fihifihia ia ʼaho nei?

¹⁰ ʼI te fakatotonu age e Moisese kia Sosue ke ina taki ia Iselaele ki te fenua ʼo te fakapapau, ʼe mahino ia ko te Folafola ʼa te ʼAtua ʼaē neʼe maʼu ʼi te temi ʼaia, neʼe ko te ʼu tohi e nima ʼa Moisese, te pesalemo e tahi peʼe lua, pea mo te tohi ʼo Sopo. Neʼe akoʼi e Moisese ia Sosue ke ina fakatahitahi te hahaʼi mokā nātou hū anai ki te Kele ʼo te Fakapapau, pea ke ina “lau te lao ʼaia ia muʼa ʼo te kau Iselaele, ke logo kiai ʼonatou taliga.” (Teutalonome 31:10-12) Tahi ʼaē meʼa, neʼe fakatotonu fēnei age e Sehova kia Sosue: “Ko te tohi ʼo te lao ʼe mole tonu anai ke mamaʼo mai tou gutu, pea ʼe tonu anai ke ke lau leʼo veliveli ʼi te ʼaho mo te po, koteʼuhi ke ke tokaga ʼo fai ia meʼa fuli ʼaē ʼe tohi ai. Heʼe ke fakatupu manuʼia anai ki tou ala pea ʼe ke aga fakapotopoto anai.”—Sosue 1:8.

¹¹ Neʼe lau e Sosue te “tohi” ʼa Sehova ʼi te ʼaho fuli, koia neʼe feala ai tana fakatokatoka te ʼu fihifihia, ʼo feiā aipe ia ʼaho nei ko te lau ʼo te Folafola ʼa Sehova ʼi te ʼaho fuli, te Tohi-Tapu, ʼe ina fakamālohiʼi Tana kau Fakamoʼoni, ke nātou tauʼi te ʼu fihifihia ʼo te ʼu “ ʼaho fakamuli” maʼuhiga ʼaenī. (2 Timoteo 3:1) ʼE tou maʼuʼuli ʼi te mālama agamālohi, koia ʼe toe ʼaoga foki ke tou mulimuli ʼaki totatou loto katoa ki te fakatotonu ʼaē neʼe fai e te ʼAtua kia Sosue: “Ke ke lototoʼa pea mo mālohi. Ke ʼaua naʼa hoha tou loto peʼe ke mataku, koteʼuhi ko Sehova tou ʼAtua ʼe nofo mo koe ʼi te faʼahi fuli pe ʼaē ʼe ke ʼalu kiai.” (Sosue 1:9) ʼI tanatou ʼosi maʼu ia Kanaane, neʼe lahi te fakapale ʼo te ʼu telepi ʼo Iselaele he kua nātou maʼu tonatou tofiʼa. “Ohage pe ko te fakatotonu ʼa Sehova kia Moisese, neʼe mulimuli kiai te ʼu foha ʼo Iselaele.” (Sosue 14:5) Ko te fakapale feiā ʼe fakatalitali kia tatou fuli ia ʼaho nei, mokā ʼe tou lau te Folafola ʼa te ʼAtua pea mo tou maʼuliʼi, koteʼuhi ʼe tou fakalogo “ ʼo mulimuli pe kiai.”

Te ʼu Hau—Agatonu Pea Mo Talagataʼa

12. (a) Koteā te fakatotonu ʼaē neʼe foaki ki te ʼu hau ʼo Iselaele? (b) Koteā te meʼa ʼaē neʼe hoko ʼi te mole fakalogo ʼa te ʼu hau ki te fakatotonu ʼaia?

¹² Koteā te ʼu meʼa ʼaē neʼe tonu ke fai e te ʼu hau ʼo Iselaele? Neʼe fakamaʼua e Sehova ki te hau ke fakalogo ki te fakatotonu ʼaenī: “Ka heka anai ki tona hekaʼaga faka hau ʼo tona puleʼaga, ʼe tonu anai ke ina hiki maʼana ki he tohi te lao ʼaia, ʼaē ʼe taupau e te ʼu pelepitelo, te kau Levite. Pea ʼe tonu anai ke nofo mo ia, pea ʼe tonu anai ke ina lau te ʼu meʼa ʼaia ʼi te ʼaho fuli ʼo tona maʼuli, ke ina ako te manavasiʼi ʼaē kia Sehova tona ʼAtua, ke feala hana taupau te ʼu folafola fuli ʼo te lao ʼaia, pea mo te ʼu lekula ʼaia, ʼo ina maʼuliʼi.” (Teutalonome 17:18, 19) Neʼe fakalogo koa te ʼu hau ʼo Iselaele ki te fakatotonu ʼaia? Ko te tokolahi ʼo te ʼu hau ʼaia, neʼe mole nātou mulimuli kiai, pea neʼe hoko kia nātou te ʼu malaʼia ʼaē neʼe fakakikite ia Teutalonome 28:15-68. Moʼo fakaʼosi, neʼe mavetevete ia Iselaele “ ʼi te tahi potu ʼo te kele ʼo aʼu ki te tahi potu ʼo te kele.”

