Te Hāofaki Tona Faka ʼUhiga Moʼoni

‘KUA hāofaki koa koutou?’ ʼI ʼihi temi, ko nātou ʼaē ʼe nātou fai te fehuʼi ʼaia, ʼe nātou manatu kua hāofaki nātou koteʼuhi kua nātou ‘tali ia Sesu ko tonatou Fakamaʼuli.’ Kae ʼe manatu ʼihi ʼe lahi te ʼu ala ʼe taki ki te hāofaki pea ʼe nātou ʼui kapau ‘ ʼe koutou tali ia Sesu ʼi tokotou loto,’ pea ʼe mole meʼa ia mo kapau ʼe mole tatau te ʼu meʼa ʼaē ʼe koutou tui kiai pea mo te lotu ʼaē ʼe koutou kau ai.

ʼE ʼui e te Tohi-Tapu ʼe ko te finegalo ʼo te ʼAtua ke ‘hāofaki te tagata fuape.’ (1 Timoteo 2:​3, 4) ʼE hāofaki anai ia nātou fuli ʼaē ka nātou tali tona finegalo. Kae koteā koa te faka ʼuhiga moʼoni ʼo te kua hāofaki ʼo he tahi? ʼE koutou maʼu moʼoni koa te hāofaki, tatau aipe peʼe lahi peʼe kailoa takotou faiga kiai?

Ko te kupu “hāofaki” ʼe faka ʼuhiga ki he “fakahāo mai he tuʼutāmaki peʼe mai he fakaʼauha.” Koia ko te hāofaki moʼoni ʼe faka ʼuhiga ia ki he meʼa ʼe lahi age ʼi te maʼu ʼo he ʼatamai tokalelei. ʼE faka ʼuhiga ki te hāofaki ʼi te fakaʼauha ʼo te tuʼu ʼo te ʼu faʼahiga meʼa ʼaenī, pea mo te hāofaki mai te mate! Kae ko ai koa ʼaē ka hāofaki anai e te ʼAtua? Moʼo tali kiai, tou vakavakaʼi te meʼa ʼaē neʼe akoʼi mai e Sesu Kilisito ʼo ʼuhiga mo te faʼahi ʼaia. ʼE lagi koutou punamaʼuli anai ʼi te ʼu kumi ʼaē neʼe mātou fai.

Te Hāofaki​—ʼE Maʼu Koa ʼi Te ʼu Lotu Fuli?

ʼI te tahi lakaga, neʼe fai palalau ia Sesu mo te fafine Samalitana. Logope la neʼe mole ko he fafine Sutea, kae neʼe tui ia ʼe haʼu anai te Mesia “ia ia ʼaē ʼe higoa ko Kilisito.” (Soane 4:​25) Neʼe tonu koa ke gata ʼaki pe tana tui ki te faʼahi ʼaia ke feala hona hāofaki? Kailoa, koteʼuhi neʼe ʼui fakahagatonu age e Sesu ki te fafine ʼaia: “ ʼE koutou atolasio kia ia ʼaē ʼe mole koutou ʼiloʼi.” Neʼe ʼiloʼi e Sesu, kapau neʼe fia maʼu e te fafine ʼaia te hāofaki, pea neʼe tonu ke ina fetogi tana faʼahiga tauhi. Koia neʼe fakamahino fēnei age e Sesu: “Kae ʼe hoko mai te hola, kua kaku mai ia, ʼe atolasio anai ki te Tāmai te kau atolasio moʼoni, ʼi te moʼoni mo te laumālie, he ko nātou ʼaia ʼe kumi e te Tāmai, te kau atolasio moʼoni kia te ia.”​—Soane 4:​22, 23.

ʼI te tahi lakaga, neʼe fakahā e Sesu tana manatu ʼo ʼuhiga mo te hāofaki ki te kau Faliseo, ko te magaʼi lotu maʼuhiga ʼo te Lotu Faka Sutea. Neʼe fakatuʼu e te kau Faliseo te faʼahiga tauhi pea neʼe nātou tui ʼe tali e te ʼAtua. Kae koutou fagono ki te ʼu palalau ʼaē neʼe fai e Sesu ki te kau Faliseo: “Koutou kau malualoi! Neʼe moʼoni te tohi ʼa Isaia ʼi tana fakakikite fēnei ʼo ʼuhiga mo koutou: ‘Ko te hahaʼi ʼaenī ʼe nātou fakaʼapaʼapa mai ʼaki tonatou ʼu laugutu, kae ko tonatou loto ʼe mamaʼo ia ia te ʼau. ʼE vaʼiganoa tanatou tauhi; ko tanatou ʼu akonaki ʼe ko te ʼu lekula ʼe akoʼi e te tagata.’ ”​—Mateo 15:​7-9, New International Version.

