He Koʼe ʼe Tonu Ke Fakahoko Takotou ʼu Fakapapau?

NEʼE ʼui fēnei e Bernard Baruch, te tagata fai tokoni fakamuli ʼo te pelesita Amelika: “Koutou vote maʼa te tagata ʼaē ʼe mole lahi tana ʼu fakapapau; heʼe mole lahi anai takotou lotomamahi ia ia.” ʼI te mālama ʼo te temi ʼaenī, ʼe ʼasi mai ai ko te ʼu fakapapau ʼaē ʼe fai ʼe mole fakahoko anai ia. ʼE lagi ko te ʼu fakapapau ʼaē ʼe fai ʼi te ʼohoana, te ʼu fakatuʼutuʼu ki he gāue, peʼe ko te ʼu fakapapau ʼaē ke kita fakaʼaogaʼi he temi lahi mo te fānau. ʼE mole kei ʼiloʼi e te tokolahi te faka ʼuhiga ʼo te tākuga ʼaenī: “ ʼE lelei he tagata mokā ina fakahoko tana ʼu fakapapau.”

ʼE mahino papau ia ʼe tokolahi te hahaʼi ʼe mole nātou fakahoko tanatou ʼu fakapapau. Ko ʼihi hahaʼi neʼe nātou fai te ʼu fakapapau kae neʼe mole nātou fakakaukauʼi, ʼo mole feala ke nātou fakahoko, peʼe mole nātou fakahoko heʼe faigafua age te faʼahi ʼaia kia nātou.

ʼE moʼoni ʼe feala ke faigataʼa te fakahoko ʼo he fakapapau mokā hoko mai he ʼu ʼaluʼaga neʼe mole tou ʼamanaki kiai. Kae ʼe kovi moʼoni koa te mole fakahoko ʼo takotou fakapapau? ʼE tonu koa ke koutou fakakaukauʼi lelei te ʼu fakapapau ʼaē ʼe koutou fai? Kapau ʼe tou vakaʼi fakanounou te faʼifaʼitaki ʼa Sehova ʼAtua, pea ʼe tokoni anai kia tatou ke tou ʼiloʼi pe koʼe ʼe tonu ke tou fakakaukauʼi lelei te faʼahi ʼaia.

ʼE Fakahoko e Sehova Tana ʼu Fakapapau

ʼE tou tauhi ki he ʼAtua ʼaē ʼe faka ʼuhiga tona huafa ki te fakahoko ʼo tana ʼu fakapapau. ʼI te ʼu temi faka Tohi-Tapu, neʼe tautau fakahā e te higoa ia te ʼuhiga ʼo he tahi. ʼE toe moʼoni te faʼahi ʼaia ki te huafa ko Sehova, ʼaē ko tona faka ʼuhiga “ ʼE Ina Fakahoko.” Koia ʼe fakahā e te huafa ʼo te ʼAtua, ʼe ina fakahoko anai tana ʼu fakapapau pea mo tana ʼu fakatuʼutuʼu.

ʼO mulimuli ki te faka ʼuhiga ʼo tona huafa, neʼe fakahoko e Sehova te ʼu fakapapau fuli ʼaē neʼe ina fai ki te puleʼaga ʼo Iselaele ʼo te temi muʼa. ʼO ʼuhiga mo tana ʼu fakapapau ʼaia, neʼe ʼui fēnei e te Hau ko Salomone: “Ke vikiʼi ia Sehova, ʼaē neʼe ina foaki he mālōlōʼaga ki tana hahaʼi ko Iselaele, ʼo mulimuli kia meʼa fuli ʼaē neʼe ina fakapapauʼi. Neʼe mole he folafola neʼe hala mo hoko ʼi tana fakapapau lelei ʼaē neʼe ina fai ʼaki ia Moisese tana tagata kaugana.”​—1 Hau 8:​56.