13. Ohage ko Tavite, e feafeaʼi hatatou maʼu he fua lelei, ʼi tatatou fakahā tatatou manako ki te Folafola ʼa Sehova?

¹³ Kae, ko Tavite—te ʼuluaki hau agatonu ʼi Iselaele—neʼe ina fakahā tana pipiki makehe ʼaē kia Sehova. Neʼe ina fakamoʼoni ko ia ko ‘he laione mui ʼo Suta’ ʼaē neʼe ina fakatātā ia Sesu Kilisito, ‘te laione ʼo te telepi ʼo Suta, te aka ʼo Tavite.’ (Senesi 49:8, 9; Fakahā 5:5) Neʼe fakatafito kiteā te mālohi ʼo Tavite? Neʼe ina maʼu te loto fakafetaʼi ʼo ʼuhiga mo te Folafola ʼaē neʼe tohi e Sehova pea neʼe ina maʼuliʼi. Ia Pesalemo 19, ko “te hiva ʼa Tavite,” ʼe tou lau fēnei: “Ko te lao ʼa Sehova ʼe haohaoa.” ʼI tana ʼosi talanoa ki te ʼu fakamanatu, te ʼu fakatotonu, te lao, pea mo te ʼu faifakamāu ʼa Sehova, ʼe ʼui fēnei e Tavite: “ ʼE nātou maʼuhiga age ʼi te aulo, ʼio, ʼi te aulo ʼe lahi ʼaupito kua ʼosi fakamaʼa. Pea ʼe malie age ia ʼi te meli, pea mo te meli ʼaē ʼe hali mai te ʼu tauga meli. Pea tahi, neʼe kua nātou fakatokaga tau kaugana totonu; pea ʼe ʼi ai te fakapale lahi ʼi tonatou taupau.” (Pesalemo 19:7-11) Kapau ko te lau ʼo te Folafola ʼa Sehova pea mo tona metitasioʼi, neʼe ko he meʼa lelei ia taʼu e 3 000 ki muʼa atu, ʼe mahino ʼe toe lahi age tona lelei ia ʼaho nei!—Pesalemo 1:1-3; 13:6; 119:72, 97, 111.

14. Koteā te meʼa neʼe hoko ki te maʼuli ʼo Salomone, ʼaē ʼe hā ʼaki ai ʼe mole feʼauga pe ʼi te maʼu ʼo te ʼatamai mālama?

¹⁴ Kae, ʼe mole feʼauga pe ʼi te maʼu ʼo te ʼatamai mālama. ʼE toe ʼaoga foki ki te ʼu kaugana ʼa te ʼAtua ke nātou maʼuliʼi te ʼatamai mālama ʼaia, ke nātou maʼuliʼi ʼo mulimuli ki te finegalo ʼo te ʼAtua—ʼio, ke nātou “fai ʼo mulimuli pe kiai.” Ko te faʼahi ʼaia ʼe hā lelei ʼi te faʼifaʼitaki ʼo Salomone, te foha ʼo Tavite, ʼaē neʼe fili e Sehova “ke heka ki te hekaʼaga faka hau ʼo Sehova ʼi Iselaele.” Neʼe fakatotonu kia Salomone ke ina laga te fale lotu, ʼo ina fakaʼaogaʼi te ʼu fakatuʼutuʼu ʼaē neʼe “tuku age e Sehova,” ʼo ʼuhiga mo te faʼahiga faʼu ʼo te fale ʼaia. (1 Fakamatala 28:5, 11-13) Neʼe lava feafeaʼi te fakahoko e Salomone te toe gāue ʼaia? Neʼe tali e Sehova te kole ʼa Salomone, ʼo ina tuku age kia ia te poto pea mo te ʼatamai mālama. ʼAki te ʼu meʼa ʼaia, pea mo tana mulimuli ki te ʼu fakatuʼutuʼu ʼaē neʼe tuku age e te ʼAtua, neʼe feala ke laga e Salomone te fale taulekaleka ʼaia, ʼaē neʼe fonu ʼaki te kolōlia ʼa Sehova. (2 Fakamatala 7:2, 3) Kae, ki muli age, neʼe meʼa noaʼi e Salomone tona maʼua. ʼI te faʼahi fea? Ko te lao ʼa Sehova neʼe ina fakatuʼutuʼu fēnei ʼo ʼuhiga mo te hau ʼo Iselaele: “ ʼE mole tonu anai ke lahi fau tona ʼu ʼohoana, ke ʼaua naʼa hēʼia tona loto.” (Teutalonome 17:17) Kae ko Salomone “neʼe ko tona ʼu ʼohoana e fitugeau, te ʼu fineʼaliki, pea mo te ʼu fafine e tolugeau neʼe nonofo feiā mo ia; pea ko tona ʼu ʼohoana neʼe nātou uga māmālie . . . tona loto ke mulimuli ʼi ʼihi ʼu ʼatua.” ʼI tona ʼu ʼaho fakaʼosi, neʼe hēʼia ia Salomone ʼo mole kei ina “fai ʼo mulimuli pe kiai.”—1 Hau 11:3, 4; Nehemia 13:26.