E feafeaʼi ki te ʼu tuʼuga lotu ʼaē ʼe nātou lau ia ʼaho nei, ʼe nātou tui kia Kilisito? ʼE tali anai koa e Sesu te ʼu lotu fuli, ʼo ina ʼui ʼe nātou mulimuli ki te ʼu faʼahi kehekehe ke nātou maʼu te hāofaki? ʼE mole tonu ke tou lākilua ʼo ʼuhiga mo te faʼahi ʼaia, he neʼe ʼui fakahagatonu e Sesu: “ ʼE mole ko nātou fuape ʼaē ʼe lea mai kia te ʼau: ‘ ʼAliki, ʼAliki!’ ʼe hū anai ki te puleʼaga ʼo selo, kae ko ia ʼaē ʼe ina fai te finegalo ʼo taku Tāmai ʼe ʼi selo. ʼE lea mai anai kia te ʼau te tokolahi ʼi te ʼaho ʼaia: ‘ ʼAliki, ʼAliki, pe neʼe mole mātou lea faka polofeta ʼi tou huafa; ʼi tou huafa, neʼe mātou kapu temonio, pea ʼi tou huafa, neʼe mātou fai te ʼu gāue mālohi?’ Pea ʼe ʼau fakahā anai kia nātou: Neʼe mole ʼau ʼiloʼi koutou ʼi he temi, koutou fakamamaʼo mai ia te ʼau, kau gāue ʼo te kovi.”​—Mateo 7:​21-​23.

ʼE Maʼuhiga Te ʼAtamai Mālama Totonu ʼo ʼUhiga Mo Sesu Moʼo Maʼu Te Hāofaki

ʼE maʼuhiga ʼaupito te ʼu palalau ʼaia ʼa Sesu. ʼE nātou fakahā mai ʼe tokolahi te hahaʼi fakamalotoloto ʼe mole nātou ‘fai te finegalo ʼo te Tāmai.’ Koia, ʼe lava feafeaʼi ki he tahi ke ina maʼu te hāofaki moʼoni? ʼE tali fēnei ia 1 Timoteo 2:⁠3, 4: “ ʼE ko te finegalo [ʼa te ʼAtua] ke hāofaki te hahaʼi fuape pea ke nātou maʼu he ʼatamai mālama totonu ʼo te moʼoni.”​—Vakaʼi ia Kolose 1:​9, 10.

ʼE maʼuhiga te ʼatamai mālama ʼaia mo kapau ʼe tou fia maʼu te hāofaki. ʼI te temi ʼaē neʼe kole fēnei e te tagata leʼo pilisoni ki te ʼapositolo ko Paulo pea mo tona kaugā gāue ko Silasi: “Koteā te meʼa ʼe tonu ke ʼau fai pea ke hāofaki ʼau?” neʼe nā tali fēnei age: ‘Ke ke tui ki te ʼAliki ko Sesu, pea ʼe ke hāo anai mo tou kaugā ʼapi katoa.’ (Gāue 16:30, 31) Ko tona faka ʼuhiga koa, neʼe tonu ke logoʼi e te tagata leʼo pilisoni pea mo tona famili he faʼahiga meʼa ʼi tonatou loto? Kailoa ia, koteʼuhi neʼe mole feala ke nātou ‘tui moʼoni ki te ʼAliki ko Sesu’ mo kapau neʼe mole nātou maʼu he faʼahiga mahino pe neʼe ko ai ia Sesu, mo te meʼa ʼaē neʼe ina fai, pea mo te meʼa ʼaē neʼe ina akoʼi.