Mai tona ʼuhiga ʼaē ʼe feala ke tou falala kia Sehova, koia neʼe lava ʼui ai e te ʼapositolo ko Paulo: “I te temi nee fai ai e te Atua tana fuakava kia Apalahamo, nee mole he tahi e maolugaʼage ia te ia ke fuakava ki ai, pea nee fuakava’pe kia te ia.” (Hepeleo 6:​13) ʼE moʼoni, ko te huafa ʼo Sehova pea mo tona ʼulugaaga ʼe ko he fakamoʼoni ʼaia ʼe ina fakahoko anai tana ʼu fakapapau, tatau aipe peʼe fakamaʼua kia te ia he ʼu meʼa ʼe faigataʼa. (Loma 8:​32) Mai tona ʼuhiga ʼaē ʼe fakahoko e Sehova tana ʼu fakapapau, koia ʼe tou maʼu ai he ʼamanaki, ʼe ko he taula ki totatou nefesi, peʼe ki totatou maʼuli.​—Hepeleo 6:​19.

Te ʼu Fakapapau ʼa Sehova Pea Mo Totatou Ka Haʼu

Ko tatatou ʼamanaki, mo tatatou tui, pea mo totatou maʼuli katoa ʼe fakalogo ki te fakahoko e Sehova tana ʼu fakapapau. Koteā te ʼamanaki ʼaē ʼe tou maʼu? “O hage ko tana fakapapau [mai e te Atua], e tou amanaki ki he lagi foou mo he kele foou, e mauli i ai te susitisia.” (2 Petelo 3:​13) Pea ʼe toe foaki mai e te Tohi-Tapu he tafitoʼaga ke tou tui ai ki “te tuuake a te agatonu mo te agahala.” (Gaue 24:15) Pea ʼe feala ke tou tui papau ʼe ʼi ai te tahi meʼa ʼe laka age ʼi te maʼuli ʼo te temi ʼaenī. Ei, ko te meʼa ʼaē ʼe fakahigoaʼi e te ʼapositolo ko Soane ko “te fakapapau nee ina fai,” ʼe ko “te mauli heegata.” (1 Soane 2:​25) Kae ko te ʼu fakapapau ʼaē ʼe fai e Sehova ʼi tana Folafola, ʼe mole hoki hoko pe anai ʼi te ka haʼu. Heʼe ʼi temi nei ʼe ʼi ai tona ʼu fua ki totatou maʼuli.

Neʼe hiva fēnei te tagata fai pesalemo: “ ʼE ōvi ia Sehova kia nātou fuli ʼaē ʼe fetapā kia te ia, . . . pea ʼe logo anai ki tanatou paui ʼaē ʼo kumi tokoni.” (Pesalemo 145:18, 19) ʼE toe fakapapau mai e te ʼAtua kia tatou “ ʼe ina foaki te mālohi kia ia ʼaē kua gaʼegaʼe; pea ʼe ina fakatuputupu te mālohi ia ia ʼaē ʼe mole kei mālohi.” (Isaia 40:29) Pea ʼe ko he meʼa fakaloto fīmālie tatatou ʼiloʼi ʼaē, ‘e mole fakagafua anai e te ʼAtua ke lahiʼage totatou fakahalaʼi i te mea e tou lavaʼi, kae e ina tuku mai anai fakatahi mo te fakahala te faigamalie ke tou hao ai pea mo te malohi ke tou faa tali’! (1 Kolonito 10:13) Kapau neʼe kua hoko kia kita he fakapapau ʼi te ʼu fakapapau ʼaia ʼa Sehova, pea ʼe tou ʼiloʼi ai ʼe feala ke tou falala katoa kia te ia. Mai tona ʼaluʼaga ʼaē ʼe tou maʼu he ʼu fua lelei he neʼe fai e te ʼAtua pea mo ina fakahoko tana ʼu fakapapau, koia ʼe tonu ke feafeaʼi ʼo ʼuhiga mo te ʼu fakapapau ʼaē ʼe tou fai kia te ia?

