ʼE Hāofaki Tatou ʼi Te ʼu Temi Tuʼutāmakiʼia
KO TE fale laufata fā ʼi Seule, ʼi Kolea, neʼe holo fakapunamaʼuli, ʼo tanu ai te ʼu hahaʼi ʼe lauʼi teau! Neʼe gāue kinakina te ʼu hahaʼi hāofaki lolotoga ni ʼu hola moʼo hāofaki te hahaʼi tokolahi. ʼI te fakalaka ʼo te ʼu ʼaho, neʼe mole kei ʼi ai he ʼamanaki ke maʼu he tahi ʼu hahaʼi ʼi te ʼu fale ʼaē neʼe holo.
ʼI te temi pe ʼaē neʼe tonu ke fakagata ai te ʼu kumi, neʼe hoko te meʼa fakaofoofo. Neʼe nātou logo ki te kiʼi leʼo veliveli mai te ʼu kaupā ʼaē neʼe holo. Neʼe keli mālohi e te ʼu hahaʼi hāofaki moʼo tohoʼi mai ai te taʼahine e taʼu 19, neʼe nofo ai lolotoga ʼaho e 16. Ko te ascenseur ʼaē neʼe maumau neʼe ina puipui ia ia mai te ʼu kaupā ʼaē neʼe holo. Logope la neʼe kua magemage tona sino pea mo lavelavea, kae neʼe hāo ia ʼi te tuʼutāmaki ʼaia!
Ia ʼaho nei, ʼe hoko ʼi te māhina fuli te ʼu tuʼutāmaki, pe ko he mafuike, he afā, te pa ʼo he moʼuga afi, he fakaʼī, pe ko he hoge. Ko te ʼu fakamatala fakaofoofo ʼo ʼuhiga mo te ʼu hāofaki ʼaē neʼe hoko, peʼe ko te ʼu hahaʼi ʼaē neʼe hāo, ʼe punamaʼuli ai te ʼu lauʼi miliona hahaʼi ʼaē ʼe nātou sivisivi te ʼu meʼa ʼaia ʼi te ʼu tala logo. Kae ko te tokolahi ʼi te malamanei katoa, ʼe mole nātou fia logo ki te fakatokaga ʼaē ʼe fai ʼo ʼuhiga mo te tuʼutāmaki ʼaē ka ʼamanaki hoko—ko te tuʼutāmaki ʼaia ʼe mole hona fakatatau kua hoko ʼi te hisitolia ʼa te tagata. (Mateo 24:21) ʼE fakamatala fēnei e te Tohi-Tapu te meʼa ʼaia ka hoko: “Koʼeni! Ko te malaʼia ʼe hū mai te puleʼaga ki te tahi puleʼaga, pea ko te toe afā lahi ʼe malaga anai mai te ʼu potu taupotu ʼo te kele. Pea ʼe mahino ia ko te kau mate ʼa Sehova ʼi te ʼaho ʼaia ʼe leta anai mai te tahi potu taupotu ʼo te kele ʼo aʼu ki te tahi potu taupotu ʼo te kele. ʼE mole tagiʼi anai nātou, ʼe mole tānaki anai nātou, pea ʼe mole tanu anai nātou. ʼE nātou liliu anai ohage ko he meʼa fakagakokele ʼi te fuga kele.”—Selemia 25:32, 33.
ʼE fakamataku te ʼu palalau ʼaia! Kae ʼo mole hage ko te ʼu tuʼutāmaki fakakelekele pea mo te ʼu fakaʼī ʼaē ʼe hoko, ko te malaʼia ʼaia ʼe mole ina matehi anai te hahaʼi fuli. ʼI tona fakahagatonu, ʼe feala ke hāo ai te hahaʼi, ke koutou hāo ai!