Ohage la, neʼe akoʼi e Sesu te fakatuʼu ʼo te puleʼaga ʼi selo​—“te puleʼaga ʼo te ʼAtua.” (Luka 4:​43) Neʼe ina toe fakatuʼutuʼu foki mo te ʼu pelesepeto ʼo ʼuhiga mo te aga faka Kilisitiano ʼaē ʼe tonu ke fai. (Mateo, te kapite 5 ki te 7) Neʼe ina fakahā lelei te meʼa ʼaē ʼe tonu ke fai e tana ʼu tisipulo ʼo ʼuhiga mo te ʼu faʼahi faka politike. (Soane 15:19) Neʼe ina fakatuʼu he polokalama ako ke fai ʼi te malamanei katoa, pea mo ina fakatotonu ki tana ʼu tisipulo ke nātou kau kiai. (Mateo 24:14; Gāue 1:8) Ei, ko te ‘tui kia Sesu’ ʼe ko tona faka ʼuhiga ke tou mahino ki he ʼu meʼa kehekehe! ʼE mahino papau ai, ko Paulo pea mo Silasi neʼe nā ‘tala te folafola ʼa Sehova ki te [tagata leʼo pilisoni] mo nātou fuape ʼo tona loto fale’ ʼi muʼa ʼo tanā papitemaʼi te ʼu hahaʼi tui foʼou ʼaia.​—Gāue 16:​32, 33.

ʼE Toe Maʼuhiga Foki Te ʼAtamai Mālama Totonu ʼo ʼUhiga Mo Te ʼAtua

Ko te faʼahi maʼuhiga ki te tui moʼoni kia Sesu ʼe ko te atolasio ki te ʼAtua ʼaē neʼe atolasio kiai. Neʼe faikole fēnei ia Sesu: “Ko te maʼuli heʼegata ʼaenī, ke nātou ʼiloʼi koe, te ʼAtua e tahi mo moʼoni pea mo ia ʼaē neʼe ke fekauʼi mai, ia Sesu Kilisito.”​—Soane 17:⁠3.

Lolotoga tona minisitelio ʼi te kele, neʼe faka maʼuhigaʼi tuʼumaʼu e te ʼAlo ʼo te ʼAtua tana Tāmai, kae mole ko ia totonu. Neʼe mole he temi neʼe ina ʼui ai ko ia te ʼAtua Māfimāfi. (Soane 12:49, 50) Neʼe lahi te ʼu lakaga neʼe fakahā ai e Sesu tona tuʼulaga ʼi te fakatuʼutuʼu ʼa te ʼAtua, ʼo ina ʼui neʼe fakalogo ia ki tana Tāmai. (Luka 22:41, 42; Soane 5:​19) Neʼe ko te tupuʼaga la ʼaia ʼo te ʼui fēnei e Sesu: “ ʼE lahi age te Tāmai ia te ʼau.” (Soane 14:28) Neʼe akoʼi atu koa kia koutou e takotou lotu te tuʼulaga moʼoni ʼo te ʼAtua pea mo Kilisito? Pe neʼe akoʼi atu koa ke koutou tui ko Sesu te ʼAtua Māfimāfi? ʼE fakalogo tokotou hāofaki ki takotou maʼu te fakamahino ʼaē ʼe totonu.

ʼI te faikole ʼo te ʼAliki, neʼe fakaloto mālohi e Sesu tana ʼu tisipulo ke nātou faikole fēnei: “Ke tāpuhā tou huafa.” (Mateo 6:9) ʼE lahi te ʼu Tohi-Tapu neʼe nātou pulihi te huafa ʼo te ʼAtua, ʼo nātou fetogi ʼaki te kupu “ ʼAliki.” Kae ʼi te ʼu tohi ʼāfea ʼo te “Tauhi ʼĀfea,” neʼe tuʼa ono afe tupu te hā ʼo te huafa ʼo te ʼAtua! ʼE tou lau ai ia Pesalemo 83:18: “Ke nātou ʼiloʼi ia koe, ʼaē ko tou huafa ko Sehova, ko koe tokotahi pe te Māʼoluga ʼAupito ʼi te kele katoa.” Neʼe akoʼi koa kia koutou ke koutou fakaʼaogaʼi te huafa ʼo te ʼAtua, ʼaē ko Sehova? Kapau neʼe mole akoʼi atu te faʼahi ʼaia, ʼe mole feala ke hāofaki koutou, koteʼuhi ‘ko ia ʼaē ʼe ina pāui te huafa ʼo Sehova ʼe hāo anai ia’!​—Gāue 2:​21; vakaʼi ia Soele 2:​32.