Tou Fakahoko Tatatou ʼu Fakapapau Ki Te ʼAtua

ʼE mahino papau ia, ko te foaki ʼo totatou maʼuli ki te ʼAtua ʼe ko te fakapapau maʼuhiga ʼaia neʼe tou fai. ʼI te faʼahi ʼaia, neʼe tou fakahā ai tatatou fia tauhi ʼaē kia Sehova ʼo talu ai. Logope la ʼe mole mamafa te ʼu fakatotonu ʼa te ʼAtua, kae ʼi ʼihi temi ʼe lagi faigataʼa tatatou fai ia tona finegalo, ʼuhi ko tatatou maʼuli ʼi te tuʼu ʼo te ʼu faʼahiga meʼa agakovi ʼaenī. (2 Timoteo 3:​12; 1 Soane 5:3) Kae, ʼi tatatou kua ‘kapa ki te saliote fulihi-kele’ pea mo liliu ko ni ʼu kaugana kua foaki tonatou maʼuli kia Sehova pea mo ni ʼu tisipulo ʼo tona ʼAlo, ko Sesu Kilisito, ʼe mole tonu ke tou toe sio ki muli, ki te ʼu meʼa ʼo te mālama ʼaē neʼe tou līaki.​—Luka 9:​62.

Ka tou faikole kia Sehova, ʼe feala ke tou fakapapau age kia te ia ʼe tou faiga anai ke tou tauʼi he vaivaiʼaga, ke tou maʼuliʼi he kalitate faka Kilisitiano, peʼe ke tou hikihiki he agaaga ʼo tatatou gāue faka teokalatike. Koteā ʼaē ka tokoni anai kia tatou ke tou fakahoko te ʼu fakapapau ʼaia?​—Vakaʼi ia Tagata Tānaki 5:​2-5.

Ko te ʼu fakapapau moʼoni ʼe fai ʼaki te loto pea mo te ʼatamai. Koia, tou fakahoko te ʼu fakapapau ʼaē neʼe tou fai kia Sehova, ʼo tou avahi totatou loto kia te ia ʼi te faikole, ʼo tou fakahā fakahagatonu age te ʼu meʼa ʼaē ʼe tou tuʼania kiai, te ʼu meʼa ʼaē ʼe tou loto kiai, pea mo tatatou ʼu vaivaiʼaga. Ko tatatou faikole ʼo ʼuhiga mo te fakapapau ʼaē neʼe tou fai, ʼe ina fakamālohi anai tatou ke tou fakahoko. ʼE feala ke tou faka ʼuhiga tatatou ʼu fakapapau ʼaē neʼe tou fai ki te ʼAtua ohage ko he ʼu maʼua ʼe tonu ke tou huʼi. Kapau ʼe mamafa te maʼua ʼaia, pea ʼe tonu ke huʼi māmālie. ʼO toe feiā pe, ʼe lahi te ʼu fakapapau ʼe tou fai kia Sehova ʼe ʼaoga kiai he temi moʼona fakahoko. Kae kapau ʼe tou foaki tuʼumaʼu kia te ia te meʼa ʼaē ʼe tou lavaʼi, pea ʼe tou fakahā ai ʼe tou fai te meʼa ʼaē neʼe tou fakapapau, pea ʼe ina tapuakinaʼi anai tatou.