15. Koteā te meʼa neʼe fai e Sosiasi “ ʼo mulimuli pe kiai”?

¹⁵ Neʼe mole lahi te ʼu hau talagafua ʼi Suta, pea ko te hau fakamuli ʼi te ʼu hau ʼaia, ko Sosiasi. ʼI te taʼu 648 ʼi muʼa ʼo totatou temi, neʼe ina kamata fakamaʼa ʼi te fenua ia te tauhi tamapua, pea neʼe ina toe gaohi te ʼu meʼa ʼaē neʼe kua maumau ʼi te fale lotu ʼo Sehova. ʼI te faʼahi ʼaia neʼe maʼu ai e te pelepitelo lahi “te tohi ʼo te lao ʼa Sehova ʼaē neʼe foaki kia Moisese.” Koteā te meʼa neʼe fai e Sosiasi ʼo ʼuhiga mo te faʼahi ʼaia? “Neʼe hake te hau ki te fale ʼo Sehova mo te ʼu tagata fuli ʼo Suta pea mo te hahaʼi ʼo Selusalemi pea mo te ʼu pelepitelo pea mo te kau Levite pea mo te hahaʼi fuli, te hahaʼi lalahi pea mo nātou liliki; pea neʼe ina kamata lau ki ʼonatou ʼu taliga te ʼu folafola fuli ʼo te tohi ʼo te fuakava, ʼaē neʼe maʼu ʼi te fale ʼo Sehova. Pea ko te hau neʼe tuʼu ʼi tona tuʼulaga pea neʼe ina fakahoko te fuakava ia muʼa ʼo Sehova, ke feala hana mulimuli ia Sehova pea mo ina taupau tana ʼu fakatotonu pea mo tana ʼu fakamoʼoni, pea mo tana ʼu fakatuʼutuʼu ʼaki tona loto katoa pea mo tona nefesi katoa, ke ina maʼuliʼi te ʼu folafola ʼo te fuakava ʼaē neʼe tuʼu ʼi te tohi ʼaia.” (2 Fakamatala 34:14, 30, 31) ʼIo, ko Sosiasi neʼe ina “fai ʼo mulimuli pe kiai.” ʼUhi ko tana nofo agatonu, neʼe mole fakahoko e Sehova tana fakamāu ki te hahaʼi heʼe agatonu ʼo Suta ʼo aʼu ki te ʼu ʼaho ʼo tona ʼu foha talagataʼa.

Tou Maʼuliʼi Te Folafola ʼa Te ʼAtua

16, 17. (a) Ko te ʼu faʼahi fea ʼaē ʼe tonu ke tou mulimuli ai ki te ʼu tafuga vaʼe ʼo Sesu? (b) Ko ai ʼihi ʼu kaugana agatonu ʼa te ʼAtua ʼe ko he ʼu faʼifaʼitaki lelei kia tatou?