ʼAki Te Laumālie Pea Mo Te Moʼoni

Tahi ʼaē meʼa, neʼe fakaʼaogaʼi e Sesu Kilisito te Folafola ʼa te ʼAtua, te Tohi-Tapu. ʼI tana fakahā te manatu ʼa te ʼAtua ʼo ʼuhiga mo he ʼu faʼahiga manatu, neʼe ina ʼui tuʼumaʼu: “Kua tohi.” (Mateo 4:​4, 7, 10; 11:10; 21:13) Ko te po ʼi muʼa ʼo tona mate, neʼe faikole fēnei ia Sesu ʼo ʼuhiga mo tana ʼu tisipulo: “Fakamaʼoniʼoniʼi ia nātou ʼaki te moʼoni, ko tau folafola ʼe moʼoni.”​—Soane 17:17.

Ko te tahi faʼahi moʼo maʼu ʼo te hāofaki, ʼe ko te mahino ki te ʼu akonaki ʼa te Folafola ʼo te ʼAtua, te Tohi-Tapu. (2 Timoteo 3:​16) Ko te Tohi-Tapu tokotahi pe ʼaē ʼe ina tali ki te ʼu fehuʼi ohage la: Koteā te faka ʼuhiga ʼo te maʼuli? He koʼe koa neʼe fakagafua e te ʼAtua ke hoko fualoa te agakovi? Koteā ʼaē ʼe hoko ki he tahi mokā mate? ʼE fakamamahi moʼoni koa e te ʼAtua te hahaʼi ʼi he ʼifeli? Koteā te fakatuʼutuʼu ʼa te ʼAtua ʼo ʼuhiga mo te kele?a ʼE mole lelei te tauhi ʼa he tahi ki te ʼAtua mo kapau ʼe mole mahino ki te ʼu manatu ʼaia, he neʼe ʼui fēnei e Sesu: “ ʼE atolasio anai ki te Tāmai te kau atolasio moʼoni, ʼi te moʼoni mo te laumālie.”​—Soane 4:​23.

Ko Te Tui ʼe Ina Uga Ki He Gāue

Ko te hāofaki ʼe mole gata pe ki te maʼu ʼo he ʼu fakamahino. Ka hū te ʼatamai mālama ʼo ʼuhiga mo te ʼAtua ki he loto ʼe lelei, ʼe tupu ai te tui. (Loma 10:10, 17; Hepeleo 11:6) Ko te tui ʼaia ʼe ina uga ki he gāue. Ohage la, ʼe tala fēnei e te Tohi-Tapu: “Koia, koutou fakahemala mo tafoki mai ke hihiko takotou agahala, pea ʼe koutou maʼu ai he temi mokomoko mai ia Sehova.”​—Gāue 3:​19.

Ei, kapau ʼe tou loto ke hāofaki tatou, pea ʼe toe maʼuhiga foki ke tou mulimuli ki te ʼu lekula ʼa te ʼAtua ʼo ʼuhiga mo te aga ʼaē ʼe tonu ke fai. ʼAki te mālohi ʼo te Folafola ʼa te ʼAtua moʼo fetogi ʼo te maʼuli ʼo te hahaʼi, ʼe fetogi ai te ʼu aga ʼaē kua kita māhani ʼi tona fai, ohage ko te loi pea mo te agakākā, pea ʼe tou liliu ko he ʼu hahaʼi fai fakahagatonu pea mo palalau ʼaki te moʼoni. (Tito 2:​10) Ko te ʼu aga heʼeʼaoga, ohage ko te hahaʼi tagata ʼaē ʼe fai tagata, te tono, pea mo te folonikasio, ʼe līaki pea mo fetogi ʼaki he ʼu aga ʼe maʼa. (1 Kolonito 6:​9-​11) ʼE mole ko he fetogi faka temi ʼaia ʼo te aga, ʼuhi ko he meʼa neʼe tou logoʼi ʼi totatou loto, kae ʼe ko he fetogi ʼo talu ai, ʼuhi ko tatatou ako fakalelei pea mo tatatou maʼuliʼi te Folafola ʼa te ʼAtua.​—Efesi 4:​22-​24.