ʼE feala ke tou fakahā ʼe maʼuhiga kia tatou te ʼu fakapapau ʼaē neʼe tou fai, ʼo tou faikole tuʼumaʼu ʼo ʼuhiga mo te faʼahi ʼaia, lagi ʼi te ʼaho fuli pe. ʼE ko he fakahā ʼaia ki tatatou Tāmai ʼi selo ʼe tou fakamalotoloto. Tahi ʼaē, ʼe tou manatuʼi tuʼumaʼu anai te ʼu fakapapau ʼaia. Neʼe tuku mai e Tavite te faʼifaʼitaki lelei ʼo ʼuhiga mo te faʼahi ʼaia. Neʼe hiva ʼo ina kole mamahi fēnei kia Sehova: “Logo mai, Ê ʼAtua, taku tagi mamahi. Tokagaʼi taku faikole . . . ʼE ʼau fai anai he ʼu hiva ki tou huafa ʼo talu ai, ke ʼau fakahoko taku ʼu fakapapau ʼi te ʼaho mo te po.”​—Pesalemo 61:​1, 8.

Ko Te Fakahoko ʼo Tatatou ʼu Fakapapau ʼe Tuputupu Ai Tatatou Falala

Kapau ʼe mole tou meʼa noaʼi te ʼu fakapapau ʼaē ʼe tou fai ki te ʼAtua, pea ʼe tonu ke toe feiā ʼo ʼuhiga mo te ʼu fakapapau ʼaē ʼe tou fai ki totatou ʼu kaumeʼa Kilisitiano. ʼE mole tonu ke kehe tatatou aga kia Sehova pea mo kehe tatatou aga ki totatou ʼu tēhina. (Vakaʼi ia 1 Soane 4:​20.) ʼI tana Akonaki ʼi te Moʼuga, neʼe ʼui fēnei e Sesu: “Kapau e ke ‘io’ pea e ‘io’, pea kapau e ‘kailoa’, pea e ‘kailoa.’ ” (Mateo 5:​37) Kapau ʼe tou fakamoʼoni ʼe feala ke nātou falala kia tatou, pea ʼe ko he ʼaluʼaga ʼaia moʼo ‘fai ia te lelei ki te kaiga o te tui.’ (Kalate 6:​10) ʼE tuputupu ia te falala mokā tou fakahoko tatatou ʼu fakapapau fuli.

ʼE lahi age te ʼu tokakovi ʼi te mole fakahoko ʼo he fakapapau ʼe pipiki kiai te paʼaga. Tatau aipe peʼe ko he maʼua neʼe tou kole, peʼe ko he gāue ʼe tonu ke tou fai, peʼe ko he felogoi ʼi te faʼahi fakakoloa, kae ʼe tonu ki te Kilisitiano ke ina fakahoko tana fakapapau. ʼE fiafia ai te ʼAtua pea ʼe mālohi ai tatatou fefalalaʼaki, pea ʼe ko he faʼahi ʼe maʼuhiga mo kapau ʼe loto e te ʼu tēhina ke nātou “nonofo fakatahi ʼi te logo tahi!”​—Pesalemo 133:1.

Kae ko te mole fakahoko ʼo te ʼu fakapapau ʼe feala ke fakatupu mamahi ki te kokelekasio pea mo nātou ʼaē neʼe fai ki ai te fakapapau. ʼE ʼui fēnei e te tēhina taupau feʼaluʼaki: “ ʼI te agamāhani, ʼe ʼiloʼi e te hahaʼi te ʼu tokakovi ʼaē ʼe hoko ʼo ʼuhiga mo he gāue​—ʼi ʼihi temi ʼe tupu ko te mole fakahoko e he tahi te fakapapau ʼaē neʼe ina fai. ʼE tupu ai te mole kei felogoi ʼa te ʼu tēhina, pea mo te tokakovi ʼa te kokelekasio.” ʼE maʼuhiga ʼaupito ke tou fakakaukauʼi fakalelei te ʼu fakapapau fuli ʼaē ʼe tou fai pea mo tohi ki he moʼi pepa!a