¹⁶ ʼI te ʼu tagata fuli ʼaē kua maʼuli ʼi te malamanei, ko te faʼifaʼitaki lelei ʼaupito ʼo ʼuhiga mo te metitasioʼi ʼo te Folafola ʼa te ʼAtua pea mo tona maʼuliʼi, ko te faʼifaʼitaki ʼo te ʼAliki ko Sesu Kilisito. Ko te Folafola ʼa te ʼAtua neʼe ko hana meʼa kai. (Soane 4:34) Neʼe ina ʼui fēnei kia nātou ʼaē neʼe fagono age kia te ia: “Ko te ʼAlo ʼe mole feala hana fai he meʼa ʼi tona loto faʼitaliha, kae ʼe ina fai pe te meʼa ʼaē neʼe ina sio ʼe fai e te Tāmai. He ko meʼa fuli ʼaē ʼe ina fai, ʼe toe fai feiā pe e te ʼAlo.” (Soane 5:19, 30; 7:28; 8:28, 42) Ko Sesu neʼe ina “fai ʼo mulimuli pe kiai,” ʼo ina ʼui fēnei: “Neʼe ʼau hifo mai te lagi, mole ko he fai ʼo toku finegalo, kae ko te finegalo ʼo ia ʼaē neʼe ina fekauʼi mai ʼau.” (Soane 6:38) Ko tatou ʼaenī ko te kau Fakamoʼoni ʼa Sehova, ʼe tonu ke tou “fai ʼo mulimuli pe kiai” ʼaki tatatou mulimuli ki te ʼu tafuga vaʼe ʼo Sesu.—Luka 9:23; 14:27; 1 Petelo 2:21.

¹⁷ Ko te fai ʼo te finegalo ʼo te ʼAtua neʼe ko he meʼa neʼe fakamuʼamuʼa tuʼumaʼu e Sesu ʼi tana fakakaukau. Neʼe ina ʼiloʼi lelei te Folafola ʼa te ʼAtua, pea neʼe feala ke ina fai he ʼu tali faka Tohi-Tapu. (Mateo 4:1-11; 12:24-31) Kapau ʼe tou tokagaʼi tuʼumaʼu te Folafola ʼa te ʼAtua, ʼe feala foki ke tou liliu ʼo “poto lelei, ʼo maʼu ia meʼa fuli ʼaē ʼe ʼaoga ki te gāue lelei fuli pe.” (2 Timoteo 3:16, 17) Tou mulimuli ki te faʼifaʼitaki agatonu ʼa te ʼu kaugana ʼa Sehova ʼi te ʼu temi ʼāfea pea mo te ʼu temi ki muli mai, pea ke tou mulimuli ki totatou Pule, ko Sesu Kilisito ʼi te ʼu meʼa fuli, ʼaē neʼe ina ʼui fēnei: “Kae, ke ʼiloʼi e te malamanei ʼe ʼau ʼofa ki te Tāmai, ʼio, ohage ko te meʼa ʼaē neʼe fakatotonu mai e te Tāmai ke ʼau fai, koia ʼe ʼau fai ʼo feiā.” (Soane 14:31) ʼOfa pe ke tou fakahā totatou ʼofa ki te ʼAtua ʼo tou haga “fai ʼo mulimuli pe kiai.”—Maleko 12:29-31.

18. Koteā ʼaē ʼe tonu ke ina uga tatou ke tou “liliu ko he ʼu hahaʼi ʼe nātou maʼuliʼi te folafola,” pea koteā anai te meʼa ka tou palalau kiai ʼi te alatike ʼaē ka hoa mai?

¹⁸ Ka tou metitasio ki te fakalogo ʼa te ʼu kaugana ʼa te ʼAtua ʼi te ʼu temi faka Tohi-Tapu, ʼe mole koa la fakaloto mālohiʼi ai tatou ke tou fakahoko fakalelei tatatou gāue, ʼi te ʼu ʼaho fakamuli ʼo te tuʼu agakovi ʼa Satana? (Loma 15:4-6) ʼE tonu ke uga ai tatou ke tou “liliu ko he ʼu hahaʼi ʼe nātou maʼuliʼi te folafola” ʼi tona ʼuhiga katoa, ohage ko te meʼa ʼaē ka tou talanoa anai kiai ʼi te alatike ʼaē ka hoa mai.—Sake 1:22.

Kei Koutou Manatuʼi Koa?

◻ ʼE tonu ke tou faka ʼuhiga feafeaʼi kia tatou ia “te ʼofa ʼo te ʼAtua”?

◻ Koteā te ako ʼe tou maʼu mai te ʼu faʼifaʼitaki ʼo Noe, mo Moisese, pea mo Sosue?

◻ Koteā te ʼu meʼa ʼaē neʼe tonu ke fai e te ʼu hau ʼo Iselaele ke nātou mulimuli ki te “folafola” ʼa te ʼAtua?

◻ Ko te ʼu faʼahi fea ʼaē neʼe fai e Sesu totatou Faʼifaʼitakiʼaga “ ʼo mulimuli pe kiai”?

[Paki ʼo te pasina 15]

Ko Noe, mo Moisese, pea mo Sosue neʼe nātou “fai ʼo mulimuli pe kiai”