ʼAki te temi, ko te ʼofa ki te ʼAtua ʼe ina uga he tahi ʼe fakamalotoloto, ke ina foaki tona maʼuli katoa ki te ʼAtua pea mo ina fakahā ʼaki tana papitema. (Mateo 28:​19, 20; Loma 12:1) Ko te kau Kilisitiano ʼaē kua papitema kua nātou hāo ia mata ʼo te ʼAtua. (1 Petelo 3:​21) Lolotoga te fakaʼauha ʼaē ka ʼamanaki hoko ki te tuʼu agakovi ʼaenī, ʼe hāofaki anai nātou e te ʼAtua ʼo ina fakahāo nātou ʼi te mamahi lahi.​—Fakahā 7:​9, 14.

Te Faka ʼUhiga ʼo Te Hāofaki Kia Koutou

ʼE fakahā lelei mai ʼi te fakamahino nounou ʼaenī, ko te maʼu ʼo te hāofaki ʼe mole gata ʼaki pe te ʼui ʼaē ‘ ʼe tou tali te ʼAliki ko Sesu ʼi totatou loto.’ ʼE faka ʼuhiga ia ke tou maʼu te ʼatamai mālama ʼo ʼuhiga mo Sehova ʼAtua pea mo Sesu Kilisito, pea mo tou fai te ʼu fetogi ʼaē ʼe ʼaoga ke tou fai ʼi totatou maʼuli. ʼE lagi mata faigataʼa te fai ʼo te ʼu meʼa ʼaia, kae ʼe lotolelei te kau Fakamoʼoni ʼa Sehova ke nātou tokoni atu kia koutou ʼi takotou faiga ʼaia. ʼAki he ako Tohi-Tapu, ʼe feala ke nātou tokoni atu kia koutou ke koutou kamata haʼele ʼi te ʼu fakatuʼutuʼu ʼaē ʼe nātou taki ki te hāofaki moʼoni.b

ʼI te kua ʼamanaki hoko ʼo te ʼaho fakamāu ʼo te ʼAtua, ʼe maʼuhiga ʼaupito te fai ʼo te ʼu meʼa ʼaia! ʼE ko te temi ʼaenī ke tou mulimuli ki te palalau ʼaenī ʼa te polofeta: “ ʼI muʼa ʼo te hoko mai kia koutou te ʼaho ʼo te hāūhāū ʼo Sehova, koutou kumi ia Sehova, ia koutou fuli, ʼaē ko te kau agavaivai ʼo te kele, ʼaē neʼe koutou fai Tana tonu fakamāu. Koutou kumi te faitotonu, koutou kumi te agavaivai. Pea ʼe mahalo pe ʼe fufū anai koutou ʼi te ʼaho ʼo te hāūhāū ʼo Sehova.”​—Sofonia 2:​2, 3.

[Nota ʼi te lalo pasina]

[Talanoa ʼo te pasina 6]

ʼE Hāofaki Tatou Mo Kapau...

◻ ʼE tou maʼu te ʼatamai mālama totonu ʼo ʼuhiga mo te ʼAtua pea mo Sesu.​—Soane 17:3.

◻ ʼE tou maʼu te tui.​—Loma 10:17; Hepeleo 11:6.

◻ ʼE tou fakahemala pea mo tafoki.​—Gāue 3:​19; Efesi 4:​22-​24.

◻ ʼE tou foaki totatou maʼuli ki te ʼAtua pea mo tou papitema.​—Mateo 16:24; 28:19, 20.

◻ ʼE tou hoko tatatou fakahā tatatou tui ia muʼa ʼo te hahaʼi.​—Mateo 24:14; Loma 10:10.

[Paki ʼo te pasina 7]

Ko te ako ʼo te Tohi-Tapu, mo te maʼuliʼi ʼo te ʼu meʼa ʼaē ʼe tou ako, mo te foaki ʼo totatou maʼuli pea mo tou papitema, ʼe ko te ʼu faʼahi kehekehe ʼaia ʼaē ʼe iku ki te hāofaki