ʼE tonu ke tou tokakaga lelei mokā tou fakatau he ʼu meʼa ʼe totogi kovi, peʼe ka tou ʼui ki he tahi ke ina faka paʼaga he matani gāue ke ina maʼu ai hona tupu, tāfito la mokā ʼe tou maʼu he falā ʼi te ʼu meʼa ʼaia. ʼE toe ʼaoga ke tou tokakaga lelei ke ʼaua naʼa tou fakalahi fau te ʼu lelei ʼaē ʼe feala ke ina maʼu ʼaki he faʼahiga meʼa peʼe ko he ʼu faitoʼo, peʼe tou fakapapau ʼe lahi anai te tupu ʼaē ka ina maʼu ʼaki te falā ʼaē neʼe ina faka paʼaga ʼaki he matani gāue. ʼE ko te ʼofa ʼaē ʼe tonu ke ina uga he Kilisitiano ke ina fakamahino te ʼu tuʼutāmaki fuli ʼaē ʼe feala ke hoko. (Loma 12:10) Mai tona ʼaluʼaga ʼaē ʼe tokolahi te ʼu tēhina ʼaē ʼe mole nātou mahino lelei ki te ʼu meʼa faka paʼaga, koia ʼe nātou falala anai ki te ʼu tokoni ʼaē ka tou fai age, ʼuhi ko tatatou fakatahi mo nātou ʼi te tui. ʼI meʼa fakaʼofaʼofa foki mo kapau ʼe maumauʼi te falala ʼaia!

ʼI totatou ʼuhiga Kilisitiano, ʼe mole ko he aga lelei ke tou kākāʼi te hahaʼi, peʼe tou meʼa noaʼi te ʼu meʼa ʼaē ka hoko kia nātou. (Efeso 2:​2, 3; Hepeleo 13:18) Kapau ʼe tou loto ke tali tatou e Sehova ‘ ʼi tona falelā,’ pea ʼe mole tonu ke tou aga fakakākā. ‘Tatau aipe pe neʼe tou fakapapau he meʼa ʼe feala ai ke fua kovi kia tatou, kae ʼe mole tou toe fetogi.’​—Pesalemo 15:​1, 4.

Neʼe fakapapau e te tui fakamāu ko Sefeteo, kapau ʼe tuku e Sehova ke mālo ʼi te kau Amonite, pea ʼe ina foaki faka mōlaga anai kia Sehova ia ia ʼaē ka ʼuluaki hū mai ki tuʼa ʼo fetaulaki mo ia, mokā toe liliu mai te tau. Neʼe ko te tamasiʼi ʼulu tokotahi ʼa Sefeteo ʼaē neʼe ʼuluaki hū mai ki tuʼa. Neʼe tali ia te faʼahi ʼaia e tona ʼofafine ʼaki tona loto katoa, pea neʼe foaki ai e Sefeteo tona ʼofafine ke tauhi ʼi tona maʼuli katoa ʼi te sagatualio ʼa te ʼAtua​—pea ʼe mahino ia neʼe ko he sakilifisio fakaloto mamahi pea mo maʼuhiga ʼaia neʼe ina fai.​—Kau Fakamāu 11:30-​40.

ʼE ko te ʼu tēhina taupau ʼo te kokelekasio ʼaē ʼe maʼua tāfito ke nātou fakahoko tanatou ʼu fakapapau. ʼO mulimuli kia 1 Timoteo 3:2, ko te tagata taupau ʼe tonu ke “hee mele.” ʼE ko te fakaliliu ʼaia ʼo te kupu faka Keleka, ʼaē ko tona faka ʼuhiga “ ʼe mole feala ke maʼutokā ʼe ʼi ai hana hala, ʼe mole hana hala, . . . ” “Ko tona faka ʼuhiga ke lelei tona matagafua, pea ʼe tau mo ia te faʼahi ʼaia.” (A Linguistic Key to the Greek New Testament) Mai tona ʼaluʼaga ʼaē ʼe tonu ke heʼe mele te tēhina taupau, koia ʼe feala ke tou falala tuʼumaʼu ki tana ʼu fakapapau.