Ko He Temi Maʼuhiga
Ke tou mahino katoa ki te manatu ʼaia, ʼe tonu ke tou mālama pe koʼe ʼe hoko anai te tuʼutāmaki ʼaia ʼi te malamanei katoa. ʼI tona fakahagatonu, ʼe ko te puleʼaki moʼoni pe ʼaia e tahi ki te ʼu fihifihia ʼo te malamanei. Ia ʼaho nei, ʼe tokosiʼi ia nātou ʼaē ʼe nātou logo fīmālie. Logope la te ʼu faiga lahi ʼo te hahaʼi popoto, ʼe hoko atu te mamate ʼa te hahaʼi ʼuhi ko te ʼu mahaki. ʼE mamate te hahaʼi ʼe lauʼi afe ʼi te ʼu tau ʼaē ʼe hoko ʼuhi ko te kehekehe ʼo te ʼu lotu, mo te ʼu telepi, pea mo te ʼu faʼahi faka politike. ʼE toe ʼāsili age te masiva pea mo te mamahi ʼa te hahaʼi fuli ʼuhi ko te ʼu hoge. Ko te ʼu aga ʼaē ʼe heʼeʼaoga kua fakatupu kovi ki te tafitoʼaga ʼo te sosiete; māʼia mo nātou liliki kua nātou liliu ʼo agakovi.
Kua hili kiai taʼu e 1 900, neʼe fakamatala lelei e te lea faka polofeta ʼo te Tohi-Tapu te ʼu meʼa ʼaē ʼe hoko ʼi te temi nei. ʼE ina ʼui fēnei: “ ʼE tonu ke koutou ʼiloʼi ʼi te ʼu ʼaho fakamuli ko te ʼu temi ʼe lahi ai anai te ʼu tuʼutāmaki.”—2 Timoteo 3:1, The New Testament in Modern English, by J. B. Phillips; vakaʼi ia Mateo 24:3-22.
Kia koutou ʼe ko he manatu fakapoto koa ke mole tokagaʼi e te ʼAtua ʼofa tatatou ʼu mamahi? ʼE ʼui fēnei e te Tohi-Tapu: “Ko ia te ʼAtua moʼoni, Ia ia ʼaē neʼe ina faʼu te kele, pea mo ina fakatupu, . . . neʼe mole ina fakatupu noa, neʼe [ina] faʼu ke nofoʼi.” (Isaia 45:18) Ei, ʼe mole tuku anai e te ʼAtua ke maumauʼi te kele matalelei ʼaenī, pea ke mamate te hahaʼi fuli, kae ʼe ina fai anai he meʼa. ʼE tou lagaʼi te fehuʼi ʼaenī, ʼE ina fakahoko feafeaʼi anai te faʼahi ʼaia?
Koutou Filifili Te Maʼuli!
ʼE tali fēnei e te Tohi-Tapu ia Pesalemo 92:7: “ ʼE homo ake te hahaʼi agakovi ohage ko te lauʼakau, pea mo tutupu ia nātou ʼaē ʼe nātou fai te ʼu meʼa kovi, ke molehi nātou ʼo talu ai.” Ko te puleʼaki ʼa te ʼAtua ki te ʼu fihifihia ʼo te malamanei ʼe ko te pulihi ʼo te agakovi. Meʼa fakafiafia foki, ʼe mole faka ʼuhiga leva ʼe molehi anai te hahaʼi fuli. ʼE fakapapau mai kia tatou ia Pesalemo 37:34: “Falala kia Sehova pea mo taupau tona ala, pea ʼe ina hikihiki anai koe ke ke maʼu te kele. Ka toʼo kehe anai te hahaʼi agakovi, ʼe ke sio anai kiai.”
ʼE fakahā e te ʼu palalau ʼaia ʼe feala ke hāofaki tatou ʼi te tuʼutāmaki lahi ʼaē ʼe ʼamanaki hoko mai ki te malamanei. ʼE tuku mai e te ʼAtua ke tou filifili. Ko te ʼu palalau ʼaē neʼe fakaloto mālohiʼi ʼaki e Moisese te kau Iselaelite ʼi tanatou ʼamanaki ke nātou hū ki te Kele ʼo Te Fakapapau, ʼe toe fai kia tatou ia ʼaho nei: “Neʼe ʼau tuku atu ki ʼou muʼa te maʼuli pea mo te mate, te tapuakina pea mo te malaʼia, pea ʼe tonu ke ke fili te maʼuli ke feala ai hau maʼuli, ia koe pea mo tou hōloga.” (Teutalonome 30:19) Kae ʼe lava feafeaʼi ki he tahi ke ina “fili te maʼuli” pea mo hāo ai? ʼI tona fakahagatonu, koteā te faka ʼuhiga ʼo te hāofaki moʼoni?
[Haʼuʼaga ʼo te paki pasina 3]
Yunhap News Agency/Sipa Press