Ko He Pilivilesio Maʼa Nātou Liliki
1 Ko te tokolahi ʼo nātou ʼaē kua maʼu fānau ʼi te temi nei, ʼe nātou manatuʼi fakafiafia te pilivilesio neʼe nātou maʼu ʼi tanatou kei liliki ʼi te moʼoni—Te ʼAho ʼo Te ʼu Nusipepa. Neʼe fakatuʼutuʼu te gāue ʼaia ʼi te ʼu kokelekasio fuli ʼi te taʼu 1949. Ko te ʼaho e tahi ʼi te vāhaʼa, neʼe tonu ai ki te ʼu kokelekasio fuli ke nātou kau tāfito ki te tufa ʼo Te Tule Leʼo pea mo te Réveillez-vous !, ʼi te ʼu ala, ʼi te ʼu ʼapi, ʼi te ʼu fale koloā, pea ʼi te tahi ʼu faʼahiga ʼaluʼaga. Neʼe fakaʼamu tāfito ia nātou liliki ke nātou kau ki te gāue ʼaia, he neʼe ko he fealagia ʼaia ke nātou gāue fakatahi mo te hahaʼi lalahi ʼo te kokelekasio. Neʼe koutou fai koa te gāue ʼaia ʼi takotou kei liliki?
2 Fakakau Kiai Takotou Fānau: ʼO feiā mo nātou ʼaē kei liliki ʼosi, ʼaē mole heʼeki feala ke nātou kamata he fai palalau faka Tohi-Tapu, ʼe feala ke nātou tufa te ʼu nusipepa. ʼE tonu anai ke nātou ako he ʼu kiʼi palalau faigafua, pea mo nounou. ʼE lagi feʼauga pe anai ke nātou palalau fakanounou ki te paki ʼo te takafi ʼo te nusipepa. Ko te tokolahi ʼo te hahaʼi, ʼe nātou tali lelei te ʼu nusipepa ʼaē ʼe ʼavage e nātou liliki, pea ʼi te agamāhani ʼe nātou vikiʼi te fakamalotoloto pea mo te aga lelei ʼo te ʼu kiʼi tamaliki liliki ʼaia. Kapau ʼe tou tokoni lelei kia nātou, pea ʼe feala ke fai lelei te gāue ʼaia e te fānau, pea mo nātou tokoni lelei ki te faka mafola ʼo te logo ʼo te Puleʼaga. ʼE mahino ia, ʼi te lahilahi ake ʼo te fānau, ʼe fia tokoni anai tanatou ʼu mātuʼa ke nātou hikihiki te gāueʼi ʼo tonatou ʼu fealagia ʼi te faka mafola.
3 Ko Manuel neʼe kamata faka mafola ʼi te ʼu ʼapi, ʼi tona taʼu tolu. Neʼe akoʼi ia ia e tana ʼu mātuʼa ke ina maʼu loto te ʼu kiʼi palalau nounou. ʼAki he faʼafai, ʼe faka mafola mo nāua, ʼo ina tufa te tuʼuga nusipepa, mo te ʼu kaupepa, pea mo te ʼu kiʼi pepa lotu. Tahi ʼaē meʼa, ʼe kau ki te faka mafola faigamālie. ʼI te tahi ʼaho, neʼe ʼalu mo tana ʼu mātuʼa ʼo haʼele ʼi te koga meʼa ʼe gaoʼi ai te kau tamaliki, pea neʼe ina tufa te ʼu kiʼi pepa lotu ki te hahaʼi ʼaē neʼe mālōlō ai. Logola tana kei veliveli, kae ko te lotomālohi ʼa Manuel ki te minisitelio, ʼe ko he fakaloto mālohi moʼoni ʼaia ki tana ʼu mātuʼa, pea mo te kokelekasio katoa.—Taag. 22:6.
4 ʼI te Kaletalio 2000 ʼo te kau Fakamoʼoni ʼa Sehova, kua fakatuʼutuʼu te Moeaki fuli, ko te “ ʼAho ʼo Te ʼu Nusipepa.” ʼU mātuʼa, ʼe mātou fakaloto mālohiʼi koutou ke koutou toe holi mālohi ki te gāue ʼaia, ʼo koutou tokoni ki takotou ʼu fānau ke nātou kau tuʼumaʼu, kapau ʼe feala, ki te pilivilesio ʼaia ʼo te gāue.