Te Tahi ʼu Faʼahiga Fai Moʼo Fakahoko Tatatou ʼu Fakapapau

E feafeaʼi ʼo ʼuhiga mo te ʼu fakapapau ʼaē ʼe tou fai ki te ʼu hahaʼi ʼaē ʼe mole ʼi te moʼoni? Neʼe ʼui fēnei e Sesu: “Ke huhulu feia toutou malama ia mua o te hahai, koteuhi ke natou mamata ki autou gaue lelei pea e natou fakakololia ki tautou Tamai i Selo.” (Mateo 5:​16) Kapau ʼe tou fakahā ʼe tou fakahoko tatatou ʼu fakapapau, pea ʼe feala ai ke fia logo te hahaʼi ki te logo ʼaē ʼe tou faka mafola. Logope la kua hifohifo te agatonu ʼi te mālama, kae ʼe kei maʼuhiga te faʼahi ʼaia ki te tokolahi. Ko te fakahoko ʼo tatatou ʼu fakapapau ʼe ko he fakahā ʼaia ʼe tou ʼofa ki te ʼAtua pea mo tatatou kaiga, pea ʼe leleiʼia tatou e te hahaʼi ʼaē ʼe ʼoʼofa ki te faitotonu.​—Mateo 22:36-​39; Loma 15:2.

Lolotoga te taʼu gāue 1998, neʼe fakaʼaogaʼi e te kau Fakamoʼoni ʼa Sehova ia hola e tahi miliale tupu moʼo tala ki te hahaʼi te logo lelei ʼo te Puleʼaga ʼa te ʼAtua. (Mateo 24:14) ʼE lagi feala, ʼi tatatou fale gāue peʼe ʼi he tahi age faʼahi, ke mole fia fakalogo te hahaʼi ki te fai faka mafola ʼaia he neʼe mole tou fakahoko tatatou ʼu fakapapau. Mai tona ʼaluʼaga ʼaē ʼe tou fakafofoga te ʼAtua moʼoni, koia ʼe ʼamanaki ai e te hahaʼi ke tou agatonu. Kapau ʼe mole tou aga fakakākā pea mo tou agatonu, ʼe tou “fakaʼalialikiʼi ai, i te meafuape, te akonaki a te Atua, totatou Fakamauli.”​—Tito 2:​10.

ʼI tatatou minisitelio, ʼe tou maʼu te ʼu faigamālie ke tou fakahoko tatatou ʼu fakapapau, mokā tou toe liliu ʼo ʼaʼahi te hahaʼi ʼaē ʼe fia logo ki te logo ʼo te Puleʼaga. Kapau ʼe tou ʼui age ki he tahi ʼe tou toe liliu age anai, ʼe tonu ke tou fakahoko. Ko tatatou toe liliu ʼaia ohage ko tatatou fakapapau ki ai, ʼe ko he fakahā ʼaia ‘ ʼe mole tou fakafisi te lelei kia nātou ʼaē ʼe tonu ke fai kiai.’ (Tāʼaga Lea 3:​27) Neʼe fakamahino fēnei e te tuagaʼane: “Neʼe tuʼa lahi taku fetaulaki mo he ʼu hahaʼi neʼe nātou fia ʼiloʼi te moʼoni pea neʼe nātou ʼui mai neʼe fakapapau age e te Fakamoʼoni ʼe toe liliu age anai kae neʼe mole toe liliu ia. ʼE ʼau ʼiloʼi ʼe feala ke mole maʼu atu te hahaʼi ʼi tonatou loto fale, peʼe lagi hoko he ʼu ʼaluʼaga ʼe mole feala ai ke tou toe ʼaʼahi ai nātou. Kae ʼe mole ʼau loto ke ʼui e he tahi te meʼa ʼaia ʼo ʼuhiga mo ʼau, koia ʼe ʼau faiga mālohi ke ʼau toe ʼalu ʼo ʼaʼahi t e hahaʼi. ʼE ʼau ʼiloʼi kapau ʼe lotomamahi he tahi kia ʼau, pea ʼe fua kovi anai kia Sehova pea mo toku ʼu tēhina fuli.”

ʼI ʼihi ʼaluʼaga, ʼe mole lagi tou fia liliu ʼo fai te ʼaʼahi, heʼe tou manatu ʼe mole ina fia ʼiloʼi moʼoni te logo. ʼE toe fakamahino fēnei e te tuagaʼane ʼaia: “ ʼE mole ʼau fia fakamāuʼi ia nātou ʼaē ʼe nātou fia ʼiloʼi te moʼoni. ʼAki te meʼa ʼaē neʼe hoko kia ʼau, neʼe ʼau ako ai ko tatatou ʼu ʼuluaki manatu ʼe hala. Koia ʼe ʼau faiga ke lelei taku manatu, ʼo ʼau faka ʼuhiga ko te hahaʼi takitokotahi ʼaia ʼe feala ke nātou liliu ko he ʼu tēhina peʼe ko he ʼu tuagaʼane.”

ʼI te minisitelio faka Kilisitiano pea ʼi te tahi ʼu faʼahi, ʼe tonu ke tou fakahā ki te hahaʼi ʼe feala ke nātou falala ki te ʼu fakapapau ʼaē ʼe tou fai. ʼE moʼoni, ʼe faigafua age hakita palalau ʼi hakita fai te meʼa ʼaia. Neʼe tohi fēnei e te tagata poto: “Ko he ʼu tagata kaugamālie ʼe nātou tahi tala anai tona lotoʼofa, kae ko he tagata agatonu, ko ai ʼaē ʼe feala ke ina maʼu?” (Tāʼaga Lea 20:6) Kapau ʼe tou loto moʼoni kiai, pea ʼe feala ke tou agatonu pea ke tou fakahoko moʼoni te ʼu meʼa ʼaē ʼe tou fakapapau.

Te ʼu Tapuakina Lahi ʼo Te ʼAtua

ʼE ko he aga kākā te fai ʼo he fakapapau kae mole fakahoko, pea ʼe hage ko he tohi ʼo he seki kae mole he falā ʼi te fale paʼaga. ʼE lahi te ʼu fakapale pea mo te ʼu tapuakina ʼe tou maʼu mo kapau ʼe tou fakahoko tatatou ʼu fakapapau! ʼE tapuakina tatatou agatonu heʼe tou maʼu he leʼo ʼo loto ʼe lelei. (Vakaʼi ia Gaue 24:16.) ʼE mole tou lotohoha anai kae ʼe tou fiafia anai pea mo tokalelei. Tahi ʼaē meʼa, kapau ʼe tou fakahoko tatatou ʼu fakapapau, pea ʼe tou lagolago ki te logo tahi ʼi te kokelekasio, ʼaē ʼe fakalogo ki tatatou fefalalaʼaki. Tahi ʼaē meʼa, ko tatatou “folafola o te mooni” ʼe ina fakahā ko tatou ko he kau minisi ʼo te ʼAtua moʼoni.​—2 Kolonito 6:​3, 4, 7.

ʼE fakahoko e Sehova te ʼu meʼa ʼaē ʼe ina ʼui, pea ʼe fehiʼa “ki te ʼalelo ʼaē ʼe loi.” (Tāʼaga Lea 6:​16, 17) Ka tou faʼifaʼitakiʼi tatatou Tāmai ʼaē ʼi selo, pea ʼe tou fakaōvi ai kia te ia. Ei, ʼe tonu ke tou fakahoko tatatou ʼu fakapapau.

[Nota ʼi te lalo pasina]

[Paki ʼo te pasina 10]

Neʼe fakahoko e Sefeteo tana fakapapau, logope la neʼe ko he meʼa fakaloto mamahi kia ia

[Paki ʼo te pasina 11]

Kapau neʼe koutou fakapapau ke koutou liliu ʼo fai te ʼaʼahi, pea koutou teuteuʼi lelei